1. Kay ano nga matatawag hi Jehova nga an siyahan ngan pinakamaopay nga Ebanghelisador?

AN USA nga ebanghelisador nagsusumat hin maopay nga sumat. An siyahan ngan pinakamaopay nga Ebanghelisador amo hi Jehova nga Dios. Katapos gud magrebelde an aton siyahan nga mga kag-anak, iginpahibaro ni Jehova an maopay nga sumat nga an halas, nga amo hi Satanas nga Yawa, pagbubungkagon. (Gen. 3:15) Ha paglabay han mga siglo, gin-giyahan ni Jehova an magtinumanon nga kalalakin-an nga isurat an mga detalye kon paonan-o kukuhaon an pagpasipara ha iya ngaran, wawad-on an kadaot nga ginpahinabo ni Satanas, ngan maibabalik ha katawohan an mga higayon nga nawara nira Adan ngan Eva.

2. (a) Ha ano nga paagi mga ebanghelisador an mga anghel? (b) Ano nga susbaranan an iginpakita ni Jesus para ha mga ebanghelisador?

² An mga anghel mga ebanghelisador liwat. Nagpapasamwak hira hin maopay nga sumat, ngan ira ginbubuligan an iba ha pagpasamwak hin maopay nga sumat. (Luc. 1:19; 2:10; Buh. 8:26, 27, 35; Pah. 14:6) Kumusta man an arkanghel nga hi Miguel? Han nakanhi hiya ha tuna sugad nga hi Jesus, iginpakita niya an susbaranan para ha ebanghelisador nga mga tawo. An iya kinabuhi nakasentro ha pagpasamwak han maopay nga sumat!—Luc. 4:16-21.

3. (a) Ano an maopay nga sumat nga aton iginpapasamwak? (b) Ano nga mga pakiana an makapainteres ha aton sugad nga mga ebanghelisador?

³ Ginsugo ni Jesus an iya mga disipulo nga magin mga ebanghelisador. (Mat. 28:19, 20; Buh. 1:8) Gin-aghat ni apostol Pablo an iya igkasi-magburuhat nga hi Timoteo: “Buhata an buruhaton han ebanghelisador, bug-os nga tumana an imo sagrado nga buruhaton.” (2 Tim. 4:5) Ano an maopay nga sumat nga aton iginpapasamwak sugad nga mga sumurunod ni Jesus? Upod hito an nagpapasarig nga kamatuoran nga an aton langitnon nga Amay, hi Jehova, nahigugma ha aton. (Juan 3:16; 1 Ped. 5:7) An usa nga nangunguna nga paagi nga iginpapakita ni Jehova nga Dios an iya gugma amo an iya Ginhadian.  Salit malipayon nga iginsusumat naton ha iba nga an ngatanan nga nagpapasakop ha pagmando han Ginhadian, nasugot ha Dios, ngan nagbubuhat han katadongan mahimo magin iya mga sangkay. (Sal. 15:1, 2) Ha pagkamatuod, katuyoan ni Jehova nga wad-on an ngatanan nga pag-antos. Iya liwat wawad-on an kasákit nga resulta han paghinumdom han magraot nga eksperyensya han naglabay. Maopay gud ito nga sumat! (Isa. 65:17) Tungod kay mga ebanghelisador kita, hisgotan naton an mga baton ha duha nga importante nga pakiana: Kay ano nga kinahanglan mabatian han mga tawo an maopay nga sumat yana? Ngan paonan-o kita magigin malampuson ha pagtuman han aton toka sugad nga mga ebanghelisador?

4. Ano nga buwa nga mga istorya an usahay iginsusumat ha mga tawo mahitungod ha Dios?

⁴ Hunahunaa nga ginsidngan ka nga ikaw ngan an iyo bug-os nga pamilya ginbayaan han imo tatay. An mga nagsiring nga nakilala hira ha iya nagsumat nga diri hiya nagtatagad, may gintatago nga mga sekreto, ngan waray kalooy. Bangin patoohon ka pa ngani han iba nga waray pulos nga mangalimbasog nga makigkomunikar ha iya kay patay na hiya. Ha pariho nga paagi, damu an ginsisidngan hin sugad hito nga mga istorya mahitungod ha Dios. Gintututdoan hira nga an Dios usa nga misteryo, imposible makilala, o waray kalooy. Pananglitan, an iba nga lider han relihiyon nagtututdo nga sisirotan han Dios an magraot ha impyerno ha waray kataposan. An iba nasiring nga an Dios an hinungdan han pag-antos nga resulta han mga kalamidad. Bisan kon ini nga mga hitabo an hinungdan han kamatay han mag-opay ngan magraot nga tawo, siring nira nga sirot ito tikang ha Dios.

5, 6. Ano an epekto ha mga tawo han teoriya han ebolusyon ngan han buwa nga mga doktrina?

⁵ An iba nasiring nga waray Dios. May kalabotan hini, tagda an teoriya han ebolusyon. Damu han madasigon nga nasuporta hito an nasiring nga an kinabuhi inulpot nga waray intelihente nga nagdisenyo. Siring nira nga waray Maglalarang. Nasiring pa ngani an iba nga an tawo tikang ha hayop salit diri urusahon kon may mga tawo nga may mga batasan nga pariho han hayop. Nasiring hira nga kon waray kalooy nga ginmamandoan han magkusog an magluya, ginsusunod la nira an gintatawag nga balaud han kinaiya. Salit diri urusahon nga damu an natoo nga diri mawawara an kawaray hustisya. Tungod hito, an mga natoo ha ebolusyon waray tinuod nga paglaom.

⁶ Sigurado nga an teoriya han ebolusyon ngan an buwa nga mga doktrina nakadugang ha pag-antos han katawohan hinin kataposan nga mga adlaw. (Roma 1:28-31; 2 Tim. 3:1-5) Ini nga mga katutdoan han tawo diri naghahatag hin tinuod ngan waray kataposan nga maopay nga sumat. Lugod, sugad han ginsiring ni apostol Pablo, tungod hito an mga tawo ‘madulom an panhunahuna, ngan nahibulag hira ha kinabuhi nga tikang ha Dios.’ (Efe. 4:17-19) Dugang pa, an teoriya han ebolusyon ngan an buwa nga mga doktrina nakapugong ha mga tawo ha pagkarawat han maopay nga sumat nga tikang ha Dios.—Basaha an Efeso 2:11-13.

7, 8. Ano la an paagi nga bug-os nga masasabtan han mga tawo an maopay nga sumat?

⁷ Basi mapahiuli an mga tawo ha Dios, kinahanglan makombinse anay hira nga naeksister hi Jehova ngan may mag-opay nga hinungdan nga magin duok ha iya. Mabubuligan naton hira nga magkaada hito nga kahibaro pinaagi ha pag-aghat ha ira nga usisahon an mga linarang. Kon gin-aadman han mga tawo an mga linarang nga abrido an ira hunahuna, nahibabaroan nira an kinaadman ngan gahum han Dios. (Roma 1:19, 20) Basi buligan an mga tawo nga mahipausa gud ha mga butang nga ginhimo han aton Harangdon nga Maglalarang, puydi naton gamiton an mga brosyur nga Ginlarang ba an Kinabuhi? ngan The Origin of Life—Five Questions Worth Asking. Bisan pa hito, an pag-aram la han mga linarang diri makakabaton han pipira han pinakamakuri nga mga pakiana, sugad hini: Kay ano nga tinutugotan han Dios an pag-antos? Ano an katuyoan han Dios para ha tuna? Nagtatagad ba an Dios ha akon sugad nga indibiduwal?

⁸ An paagi la nga bug-os nga masasabtan han  mga tawo an maopay nga sumat mahitungod ha Dios ngan ha iya katuyoan amo an pag-aram han Biblia. Pribilehiyo gud naton nga buligan an mga tawo nga hibaroan an baton ha ira mga pakiana! Kondi basi maabot an ira kasingkasing, diri igo nga sumatan la hira han tinuod nga mga impormasyon. Kinahanglan kombinsihon naton hira. (2 Tim. 3:14) Mahimo kita magin mas makakombinse pinaagi han pagsubad kan Jesus. Kay ano nga malampuson gud hiya? Usa nga hinungdan amo an iya epektibo nga paggamit hin mga pakiana. Paonan-o naton hiya masusubad?

9. Basi mabuligan naton an mga tawo ha espirituwal, ano an kinahanglan naton buhaton?

⁹ Kay ano nga sadang kita gumamit hin mga pakiana ha aton ministeryo, pariho kan Jesus? Hunahunaa ini nga sitwasyon: Ginsidngan ka han imo doktor nga may maopay hiya nga sumat. Matatambal niya an imo sakit kon magpapaopera ka. Bangin tumuod ka ha iya. Pero ano man kon isiring niya ito ha imo antes ka pa niya pakianhan mahitungod han imo kahimsog? Posible nga diri ka matuod ha iya. Bisan ano pa kaeksperto an doktor, kinahanglan magpakiana anay hiya ngan mamati ha imo isisiring mahitungod han imo inaabat antes hiya makabulig ha imo. Ha pariho nga paagi, basi mabuligan naton an mga tawo nga kumarawat han maopay nga sumat, kinahanglan mahibaro kita nga magin epektibo ha paggamit hin mga pakiana. Kon maaram na kita han ira kahimtang ha espirituwal, dida la naton hira mabubuligan.

10, 11. Ano an bangin mahimo naton kon aton susubaron an paagi han pagtutdo ni Jesus?

¹⁰ Maaram hi Jesus nga an ginhunahuna hin maopay nga mga pakiana diri la nabulig ha nagtututdo nga mahibaro mahitungod ha iya estudyante kondi nakakaaghat liwat ito ha estudyante nga maghunahuna ngan ipahayag an iya opinyon. Pananglitan, han karuyag ni Jesus tutdoan an iya mga disipulo hin leksyon mahitungod ha pagkamapainubsanon, nagbangon anay hiya hin pakiana nga makakaaghat ha ira nga maghunahuna. (Mar. 9:33) Basi tutdoan hi Pedro kon paonan-o mangangatadongan basado ha mga prinsipyo, nagbangon hi Jesus hin pakiana nga may mapipilian nga baton. (Mat. 17:24-26) Ha lain nga higayon, han karuyag ni Jesus hibaroan an nakada ha kasingkasing han iya mga disipulo, nagbangon hiya hin sunod-sunod nga pakiana nga makakaaghat ha ira nga isumat kon ano gud an ira inaabat. (Basaha an Mateo 16:13-17.) Pinaagi ha paggamit hin mga pakiana ngan pagsaysay, hi Jesus diri la kay nagsumat hin mga impormasyon. Nabantad niya an kasingkasing han mga tawo ngan naaghat hira nga gumios uyon ha maopay nga sumat.

¹¹ Kon ginsusubad naton hi Jesus ha epektibo nga paggamit hin mga pakiana, nahihimo naton an diri maminos hin tulo nga butang. Nahibabaro kita kon paonan-o mabubuligan an mga tawo ha gimaopayi nga paagi, nalalamposan naton an mga pagriwa, ngan natututdoan naton an mga mapainubsanon kon paonan-o magigin mapulsanon an ira kinabuhi. Tagda an tulo nga kahimtang nga nagpapakita kon paonan-o naton magagamit hin epektibo an mga pakiana.

12-14. Paonan-o mo mabubuligan an imo anak nga mas magkaada kompyansa ha pagsangyaw han maopay nga sumat? Paghatag hin ehemplo.

¹² Siyahan nga kahimtang: Kon usa ka nga kag-anak, ano an imo bubuhaton kon an imo tin-edyer nga anak nagsiring nga nahahadlok hiya pakiistorya ha iya mga kaklase mahitungod han paglarang? Sigurado nga karuyag mo hiya buligan nga magkaada kompyansa ha pagsangyaw han maopay nga sumat. Salit imbes nga isgan hiya o tutdoan dayon kon ano an iya isisiring, kay ano nga diri subaron hi Jesus ngan magbangon hin mga pakiana nga makakaaghat ha iya nga isumat an iya inaabat? Paonan-o mo ito mahihimo?

 ¹³ Basaha kaupod han imo anak an pipira nga bahin han brosyur nga The Origin of Life—Five Questions Worth Asking, ngan katapos mahimo ka magpakiana kon hain nga mga pangatadongan an para ha iya nakakaaghat gud nga maghunahuna. Aghata hiya nga maghunahuna hin iba pa nga rason kon kay ano nga nakombinse hiya nga tumoo ha Maglalarang ngan kon kay ano nga karuyag niya buhaton an kaburut-on han Dios. (Roma 12:2) Sumati an imo anak nga diri man kinahanglan nga magpariho an iyo mga rason.

¹⁴ Isaysay ha imo anak nga kon makiistorya hiya ha iya kaklase, puydi niya subaron adto nga imo paagi han pakiistorya. Karuyag sidngon, puydi niya isumat ha iya kaklase an pipira nga impormasyon ngan katapos pakianhan kon ano an iya panhunahuna. Pananglitan, puydi niya hangyoon an iya kaklase nga basahon an kahon ha pahina 21 han brosyur nga Origin of Life. Katapos, mahimo hiya magpakiana, “Tinuod ba nga an kapasidad han DNA ha pagtipig hin impormasyon diri la gihapon matupngan han bisan ano nga kompyuter yana?” Posible nga oo an ibabaton han iya kaklase. Katapos, puydi hiya magpakiana, “Kon diri ito nahihimo han mga nagdisenyo han kompyuter, mahihimo ba ito han mga butang nga waray hunahuna?” Basi buligan an imo anak nga mas magkaada kompyansa nga ipakiistorya ha iba an iya gintotoohan, mahimo kamo magpraktis hin regular. Kon imo hiya babansayon nga magin epektibo ha paggamit hin mga pakiana, mabubuligan mo hiya nga matuman an iya toka sugad nga ebanghelisador.

15. Paonan-o naton mahimo gamiton an mga pakiana basi buligan an usa nga ateyista?

¹⁵ Ikaduha nga kahimtang: Ha aton pagsangyaw, nakakaistorya naton an mga tawo nga nagruruhaduha kon may Dios. Pananglitan, bangin magsumat ha aton an usa ka tawo nga ateyista hiya. Diri naton sadang himoon ito nga rason ha pag-undang ha pakiistorya ha iya. Lugod, puydi naton hiya pakianhan hin matinalahuron kon ano kaiha na hiya nga ateyista ngan kon kay ano nga nagin sugad hito an iya panhunahuna. Katapos pamatian an iya baton ngan kumendasyonan hiya tungod han paghunahuna hito hin maopay, puydi naton hiya  pakianhan kon para ha iya sayop ba nga magbasa hin mga barasahon nga naghahatag hin mga ebidensya nga ginlarang an kinabuhi. Kon abrido an iya hunahuna, posible nga masiring hiya nga diri makatadunganon an diri pag-usisa hito nga mga ebidensya. Katapos puydi naton itanyag ha iya an brosyur nga Ginlarang ba an Kinabuhi? o an brosyur nga The Origin of Life—Five Questions Worth Asking. An mataktika ngan buotan nga paagi han pagpakiana mahimo magin sugad hin yawi nga mag-aabri ha kasingkasing han tawo basi kumarawat han maopay nga sumat.

16. Kay ano nga diri kita sadang magin kontento nga basahon la han aton estudyante ha Biblia an mga baton ha publikasyon nga gin-aadman?

¹⁶ Ikatulo nga kahimtang: Ha pagdumara hin pag-aram ha Biblia, bangin pasagdan la naton an estudyante nga basahon an baton ha publikasyon nga gin-aadman. Pero kon ito an aton bubuhaton, bangin mapugngan naton hiya nga mag-uswag ha espirituwal. Kay ano? Kay an estudyante nga nagbabasa la han baton nga diri ito ginpapamalandong posible nga diri magigin marig-on ha espirituwal. Bangin umundang hiya tungod han pagkontra, pariho hin tanom nga nalalaya tungod han kapaso han adlaw. (Mat. 13:20, 21) Basi malikyan ito, kinahanglan pakianhan naton an aton estudyante kon ano an iya inaabat ha iya nahibabaroan. Pangalimbasog nga hibaroan kon nauyon hiya hito ngan kon kay ano nga sugad hito an iya inaabat. Katapos, buligi hiya nga mangatadongan basado ha Kasuratan basi ha urhi makakalugaring hiya paghimo hin husto nga mga konklusyon. (Heb. 5:14) Kon epektibo nga gagamiton naton an mga pakiana, posible gud nga an aton mga gintututdoan magkakaada marig-on nga pagtoo ngan makakaato ha mga pangalimbasog han mga nakontra o nagsasari paglimbong ha ira. (Col. 2:6-8) Ano pa an aton mahihimo basi matuman an aton toka sugad nga mga ebanghelisador?

17, 18. Kon kaupod naton an usa nga bugto ha ministeryo, paonan-o naton mabubuligan an usa kag usa?

¹⁷ Ginsugo ni Jesus an iya mga disipulo nga magsangyaw nga tagduha-duha. (Mar. 6:7; Luc. 10:1) Ha urhi, hi apostol Pablo nag-unabi hin mga “igkasi-magburuhat” nga “nangalimbasog kaupod [niya] para ha maopay nga sumat.” (Fil. 4:3) Uyon hito nga susbaranan ha Kasuratan, han 1953 an organisasyon nagtikang hin programa diin an mga magwarali magbabansay ha iba ha ministeryo.

¹⁸ Kon kaupod mo an usa nga bugto ha ministeryo, paonan-o niyo mabubuligan an usa kag usa? (Basaha an 1 Corinto 3:6-9.) Kitaa ha imo Biblia an mga teksto nga ginagamit han imo partner. Pamati ha imo partner ngan ha tagbalay kon nagyayakan an bisan hin-o ha ira. Pamatii hin maopay an ira pag-istorya basi makabulig ka ha imo partner kon ginkikinahanglan niya ito ha pagbaton hin pagriwa. (Ekles. 4:12) Kondi tigamni ini: Pangalimbasog nga diri sumagbang ha imo partner kon nagamit hiya hin epektibo nga pangatadongan. An imo pagsagbang bangin makapaluya ha imo partner ngan makawurok ha tagbalay. May mga panahon nga bangin husto an pag-api ha ira pag-istorya. Pero kon may karuyag ka isiring, siguroha nga halipot la ito. Katapos pabay-i an imo partner nga ipadayon an pakiistorya.

19. Ano an maopay nga hinumdoman naton, ngan kay ano?

¹⁹ Kon kamo nga magpartner tipakadto ha sunod nga balay, paonan-o niyo mabubuligan an usa kag usa? Kay ano nga diri gamiton ito nga panahon ha paghisgot kon paonan-o mapapauswag an iyo presentasyon? Likayi an pagyakan hin negatibo nga mga komento mahitungod ha mga tawo ha iyo teritoryo. Sugad man, likayi an pagreklamo mahitungod han mga kaluyahan han kabugtoan. (Gal. 5:15) Maopay nga hinumdoman naton nga kita ngatanan diri hingpit. Buotan gud hi Jehova kay igintapod niya ha aton an sugad hin bahandi nga sagrado nga buruhaton nga pagsangyaw han maopay nga sumat. (Basaha an 2 Corinto 4:1, 7.) Salit ipakita naton ngatanan an aton apresasyon hito nga bahandi pinaagi ha pagbuhat han aton gimaopayi ha pagtuman han aton toka sugad nga mga ebanghelisador.