Kon Ano an Angay Basahon—Maaramon nga Sagdon ni Salomon

“AN PANHIMO hin damu nga basahon waray kataposan; ngan an duro nga pagtoon nakakaguol han unod.” (Eklesiastes 12:12) Han iginsurat ito nga mga pulong mga 3,000 ka tuig na an naglabay, diri ginhuhulop han maaramon nga hi Hadi Salomon han Israel an mga tawo ha pagbasa. Lugod, nagkukomento hiya nga kinahanglan magin mapili. Napapanahon gud yana ito nga pahinumdom, tungod kay binilyon nga mga pahina han mga barasahon an iginpupublikar ha kalibotan kada tuig!

Matin-aw nga an “damu nga basahon” nga gin-unabi ni Salomon diri nakakaparig-on o nakakarepresko. Salit, nangatadongan hiya nga an duro nga pagpabili hito “nakakaguol han unod,” imbes nga maghatag hin positibo ngan nagpapadayon nga mga kapulsanan.

Kondi, nasiring ba hi Salomon nga waray mga libro nga naghahatag hin maopay, masasarigan nga giya nga mapapahimulosan han magbarasa? Diri, kay hiya nagsurat liwat: “An mga pulong han makinaadmananon sugad-sugad han mga tiunay; ngan sugad han mga raysang nga maopay nga pagdulot amo an mga pulong han mga agaron han mga katirok, nga iginhahatag tikang ha usa nga paramangno hin karnero.” (Eklesiastes 12:11) Oo, may-ada sinurat nga mga pulong nga, “sugad han mga tiunay” makakabulig ha pagpagios. Makakaaghat ito ha usa ka tawo nga gumios ha husto nga paagi. Dugang pa, “sugad han mga raysang nga maopay nga pagdulot,” makakabulig ito ha pagpakusog ha determinasyon han usa ngan may-ada makaparig-on nga epekto.

Diin naton hiaagian an sugad nga maaramon nga mga pulong? Labaw ha ngatanan, sumala kan Salomon, nagtitikang ito ha usa nga Paramangno hin karnero, hi Jehova. (Salmo 23:1) Salit, an gimaopayi nga libro nga giniyahan han Dios nga mababasa han usa—amo an Biblia. An regular nga pagbasa ha sugad nga giniyahan nga mga pulong makakabulig ha usa nga “mahingpit, ngan maandam tungod ha ngatanan nga maopay nga buhat.”—2 Timoteo 3:16, 17.