Hi María Isabel usa nga madasigon nga bata nga magwarali ha syudad han San Bernardo ha Chile, usa nga nasud ha South America. Hiya ngan an iya pamilya kaapi han Mapuche nga tribo. An ira bug-os nga pamilya madasigon nga nasuporta ha mga pangalimbasog nga magkaada bag-o nga kongregasyon ha Mapuche nga yinaknan, nga tinatawag liwat nga Mapudungun.

Han iginpahibaro nga isasaurog liwat an Memoryal han kamatayon ni Kristo ha Mapudungun nga yinaknan ngan 2,000 nga imbitasyon an ipapanaltag, naghunahuna hi María Isabel. Ano daw la an iya maibubulig? Nahinumdoman niya an mga eksperyensya han iba nga batan-on nga Saksi nga nagmalampuson ha pagsangyaw ha ira mga kaklase ngan titser. Nakiistorya hiya ha iya mga kag-anak mahitungod hito, ngan sugad nga pamilya nagdesisyon hira nga maghuhunahuna hi María Isabel hin plano nga ipanaltag ha eskwelahan an mga imbitasyon. Ano an iya nahunahuna nga plano?

Siyahan, nagsarit hi María Isabel ha mga nagdudumara han eskwelahan kon puydi hiya magpaskin hin imbitasyon ha prente nga gate han eskwelahan. Ira gintugotan hiya ngan gindayaw ha iya panalinguha. Usa ka adlaw durante han roll call ha aga, iginpahibaro pa ngani han prinsipal pinaagi han loudspeaker an mahitungod han imbitasyon!

Katapos, nagsarit hi María Isabel nga iya kakadtoon an ngatanan nga classroom. Han gintugotan hiya han mga titser, ginpakianhan niya an mga estudyante ha tagsa nga klase kon may-ada ba ha ira Mapuche. “Kahuna ko nga mga 10 o 15 an Mapuche nga mga estudyante ha bug-os nga eskwelahan,” siring niya, “pero mas damu pa ngay-an, salit 150 nga imbitasyon an akon naipanhatag!”

Usa nga babaye nga nakakita han imbitasyon nga iginpaskin ha gate han eskwelahan an nagpakiana kon hin-o an iya kakaistoryahon mahitungod hito. Hunahunaa an iya kahipausa han igintutdo hiya ha usa nga 10-anyos nga bata nga babaye! “Naglalaom hiya nga daku na an iya makakaistorya,” nahiyom nga nagsiring hi María Isabel. Katapos tagan hin imbitasyon an babaye ngan isaysay ito hin halipot, gin-aro ni María Isabel an iya adres basi mabisita hiya ni María Isabel ngan han iya mga kag-anak ngan istoryahan hin dugang pa mahitungod han Ginhadian han Dios. Nalipay gud an 20 nga magwarali nga nabulig pagsangyaw ha mga tawo nga nagyayakan hin Mapudungun han nakita nira nga tinambong ha Memoryal ito nga babaye upod han 26 iba pa nga interesado nga kaapi han Mapuche nga tribo. Ito nga grupo usa na yana nga mainuswagon nga kongregasyon!

Anoman an imo edad, makakahimo ka ba liwat hin paagi basi maimbitar an imo mga igkasi-estudyante o katrabaho nga tumambong ha Memoryal, pahayag publiko, o distrito nga kombensyon? Kay ano nga diri magsaliksik ha aton mga publikasyon hin mga eksperyensya nga bangin makahatag ha imo hin ideya kon paonan-o magigin malampuson ha sugad hito nga proyekto? Pag-ampo liwat nga buligan ka han baraan nga espiritu ni Jehova nga magkaada kaisog ha pagyakan mahitungod ha iya. (Luk. 11:13) Kon bubuhaton mo ito, bangin mahipausa ka liwat, malipay, ngan madasig gud ha mga resulta han imo ginplano hin maopay nga pangalimbasog.