1. Ano an makasurubo nga kahimtang nga naieksperyensyahan han mga tawo yana?

DIRI katuyoan ni Jehova nga an mga tawo mag-antos han makapaluya nga mga epekto han kalagas. Ha kabaliktaran, katuyoan niya nga an ngatanan nga tawo magpahimulos hin hingpit nga kahimsog ha Paraiso. Kondi yana an “ngatanan nga butang nga hinimo han Dios parapriho naghaharoy ngan nagsasakit.” (Roma 8:22) Ano daw la an inaabat han Dios kon nakikita niya nga nag-aantos an mga tawo tungod han makasurubo nga resulta han sala? Dugang pa, damu nga lagas an ginpapasibay-an ha panahon nga nanginginahanglan gud hira hin bulig.—Sal. 39:5; 2 Tim. 3:3.

2. Kay ano nga mapasalamaton an mga Kristiano nga may mga lagas nga kaupod nira ha kongregasyon?

² Mapasalamaton an katawohan ni Jehova nga may mga lagas nga kaupod nira ha kongregasyon. Nagpapahimulos kita han ira kinaadman ngan napaparig-on han ira susbaranan ha pagtoo. Damu ha aton an paryente o kasangkayan hinin hinigugma nga kalagasan. Kaano-ano man naton hira o diri, interesado kita ha ira kaopayan. (Gal. 6:10; 1 Ped. 1:22) Magpapahimulos kita ngatanan kon uusisahon naton an pagtagad han Dios ha ira. Hihisgotan liwat naton an responsabilidad han mga kapamilya pati han kongregasyon may kalabotan ha aton hinigugma nga kalagasan.

3, 4. (a) Ano an ginhangyo kan Jehova han nagsurat han Salmo 71? (b) Ano an mahimo ighangyo ha Dios han Kristiano nga kalagasan?

³ “Ayaw ako isalikway kon ako matigurang na; Ayaw ako pagpasibay-i kon an akon kusog lumuya,” an pangamuyo ha Dios han nagsurat han Salmo 71:9. Posible nga sumpay ini han Salmo 70, nga may superskripsyon nga “Salmo ni David.” Salit posible nga hi David an naghangyo han mababasa ha Salmo 71:9. Nag-alagad hiya ha Dios tikang ha iya kabata tubtob ha iya kalagas, ngan gintokahan hiya ni Jehova hin importante nga mga buruhaton. (1 Sam. 17:33-37, 50; 1 Hadi. 2:1-3, 10) Bisan pa hito, inabat niya nga kinahanglan niya hangyoon hi Jehova nga padayon nga mangnoan hiya.—Basaha an Salmo 71:17, 18.

⁴ Damu yana an pariho kan David. Bisan pa han kalagas ngan “magraot nga mga adlaw,” padayon nga gindadayaw nira an Dios tubtob ha ira maaakos. (Ekles. 12:1-7) Bangin damu ha ira an limitado na la an nahihimo, bisan ha pagministeryo. Kondi mahimo liwat hira makimalooy kan Jehova nga padayon hira nga bendisyonan ngan mangnoan. Inin matinumanon nga kalagasan makakasiguro nga babatunon han Dios an ira mga pag-ampo. Maaram kita hito tungod kay hi Jehova mismo an naggiya kan David basi ig-ampo niya an pariho nga mga butang.

5. Ano an pagtagad ni Jehova ha matinumanon nga kalagasan?

⁵ Iginpapakita han Kasuratan nga ginpapabilhan gud ni Jehova an matinumanon nga kalagasan ngan naglalaom hiya nga papasidunggan hira han iya mga surugoon. (Sal. 22:24-26; Prob. 16:31; 20:29) “Pagtahora niyo an kalagasan ngan pagpasidunggi hira. Pagsugta ngan kahadloki niyo ako. Hi ako an Ginoo,” siring han Lebitiko 19:32. (Maopay nga Sumat) Oo, an pagpasidungog ha kalagasan ha kongregasyon gintatagad nga seryoso nga responsabilidad hadto tubtob yana. Kondi kumusta man an pag-ataman ha ira? Kan kanay ito responsabilidad?

6. Ano nga susbaranan an iginpakita ni Jesus may kalabotan ha pag-ataman ha kag-anak?

⁶ An Pulong han Dios nasiring ha aton: “Pasidunggi an imo tatay ngan an imo nanay.” (Eks. 20:12; Efe. 6:2) Iginpakita ni Jesus nga importante gud ini nga sugo han iya ginkondenar an mga Pariseo ngan mga eskriba nga nadiri pagtagana ha ira mga kag-anak. (Mar. 7:5, 10-13) Hi Jesus mismo nagpakita hin maopay nga susbaranan. Pananglitan, han hirani na hiya mamatay ha pasakitan nga kahoy, igintapod niya ha iya hinigugma nga disipulo nga hi Juan an pag-ataman ha iya nanay, nga posible nga balo na hito nga panahon.—Juan 19:26, 27.

7. (a) Ano nga prinsipyo an gin-unabi ni Pablo may kalabotan ha pagtagana ha mga kag-anak? (b) Ano an konteksto han ginsiring ni Pablo?

⁷ Hi apostol Pablo gin-giyahan ha pagsurat nga an mga tumuroo kinahanglan magtagana ha ira kalugaringon nga panimalay. (Basaha an 1 Timoteo 5:4, 8, 16.) Tagda an konteksto han surat ni Pablo kan Timoteo. Iya iginsaysay kon hin-o an puydi kumarawat hin pinansyal nga bulig tikang ha kongregasyon. Iginpatin-aw niya nga an tumuroo nga mga anak, apo, ngan iba pa nga paryente han lagas nga mga balo amo an siyahan nga may responsabilidad ha pagtagana ha ira. Hito nga paagi, diri mabubug-atan ha pinansyal an kongregasyon. Sugad man yana, usa han mga paagi basi maipakita han mga Kristiano an ira “debosyon ha Dios” amo an pagtagana ha pinansyal ha ira mga paryente nga nanginginahanglan.

8. Kay ano nga maaramon nga waray maghatag an Biblia hin espisipiko nga mga instruksyon may kalabotan ha pag-ataman ha lagas na nga mga kag-anak?

⁸ Ha simple nga pagkayakan, may responsabilidad an Kristiano nga adulto nga mga anak ha pagsiguro nga maitagana an materyal nga panginahanglan han ira mga kag-anak. An ginhisgotan ni Pablo amo an pagbulig ha tumuroo nga mga paryente, kondi diri liwat sadang pabay-an an diri Kristiano nga mga kag-anak. Iba-iba  an mahihimo han mga anak ha pag-ataman ha ira mga kag-anak tungod kay diri parapriho an ira sitwasyon. Iba-iba liwat an panginahanglan, personalidad, ngan kahimtang ha kahimsog han tagsa nga indibiduwal. May pipira nga mga lagas nga damu an anak, an iba naman usa la. An iba may nakakarawat nga bulig tikang ha gobyerno, an iba naman waray. Magkaiba-iba liwat an ira mga karuyag. Salit diri maaramon o mahigugmaon nga pakarauton an paagi han usa ha pag-ataman ha iya lagas na nga mga kapamilya o paryente. Mahimo bendisyonan ni Jehova an anoman nga desisyon nga uyon ha Kasuratan ngan magkaada ito maopay nga resulta, pariho han iya ginbuhat tikang pa ha panahon ni Moises.—Num. 11:23.

9-11. (a) Ano an makuri nga mga sitwasyon nga mahimo atubangon han pipira? (Kitaa an retrato ha tinikangan hini nga artikulo.) (b) Kay ano nga an adulto nga mga anak diri sadang magdali-dali ha pagdesisyon nga bumaya ha bug-os panahon nga pag-alagad? Iilustrar.

⁹ Kon an mga anak naukoy hirayo ha ira lagas na nga mga kag-anak, bangin makurian hira ha pagtagana han ginkikinahanglan nga bulig. Mahimo nga tigda nga magluya an kahimsog ha usa han ira mga kag-anak, bangin tungod han katumba, kabarii hin tul-an, o iba pa nga problema, salit kinahanglan hira bisitahon. Posible nga magkinahanglan hira hin bulig—bangin temporaryo la o ha sulod hin maiha nga panahon. *

¹⁰ Adton aada ha bug-os panahon nga pag-alagad nga hirayo ha ira pamilya tungod han teokratiko nga mga toka mahimo umatubang hin makuri nga mga desisyon. Para ha mga Bethelite, misyonero, ngan nagbibiyahe nga mga paramangno, an ira toka presyoso ngan bendisyon tikang kan Jehova. Kondi kon nagkakasakit an ira mga kag-anak, bangin hunahunaon dayon nira, ‘Kinahanglan na namon bayaan an amon toka basi atamanon an amon mga kag-anak.’ Pero maaramon kon mainampoon nga tatagdon nira kon ito gud ba an kinahanglan o karuyag han ira mga kag-anak. Diri sadang magdali-dali ha pagdesisyon an usa nga bayaan an iya pribilehiyo ha pag-alagad, ngan bangin diri man ngani ito an ginkikinahanglan. Posible ba nga temporaryo la ito nga pagkasakit ngan bangin may kakongregasyon an mga kag-anak nga andam bumulig?—Prob. 21:5.

¹¹ Tagda pananglitan an kahimtang han duha nga magbugto nga nag-aalagad hirayo ha ira pamilya. An usa misyonero ha South America, ngan an usa nagtatrabaho ha sentro nga opisina ha Brooklyn, New York. An ira lagas na nga mga kag-anak nanginahanglan hin bulig. An magbugto upod an ira asawa bumisita ha ira mga kag-anak ha Japan basi mahibaroan kon ano an ira maibubulig. Ha urhi, ginhunahuna han mag-asawa ha South America nga umundang ha pagmisyonero basi atamanon an ira mga kag-anak. Katapos, tumawag ha ira an koordinetor han lawas han mga tigurang han kongregasyon han ira mga kag-anak. Gin-iristoryahan han mga tigurang an sitwasyon ngan karuyag nira nga magpadayon an mag-asawa ha pagmisyonero tubtob ha mahihimo. Gin-aapresyar han mga tigurang an pag-alagad hini nga mag-asawa ngan determinado hira nga himoon an ira maaakos ha pagbulig ha pag-ataman ha mga kag-anak hito. Mapasalamaton gud an bug-os nga pamilya hinin mahigugmaon nga bulig.

12. Ano an sadang siguruhon han Kristiano nga pamilya may kalabotan ha ira desisyon ha pag-ataman ha ira lagas na nga mga kag-anak?

¹² Anoman an magin desisyon han Kristiano nga pamilya ha pag-ataman ha ira lagas na nga mga kag-anak, sadang siguruhon han ngatanan nga magpapasidungog ito ha ngaran han Dios. Diri gud naton karuyag nga magin pariho ha relihiyoso nga mga lider ha panahon ni Jesus. (Mat. 15:3-6) Karuyag naton nga an aton mga desisyon magpapasidungog ha Dios ngan ha kongregasyon.—2 Cor. 6:3.

13, 14. Paonan-o iginpapakita han Biblia nga sadang bumulig an kongregasyon ha pag-ataman ha Kristiano nga mga lagas?

¹³ Diri ngatanan makakabulig ha bug-os panahon nga mga surugoon sugad han ginbuhat han gin-unabi nga ehemplo. Kondi iginpapakita han usa nga hitabo ha siyahan nga siglo nga an mga kongregasyon sadang bumulig basi maitagana an mga panginahanglan hadton matinumanon nga mga lagas nga kabugtoan. Mahitungod ha kongregasyon ha Jerusalem, an Biblia nasiring nga “waray usa ha ira nga nakulangan.” Diri ito nagpapasabot nga riko hira ngatanan. Matin-aw nga pobre an pipira nga kabugtoan, kondi “gintatagan an kada usa uyon ha iya panginahanglan.” (Buh. 4:34, 35) Ha urhi, may problema nga bumangon didto. An pipira nga “balo nga babaye napapabay-an ha adlaw-adlaw nga panhatag hin pagkaon.” Salit an mga apostol nagsugo hin kwalipikado nga kalalakin-an nga manginginano basi masiguro nga matagan hin pagkaon an ngatanan nga balo. (Buh. 6:1-5) Tinuod, temporaryo la ini nga panhatag kada adlaw para maitagana an panginahanglan hadton mga nagin Kristiano han Pentekostes 33 C.E. ngan adton nagpabilin ha Jerusalem ha pipira ka panahon basi maparig-on an ira espirituwalidad. Bisan pa hito, iginpakita han ginbuhat han mga apostol nga makakabulig an kongregasyon basi maataman adton kabugtoan nga nanginginahanglan.

¹⁴ Sugad han gin-unabi na, naghatag hi Pablo kan Timoteo hin mga instruksyon kon hin-o nga Kristiano nga mga balo an puydi makakarawat hin pinansyal nga bulig tikang ha kongregasyon. (1 Tim. 5:3-16) Gin-giyahan liwat hi Santiago ha pagsurat nga may obligasyon an mga Kristiano ha pag-ataman ha mga ilo, balo nga babaye, ngan iba pa nga nanginginahanglan hin bulig. (San. 1:27; 2:15-17) Hi apostol Juan nagsaysay liwat: “An bisan hin-o nga may materyal nga panag-iya dinhi hini nga kalibotan ngan nakikita niya nga an iya bugto nanginginahanglan pero diri hiya nagpapakita hin pagpaid ha iya, paonan-o naton masisiring nga nahigugma hiya ha Dios?” (1 Juan 3:17) Kon an tagsa nga Kristiano may obligasyon pagbulig ha mga nanginginahanglan, diri ba sadang liwat ito buhaton han kongregasyon?

15. Kon nabulig ha pag-ataman hin lagas na nga kabugtoan, ano nga mga butang an mahimo tagdon?

¹⁵ Ha pipira nga nasud, an gobyerno nagtatagana hin pensyon ngan iba pa nga serbisyo para ha kalagasan. (Roma 13:6) Pero ha iba nga lugar, waray sugad hini nga mga serbisyo. Salit diri parapriho an maihahatag nga bulig han mga paryente ngan han kongregasyon tungod kay iba-iba an sitwasyon. Kon an tumuroo nga mga anak nag-uukoy hirayo ha ira mga kag-anak, bangin makaapekto ito ha kon ano an ira maibubulig.  Maopay gud kon makikigkomunikar an mga anak ha mga tigurang ha kongregasyon han ira mga kag-anak basi masiguro nga nasasabtan han ngatanan an kahimtang han pamilya. Pananglitan, mahimo bumulig an mga tigurang para an lagas na nga mga kag-anak makakuha hin mga benepisyo ha gobyerno o ha iba pa nga lokal nga mga serbisyo. Bangin may maobserbaran hira nga mga butang nga kinahanglan ipahibaro ha mga anak sugad han mga kabaraydan nga waray mapapanginano o mga medisina nga nahingangalimtan tumaron han mga kag-anak. An sugad nga tangkod nga pakigkomunikar mabulig nga diri magtikaduro an problema ngan masolusyonan ito. Matin-aw nga kon may magbuburobisita ngan manginginano ha mga kag-anak ha panapanahon, o magpapahibaro ha mga anak han ira sitwasyon, mahimo ito makaiban ha kabaraka han pamilya.

16. Paonan-o ginbubuligan han pipira nga kabugtoan an mga lagas ha kongregasyon?

¹⁶ Tungod kay hinigugma han kongregasyon ini nga mga lagas, andam gamiton han pipira an ira panahon ngan kusog basi makabulig ha anoman nga paagi nga ira mahihimo. Iginpapakita nira nga interesado gud hira ha kaopayan han mga lagas ha kongregasyon. Ginbabahin-bahin han pipira nga kabugtoan an mga buruhaton ngan nagsusurosaliwan ha pagmangno hini nga kalagasan. Tungod kay diri igintutugot han ira kahimtang nga sumulod ha bug-os panahon nga pag-alagad, nalilipay hira pagbulig ha mga anak nga makapabilin ha ira toka tubtob ha mahihimo. Maopay gud an disposisyon nga iginpapakita hini nga kabugtoan! Syempre, bisan pa han ira pagin andam bumulig, responsabilidad pa gihapon han mga anak nga buhaton an ira maaakos para ha ira mga kag-anak.

17, 18. Kon nag-aataman ha mga lagas, paonan-o makakabulig an pagin positibo?

¹⁷ Magigin masayon bisan an makuri nga sitwasyon kon an mga lagas ngan adton mga nag-aataman ha ira magpapabilin nga positibo. Usahay an mga lagas madagmit masubo o nadidepres pa ngani. Salit bangin kinahanglan mo mangalimbasog gud basi mapasidunggan ngan madasig hira pinaagi han pirme pakiistorya ha ira hin makaparig-on. Angay kumendasyonan adton nagpapabilin nga matinumanon ha pag-alagad. Diri hingangalimtan ni Jehova an ira ginbuhat para ha iya, ngan diri liwat ito hingangalimtan han ira mga kabugtoan.—Basaha an Malakias 3:16; Hebreo 6:10.

¹⁸ Dugang pa, magigin magaan an adlaw-adlaw nga mga buruhaton kon an ngatanan maaram magpatawa. (Ekles. 3:1, 4) Nangangalimbasog an damu nga lagas nga diri obligaron adton mga nabulig ha ira. Maaram hira nga mas damu an mabisita ngan mag-aataman ha ira kon buotan hira. Damu han nabisita ha ira an nasiring, “Binisita ako basi parig-unon an usa ko nga sangkay nga lagas na, kondi ako lugod an naparig-on.”—Prob. 15:13; 17:22.

19. Ano an mabulig ha mga batan-on ngan ha mga lagas nga magpabilin nga marig-on bisan pa ha makuri nga mga panahon?

¹⁹ Ginpapamulat na gud naton an panahon nga mawawara na an pag-antos ngan an mga epekto han pagkadiri-hingpit. Samtang diri pa ito naabot, an mga surugoon han Dios kinahanglan magpokus ha ira makalilipay nga paglaom nga magpapadayon ha waray kataposan. Maaram kita nga an aton pagtoo ha mga saad han Dios usa nga angkla ha panahon han kakurian o kasakitan. Tungod han aton pagtoo, “diri kita naundang, kay bisan kon an aton lawas nagtitikaluya, an aton personalidad nababag-o gud kada adlaw.” (2 Cor. 4:16-18; Heb. 6:18, 19) Kondi labot la ha pagtipig hin marig-on nga pagtoo ha mga saad han Dios, ano pa an mabulig ha imo basi matuman mo an imo responsabilidad ha pag-ataman ha mga lagas? Hihisgotan ha masunod nga artikulo an pipira nga praktikal nga suhestyon.