Ginsunod han minilyon nga tawo an mga prinsipyo nga gin-unabi ha nahiuna nga mga artikulo ngan naibanan na gud an diskriminasyon ha ira kasingkasing. Pero ha tinuod la, diri naton kaya wad-on hin bug-os an diskriminasyon ha aton la pangalimbasog. Kon sugad, waray na gud ba paglaom nga mawara ito?

An tawhanon nga mga gobyerno pakyas gud ha pagwara han diskriminasyon. Pero karuyag sidngon ba nga waray gobyerno nga makakagwara hito?

Basi mawara han usa nga gobyerno an diskriminasyon, kinahanglan hito

1. 1. Mapagios an mga tawo nga bag-uhon an ira panhunahuna ngan pagbati ha iba.

2. 2. Matambal an kasakit nga resulta han diri patas nga pagtratar.

3. 3. Magkaada mga lider nga diri nagdidiskriminar.

4. 4. Maaghat an mga tawo han ngatanan nga nasud nga magkaurosa.

Ginpapasarig kita han Biblia nga an Dios nag-establisar hin sugad nga gobyerno. Gintatawag ito nga “Ginhadian han Dios.”​—Lucas 4:43.

Ini an bubuhaton hito nga gobyerno.

‘An mga naukoy ha tuna mahibabaro mahitungod han katadongan.’​—ISAIAS 26:9.

“An tinuod nga katadongan magriresulta hin kamurayawan, ngan an tinuod nga katadongan magbubunga hin nagpapadayon nga kamurayawan ngan kasigurohan.”​—ISAIAS 32:17.

Ano an iginpapasabot hito? Tututdoan han Ginhadian han Dios an mga tawo kon ano an husto. Kon mahibaro an mga tawo han kaibahan han husto ngan sayop​—han hustisya ngan kawaray-hustisya—​magbabag-o an ira panhunahuna ha kada tagsa. Mahibabaroan han ngatanan nga an paghigugma ha ngatanan nga klase hin tawo amo an husto nga buhaton.

“Papahiron [han Dios] an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.”​—PAHAYAG 21:4.

Ano an iginpapasabot hito? Wawad-on han Ginhadian han Dios an ngatanan nga kasakit nga resulta han kawaray-hustisya. An nagin mga biktima han diri patas nga pagtratar waray na rason para mangalas.

“Diri hiya maghuhukom uyon ha nakikita han iya mga mata o magsasaway uyon la ha nababatian han iya mga talinga. Magigin patas an iya paghukom ha mga ubos, ngan pinaagi han katadongan magsasaway hiya para ha mga maaghop ha tuna.”​—ISAIAS 11:3, 4.

Ano an iginpapasabot hito? Hi Jesu-Kristo, an Hadi han langitnon nga Ginhadian han Dios, magmamando ha bug-os nga tuna hin patas ngan waray dinadapigan. Hi Jesus waray ginpapaboran nga nasud, ngan sisiguruhon niya nga susundon han ngatanan nga tawo an iya matadong nga mga balaud.

Gintututdoan han Ginhadian han Dios an mga tawo nga magkaada ‘pariho nga hunahuna ngan pariho nga gugma, bug-os nga magkaurosa, [ngan] magkaada uusa nga panhunahuna.’​—FILIPOS 2:2.

Ano an iginpapasabot hito? An pagkaurosa nga nakikita ha mga sakop han Ginhadian han Dios diri kay pakunokuno la. Magkakaada hira “bug-os nga pagkaurosa” kay hinigugma gud nira an usa kag usa.