Mga Tangke nga Diri Masusudlan hin Tubig

HA MGA panahon han Biblia, an mga tangke amo an hinimo han tawo nga mga buho ha ilarom han tuna nga ginamit labi na basi butangan hin tubig. Durante han pipira nga mga panahon, ha Tuna nga Iginsaad, ito la an paagi ha pagmintinar han kinahanglanon nga suplay han tubig.

Ha pagrekord han usa nga kapahayagan han Dios, gin-unabi ni propeta Jeremias an mga tangke ha simboliko nga paagi, nasiring: “An akon katawohan nagbuhat hin duha nga karat-an; hira binaya ha akon, an burabod han buhi nga mga tubig, ngan naghimo para ha ira hin mga tangke, mga tangke nga buong, nga diri nabibiawan hin tubig.”​—⁠Jeremias 2:13.

Tungod kay binayaan an ira Dios, hi Jehova​—⁠“an burabod han buhi nga mga tubig”⁠—​an mga Israelita inayop ha diri-masasarigan nga mga pakig-alyansa ha militar han pagano nga mga nasud ngan ha pagsingba ha waray-mahihimo, palso nga mga dios. An sugad nga ginlaoman nga mga arayopan, sumala ha pagtanding ni Jeremias, sugad la hin may-buho nga mga tangke nga waray bisan ano nga nagpapanalipod o nagluluwas nga gahum.​—⁠Deuteronomio 28:20.

May-ada ba leksyon para ha aton yana nga panahon inin ehemplo ha kasaysayan? Sugad han kahimtang ha panahon ni Jeremias, an waray kataposan nga Dios, hi Jehova, nagpapadayon nga amo la an Surok han naghahatag-kinabuhi nga mga tubig. (Salmo 36:⁠9; Pahayag 4:11) Tikang la ha iya, pinaagi han iya Anak nga hi Jesu-Kristo, makakarawat han mga tawo an kinabuhi nga waray kataposan. (Juan 4:14; 17:3) Kondi, pariho han mga kadungandungan ni Jeremias, pinipili han damu nga katawohan yana nga isalikway ngan pasiparahan pa ngani an pulong han Dios nga iginpahayag ha Biblia. Lugod, nasarig hira ha kombinyente nga mga solusyon han politika, ha diri-maaramon nga mga pangatadongan han mga tawo, ngan ha waray-pulos nga mga ideolohiya ngan mga pilosopiya nga nagpapasipara ha Dios. (1 Korinto 3:18-20; Kolosas 2:8) Matin-aw kon ano an angay pilion. Diin ka masarig? Masarig ka ba ha “burabod han buhi nga mga tubig,” hi Jehova, o ha “mga tangke nga buong, nga diri nabibiawan hin tubig”?

[Retrato ha pahina 32]

“Terra-cotta” nga estatwa han iroy nga diosa nga hin-agian ha usa nga lubnganan ha Israel

[Ginkuhaan han Retrato]

Retrato pinaagi han pagtugot han British Museum