1. (a) Kay ano nga importante gud nga atohan naton hi Satanas yana? (b) Paonan-o kita nahibaro nga mahimo naton mapirde hi Satanas?

HI Satanas nakikig-away ha nanhibilin nga dinihogan ngan ha “iba nga mga karnero.” (Juan 10:16) Tungod kay halipot na la an iya panahon, nangangalimbasog gud an Yawa nga bungkagon an pagtoo han mga surugoon ni Jehova. (Basaha an Pahayag 12:9, 12.) Mahimo ba naton mapirde hi Satanas? Oo! An Biblia nasiring: “Atohi an Yawa, ngan mabaya hiya ha iyo.”—San. 4:7.

2, 3. (a) Kay ano nga karuyag ni Satanas nga tumoo an mga tawo nga diri hiya naeksister? (b) Paonan-o kita nahibaro nga tinuod nga persona hi Satanas?

² Damu an diri natoo nga naeksister hi Satanas. Para ha ira, hi Satanas ngan an mga demonyo mga karakter la ha mga libro, magpakaharadlok nga pelikula, ngan mga video game. Naghuhunahuna hira nga waray baltok nga tawo nga matoo ha magraot nga espiritu. Apektado ba hi Satanas nga an mga tawo diri natoo nga naeksister hiya ngan an iya mga demonyo? Diri gud! Aw, mas masayon pa ngani ha iya nga mabutahan an hunahuna hadton nagruruhaduha nga naeksister hiya. (2 Cor. 4:4) Ngan iginpapasarang niya ito nga ideya basi limbongan an mga tawo.

³ Sugad nga mga surugoon ni Jehova, diri kita nalilimbongan. Maaram  kita nga hi Satanas nga Yawa tinuod nga persona, kay nakiistorya hiya kan Eva pinaagi hin halas. (Gen. 3:1-5) Nakiistorya hiya kan Jehova ngan ginkwestyon an motibo ni Job. (Job 1:9-12) Nangalimbasog liwat hiya pagsulay kan Jesus. (Mat. 4:1-10) Ngan han naestablisar an Ginhadian han Dios han 1914, ‘nakiggirra’ hiya ha nanhibilin nga dinihogan. (Pah. 12:17) Nagpapadayon ito nga girra samtang nangangalimbasog hiya ha pagbungkag han pagtoo han mga dinihogan ngan han iba nga mga karnero. Basi magdaog ha aton pakig-away, kinahanglan naton atohan hi Satanas ngan tipigan nga marig-on an aton pagtoo. Hihisgotan hini nga artikulo an tulo nga paagi ha pagbuhat hito.

4. Kay ano nga hi Satanas an pinakaangayan nga ehemplo han pagpasigarbo?

⁴ Hi Satanas mapahitas-on gud hinduro. Inin maraot nga anghel nga nagpasipara pagkontra ha pagkasoberano ni Jehova ngan nangalimbasog magin karibal han Dios, an pinakaangayan nga ehemplo han pagpasigarbo ngan pagpahitaas. Salit, usa nga paagi nga maaatohan naton hi Satanas amo an pagsalikway han pagpasigarbo ngan pagkultibar han pagpaubos. (Basaha an 1 Pedro 5:5.) Pero ano an pagpasigarbo? Pirme ba ito maraot?

5, 6. (a) Pirme ba maraot an pagpasigarbo? Isaysay. (b) Ano nga klase hin pagpasigarbo an peligroso, ngan ano an pipira nga ehemplo hini ha Biblia?

⁵ Usa nga diksyonaryo an naghatag hin kahulogan han pulong nga pagpasigarbo sugad nga “pag-abat hin pagkaada dignidad ngan pagtahod ha kalugaringon” ngan “pag-abat hin katagbaw tungod kay ikaw o an mga tawo nga duok ha imo may ginbuhat nga maopay o may gintatag-iya nga maopay.” Diri maraot an sugad nga pag-abat. Ginsidngan ni apostol Pablo an mga taga-Tesalonica: “Gindadayaw [o iginpapasigarbo] namon kamo ha mga kongregasyon han Dios tungod han iyo pagpailob ngan pagtoo bisan pa han ngatanan nga pagtimaraot ngan kasakitan nga iyo gin-aantos.” (2 Tes. 1:4) Salit an kalipay tungod ha nahimo han iba ngan an husto nga pagpasigarbo ha kalugaringon mahimo magin mapulsanon. Diri naton angay ikaawod an aton pamilya, kultura, o lugar nga gindak-an.—Buh. 21:39.

⁶ Pero, may klase hin pagpasigarbo nga nakakadaot hin relasyon, labi na ha aton pakigsangkay kan Jehova. An sugad nga pagpasigarbo mahimo magin hinungdan nga masina kita ngan isalikway an sagdon ha aton imbes nga mapainubsanon nga karawaton ito. (Sal. 141:5) Ini nga klase hin pagpasigarbo nangangahulogan hin “hitaas nga pagkita ha kalugaringon” o “mapahitas-on nga disposisyon han mga tawo nga naghuhunahuna, nga agsob waray basihan, nga mas maopay hira kay ha iba.” Nangangalas gud hi Jehova hini nga klase han pagpasigarbo. (Esek. 33:28; Amos 6:8) Kondi nalilipay hi Satanas kon naghahambog an mga tawo tungod kay iginpapakita hito an iya pagkamapahitas-on. Sigurado nga nalipay gud hiya ha pagpahitaas nira Nimrod, Paraon, ngan Absalon—mga biktima han sayop nga pagpasigarbo! (Gen. 10:8, 9; Eks. 5:1, 2; 2 Sam. 15:4-6) Ito liwat an nagin hinungdan nga nadaot an relasyon ni Cain ha Dios. Ginsagdonan hiya han Dios pero nagin mapahitas-on hiya. Iya ginbalewaray an pahamangno ni Jehova ngan waray pag-alang ha pagbuhat hin sala.—Gen. 4:6-8.

7, 8. (a) Ano an rasismo, ngan ano an koneksyon hito ha pagpasigarbo? (b) Isaysay kon paonan-o an pagpasigarbo mahimo magwara han kamurayawan han kongregasyon?

⁷ Yana, iginpapakita han mga tawo an pagpasigarbo ha nakakadaot nga mga paagi. Usahay konektado ito ha rasismo. Sumala ha usa nga diksyonaryo, an rasismo amo an “pagpasulabi o kangalas ha mga tawo nga iba an lahi” ngan an “paghunahuna nga an mga tawo nga iba an lahi may iba nga kalidad ngan abilidad, ngan may mga lahi nga labaw o minos.” An rasismo nagriresulta ha araway, girra, ngan pamatay pa ngani hin damu nga tawo.

 ⁸ Syempre, diri ito sadang mahitabo ha Kristiano nga kongregasyon. Pero an diri pagkasinabtanay han kabugtoan, nga usahay tungod han pagpasigarbo, mahimo dumaku. Nahitabo ito ha siyahan-siglo nga mga Kristiano, salit ginbangon ni Santiago inin mapwersa nga pakiana: “Ano an gintikangan han iyo mga girra ngan araway?” (San. 4:1) Oo, kon nangangalas kita ha iba ngan inaabat naton nga mas maopay kita kay ha ira, posible nga makagyakan o makagbuhat kita hin makakasakit ha ira. (Prob. 12:18) Matin-aw, an pagpasigarbo mahimo magwara han kamurayawan han kongregasyon.

9. Paonan-o kita ginbubuligan han Biblia nga maatohan an rasismo ngan sayop nga pagpasigarbo? (Kitaa an retrato ha tinikangan hini nga artikulo.)

⁹ Kon may tendensya kita nga umabat nga labaw kita ha iba, kinahanglan naton hinumdoman nga “an tagsa-tagsa nga palabilabihon an kasingkasing amo an mangil-ad kan Jehova.” (Prob. 16:5) Mapulsanon liwat kon uusisahon naton an aton panhunahuna hadton iba an lahi, nasyonalidad, o kultura. Kon inaabat naton nga labaw an aton lahi o nasud kay ha iba, ginbabalewaray naton an kamatuoran nga “tikang ha usa nga tawo ginhimo [han Dios] an ngatanan nga nasud.” (Buh. 17:26) Iginpapakita hini nga uusa la an aton lahi, kay kita ngatanan nagtikang kan Adan. Salit kalurongan gud an paghunahuna nga may lahi nga labaw o minos kay ha iba. Kon sugad hito an aton panhunahuna, gintutugotan naton hi Satanas nga dauton an aton Kristiano nga gugma ngan pagkaurosa. (Juan 13:35) Basi maatohan ngan mapirde hi Satanas, kinahanglan likyan naton an sayop nga pagpasigarbo.—Prob. 16:18.

10, 11. (a) Kay ano nga bangin masayon la higugmaon an kalibotan? (b) Ano an resulta han paghigugma ni Demas ha kalibotan?

¹⁰ Hi Satanas an “magmarando hini nga kalibotan,” ngan kontrolado niya ini. (Juan 12:31; 1 Juan 5:19) Salit, kadam-an han igintatanyag hini diri gud uyon ha mga suruklan han Biblia. Diri man maraot an ngatanan nga igintatanyag han kalibotan. Pero sigurado nga gagamiton ni Satanas an iya kalibotan basi salingabuton an aton mga hingyap ngan sulayon kita nga magbuhat hin sala o higugmaon an kalibotan ngan balewarayon an aton pagsingba kan Jehova.—Basaha an 1 Juan 2:15, 16.

¹¹ Ha siyahan nga siglo, ginhigugma han pipira nga Kristiano an kalibotan. Pananglitan, hi Pablo nagsurat: “Ginbayaan ako ni Demas tungod kay nahigugma hiya hini nga sistema.” (2 Tim. 4:10) Waray unabiha ha Biblia kon ano nga espisipiko nga bahin han kalibotan an ginhigugma ni Demas, nga tungod hito iya ginbayaan hi Pablo. Posible nga mas ginhigugma ni Demas an materyal nga mga butang kay han pag-alagad kan Jehova. Kon ito an nahitabo, nawara niya an higayon nga magkaada makalilipay nga mga pribilehiyo ha pag-alagad ha Dios. May kapulsanan ba ito? May maihahatag ba an kalibotan kan Demas nga labaw kay ha mga bendisyon nga maihahatag ni Jehova ha iya sugad nga kaupod ni Pablo?—Prob. 10:22.

12. Paonan-o kita mahimo masulay han “nakakalimbong nga gahum han karikohan”?

¹² Mahimo liwat ito mahitabo ha aton. Sugad nga mga Kristiano, normal la nga karuyag naton maitagana an aton materyal nga panginahanglan pati an panginahanglan han aton pamilya. (1 Tim. 5:8) Maaram kita nga karuyag ni Jehova nga magkaada kita komportable nga kinabuhi tungod kay ginpaukoy niya hira Adan ngan Eva ha makaruruyag nga paraiso. (Gen. 2:9) Pero mahimo salingabuton ni Satanas an aton hingyap pinaagi han “nakakalimbong nga gahum han karikohan.” (Mat. 13:22) Damu an naghuhunahuna nga an kwarta ngan materyal nga panag-iya makakaghatag ha ira hin kalipay o kalamposan. An sugad nga panhunahuna  usa nga limbong, ngan mahimo ito makagwara han aton birilhon nga panag-iya—an aton relasyon kan Jehova. Ginpahamangnoan ni Jesus an iya mga sumurunod: “Waray makakagserbi ha duha nga agaron kay masisina hiya ha usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagpauripon ha Dios ngan ha Karikohan.” (Mat. 6:24) Kon magin uripon kita han Karikohan, diri na kita surugoon ni Jehova, ngan ito gud an karuyag ni Satanas nga buhaton naton! Hinaot diri naton tugotan an kwarta o an ngatanan nga napapalit hito nga magin mas importante kay ha aton pakigsangkay kan Jehova. Basi maatohan ngan mapirde hi Satanas, kinahanglan naton tipigan an timbang nga panhunahuna ha materyal nga mga butang.—Basaha an 1 Timoteo 6:6-10.

13. Ano an sayop nga panhunahuna han kalibotan mahitungod ha pag-asawa ngan sekso?

¹³ Usa pa nga lit-ag han kalibotan ni Satanas an seksuwal nga imoralidad. Damu an naghuhunahuna nga an pagin maunungon ha asawa o bana, ngan ha pag-asawa mismo, kadaan na ngan naglilimita han ira kagawasan. Pananglitan, usa nga sikat nga artista an nagsiring nga imposible an pagin maunungon ha padis. Hiya nagdugang: “Waray ko kilala nga maunungon o karuyag magin maunungon.” Usa pa nga artista an nagsiring: “Diri ako sigurado kon natural ba ha aton nga makig-upod ha usa la nga padis ha bug-os naton nga kinabuhi.” Nalilipay gud hi Satanas kon gintatamay han kilala nga mga tawo an regalo han Dios nga pag-asawa. Diri gud nasuporta an Yawa ha kahikayan han pag-asawa, ngan diri niya karuyag nga maglampos ito. Salit basi maatohan ngan mapirde hi Satanas, kinahanglan naton tahuron an kahikayan han Dios ha pag-asawa.

14, 15. Paonan-o naton malilikyan an seksuwal nga imoralidad?

¹⁴ Inasaw-an man o solo, kinahanglan mangalimbasog gud kita nga likyan an ngatanan nga klase han seksuwal nga imoralidad. Masayon ba ito? Diri gud! Pananglitan, kon usa ka nga batan-on, bangin nababatian mo nga iginhahambog han imo mga kaeskwela an ira pakighilawas ha bisan hin-o nga ira karuyag o an ira pakig-sexting, nga amo an pagpadara hin maglaw-ay nga mensahe ngan retrato ha ira celfon. Ha iba nga nasud, an sexting gintatagad nga pariho ha pagpadara hin child pornography. An Biblia nasiring: “An nagbubuhat hin imoralidad nakakasala ha iya kalugaringon nga lawas.” (1 Cor. 6:18) Damu an nag-aantos ngan namamatay tungod han mga sakit nga nakukuha ha pakighilawas. Ngan kadam-an han solo nga mga batan-on nga nakaeksperyensya na hin pakighilawas an nagsiring nga nagbabasol hira han ira ginbuhat. Igin-aaghat han media an panhunahuna nga waray maraot nga resulta an pagtalapas ha mga balaud han Dios. Kon tumoo kita hito, magigin biktima kita han “nakakalimbong nga gahum han sala.”—Heb. 3:13.

¹⁵ Kon nasusulay ka ha pagbuhat hin seksuwal nga imoralidad, ano an sadang mo buhaton? Karawata nga may-ada ka kaluyahan. (Roma 7:22, 23) Pag-ampo ha Dios nga tagan ka hin kusog. (Fil. 4:6, 7, 13) Likyi an mga sitwasyon diin mahimo ka masulay ha pagbuhat hin imoralidad. (Prob. 22:3) Ngan kon umatubang ka hin pagsulay, isalikway dayon ito.—Gen. 39:12.

16. Ano an ginbuhat ni Jesus han ginsulay hiya ni Satanas, ngan ano an aton hibabaroan ha Iya susbaranan?

¹⁶ Hi Jesus nagpakita hin maopay gud nga susbaranan ha pag-ato ha mga pagsulay. Waray hiya malimbongi han mga saad ni Satanas, ngan waray gud niya ito hunahunaa. Lugod, binaton dayon hiya: “Ini an iginsurat.” (Basaha an Mateo 4:4-10.) Maaram gud hiya han Pulong  han Dios, salit nakagkotar dayon hiya hin teksto han ginsulay hiya ni Satanas. Basi maatohan ngan mapirde hi Satanas, diri naton sadang tugotan nga masulay kita ha pagbuhat hin seksuwal nga imoralidad.—1 Cor. 6:9, 10.

17, 18. (a) Ano an iba pa nga taktika nga ginagamit ni Satanas, ngan kay ano nga diri kita sadang mahipausa hito? (b) Ano an mahitatabo kan Satanas, ngan kay ano nga nag-aaghat ito ha imo nga magpailob?

¹⁷ An pagpasigarbo, materyalismo, ngan seksuwal nga imoralidad tulo la han mga taktika ni Satanas. Damu pa an iya mga taktika. Pananglitan, an pipira nga Kristiano ginkukontra han ira mga kapamilya, gintatamay han ira mga kaeskwela, o gindidid-an pa ngani han gobyerno nga magsangyaw. Pero diri kita nahipapausa hito kay hi Jesus nagpahamangno ha aton: “Mapupungot ha iyo an ngatanan nga tawo tungod ha akon ngaran, pero an magpailob tubtob ha kataposan amo an matatalwas.”—Mat. 10:22.

¹⁸ Paonan-o naton maaatohan ngan mapipirde hi Satanas? Hi Jesus nagsiring ha iya mga disipulo: “Pinaagi han iyo pagpailob matatalwas an iyo kalag.” (Luc. 21:19) An mga tawo waray mahihimo nga permanente nga kadaot ha aton. Waray bisan hin-o nga makakadaot han aton pakigsangkay ha Dios labot la kon tugotan naton ito nga mahitabo. (Roma 8:38, 39) Bisan kon mamatay an magtinumanon nga surugoon ni Jehova, diri ito nagpapasabot nga nagdaog hi Satanas, kay babanhawon hira ni Jehova! (Juan 5:28, 29) Pero waray gud kabubuwason hi Satanas. Katapos bungkagon inin maraot nga sistema, ilalabog hiya ha kahiladman ha sulod hin 1,000 ka tuig. (Pah. 20:1-3) Kahuman han Usa ka Yukot ka Tuig nga Pagmando han Kristo, “bubuhian hi Satanas ha iya prisohan” hin halipot nga panahon ngan mangangalimbasog paglimbong ha perpekto nga katawohan ha ultimo nga higayon. Katapos hito, bubungkagon hiya. (Pah. 20:7-10) Sigurado nga mabubungkag hi Satanas, pero diri ito mahitatabo ha imo! Padayon nga atohi hiya, ngan tipigi nga marig-on an imo pagtoo. Maaatohan ngan mapipirde mo hi Satanas!