Karuyag Mo ba Mabuhi ha Waray Kataposan?

DIRI ako nahahadlok mamatay,” siring han usa nga edaran na nga babaye ha Japan. “Kondi nasusubo gud ako nga babayaan ko ini nga mga bukad.” Hinsabtan han usa nga Kristiano nga ministro nga nabisita ha iya panimalay an iya iginpapasabot, tungod kay may-ada hiya maopay nga hardin. Damu nga nasiring nga diri hira nahahadlok mamatay an naruruyag gud ha urusahon nga mga linarang ngan ha pagkatinuod, bangin naghihingyap nga mabuhi ha waray kataposan.

Mabuhi ha waray kataposan? Ginbabalewaray han damu ito nga ideya. Bangin sumiring pa ngani an iba nga waray hira interes nga mabuhi ha waray kataposan. Kay ano nga mahimo umabat hin sugad hito an bisan hin-o?

 Kinabuhi nga Waray Kataposan—Makauuyam?

Naghuhunahuna an iba nga makauuyam an mabuhi ha waray kataposan. Bangin unabihon nira an nakakauyam nga kinabuhi han damu nga retirado na nga mga tawo nga haros waray na nahihimo kondi magliningkod na la ngan magkinita ha telebisyon. Kon ito an imo inaabat, tagda an ginsiring han astronomo nga hi Robert Jastrow han ginpakianhan hiya kon an kinabuhi nga waray kataposan bendisyon ba o tunglo. Hi Jastrow binaton: “Bendisyon ito ha mga tawo nga mausisa an mga hunahuna ngan may nagpapadayon nga hingyap nga mahibaro. An ideya nga may-ada hira waray kataposan nga panahon ha pagkuha hin kahibaro nakakaliaw hinduro para ha ira. Kondi para ha iba nga naabat nga hinbaroan na nira an ngatanan nga ira angay hibaroan ngan sarado an mga hunahuna, makaharadlok ito nga tunglo. Diri hira maaram kon paonan-o gagamiton an ira panahon.”

Depende gud ha imo disposisyon kon an kinabuhi nga waray kataposan magigin makauuyam o diri. Kon may-ada ka ‘mausisa nga hunahuna ngan nagpapadayon nga hingyap nga mahibaro,’ hunahunaa an imo mabubuhat ha mga kanataran han arte, musika, arkitektura, paghardin, o anoman nga mag-opay nga mga buruhaton nga nakakapainteres ha imo. An kinabuhi nga waray kataposan ha tuna magtatagana hin makaruruyag hinduro nga mga posibilidad ha pagpatubo han imo mga kaabtik ha magkalainlain nga mga kanataran han mga buruhaton.

An kapasidad ha pagpakita ngan pakaeksperyensya hin gugma ha waray kataposan makakahimo han kinabuhi nga dayon nga makapatagbaw gud. Ginlarang kita nga may potensyal ha pagpakita hin gugma, ngan nag-uuswag kita kon naabat kita nga hinigugma kita. An pagpahimulos hin totoo nga gugma kaupod han iba nagriresulta hin hilarom nga katagbaw nga diri nawawara ha paglabay han panahon. An pagkinabuhi ha waray kataposan magtatagana hin nagpapadayon nga higayon nga mapatubo an gugma diri la para ha mga igkasi-tawo kondi labi na para ha Dios. “Kon an usa ka tawo mahigugma ha Dios,” nagsiring hi apostol Pablo, “amo ini hiya an kinikilala niya.” (1 Korinto 8:3) Urusahon gud ito nga paglaom—an makakilala ha Soberano ha uniberso ngan makilala niya! Dugang pa, waray kataposan an paghibaro mahitungod han aton mahigugmaon nga Maglalarang. Niyan, magigin makauuyam ba ngan waray pulos an kinabuhi?

Kinabuhi—Temporaryo Ngan Presyoso

Inaabat han pipira nga an pagin halipot han kinabuhi amo an rason nga presyoso gud hito. Bangin igpariho nira an kinabuhi ha bulawan, nga limitado la an kadamu. Kon mabibilngan an bulawan ha bisan la diin, siring nira, maiibanan an bili hito. Bisan pa hito, an bulawan magigin maopay la gihapon pagkit-on. Sigurado nga pariho hito an kinabuhi.

Bangin igpariho naton an pagpahimulos han kinabuhi nga dayon ha pagkaada hin hura nga  hangin. Tatagdon han mga tripulante nga aada ha usa nga guba nga submarino nga an hangin birilhon hinduro. Katapos hira matalwas, ha imo hunahuna magigin diri mapasalamaton ba hira ngan mareklamo tungod kay nagpapahimulos utro hira hin hura nga hangin? Diri gud!

Pariho han sugad nga mga tripulante, mahimo kita matalwas, nga diri la kay may-ada paglaom nga mabuhi ha sulod hin pipira la ka mga tuig, kondi nga may-ada han mas daku nga paglaom nga kinabuhi nga waray kataposan. “An suhol han sala amo an kamatayon,” nagsurat hi apostol Pablo, “kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.” (Roma 6:23) Pinaagi han halad lukat ni Jesus, kukuhaon han Dios an pagkadiri-hingpit ngan kamatayon han tawo ngan iya ihahatag ha masinugtanon nga katawohan an regalo nga kinabuhi nga waray kataposan. Sadang gud kita magin mapasalamaton hinduro para han sugad nga mahigugmaon nga kahikayan!

Kumusta Man an Imo mga Hinigugma?

An iba nga mga indibiduwal bangin maghunahuna: ‘Kumusta man an akon mga hinigugma? An kinabuhi nga dayon ha tuna diri magigin makahuluganon hinduro ha akon kon diri ko hira kaupod.’ Bangin nagkuha ka na hin kahibaro mahitungod han Biblia ngan hinbaroan mo na an mahitungod han posibilidad han pagpahimulos han kinabuhi nga waray kataposan ha paraiso ha tuna. (Lukas 23:43; Juan 3:16; 17:3) Natural la nga karuyagon mo nga aadto liwat an mga membro han imo pamilya, an iba pa nga mga hinigugma, ngan hinigugma nga kasangkayan, nga nakakaeksperyensya han mga kalipay nga imo liwat ginlalaoman nga maeksperyensyahan ha matadong nga bag-o nga kalibotan nga iginsaad han Dios.—2 Pedro 3:13.

Kondi, kumusta man kon an imo kasangkayan ngan mga hinigugma diri nagpapakita hin interes ha pagkinabuhi ha waray kataposan ha paraiso nga tuna? Ayaw tuguti nga magpaluya ito ha imo. Padayon nga kumuha hin husto nga kahibaro ha Kasuratan, ngan gumios uyon hito. Hi apostol Pablo nagsurat: “Kay ano an hibaro nimo, O! asawa nga babaye, kon maluluwas mo ba an imo asawa nga lalaki? O ano an hibaro nimo, O! asawa nga lalaki, kon maluluwas mo ba an imo asawa nga babaye?” (1 Korinto 7:16) Mahimo magbag-o an mga tawo. Pananglitan, usa nga lalaki nga nakontra hadto ha Kristianidad an nagbag-o ngan ha urhi nagin tigurang ha usa nga Kristiano nga kongregasyon. Hiya nasiring: “Mapasalamaton gud ako nga an akon hinigugma nga pamilya maunungon nga nagpabilin ha ira mga prinsipyo ha Biblia ha bug-os nga panahon nga ginkukontra ko hira.”

Gintatagad gud han Dios an imo kinabuhi ngan an kinabuhi han imo mga hinigugma. Oo, “an Ginoo . . . diri buot nga may-ada mawara, kondi nga an ngatanan magbasol.” (2 Pedro 3:9) Karuyag ni Jehova nga Dios nga ikaw ngan an imo mga hinigugma mabuhi ha waray kataposan. Mas labaw an iya gugma kay han kanan diri-hingpit nga mga tawo. (Isaias 49:15) Salit kay ano nga diri magpatubo hin maopay nga relasyon ha Dios? Niyan bangin mabuligan mo an imo mga hinigugma nga buhaton liwat ito. Bisan kon yana diri hira natoo ha imo paglaom nga mabuhi ha waray kataposan, bangin magbag-o an ira disposisyon kon makita nira nga nagios ka uyon ha husto nga kahibaro ha Biblia.

Kumusta man an imo mga hinigugma nga bangin namatay na? Para ha minilyon nga namatay na, iginsaad han Biblia an urusahon nga paglaom han pagkabanhaw—han pagmata tikang ha kamatayon ngan pagkinabuhi ha Paraiso ha tuna. Hi Jesu-Kristo nagsaad: “Maabot an oras nga an ngatanan, nga aadto ha mga lubnganan . . . man-gugowa.” (Juan 5:28, 29) Bisan adton mga namatay nga waray kumilala ha Dios babanhawon, kay an Biblia nasiring: “May pagkabanhaw han mga minatay han mga magtadong ngan diri man magtadong.” (Buhat 24:15) Magigin makalilipay gud an pag-abiabi han sugad nga binanhaw nga mga tawo!

Kinabuhi nga Dayon—Usa nga Makalilipay nga Paglaom

Kon nakakabiling ka hin kalipay ngan pagkakontento yana bisan pa han ngatanan nga mga problema dinhi hini nga kalibotan, sigurado nga malilipay ka gud ha kinabuhi nga dayon ha paraiso nga tuna. Kondi, han iginpatin-aw han usa han mga Saksi ni Jehova an magigin mga kapulsanan han kinabuhi nga waray kataposan, usa nga babaye an nagsiring: “Diri ko karuyag nga mabuhi ha waray kataposan. Ini nga 70 o 80 anyos nga kinabuhi  igo na para ha akon.” Usa nga Kristiano nga tigurang nga nakada hito nga takna an nagpakiana ha iya: “Nahunahuna mo na ba kon ano an aabaton han imo mga anak kon ikaw mamatay?” Nanuro an iya mga luha han nahunahuna niya an kasubo nga ira maieksperyensyahan kon mamatay an ira iroy. “Ha siyahan nga higayon, nasantop ko kon mationan-o kamakikalugaringon ako hadto,” siring niya, “ngan hinsabtan ko nga an kinabuhi nga waray kataposan diri usa nga paglaom para ha kalugaringon la, kondi nga nag-uupod ito hin pagkinabuhi para ha iba.”

Bangin inaabat han pipira nga waray napaid kon hira mabuhi man o mamatay. Kondi, napaid an aton Humaratag hin kinabuhi, nga nasiring: “Sugad nga ako buhi, . . . diri ko ikinalilipay an kamatayon han maraot; kondi nga an maraot tumalikod tikang han iya paagi ngan mabuhi.” (Esekiel 33:11) Tungod kay napaid hinduro an Dios ha kinabuhi bisan han magraot nga mga tawo, sigurado nga napaid gud hiya hadton nahigugma ha iya.

May pagsarig hi Hadi David han kadaan nga Israel ha mahigugmaon nga pagmangno ni Jehova. Makausa, hi David nagsiring: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” (Salmo 27:10) Posible nga sigurado hi David ha gugma han iya mga kag-anak ha iya. Kondi bisan kon bayaan man lugaring hiya han iya mga kag-anak—an mga tawo nga pinakaduok ha iya—maaram hiya nga diri hiya babayaan han Dios. Tungod han gugma ngan pagtagad ni Jehova, nagtatanyag hiya ha aton hin waray kataposan nga kinabuhi ngan nagpapadayon nga pakigsangkay ha iya. (Jakobo 2:23) Diri ba naton sadang karawaton inin urusahon nga mga regalo ha mapasalamaton nga paagi?

[Retrato ha pahina 7]

Magigin takos nga mabuhi ha waray kataposan tungod han gugma ha Dios ngan ha igkasi-tawo