Diri nawawara an gugma han mag-asawa nga natahod ha kada tagsa bisan kon may diri hira ginkakauyonan. “Ginlilikyan hini nga mga mag-asawa an mga sitwasyon nga diri gud hira nagkakauyon,” siring han libro nga Ten Lessons to Transform Your Marriage. “Lugod, ira gin-iistoryahan an ira mga diri pagkasinabtanay. Matinalahuron nga namamati hira ha opinyon han ira padis ngan namimiling hin solusyon nga makakaopay ha ira nga duha.”

PRINSIPYO HAN BIBLIA: “An gugma . . . diri nagbibiling han kalugaringon la nga kaopayan.”—1 Corinto 13:4, 5.

“An pagrespeto ha akon asawa nangangahulogan nga gin-aapresyar ko hiya ngan diri ako magbubuhat hin bisan ano nga makakadaot ha iya o ha amon pag-asawa.”—Micah.

Kon waray pagtahod, an pag-istorya han mag-asawa mahimo magin puno hin pagtamay, panginsulto, ngan pagpakaraot pa ngani—mga sinyales nga magtutugway ha pagbulag, sumala ha mga parasaliksik.

“An nakakaminos nga mga pulong, pagpinabati, o mga intremes mahitungod han imo asawa makakadaot han iya kompyansa, makakawara han iya pagtapod, ngan makakaguba han iyo pag-asawa.”—Brian.

SARIHI AN IMO KALUGARINGON

Ha sulod hin usa ka semana, obserbari an iyo pag-istorya ngan pagtratar ha kada tagsa. Katapos, pakianhi an imo kalugaringon:

• ‘Mationan-o kaagsob nga ginpakaraot ko an akon padis, ngan mationan-o kaagsob nga gintagan ko hiya hin kumendasyon?’

• ‘Ha ano nga espisipiko nga mga paagi iginpakita ko an akon pagtahod ha akon padis?’

IPAKIISTORYA HA IMO ASAWA

• Ano nga mga pulong ngan mga buhat an makakabulig ha kada tagsa ha iyo nga umabat nga ginrirespeto niyo an kada usa?

• Ano nga mga pulong ngan mga buhat an nakakawara han pag-abat nga ginrirespeto ka han imo padis?

SUHESTYON

• Igsurat an tulo nga paagi kon paonan-o mo karuyag nga tahuron ka. Ipabuhat liwat ini ha imo asawa. Pagbalyoay kamo han iyo iginsurat ngan pangalimbasugi nga pauswagon an iyo pagpakita hin pagtahod ha bahin nga iyo iginsurat.

• Ilista an mga kalidad nga naruruyagan mo ha imo padis. Katapos, sumati hiya nga gin-aapresyar mo gud ito nga mga kalidad.

“An pagrespeto ha akon bana nangangahulogan nga iginpapakita ko ha akon buhat nga ginpapabilhan ko hiya ngan karuyag ko nga malipay hiya. Diri ito pirme pinaagi hin dagku nga buhat, kondi usahay bisan la ha gudti nga akon nahihimo.”—Megan.

Ha pagkamatuod, an isyu diri an pag-abat nga gintatahod ka o diri, kondi kon inaabat ba han imo padis nga ginrirespeto mo hiya.

PRINSIPYO HAN BIBLIA: “Pagsul-ot kamo han malumo nga pagpalangga nga may pagpaid, pagkabuotan, pagkamapainubsanon, pagkamalumo, ngan pagkapasensyoso.”—Colosas 3:12.