Kon diri kita makikig-upod ha mga tawo nga ginhuhunahunaan naton hin negatibo, magduduro la an aton pagdiskriminar ha ira. Ngan kon makikigsangkay la kita ha aton mga kapariho, posible hunahunaon naton nga an aton panhunahuna, inaabat, ngan panggawi, amo la an husto.

“Abrihi niyo hin haluag an iyo kasingkasing.”​—2 CORINTO 6:13.

Ano an karuyag sidngon hito? An “kasingkasing” mahimo magtudlok han aton emosyon ngan pagbati. Kon an aton la ginhihigugma adton mga tawo nga kapariho naton, mawawarayan hin lugar an iba ha aton kasingkasing. Basi malikyan ito nga problema, kinahanglan magin andam kita pakigsangkay ha mga tawo nga iba ha aton.

Samtang mas nakikilala naton an iba, mas nasasabtan naton kon kay ano nga naiiba hira. Ngan samtang mas nagigin duok kita ha ira, diri na naton nahuhunahuna nga iba hira ha aton. Nagigin importante hira ha aton, ngan mas nakakagpakita kita hin empatiya ha ira.

Tagda an ehemplo ni Nazaré. Hadto, gindidiskriminar niya an mga dayo. Ano an nakabulig ha iya? “Naggahin ako hin panahon nga makaupod ngan makatrabaho hira. May nakilala ako nga mga dayo nga iba gud ha ginsisiring han mga tawo mahitungod ha ira. Kon nakikigsangkay ka ha mga tawo nga iba an kultura, diri mo hira huhukman uyon ha imo nakikita o nababatian, lugod, hihigugmaon mo hira ngan aapresyaron.”

Pamiling hin mga higayon nga makaistorya an mga tawo tikang ha iba nga nasud, lahi, o linggwahe. Puydi mo

• Hangyoon hira nga sumatan ka mahitungod ha ira.

• Imbitaron hira nga mangaon.

• Pamatian hira hin maopay kon may igin-iistorya hira, ngan pangalimbasogan nga hibaroan kon ano an importante ha ira.

Kon mangangalimbasog ka nga mahibaroan an ira mga gin-agian, masasabtan mo kon kay ano nga sugad hira hito. Mabulig ini ha imo nga higugmaon hira ngan an iba pa nga pariho ha ira.