Mga Pakiana Tikang ha mga Magbarasa

Makakagtipig ba an usa nga Kristiano hin maopay nga konsensya kon nakarawat hiya hin trabaho nga nag-oobligar ha iya nga magdinara-dara hin armas de puygo?

Ginsiseryoso han mga Saksi ni Jehova ha bug-os nga kalibotan an responsabilidad nga hatag han Dios ha ira ha pagtagana hin materyal nga mga butang ha ira pamilya. (1 Timoteo 5:8) Kondi, may-ada mga klase hin trabaho nga matin-aw nga nagtatalapas ha mga prinsipyo ha Biblia ngan sadang likayan. Upod hini an mga trabaho nga may kalabotan ha paghuygo, sayop nga paggamit han dugo, ngan pag-aghat ha paggamit hin mga produkto han tabako. (Isaias 65:11; Buhat 15:29; 2 Korinto 7:1; Kolosas 3:5) An iba nga mga klase hin trabaho, bisan kon diri direkta nga ginkondenar ha Biblia, mahimo makaapekto ha konsensya han usa o han iba.

Personal nga desisyon an pagkarawat hin sekular nga trabaho nga nagkikinahanglan hin pagdinara-dara hin armas de puygo o iba nga hinganiban. Kondi, tungod han trabaho nga nag-oobligar han pagdinara-dara hin armas nagigin posible nga an usa magin salaan ha dugo kon ginkikinahanglan niya nga gamiton ito. Kon sugad, kinahanglan mainampoon nga tagdon han usa nga Kristiano kon disidido ba hiya nga karawaton an makuri nga responsabilidad han pagdesisyon dayon kon nahidadabi an kinabuhi han tawo. An pagdinara-dara hin hinganiban nagbubutang liwat han usa nga tawo ha peligro nga madaot o mamatay tungod han pag-atake o pagbulos.

Mahimo liwat maapektohan an iba han iya desisyon. Pananglitan, an siyahan nga responsabilidad han usa nga Kristiano amo an pagsangyaw han maopay nga sumat han Ginhadian han Dios. (Mateo 24:14) Magigin posible ba an pagtutdo ha iba nga magin ‘mamurayawon ha ngatanan nga mga tawo,’ samtang ha pariho nga panahon nanginginabuhi pinaagi ha pagdara-dara hin hinganiban? (Roma 12:18) Kumusta man an mga anak o iba nga mga membro han pamilya? Mamimeligro ba an ira kinabuhi tungod ha pagkaada pusil ha balay? Dugang pa, posible ba mahipakdol an iba tungod han disposisyon han usa hito nga butang?—Filipos 1:10.

Hini nga “kataposan nga mga adlaw,” nagtitikadamu nga mga tawo an “magpintas, waray gugma ha kaopayan.” (2 Timoteo 3:1, 3) Tungod hini, mahimo ba magpabilin nga ‘waray kasal-anan’ an usa nga tawo kon iya pilion an trabaho nga nag-oobligar ha iya ha pagdinara-dara hin armas diin mahimo niya igkaingkwentro an sugad nga mga indibiduwal? (1 Timoteo 3:10) Diri gud. Tungod hini, diri tatagdon han kongregasyon an sugad nga tawo nga ‘waray kasal-anan’ kon padayon nga magdinara-dara hiya hin hinganiban katapos hiya tagan hin sagdon tikang ha Biblia ha buotan nga paagi. (1 Timoteo 3:2; Tito 1:5, 6) Salit, an sugad nga lalaki o babaye diri magigin kwalipikado ha bisan ano nga espesyal nga mga pribilehiyo ha kongregasyon.

Ginpasarig ni Jesus an iya mga disipulo nga kon unahon nira an mga interes han Ginhadian ha ira kinabuhi, diri hira kinahanglan nga mabaraka hin sobra mahitungod ha pagkaada han mga kinahanglanon ha kinabuhi. (Mateo 6:25, 33) Oo, kon bug-os nga nasarig kita kan Jehova, ‘kita iya bubuligan; diri gud hiya makakailob nga pagkikiwahon an matadong.’—Salmo 55:22.