Tubtob San-o Mahimo Mabuhi an Tawo?

HAN Marso 3, 1513, an Espanyol nga eksplorador nga hi Juan Ponce de León nagtikang han usa nga makatirigamnan nga biyahe. Naglayag hiya tikang ha Puerto Rico ha paglaom nga madadangat niya an isla nga Bimini. Sumala ha susmatanon, namiling hiya hin usa nga milagroso nga burabod—an Burabod han Pagkabatan-on. Kondi dinangat hiya ha tinatawag yana nga estado han Florida, E.U.A. Syempre, waray gud niya hibilngi an burabod, tungod kay waray ito mag-eksister.

Yana, an kinabuhi han katawohan ha kabug-osan diri nasobra ha 70 o 80 anyos. Bisan kon nakalista ha Biblia an mga tawo nga mas hilawig hinduro an mga kinabuhi, an 2002 Guinness Book of World Records nasiring nga 122 anyos ngan 164 ka adlaw an edad han gilalagasi nga tawo nga nabuhi. (Genesis 5:3-32) Kondi, an bioethicist nga hi John Harris nagsiring: “Iginpapakita yana han bag-o nga mga pagsaliksik nga bangin posible an pagkaada hin sosiedad diin an pagkalagas—ngan bisan an kamatayon—mahimo na malikyan.” May pipira nga mga parasaliksik han ika-21 ka siglo nga naghihisgot mahitungod han “haros sigurado nga pagkadiri-mamaratyon,” “waray tubtoban nga kinabuhi han mga tawo pag-abot han 2099,” “kapasidad ha pagkaada waray-kataposan nga pagpadamu han mga selyula,” ngan iba pa nga pariho hito nga mga butang.

Ha libro ni Mark Benecke nga The Dream of Eternal Life, hiya nasiring: “Haros an ngatanan nga mga selyula han lawas nagbabag-o hin damu ka beses durante han pagkinabuhi . . . Katapos hin mga pito ka tuig, bag-o na gud kita nga mga tawo.” Ugaring la kay diri ini nagpapadayon tubtob ha waray kataposan tungod kay an mga selyula naundang ha pagdamu katapos han itinanda na nga kadamu han pagbahin-bahin. Kondi, siring ni Benecke nga kon diri ito amo an kahimtang, “an lawas han tawo makakagbag-o ha kalugaringon hito ha sulod hin maiha hinduro nga panahon—bisan tubtob ha kadayonan.”

Tagda liwat an urusahon hinduro nga kapasidad han utok han tawo, nga nalabaw hinduro ha bisan ano nga aton paggamit hito durante han aton halipot gud nga kinabuhi. Sumala ha Encyclopædia Britannica, an utok han tawo “ginsangkapan hin mas daku pa gud nga potensyal kay  han nagagamit durante han kinabuhi han usa ka tawo.” (1976 nga Edisyon, Tomo 12, pahina 998) An libro nga How the Brain Learns, ni David A. Sousa, nasiring: “Haros waray limitasyon an kapasidad han utok nga magtipig hin impormasyon.”—Pahina 78, Ikaduha nga Edisyon, copyright 2001.

Kay ano nga an mga parasaliksik diri nakakabiling hin pisyolohikal nga hinungdan kon kay ano nga kita namamatay? Ngan kay ano nga an utok han tawo may-ada sugad kadaku hinduro nga kapasidad? Posible ba nga gindisenyo kita basi padayon nga magkuha hin kahibaro tubtob ha waray kataposan? Kay ano nga nahuhunahuna gud naton an mahitungod han kinabuhi nga waray kataposan?

An Biblia nasiring: “Iginpahamutang [han Dios] an kadayonan ha ira kasingkasing, basi nga an tawo diri makaagi han buhat nga kanan Dios ginbuhat tikang ha tinikangan bisan ngadto ha kataposan.” (Eklesiastes 3:11) Iginpapasabot hini nga mga pulong nga iginpasilsil han Dios ha aton an ideya nga mabuhi ha waray kataposan. Tungod hito, pirme kita magkakamay-ada hibabaroan mahitungod ha Dios ngan ha iya mga buhat. Kon mabuhi kita ha sulod han diri-maihap nga binilyon nga mga tuig—oo, ha waray kataposan—pirme kita mahibabaro hin dugang pa mahitungod han urusahon nga mga buhat han paglarang han Dios.

An mga pulong ni Jesu-Kristo nagpapakita liwat nga posible an kinabuhi nga dayon ha tawo. Hiya nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Kumusta ka man? Karuyag mo ba mabuhi ha waray kataposan?

[Mga Retrato ha pahina 3]

Ginpamiling ni Juan Ponce de León an burabod han pagkabatan-on

[Ginkuhaan han Retrato]

Ponce de León: Harper’s Encyclopædia of United States History