“Uyon Ini han Imo Kaburut-on”
“Ini nga mga kamatuoran imo gintago tikang ha mga maaramon ngan edukado ngan iginpahayag ini ha kabataan.”—LUC. 10:21.
1. Kay ano nga hi Jesus “nalipay gud ha baraan nga espiritu”? (Kitaa an retrato hini nga pahina.)
HANDURAWA an pamahongpahong ni Jesu-Kristo han “nalipay gud hiya ha baraan nga espiritu.” Bangin nahiyom hiya ngan nakikita ha iya mga mata an duro nga kalipay. Kay ano nga nalipay gud hiya? Ginsugo pa la niya an 70 han iya mga disipulo nga magsangyaw han maopay nga sumat han Ginhadian han Dios. Karuyag gud niya hibaroan kon paonan-o nira tutumanon an ira toka. Damu an maimpluwensya nga kaaway han maopay nga sumat, sugad han tuso ngan edukado nga mga eskriba ngan mga Pariseo. Gin-impluwensyahan nira an damu nga tawo nga tagdon hi Jesus sugad nga panday la ngan an iya mga disipulo sugad nga ‘ordinaryo la ngan diri edukado.’ (Buh. 4:13; Mar. 6:3) Bisan pa hito, malipayon nga binalik an mga disipulo tikang ha ira toka. Nagsangyaw hira bisan pa han pagkontra han mga tawo ngan mga demonyo! Kay ano nga nagin malipayon ngan maisugon hira?—Basaha an Lucas 10:1, 17-21.
2. (a) Ha ano nga paagi an mga disipulo ni Jesus pariho hin kabataan? (b) Paonan-o nasabtan han mga sumurunod han Kristo an importante nga mga kamatuoran ha Kasuratan?
2 Tagda an ginsiring ni Jesus kan Jehova: “Amay, Ginoo han langit ngan han tuna, gindadayaw ko ikaw ha kadaygan, kay ini nga mga kamatuoran imo gintago tikang ha mga maaramon ngan edukado ngan iginpahayag ini ha kabataan. Oo, Amay, kay uyon ini han imo kaburut-on.” (Mat. 11:25, 26) Syempre, diri karuyag sidngon ni Jesus nga an iya mga disipulo literal nga kabataan. Lugod, maaram hiya nga sugad hira hin kabataan kon itanding ha baltok ngan edukado nga mga tawo ha nasud, nga hitaas an pagkita ha ira kalugaringon. Ngan an mas importante, gintutdoan niya an iya mga sumurunod nga magin pariho hin kabataan—mapainubsanon ngan andam magpatutdo. (Mat. 18:1-4) Paonan-o hira nagpahimulos ha pagin mapainubsanon? Ginbuligan hira ni Jehova pinaagi han iya baraan nga espiritu nga masabtan an importante nga mga kamatuoran ha Kasuratan samtang adton maaramon ngan mga baltok, nga nagtatamay ha ira, padayon nga nabutahan ni Satanas ngan han pagin mapahitas-on.
3. Ano an aton hihisgotan hini nga artikulo?
3 Diri urusahon nga nalipay gud hi Jesus! Nalipay hiya ha paagi ni Jehova ha pagpahayag han higlarom nga mga kamatuoran ha ngatanan nga mapainubsanon nga tawo, anoman an ira edukasyon o kinaadman. Nalipay hiya nga gin-uyonan han iya Amay an simple ngan klaro nga paagi han pagtutdo. Waray magbag-o hi Jehova. Paonan-o niya iginpapakita nga gin-uuyonan pa gihapon niya an sugad nga paagi han pagtutdo? Samtang ginhihisgotan naton an baton hini, malilipay liwat kita pariho kan Jesus.
GINPASIMPLE AN PAGSAYSAY HAN HIGLAROM NGA KAMATUORAN
4. Kay ano nga usa nga mahigugmaon nga regalo an ginpasimple nga edisyon han The Watchtower?
4 Hinin bag-o la nga mga tuig, makikita ha espirituwal nga instruksyon nga igintatagana han organisasyon ni Jehova an mas hilarom nga pagpabili ha simple ngan klaro nga paagi han pagtutdo. Tagda an tulo nga ehemplo. Siyahan, nagkaada ginpasimple nga edisyon han The Watchtower. * Mahigugmaon gud ini nga regalo para hadton nakukurian pagbasa o pagsabot han yinaknan. Naobserbaran han mga ulo han pamilya nga an ira mga anak mas nakikigbahin na ha pag-aram hini nga magasin, an nangunguna nga garamiton ha pagpakaon ha aton ha espirituwal. Damu an nagsurat ha Nagmamando nga Lawas basi ipahayag an ira kinasingkasing nga apresasyon. Usa nga bugto an nagsiring nga hadto nahahadlok hiya pagkomento durante han Pag-aram ha Barantayan. Pero yana, diri na! Han nagtikang hiya paggamit han ginpasimple nga edisyon, hiya nagsiring: “Yana, diri la usa ka beses ako nagkukomento, ngan diri na ako nahahadlok! Nagpapasalamat ako kan Jehova ngan ha iyo.”
5. Ano an pipira nga kapulsanan han ginrebisa nga edisyon han New World Translation of the Holy Scriptures?
5 Ikaduha, nagkaada ginrebisa nga edisyon han New World Translation of the Holy Scriptures ha Ingles nga yinaknan nga iginpagowa ha tinuig nga katirok han Oktubre 5, 2013. * Damu nga teksto an ginpahalipot, pero waray mabag-o an kahulogan ngan nagin mas matin-aw pa ngani. Pananglitan, an Job 10:1 may-ada 27 nga pulong hadto, yana 19 na la; an Proberbios 8:6 may-ada 20 nga pulong hadto, yana 13 na la. Inin duha nga teksto mas matin-aw ha bag-o nga edisyon. Ngani, usa nga matinumanon nga dinihogan nga maunungon nga nag-aalagad ha sulod hin damu na ka dekada, an nagsiring: “Natapos ko pa la mabasa an libro han Job ha bag-o nga edisyon, ngan inabat ko nga baga hin yana ko pa la ito nasabtan!” Damu an nagsiring liwat hin sugad hito.
6. Ano an imo inaabat mahitungod ha pagbag-o han aton pagsabot ha Mateo 24:45-47?
6 Ikatulo, tagda an pipira han diri pa la maiha nga mga pagbag-o ha aton pagsabot. Pananglitan, nalipay gud kita ha iginpatin-aw nga pagsabot may kalabotan ha “matinumanon ngan maaramon nga uripon,” nga ginhisgotan ha Hulyo 15, 2013 nga Barantayan. (Mat. 24:45-47) Iginsaysay hito nga an matinumanon nga uripon amo an Nagmamando nga Lawas, ngan an “mga surugoon ha panimalay” amo an ngatanan nga ginpapakaon ha espirituwal, dinihogan man o kaapi ha “iba nga mga karnero.” (Juan 10:16) Makalilipay gud an paghibaro hito nga mga kamatuoran ngan an pagtutdo hito ha mga bag-ohan! Ano an iba pa nga paagi nga iginpapakita ni Jehova nga gin-uuyonan niya an simple ngan klaro nga paagi han pagtutdo?
MAS SIMPLE NGAN MAS KLARO NGA PAGSAYSAY HA MGA ASOY HA BIBLIA
7, 8. Ano an pipira han mga asoy ha Biblia nga may-ada ginpapadagawan?
7 Kon maiha ka na nga nag-aalagad kan Jehova, bangin naobserbaran mo ha aton mga literatura an hinay-hinay nga pagbag-o ha paagi han pagsaysay ha mga asoy ha Biblia. Ha naglabay, an aton mga literatura agsob magsiring nga an pipira nga asoy ha Biblia may-ada ginpapadagawan. An asoy ha Biblia gintatawag nga tipiko, ngan an ginrirepresentaran han tipiko gintatawag nga antitipiko. May Kasuratanhon ba nga basihan an sugad nga pagsaysay? Oo. Pananglitan, gin-unabi ni Jesus an “tigaman ni Jonas nga propeta.” (Basaha an Mateo 12:39, 40.) Iginsaysay ni Jesus nga an panahon nga nakadto hi Jonas ha tiyan han isda—nga magigin lubnganan unta ni Jonas kon waray hiya talwasa ni Jehova—nagrirepresentar ha panahon nga patay hi Jesus.
8 May iba pa nga asoy ha Biblia nga may-ada ginpapadagawan. Ginhisgotan ni apostol Pablo an pipira hito. Pananglitan, an relasyon ni Abraham kan Hagar ngan Sara nagrirepresentar han relasyon ni Jehova ha nasud han Israel ngan ha langitnon nga bahin han Iya organisasyon. (Gal. 4:22-26) Ha pariho nga paagi, an tabernakulo ngan an templo, an Adlaw han Pagbayad han Sala, an hitaas nga saserdote, ngan an iba nga bahin han Mosaiko nga Balaud ‘nagpapadagaw han maopay nga mga butang nga maabot.’ (Heb. 9:23-25; 10:1) Napaparig-on an aton pagtoo kon gin-aadman naton ini nga mga asoy ha Biblia ngan an ginrirepresentaran hito. Kondi sadang ba naton hunahunaon nga an tagsa nga indibiduwal, panhitabo, ngan butang nga ginhihisgotan ha Biblia may-ada ginpapadagawan?
9. Ano an aton pagsaysay hadto ha asoy han Biblia mahitungod kan Nabot?
9 Ha naglabay, kasagaran nga sugad hito an pagsaysay ha mga asoy ha Biblia. Pananglitan, tagda an asoy mahitungod kan Nabot. Diri makatadunganon nga ginbista ngan ginpapatay hiya han maraot nga hi Rayna Jesebel basi makuha han bana hito nga hi Ahab an urubasan ni Nabot. (1 Hadi 21:1-16) Han 1932, iginsaysay han The Watchtower nga hira Ahab ngan Jesebel nagrirepresentar kan Satanas ngan han iya organisasyon; hi Nabot nagrirepresentar kan Jesus; ngan an kamatayon ni Nabot, nagsisimbolo ha kamatayon ni Jesus. Kondi, paglabay hin mga dekada, an libro nga “Let Your Name Be Sanctified,” nga iginpublikar han 1961, nagsiring nga hi Nabot nagrirepresentar ha mga dinihogan, ngan hi Jesebel nagrirepresentar ha Kakristianohan. Salit an pagtimaraot ni Jesebel kan Nabot nagsisimbolo ha pagtimaraot ha mga dinihogan durante han kataposan nga mga adlaw. Ha sulod hin damu ka tuig, naparig-on an pagtoo han katawohan han Dios han sugad nga mga pagsaysay. Kon sugad, kay ano nga kinahanglan hin pagbag-o?
10. (a) Paonan-o an pagin maaramon nabulig ha matinumanon nga uripon nga magin mas maikmat ha pagsaysay han mga asoy ha Biblia? (b) Ha ano mas nakapokus an aton mga literatura yana?
10 Ha paglabay han mga tuig, padayon nga ginbubuligan ni Jehova an “matinumanon ngan maaramon nga uripon” nga magin mas maaramon. An pagin maaramon nabulig ha ira nga magin maikmat ha pagsiring nga an usa nga asoy ha Biblia may-ada ginpapadagawan labot la kon may matin-aw nga Kasuratanhon nga basihan ha pagbuhat hito. Dugang pa, naobserbaran nga an pipira nga pagsaysay hadto han mga asoy gamit an tipiko ngan antitipiko makuri gud masabtan han damu ha aton. An mga detalye han sugad nga katutdoan—kon hin-o an ginrirepresentaran ngan kon kay ano—makuri sabuton, hinumdoman, ngan iaplikar. Labaw ha ngatanan, bangin magin diri matin-aw o mawara an moral ngan praktikal nga mga leksyon han mga asoy ha Biblia tungod ha pagpinamiling han posible nga ginrirepresentaran han mga asoy. Salit yana, an aton mga literatura mas nakapokus ha simple ngan praktikal nga mga leksyon may kalabotan ha pagtoo, pagpailob, debosyon ha Dios, ngan iba pa nga importante nga kalidad nga aton hibabaroan tikang ha mga asoy ha Biblia. *
An ehemplo ni Nabot nagtututdo ha aton hin mapulsanon gud nga leksyon (Kitaa an parapo 11)
11. (a) Ano an aton pagsabot yana ha asoy mahitungod kan Nabot, ngan kay ano nga mapulsanon ha aton an iya susbaranan? (b) Kay ano nga an aton mga publikasyon yana talagsa na la mag-unabi hin tipiko ngan antitipiko? (Kitaa an “Mga Pakiana Tikang ha mga Magbarasa” dinhi hini nga gowa.)
11 Yana, mas klaro ngan mas simple na an aton pagsabot ha asoy mahitungod kan Nabot. Inin matadong nga tawo namatay, diri tungod kay nagrirepresentar hiya kan Jesus o ha mga dinihogan, kondi tungod kay gintipigan niya an iya integridad. Ginsunod niya an Balaud ni Jehova bisan pa han pagtimaraot han gamhanan nga mga magmarando. (Num. 36:7; 1 Hadi 21:3) Mapulsanon ha aton an iya susbaranan tungod kay posible liwat kita makaeksperyensya hin sugad nga pagtimaraot. (Basaha an 2 Timoteo 3:12.) An sugad nga leksyon nga makaparig-on ha pagtoo masayon masabtan, mahinumdoman, ngan maiaplikar han ngatanan nga Kristiano.
12. (a) Ano an diri naton sadang hunahunaon may kalabotan ha mga asoy ha Biblia? (b) Kay ano nga may-ada kita matin-aw nga pagsabot bisan han higlarom nga butang? (Kitaa an footnote.)
12 Sadang ba naton hunahunaon nga praktikal la nga mga leksyon an aton hibabaroan ha mga asoy ha Biblia ngan waray na ito iba nga kahulogan? Diri. Igintututdo han aton mga publikasyon yana nga an usa nga asoy nagpapahinumdom o nag-iilustrar han iba nga asoy. Posible nga diri na hito isaysay an damu nga mga asoy ha Biblia sugad nga tipiko ngan antitipiko. Pananglitan, an pagtipig ni Nabot han iya integridad bisan pa han iya naeksperyensyahan nga pagtimaraot ngan kamatayon nagpapahinumdom ha aton han integridad han Kristo ngan han mga dinihogan. Kondi, mahimo liwat ito magpahinumdom ha aton han pagin matinumanon han damu nga kaapi han “iba nga mga karnero” han Ginoo. An sugad nga simple ngan klaro nga pagsaysay tigaman han pagtutdo nga tikang ha Dios. *
MAS SIMPLE NGA PAGSAYSAY HAN MGA ILUSTRASYON NI JESUS
13. Ano nga mga ehemplo an nagpapakita nga mas simple ngan mas klaro na yana an aton pagsaysay ha mga ilustrasyon ni Jesus?
13 Hi Jesu-Kristo an pinakabantogan nga Magturutdo nga nabuhi ha tuna. Agsob hiya gumamit hin mga ilustrasyon ha pagtutdo. (Mat. 13:34) An mga ilustrasyon naghahatag hin matin-aw nga paghulagway nga nagpapagios ha hunahuna ngan nakakabantad ha kasingkasing. Ha paglabay han mga tuig, nagin mas simple ngan mas klaro ba an pagsaysay han aton mga literatura han mga ilustrasyon ni Jesus? Oo! Nalipay gud kita ha pagkaada mas matin-aw nga pagsabot ha mga ilustrasyon ni Jesus mahitungod han libadura, han liso han mustasa, ngan han pukot nga ginhisgotan ha Hulyo 15, 2008, nga An Barantayan. Mas klaro na ha aton yana nga ini nga mga ilustrasyon ni Jesus naaplikar ha Ginhadian han Dios ngan ha daku nga kalamposan hito ha pagtirok han tinuod nga mga sumurunod han Kristo tikang hinin maraot nga kalibotan.
14. (a) Ano an aton pagsaysay hadto han parabola mahitungod han maloloy-on nga Samaritano? (b) Ano an aton pagsabot yana ha parabola ni Jesus?
14 Kondi kumusta man an detalyado nga mga istorya, o parabola, nga iginsumat ni Jesus? Syempre, simboliko ngan matagnaon an pipira hito, samtang an iba nagtututdo hin praktikal nga mga leksyon. Pero paonan-o naton mahibabaroan kon an usa nga asoy may simboliko nga kahulogan o waray? Paglabay han panahon, hinay-hinay nga nagin matin-aw an baton hito nga pakiana. Pananglitan, tagda an aton pagsaysay hadto han parabola ni Jesus mahitungod han maloloy-on nga Samaritano. (Luc. 10:30-37) Han 1924, an The Watch Tower nagsiring nga an Samaritano nagrirepresentar kan Jesus; an tipalusad nga dalan tikang ha Jerusalem ngadto ha Jerico, nagsisimbolo ha nagtitikaraot nga pagkinabuhi han tawo tikang han pagrebelde nga nahitabo ha Eden; an mga tulisan ha dalan nagrirepresentar ha dagku nga korporasyon ngan hakog nga mga negosyante; ngan an saserdote ngan an Lebihanon nagrirepresentar ha Kakristianohan. Yana, ginagamit han aton mga literatura ini nga ilustrasyon ha pagpahinumdom ha ngatanan nga Kristiano nga kinahanglan waray hira ginpapaurog kon nabulig hira ha mga nanginginahanglan, labi na hadton nagkikinahanglan hin espirituwal nga bulig. Nalilipay gud kita nga ginpapasimple ni Jehova an iya katutdoan basi magin klaro ito ha aton!
15. Ano an aton hihisgotan ha sunod nga artikulo?
15 Ha sunod nga artikulo, hihisgotan naton an usa pa nga parabola ni Jesus—an mahitungod han “napulo nga birhen.” (Mat. 25:1-13) Ano an karuyag ni Jesus nga magin pagsabot han iya mga sumurunod ha kataposan nga mga adlaw hito nga mapwersa nga parabola? An tagsa ba nga tawohan, butang, ngan panhitabo may simboliko nga kahulogan? O karuyag ba niya nga gamiton ito han iya mga sumurunod sugad nga praktikal nga leksyon nga maggigiya ha ira durante hinin kataposan nga mga adlaw? Aton kitaon.
^ par. 4 An ginpasimple nga edisyon siyahan nga iginpagowa ha Ingles nga yinaknan han Hulyo 2011. Tikang hadto, nagkaada liwat hini nga edisyon ha iba pa nga yinaknan.
^ par. 5 Magkakaada liwat ginrebisa nga edisyon ha iba nga yinaknan.
^ par. 10 Pananglitan, an libro nga Subara an Ira Pagtoo detalyado nga naghihisgot han kinabuhi han 14 nga tawohan ha Biblia. Nakapokus ini ha praktikal nga mga leksyon, diri ha simboliko o matagnaon nga mga kahulogan.
^ par. 12 Tinuod, may mababasa kita ha Pulong han Dios nga bangin “makuri masabtan,” upod na an pipira nga bahin han mga sinurat ni Pablo. Kondi, an ngatanan nga parasurat han Biblia giniyahan han baraan nga espiritu. Ito gihap nga pwersa an nabulig ha tinuod nga mga Kristiano yana nga masabtan an mga kamatuoran ha Biblia. Tungod hito, nagigin mas masayon masabtan ngan mas klaro ha aton limitado nga hunahuna “bisan an hilarom nga mga butang han Dios.”—2 Ped. 3:16, 17; 1 Cor. 2:10.
