HAN Septyembre 6, 1926, usa nga Hapon nga pilgrim (nagbibiyahe nga paramangno) ha Estados Unidos an bumalik ha Japan sugad nga misyonero. Naghuhulat ha iya an usa la nga may subskripsyon han The Watch Tower, nga nakagtikang hin usa nga grupo hin pag-aram ha Biblia ha Kobe. Han Enero 2, 1927, ginhimo han mga Estudyante han Biblia an ira siyahan nga asembleya hito nga syudad. Gintambongan ito hin 36, ngan 8 an nabawtismohan. Maopay ito nga tinikangan, kondi paonan-o daw la masasangyawan hinin gutiay nga grupo an 60 ka milyon nga populasyon ha Japan nga kinahanglan makakita han kalamrag han kamatuoran han Biblia?

Han Mayo 1927, gintikangan han madiskarte nga mga Estudyante han Biblia an usa nga kampanya ha pagsangyaw ha publiko basi igpahibaro an pagdudumarahon nga mga pahayag ha Biblia. An siyahan nga pahayag gindumara ha Osaka. An kabugtoan nagpaskin hin mga karatola ha ligid han mga kalsada ngan hin dagku nga billboard ha bug-os nga syudad ngan nagpadara hin 3,000 nga imbitasyon ha prominente nga mga tawo. Nanhatag hira hin 150,000 nga handbill ngan iginpahibaro an pahayag ha nangunguna nga mga peryodiko ha Osaka ngan ha 400,000 nga tiket han tren. Ha adlaw han pahayag, duha nga eruplano an naghulog hin 100,000 nga handbill ha bug-os nga syudad. An Osaka Asahi Hall napuno hin mga 2,300 nga namati ha pahayag nga “The Kingdom of God Is at Hand.” Mga 1,000 an waray na makasulod hito nga pasilidad. Katapos han pahayag, nagpabilin an sobra 600 nga tinambong para ha pakiana ngan baton nga sesyon. Han sumunod nga mga bulan, nagdumara hin mga pahayag ha Kyoto ngan ha iba pa nga syudad ha weste han Japan.

Han Oktubre 1927, an mga Estudyante han Biblia naghikay hin mga pahayag ha Tokyo. Nagpadara utro hira hin mga imbitasyon ha prominente nga mga tawo—upod na an primero ministro, mga membro han parliamento, ngan mga lider han relihiyon ngan militar. Igin-anunsyo nira ito ha mga peryodiko, ngan ginamit liwat hira hin mga poster pati hin 710,000 nga handbill. Gintambongan hin 4,800 an tulo nga pahayag nga gindumara ha kapital nga syudad han Japan.

An mga colporteur (payunir) may importante nga bahin ha pagpasamwak han mensahe han Ginhadian ngadto ha mga balay. Nakobrehan ni Matsue Ishii, usa han siyahan nga colporteur ha Japan, ngan han iya bana nga hi Jizo, an 75 porsyento han nasud, tikang ha Sapporo ha norte ngadto ha Sendai, Tokyo, Yokohama, Nagoya, Osaka, Kyoto, Okayama, ngan Tokushima. Hi Sister Ishii ngan an edaran na nga hi Sister Sakiko Tanaka, nagbado hin pormal nga kimono basi bisitahon an hitaas nga mga opisyal han gobyerno. Usa hito an naghangyo hin 300 ka set han mga libro nga The Harp of God ngan Deliverance basi ibutang ha mga librarya ha prisohan.

Hira Katsuo ngan Hagino Miura nakakarawat hin mga libro tikang kan Sister Ishii ngan dayon nira nasantop nga kamatuoran an ira nabasa. Nabawtismohan hira  han 1931 ngan nagin mga colporteur. Hira Haruichi ngan Tane Yamada, pati an damu nga ira paryente, kumarawat han mensahe han Ginhadian antes pa han 1930. An mag-asawa nga Yamada nag-alagad sugad nga colporteur, ngan an ira anak nga hi Yukiko, nagin Bethelite ha Tokyo.

Hito nga panahon, mahal hinduro an awto ngan makuri an mga kalsada. Salit hi Kazumi Minoura ngan an iba pa nga batan-on nga colporteur gumamit hin mga house car nga waray makina. Ira ito ginngaranan hin Jehu nga ginkuha tikang ha nagpapadalagan hin karuwahe nga nagin usa han mga hadi han Israel. (2 Hadi 10:15, 16) Tulo an Daku nga Jehu nga an tagsa 2.2 ka metros an kahilaba, 1.9 ka metros an kahilapad, ngan 1.9 ka metros an kahitaas, nga nakakagsakay hin unom nga payunir. Dugang pa, may 11 nga Guti nga Jehu nga ginpapadalagan hin bisikleta nga nakakagsakay hin duha ka tawo. Ginhimo ito ha sanga nga opisina ha Japan. Hi Kiichi Iwasaki nga bumulig ha paghimo hin mga Jehu, nagsiring, “An tagsa nga Jehu may tolda ngan bateriya hin awto nga nagsusuplay hin koryente para ha mga suga.” Iginpasanag han mga colporteur an lamrag han kamatuoran ha bug-os nga Japan, gamit an mga Jehu nga ira ginduduso ngan gindadanas samtang naagi hira ha kabukiran ngan natabok ha mga walog tikang ha norte han Hokkaido ngadto ha sur han Kyushu.

An colporteur nga hi Ikumatsu Ota nagsiring: “Pag-aabot namon ha usa nga bungto, amon igin-gagarahe an Jehu ha ligid han salog o ha uma. Ginbibisita anay namon an prominente nga mga tawo han bungto, sugad han mayor, katapos nagbabalay-balay kami basi itanyag an mga literatura. Katapos namon makobrehan an teritoryo, nabalhin kami ha sunod nga bungto.”

Han ito nga grupo han 36 nga Estudyante han Biblia nagkaada siyahan nga asembleya ha Kobe, usa adto nga ‘adlaw han gutiay nga tinikangan.’ (Sak. 4:10, Baraan nga Biblia) Paglabay la hin lima ka tuig​—han 1932—​103 nga colporteur ngan magwarali ha Japan an nagreport, ngan nakapanaltag hira hin sobra 14,000 nga libro. Yana, may organisado na nga pagsangyaw ha publiko ha dagku nga syudad ha Japan, ngan haros 220,000 nga magwarali an nagpapasanag han ira kalamrag ha bug-os nga Tuna nga Ginsisirangan han Adlaw.​—Tikang ha aton daan nga mga koleksyon ha Japan.