1. Paonan-o nagpakita hi Jesus hin hingpit nga susbaranan ha pagsakripisyo ha kalugaringon?

HAN nakanhi hi Jesus ha tuna, nagpakita hiya hin hingpit nga susbaranan ha pagsakripisyo ha kalugaringon. Gin-uuna niya an pagbuhat han kaburut-on han Dios imbes nga an iya karuyag ngan kahimyang. (Juan 5:30) Pinaagi han iya pagpabilin nga matinumanon tubtob ha kamatayon ha pasakitan nga kahoy, ginpamatud-an niya nga waray limitasyon an iya pagsakripisyo.—Fil. 2:8.

2. Paonan-o naton ipapakita an nagsasakripisyo nga disposisyon, ngan kay ano nga sadang naton ito buhaton?

² Sugad nga mga sumurunod ni Jesus, kinahanglan liwat naton ipakita an nagsasakripisyo nga disposisyon. Ano an karuyag sidngon han pagkaada hito nga disposisyon? Ha simple nga pagkayakan, andam igsakripisyo han usa an iya mismo kaopayan para buligan an iba. Kabaliktaran ito ha pagin makikalugaringon. (Basaha an Mateo 16:24.) An nagsasakripisyo nga disposisyon mabulig ha aton nga unahon an pagbati ngan mga karuyag han iba kay han aton. (Fil. 2:3, 4) Ngani, igintutdo ni Jesus nga importante ito ha aton pagsingba. Kay ano? An Kristiano nga gugma, nga nagpapagios ha aton basi magsakripisyo, amo an pangirilal-an han tinuod nga mga disipulo ni Jesus. (Juan 13:34, 35) Ngan hunahunaa la an mga bendisyon nga aton napapahimulosan tungod kay bahin kita han bug-os kalibotan nga pagminagburugto  nga nagpapakita hin nagsasakripisyo nga disposisyon!

3. Ano an mahimo makagwara han aton nagsasakripisyo nga disposisyon?

³ Kondi may kaaway kita nga mahimo nga hinay-hinay nga makagwara han aton nagsasakripisyo nga disposisyon. Ito nga kaaway amo an aton tendensya nga magin makikalugaringon. Hunahunaa kon paonan-o ito iginpakita nira Adan ngan Eva. Hi Eva nagpadaog han iya hakugnon nga hingyap nga magin pariho ha Dios. An iya bana nagpakita hin hakugnon nga hingyap han gin-una hito nga lipayon hiya kay ha Dios. (Gen. 3:5, 6) Katapos masulay han Yawa hira Adan ngan Eva nga bumaya ha tinuod nga pagsingba, padayon nga ginsulay niya an mga tawo nga magin makikalugaringon. Gin-gamit pa ngani niya ito han ginsulay niya hi Jesus. (Mat. 4:1-9) Yana, nalilimbongan ni Satanas an kadam-an nga tawo, napapagios niya hira nga magin makikalugaringon ha damu nga paagi. Kinahanglan magin mabinantayon kita tungod kay mahimo kita maimpluwensyahan hinin kalyap nga disposisyon.—Efe. 2:2.

4. (a) Mawawara ba naton yana an makikalugaringon nga mga tendensya? Isaysay. (b) Ano nga mga pakiana an aton tatagdon?

⁴ An pagin makikalugaringon mahimo igpariho ha taoy. Kon an usa nga puthaw pag-inuranan o pagsinirakan, posible nga pagtauyon ito. Peligroso gud kon igbabalewaray an taoy tungod kay mahimo ito makaruba o makadaot ha puthaw. Ha pariho nga paagi, bisan kon diri naton yana mawawara an pagkadiri-hingpit ngan makasasala nga mga tendensya, sadang kita magin alerto ha mga peligro hito ngan padayon nga atohan ito nga mga tendensya. (1 Cor. 9:26, 27) Paonan-o naton mahibabaroan nga nagigin makikalugaringon na kita? Ngan paonan-o naton mas maipapakita an nagsasakripisyo nga disposisyon?

5. (a) Paonan-o an Biblia pariho hin espiho? (Kitaa an retrato ha tinikangan hini nga artikulo.) (b) Kon gin-uusisa an aton kalugaringon may kalabotan ha pagin makikalugaringon, ano an sadang naton likyan?

⁵ Sugad la nga magagamit naton an espiho basi makita an aton hitsura, magagamit liwat naton an Biblia basi usisahon an aton pagkatawo ngan tadungon an anoman nga kaluyahan nga bangin makita naton. (Basaha an Santiago 1:22-25.) Kondi makakabulig la ha aton an espiho kon gagamiton naton ito hin husto. Pananglitan, kon masiplat la kita ha espiho, bangin diri naton makita an gutiay pero kinahanglan kuhaon nga hugaw. O kon samtang nangingespiho kita pero an espiho diri nakasentro ha aton, bangin iba nga tawo an aton makita. Ha pariho nga paagi, basi magamit naton an Biblia nga makita an usa nga kaluyahan sugad han pagin makikalugaringon, kinahanglan diri la naton pahapyaw nga basahon o gamiton ito basi makita an mga kaluyahan han iba.

6. Paonan-o kita “nagpapadayon” ha perpekto nga balaud?

⁶ Ha pag-ilustrar, bisan kon ginbabasa naton an Pulong han Dios hin regular o kada adlaw pa ngani, mahimo nga diri pa gihapon naton makita nga nagigin makikalugaringon na ngay-an kita. Paonan-o ito nahitatabo? Tagda ini: Ha ilustrasyon nga ginamit ni Santiago may kalabotan han espiho, an problema diri kay napakyas an tawo nga kitaon hin maopay an iya kalugaringon. Hi Santiago nagsiring nga ‘ginkikita han tawo an iya kalugaringon.’ Ginamit dinhi ni Santiago an Griego nga pulong nga nagpapasabot hin pag-usisa o pagpanginano hin maopay. Salit hini nga ilustrasyon, ano an problema han tawo? Hi Santiago nagpadayon: “Pagbaya niya nangangalimot dayon hiya kon ano nga klase hiya hin tawo.” Oo, bumaya hiya ha espiho nga waray man la ginbuhat may kalabotan han iya nakita. Ha kabaliktaran, an matadong nga tawo diri la “nagkikita hin maopay han perpekto nga balaud” kondi “nagpapadayon” liwat hito. Imbes nga igbalewaray an hingpit nga balaud han Pulong han Dios, nagpapadayon hiya ha pagsunod han mga katutdoan hito. Ito liwat an ginpabug-atan ni Jesus han hiya nagsiring: “Kon pirme niyo ginbubuhat an akon ginsisiring, mga disipulo ko gud kamo.”—Juan 8:31.

7. Paonan-o naton magagamit an Biblia ha pag-usisa may kalabotan ha pagin makikalugaringon?

⁷ Salit, basi maatohan an pagin makikalugaringon, kinahanglan basahon mo anay hin maopay an Pulong han Dios. Mabulig ito nga makita mo  an mga butang nga kinahanglan mo pauswagon. Kondi kinahanglan ka magbuhat hin dugang pa. Pag-usisa hin dugang pinaagi ha pagsaliksik. Kon nagbabasa ka hin usa nga asoy ha Biblia, hunahunaa nga aada ka hito nga sitwasyon. Pakianhi an imo kalugaringon: ‘Ano daw la an akon bubuhaton ha sugad nga sitwasyon? Magios gud ba ako ha husto nga paagi?’ Labaw ha ngatanan, katapos mo pamalandungon an imo nabasa, pangalimbasog nga iaplikar ito. (Mat. 7:24, 25) Aton tagdon kon paonan-o an asoy mahitungod kan Hadi Saul ngan kan apostol Pedro mabulig basi matipigan naton an nagsasakripisyo nga disposisyon.

8. Ano an disposisyon ni Saul han nagtikang hiya paghadi, ngan paonan-o niya ito iginpakita?

⁸ An asoy mahitungod kan Hadi Saul han Israel nagpapahamangno ha aton nga mahimo mawara an aton nagsasakripisyo nga disposisyon tungod han pagin makikalugaringon. Han nagtikang maghadi hi Saul, mapainubsanon hiya. (1 Sam. 9:21) Waray niya siruti an mga Israelita nga nagpakaraot ha iya pagin hadi, bisan kon husto la nga depensahan niya an iya hatag han Dios nga posisyon. (1 Sam. 10:27) Ginkarawat niya an giya han baraan nga espiritu han Dios pinaagi ha pagpanguna ha mga Israelita ha malampuson nga pakig-away kontra ha mga Amonitanhon. Katapos, mapainubsanon nga iginhatag niya kan Jehova an ngatanan nga kadungganan.—1 Sam. 11:6, 11-13.

9. Paonan-o hi Saul nagin makikalugaringon?

⁹ Ha urhi, gintugotan ni Saul nga tumubo ha iya kasingkasing an pagin makikalugaringon ngan pagpahitaas, pariho han nakakadaot nga taoy. Han napirde niya an mga Amalekanhon, gin-una niya an iya mga hingyap kay ha pagsugot kan Jehova. May pagkahakog nga gindara niya an mga dinag-an imbes nga bungkagon ito sugad han iginsugo ha iya han Dios. Ngan mapahitas-on nga naghimo hiya hin monumento para ha iya kalugaringon. (1 Sam. 15:3, 9, 12) Han ginsidngan hiya ni propeta Samuel nga nasubo hi Jehova ha iya, ginpakamatadong niya an iya kalugaringon pinaagi ha pagsiring nga ginsunod niya an iba nga sugo han Dios, ngan ginbasol niya an iba han iya nabuhat nga sayop. (1 Sam. 15:16-21) Dugang pa, tungod han iya pagpahitaas, nagin mas importante ha iya nga diri madaot an iya reputasyon ha mga tawo imbes nga mapalipay an Dios. (1 Sam. 15:30) Paonan-o naton magagamit sugad nga espiho an asoy mahitungod kan Saul basi matipigan an aton nagsasakripisyo nga disposisyon?

10, 11. (a) Ano an aton mahibabaroan tikang ha eksperyensya ni Saul mahitungod ha pagtipig han nagsasakripisyo nga disposisyon? (b) Paonan-o naton malilikyan nga magin pariho kan Saul?

¹⁰ Siyahan, an eksperyensya ni Saul nagpapakita nga diri kita sadang magin kampante ngan maghunahuna nga kon nagpakita na kita hadto hin nagsasakripisyo nga disposisyon, padayon nga maipapakita na naton ito. (1 Tim. 4:10) Hinumdoman naton nga maopay hadto hi Saul ngan gin-uyonan hiya han Dios, kondi waray niya atohi an makikalugaringon nga tendensya nga nagtikang tumubo ha iya. Ha urhi, iginsalikway hiya ni Jehova tungod han iya pagkadiri-masinugtanon.

¹¹ Ikaduha, sadang likyan naton nga magpokus la ha mga butang nga nahihimo naton hin maopay, ngan iginbabalewaray na an mga butang nga kinahanglan naton pauswagon. Pariho ini hin nangingespiho kita nga ginkikita la an aton bag-o nga bado pero iginbabalewaray an hugaw ha aton nawong. Bisan kon diri kita pariho kan Saul nga nagpatagbaw la ha iya kalugaringon, sadang naton likyan an bisan ano nga tendensya nga bangin magin hinungdan nga magin pariho kita ha iya. Kon ginsasagdonan kita, likyan naton nga pakamatadungon an aton ginbuhat, mangatadongan nga diri man daku an aton sayop, o basulon an iba. Imbes nga magin pariho kan Saul, maopay gud kon mamamati kita ha mga sagdon.—Basaha an Salmo 141:5.

12. Paonan-o an nagsasakripisyo nga disposisyon mabulig ha aton kon nakahimo kita hin seryoso nga sala?

¹² Pero kumusta man kon nakahimo kita hin seryoso nga sala? Tungod kay karuyag ni Saul nga diri madaot an iya reputasyon, waray niya maibalik an iya maopay nga relasyon ha Dios. Ha kabaliktaran, an nagsasakripisyo nga disposisyon makakabulig ha aton basi diri kita madaog  han kahadlok nga maalohan ha mga tawo lugod kakarawaton naton an bulig. (Prob. 28:13; San. 5:14-16) Pananglitan, usa nga brother an nagtikang magkinita hin pornograpiya han 12 anyos hiya, ngan ginbuhat niya ito hin patago ha sulod hin sobra napulo ka tuig. Hiya nagsiring: “Makuri hinduro isumat ha akon asawa ngan ha mga tigurang an akon ginbibinuhat. Kondi yana nga iginsumat ko na ito, sugad hin nawara ha akon an mabug-at hinduro nga pinas-an. An pipira han akon kasangkayan nasubo han matangtang ako ha pagin ministeryal, sugad hin ginpakyas ko hira. Kondi maaram ako nga mas nalilipay hi Jehova han akon pag-alagad yana kay han nagkikinita pa ako hin pornograpiya, ngan an iya panhunahuna an mas importante ha akon.”

13, 14. Paonan-o hi Pedro nagpakita hin makikalugaringon nga mga tendensya?

¹³ Samtang hi apostol Pedro ginbabansay ni Jesus, nagpakita hiya hin nagsasakripisyo nga disposisyon. (Luc. 5:3-11) Kondi kinahanglan niya atohan an makikalugaringon nga mga tendensya. Pananglitan, nasina hiya han hira apostol Santiago ngan Juan nangalimbasog nga magkaada hin prominente nga posisyon ha Ginhadian han Dios kaupod ni Jesus. Bangin naghunahuna hi Pedro nga hiya an angay para hito nga posisyon kay ginsidngan na hiya ni Jesus nga magkakaada hiya hin espesyal nga toka. (Mat. 16:18, 19) Anoman an ginhunahuna ni Pedro, ginpahamangnoan ni Jesus hira Santiago ngan Juan, pati na hi Pedro ngan an iba pa nga apostol nga diri magin makikalugaringon o ‘magpakaagaron’ ha ira kabugtoan.—Mar. 10:35-45.

¹⁴ Bisan kon gintadong na ni Jesus an panhunahuna ni Pedro, waray pa gihapon magbag-o hi Pedro. Han ginsumatan ni Jesus an mga apostol nga temporaryo nga babayaan hiya nira, ginminos ni Pedro an iba ngan naghambog pinaagi ha pagsiring nga hiya la an magpapabilin nga matinumanon. (Mat. 26:31-33) Pero sayop gud an iya pagin kampante tungod kay hito mismo nga gab-i napakyas hiya ha pagpakita hin nagsasakripisyo nga disposisyon. Tungod han iya pangalimbasog nga mapanalipdan an iya kalugaringon, makatulo ka beses nga iginnigar niya hi Jesus.—Mat. 26:69-75.

15. Ha kabug-osan, kay ano nga makaparig-on an ehemplo ni Pedro?

¹⁵ Bisan pa hini nga mga kaluyahan ngan kapakyasan  ni Pedro, makaparig-on pa gihapon an iya ehemplo. Pinaagi han iya pangalimbasog ngan han bulig han baraan nga espiritu han Dios, naatohan niya an iya sayop nga mga tendensya ngan nagpakita hin pagpugong ha kalugaringon ngan nagsasakripisyo nga disposisyon. (Gal. 5:22, 23) Nalamposan niya an mga pagsari nga mas makuri kay ha nahiuna nga mga pagsari nga nagin hinungdan han iya kahipakdol. Nagpaubos hiya han ginsaway hiya ni apostol Pablo ha publiko. (Gal. 2:11-14) Katapos hiya sawayon, waray hiya magdumot ngan maghunahuna nga nadaot an iya reputasyon. Padayon niya nga iginpakita an iya gugma kan Pablo. (2 Ped. 3:15) An ehemplo ni Pedro makakabulig ha aton nga makultibar an nagsasakripisyo nga disposisyon.

16. Paonan-o naton maipapakita an nagsasakripisyo nga disposisyon kon nakakaeksperyensya kita hin magkuri nga kahimtang?

¹⁶ Hunahunaa kon paonan-o ka nagios kon nakakaeksperyensya hin magkuri nga kahimtang. Han hi Pedro ngan an mga apostol napriso ngan ginkastigo tungod han ira pagsangyaw, nagkalipay hira “kay nagkaada hira pribilehiyo nga mag-antos hin kaalohan tungod han [kan Jesus] ngaran.” (Buh. 5:41) Mahimo mo liwat tagdon an pagtimaraot sugad nga higayon basi masubad hi Pedro ngan masunod an mga pitad ni Jesus pinaagi ha pagpakita hin nagsasakripisyo nga disposisyon. (Basaha an 1 Pedro 2:20, 21.) Ini nga panhunahuna mabulig pa ngani ha imo kon nakakarawat ka hin ginkikinahanglan nga disiplina tikang ha mga tigurang. Imbes nga masina, sunda an ehemplo ni Pedro.—Ekles. 7:9.

17, 18. (a) Ano an mahimo naton ipakiana ha aton kalugaringon mahitungod han aton espirituwal nga mga tumong? (b) Ano an sadang naton buhaton kon baga hin nagigin makikalugaringon na kita?

¹⁷ May kalabotan ha espirituwal nga mga tumong, makakapahimulos ka liwat tikang ha ehemplo ni Pedro. Mahimo mo ito kab-uton ha paagi nga nagpapakita ka hin nagsasakripisyo nga disposisyon. Kondi, sadang ka magbantay nga an imo motibo ha pagkab-ot hito diri kay basi magin prominente. Salit pakianhi an imo kalugaringon: ‘Naghihingyap ba ako nga mag-uswag an akon pag-alagad kan Jehova tungod kay karuyag ko magin sikat o magkaada hin awtoridad, sugad han karuyag nira Santiago ngan Juan?’

¹⁸ Kon naabat ka nga baga hin nagigin makikalugaringon ka na, paghangyo kan Jehova nga buligan ka nga tadungon an imo panhunahuna ngan mga pagbati; ngan pangalimbasog nga magpokus ha himaya ni Jehova imbes nga ha imo kalugaringon. (Sal. 86:11) Mahimo ka liwat magkab-ot hin mga tumong nga diri magpapahinabo nga magin prominente ka. Pananglitan, mahimo mo kultibaron hin dugang pa an pipira nga bahin han bunga han espiritu nga nakukurian ka nga ipakita. O kon maduruto ka nga nangangandam ha imo mga bahin ha katirok kondi diri malipayon ha pakigbahin ha paglimpyo han Kingdom Hall, mahimo mo himoon nga tumong nga iaplikar an sagdon ha Roma 12:16.—Basaha.

19. Ano an aton bubuhaton basi diri kita manluya ha aton nakikita samtang nangingespiho kita ha Pulong han Dios?

¹⁹ Kon ginkikita naton hin maopay an aton kalugaringon ha espiho han Pulong han Dios ngan makakita kita hin mga kaluyahan, sugad han pagin makikalugaringon, bangin manluya kita. Kon mahitabo ito ha imo, hunahunaa an matadong nga tawo ha ilustrasyon ni Santiago. Waray pabug-ati ni Santiago kon gin-ayos ba dayon han tawo an iya nakita nga problema o iya pa ngani ginkuha an mga hugaw; lugod nagsiring hi Santiago nga an tawo ‘nagpadayon ha perpekto nga balaud.’ (San. 1:25) Waray niya hingalimti an iya nakita ha espiho ngan padayon hiya nga nangalimbasog nga ayuson ito. Oo, padayon nga magin positibo ngan timbang ha imo panhunahuna may kalabotan ha imo pagkadiri hingpit. (Basaha an Eklesiastes 7:20.) Padayon nga kitaa hin maopay an perpekto nga balaud ngan pangalimbasog nga matipigan an nagsasakripisyo nga disposisyon. Andam hi Jehova ha pagbulig ha imo, sugad la nga iya ginbubuligan an damu hinduro nga imo kabugtoan nga bisan kon diri mga hingpit, mahimo makakarawat han pag-uyon ngan bendisyon han Dios.