Mga Pakiana Tikang ha mga Magbarasa

Paonan-o sadang hunahunaon han mga Kristiano an paggamit hin mga birthstone?

Ha pipira nga mga kultura, an birthstone may-ada kalabotan ha bulan nga natawohan han usa. Personal nga desisyon kon ano nga klase hin presyoso nga bato an ibubutang han usa nga Kristiano ha iya singsing. (Galasia 6:5) Ha paghimo hito nga desisyon, may-ada importante nga mga butang nga angay tagdon.

An Encyclopaedia Britannica nasiring nga an usa nga birthstone amo an usa nga “presyoso nga bato nga iginkaw-ing ha petsa han natawohan han usa, nga an pagsul-ot hito kasagaran nga ginhuhunahuna nga nagdadara hin suwerte o kahimsog.” Ini nga libro nagdudugang: “Maiha na nga ginhunahuna han mga astrologo nga an pipira nga mga presyoso nga bato may-ada labaw ha tawo nga mga gahum.”

Labi na ha kadaan nga mga panahon nga damu an natoo nga an birthstone nahatag hin suwerte ha nagsusul-ot hito. Natoo ba hini an usa nga totoo nga Kristiano? Diri, tungod kay maaram hiya nga ginkondenar ni Jehova adton binaya ha iya ngan adton nasarig “ha dios han Suwerte.”—Isaias 65:11, NW.

Durante han Edad Medya, an mga parapanigo nagpili hin usa nga hiyas para ha tagsa nga bulan han tuig. Ira gindasig an mga tawo nga isul-ot an hiyas han bulan nga ira natawohan, ha pagtoo nga mapanalipdan an nagsusul-ot tikang ha kadaot. Kondi magigin sayop sumala ha Kasuratan kon sundon han mga Kristiano an propesyonal nga mga parapanigo han mga hitabo, tungod kay ginkukondenar hira han Biblia.—Deuteronomio 18:9-12.

Diri liwat angayan para ha mga Kristiano nga hunahunaon nga may espesyal nga bili an usa nga singsing tungod kay may-ada ito birthstone. Diri nagsasaurog an mga Saksi ni Jehova hin mga kompleanyo. An hinungdan amo nga an sugad nga mga selebrasyon nakasentro gud ha indibiduwal ngan an mga kompleanyo la nga nakarekord ha Biblia amo an kanan mga magmarando nga diri nag-aalagad ha Dios.—Genesis 40:20; Mateo 14:6-10.

Ginhuhunahuna han pipira nga mga tawo nga an pagsul-ot hin singsing nga may birthstone may-ada maopay nga epekto ha personalidad han nasul-ot. Kondi, diri natoo hini an totoo nga mga Kristiano, tungod kay maaram hira nga “an bag-o nga personalidad” naisusul-ot pinaagi han impluwensya han baraan nga espiritu han Dios ngan pinaagi han pag-aplikar han mga prinsipyo han Kasuratan.—Efeso 4:22-24, NW.

An usa nga importante hinduro nga hinungdan amo an motibo. Ha pagdesisyon kon angayan ba magsul-ot hin singsing nga may-ada birthstone o diri, an usa nga Kristiano mahimo magpakiana ha iya kalugaringon, ‘Karuyag ko ba isul-ot ini nga singsing tungod la kay naruruyagan ko an bato hito, bisan kon iginkakaw-ing ito ha bulan han akon natawohan? O naimpluwensyahan na ba ako han diwatahan nga mga ideya nga iginkaw-ing han pipira nga mga tawo ngada hiton nga mga hiyas?’

Sadang usisahon han usa nga Kristiano an iya kasingkasing basi hisabtan an iya motibo. “Bantayi an imo kasingkasing ha bug-os nga kamaduruto,” siring han Kasuratan, “kay natikang dida an mga burabod han kinabuhi.” (Proberbios 4:23) Ha pagdesisyon mahitungod han mga birthstone, an tagsa nga Kristiano magpapahimulos kon mangalimbasog hiya ha pag-usisa han iya motibo ngan han posible nga mga epekto han iya bubuhaton ha iya kalugaringon ngan ha iba.—Roma 14:13.