An waray-tunog nga sine nga A Trip Down Market Street naruyagan gud han mga magkirita. Iginpapakita hito an mga panhitabo ha adlaw-adlaw nga pagkinabuhi ha San Francisco, U.S.A., ha tinikangan han ika-20 ka siglo. An mga naghimo hito nga sine nagbutang hin kamera ha prente han nalarga nga cable car ngan iginpokus ito ha kalsada ha unhan. Upod ha iginpakita ha sine an mga karomata nga gindadanas hin kabayo ngan an kadaan nga mga awto, sugad man an mga mamaralit ngan an mga parabaligya hin dyaryo nga nagbubuhat han ira adlaw-adlaw nga buruhaton.

Nagin makasurubo hinduro ini nga sine kay posible nga ginhimo ini han Abril 1906, antes gud han linog ngan sunog han Abril 18 nga nagin hinungdan han kamatay han yinukot nga tawo ngan haros nagbungkag hito nga bahin han syudad. Posible nga an iba nga malipayon nga tawo nga makikita hito nga sine pipira na la ka adlaw nga mabubuhi. “Nakikita ko la an mga tawo didto,” siring ni Scott Miles nga paryente han usa han mga naghimo hito nga sine, “ngan diri hira maaram han mahitatabo ha ira. Ngan diri mo mapupugngan nga malooy ha ira.”

Sugad liwat hito an kahimtang yana. Diri liwat naton mapupugngan nga malooy ha mga tawo. Ginbubuhat nira an ira adlaw-adlaw nga mga buruhaton nga diri gud maaram han kalamidad nga hirani na gud mahitabo—an kabungkagan hini nga sistema ngan han ira paagi han pagkinabuhi. Kondi diri pariho han linog nga diri mahibabaroan kon san-o mahitatabo, may halipot pa nga higayon ha pagpahamangno ha mga tawo mahitungod han adlaw han paghukom ni Jehova. Posible gud nga kada semana naggagahin ka hin panahon ha pagsangyaw ha balay-balay, kondi puydi mo ba dugangan an imo ginhihimo ha pagpahamangno ha iba?

Maopay gud nga susbaranan hi Jesus kay andam hiya pirme magsangyaw. Iya ginsasangyawan an ngatanan nga iya iginkikita, sugad han parasukot hin buhis nga iya iginkatapo ha dalan o han babaye nga iya nakaistorya ha may atabay durante han udto. (Luc. 19:1-5; Juan 4:5-10, 21-24) Bisan han naggahin hiya hin panahon nga magpahalibway, andam hiya nga diri ito idayon basi tutdoan an iba. An pagpaid ha iya igkasi-tawo nagpagios ha iya nga sangyawan hira hin maopay. (Mar. 6:30-34) Paonan-o ­ginsusubad yana an kan Jesus pag-abat hin pagkaapurado?

Hi Melika naukoy ha usa nga apartment ha bilding nga istrikto ha seguridad. Damu han iya mga amyaw  an mga estudyante nga taga-iba nga nasud nga an numero han celfon waray ha directory o an mga ngaran waray ha listahan ha lobby. Iya ginpapabilhan an iya talagsahon nga higayon nga kaistoryahon mahitungod ha Biblia an mga naukoy hito nga bilding kon aadto hira ha lobby ngan elebetor. Hiya nagsiring, “Gintatagad ko ini nga sugad hin akon teritoryo.” Nagdadara hi Melika hin mga literatura ha pipira nga yinaknan, ngan damu an nakarawat hin mga tract ngan magasin. Iya liwat hira gin-aaghat nga kitaon an aton Web site, an jw.org. Nakagtikang hiya hin pipira nga pag-aram ha Biblia.

Hi Sonia liwat nagsasalingabot han tagsa nga higayon ha pagsangyaw ha bisan hin-o nga puydi niya sangyawan. Nagtatrabaho hiya ha klinika han usa nga doktor, ngan ginhimo niya nga tumong nga sangyawan hin maopay an tagsa han iya mga katrabaho. Siyahan, naggahin hiya hin panahon nga hibaroan an mga panginahanglan ngan hilig han tagsa ha ira. Katapos, ha iya bakante nga oras ha udto iya hira ginbibiling ngan ginkakaistorya mahitungod ha Biblia. Sugad nga resulta, nakagtikang hi Sonia hin duha nga pag-aram ha Biblia. Nagpaplano ­liwat hiya nga gamiton an iba han iya bakante nga oras ha pakiistorya ha mga aadto ha lobby han klinika ngan naghuhulat han ira turno nga makiistorya ha doktor.

OUsa han nakatalwas ha linog han 1906 an nagsiring nga ito an “pinakagrabe nga kalamidad nga nahitabo ha usa nga estado o syudad.” Kondi diri mag-iiha an ngatanan nga kalamidad magigin gutiay gud la kon itanding ha adlaw han panimalos nga maabot ha ngatanan nga “diri nakilala ha Dios.” (2 Tes. 1:8) Karuyag gud ni Jehova nga magbag-o an hunahuna ngan kasingkasing han mga tawo ngan mamati hira ha nagpapahamangno nga mensahe nga iginpapasamwak han iya mga Saksi.—2 Ped. 3:9; Pah. 14:6, 7.

Pribilehiyo mo nga ipasantop ha mga tawo nga peligroso gud an aton panahon ngan buligan hira nga bayaan an ira makikalugaringon nga mga hingyap basi pamilngon hi Jehova. (Sep. 2:2, 3) Puydi mo ba salingabuton an tagsa nga higayon ha pagsangyaw ha imo mga katrabaho, amyaw, ngan ha mga tawo nga imo iginkikita samtang imo ginbubuhat an imo adlaw-adlaw nga buruhaton? Dudugangan mo ba an imo ginhihimo ha pagpahamangno ha iba??