Natutuman ba an Kaburut-on han Dios?

‘Matuman an imo kaburut-on, sugad ha langit, amo man ha tuna.’—Mateo 6:10.

NAHAHADLOK nga nagkita hira Julio ngan Christina samtang an upat han ira mga anak nasunog tubtob nga namatay. An ira nakaparada nga awto nabunggo hin hubog nga drayber, ngan binuto ito ngan nasunog. An ikalima nga anak, hi Marcos, natalwas tikang ha kalayo, kondi nadaot han kalayo an iya lawas, nga permanente nga nakabaldado ha iya. Noybe anyos an iya pangidaron ngan nasubo hinduro an iya amay. Iya ginliaw an iya kalugaringon ngan an iya pamilya pinaagi han mga pulong: “Kinahanglan hisabtan naton nga maopay man, maraot, anoman an mahitabo, kaburut-on ito han Dios.”

Kon may-ada makangingirhat nga panhitabo pariho hini, damu an nagios ha pariho nga paagi. ‘Kon an Dios gamhanan-ha-ngatanan ngan napaid ha aton,’ hira nangangatadongan, ‘ha usa nga paagi, an nahitabo sigurado nga para ha aton kaopayan, bisan kon bangin makuri gud ito hisabtan.’ Nauyon ka ba hini?

An opinyon nga anoman an nahitatabo, maopay man ito o maraot, nagpapakita han kaburut-on han Dios agsob nga iginbabasar ha mga pulong ni Jesus ha tinatawag nga an Pag-ampo han Ginoo, nga ginkotar ha igbaw. An kaburut-on han Dios natutuman ha langit, diri ba? Ha pag-ampo nga ‘Matuman an imo kaburut-on ha tuna,’ diri ba kita nauyon nga an nahitatabo ha tuna kaburut-on han Dios?

Damu an nagruruhaduha hini nga ideya. Para ha ira, iginhuhulagway hito an Dios sugad nga waray pagpaid ha mga pagbati han iya linarang nga mga tawo. ‘Paonan-o mahihingyap han mahigugmaon nga Dios an makangingirhat nga mga panhitabo para ha inosente nga mga tawo?’ napakiana hira. ‘Kon karuyag han Dios nga mahibaro kita hin leksyon tikang ha maraot nga mga nahitatabo, ano daw la ito nga leksyon?’ Bangin ito an inaabat mo.

May kalabotan hini, an bugto ha iroy ni Jesus nga hi disipulo Jakobo, nagsurat: “Waray bisan hin-o nga ginsulay nga magsiring, ginsusulay ako han Dios; kay an Dios diri sadang pagsulayon hin maraot, ngan diri hiya magsulay hin bisan hin-o nga tawo.” (Jakobo 1:13) An Dios diri amo an surok han karaotan. Salit, matin-aw nga diri kaburut-on han Dios an ngatanan nga nahitatabo ha tuna yana. An Kasuratan naghihisgot liwat mahitungod han kaburut-on han tawo, han kaburut-on han mga nasud, ngan han kaburut-on pa ngani han Yawa. (Juan 1:13; 2 Timoteo 2:26; 1 Pedro 4:3) Nauyon ka ba nga an nahitabo ha pamilya nira Julio ngan Christina diri gud kaburut-on han mahigugmaon nga langitnon nga Amay?

Salit, ano gud an iginpapasabot ni Jesus han gintutdoan niya an iya mga disipulo nga mag-ampo: ‘Matuman an imo kaburut-on’? Usa la ba ito nga hangyo ha Dios nga maghilabot ha partikular nga mga kahimtang, o gintututdoan ba kita ni Jesus nga mag-ampo para ha usa nga butang nga mas importante ngan mas maopay, usa nga pagbag-o nga malalaoman han ngatanan? Aton usisahon pa gud an ginsisiring han Biblia.

[Ginkuhaan han Retrato ha pahina 3]

Awto: Dominique Faget-STF/AFP/Getty Images; bata: FAO photo/B. Imevbore