TEMPRANO adto han katpaso han 1970. Nahospital ako ha Valley Forge General Hospital, Phoenixville, Pennsylvania, Estados Unidos, tungod hin grabe ngan nakakatapon nga sakit. Kada 30 minutos, ginkukuha han usa nga lalaki nga nars an presyon han akon dugo. Bainte anyos ako hito nga panahon ngan usa nga sundalo. An nars, nga magurang la ha akon hin pipira ka tuig, nababaraka gud. Samtang padayon nga nahamubo an presyon han akon dugo, ginpakianhan ko hiya, “Waray ka pa pakakita hin namatay, ano?” Nanduas hiya ngan binaton, “Waray pa.”

Hito nga panahon, baga hin waray na ako tsansa nga mabuhi. Pero kay ano nga nagkaada ako grabe nga sakit? Iistoryahan ko kamo mahitungod han akon kinabuhi.

Nagkasakit ako samtang nagtatrabaho sugad nga operating room technician durante han girra ha Vietnam. Nalilipay ako pagbulig ha mga may sakit ngan ha mga nasamaran ngan karuyag ko magin surgeon. Inabot ako ha Vietnam han Hulyo 1969. Pariho han ngatanan nga bag-o nga naabot, gintagan ako hin usa ka semana nga training basi makapahiuyon ha oras didto ngan ha duro nga kapaso.

Waray pag-iha, pagreport ko ha trabaho ha usa nga surgical hospital ha Mekong Delta, ha Dong Tam, damu nga helikopter an inabot nga puno hin mga nasamaran ngan mga patay. Hinigugma ko gud an akon nasud ngan an akon trabaho, salit binulig dayon ako. An mga nasamaran gin-andam ngan gindara ha gudtiay nga naka-aircon nga kwarto nga hinimo ha metal nga ginagamit sugad nga operating room. Didto naghuhuruot an surgeon, anesthetist, ngan duha nga nars, nga nangangalimbasog gud ha pagtalwas hin kinabuhi. Naobserbaran ko nga may dagku nga itom nga surudlan nga waray ihaw-as ha mga helikopter. Hinbaroan ko nga mga parti han lawas han mga sundalo nga nabuthan an sulod hito. Ini an tinikangan han akon pakigbahin ha girra.

Han batan-on pa ako, may gutiay na ako nga hinbabaroan mahitungod ha kamatuoran nga igintututdo han mga Saksi ni Jehova. An akon nanay nag-aram ha Biblia upod han mga Saksi, pero waray hiya mabawtismohi. Nalilipay gud ako pag-api ha pag-aram ni Nanay. Usa ka higayon, linabay kami han akon pinakaamay ha usa nga Kingdom Hall. Ginpakianhan ko hiya, “Ano ito?” Binaton hiya, “Ayaw gud paghirani hito nga  mga tawo!” Tungod kay hinigugma ko hiya ngan natapod ako ha iya, ginsunod ko an iya ginsiring. Salit tikang hadto, waray na ako makigkita ha mga Saksi.

Pag-uli ko tikang ha Vietnam, inabat ko nga kinahanglan ko an Dios ha akon kinabuhi. Tungod han masakit nga mga hinumdoman, nawad-an ako hin pagbati. Baga hin waray gud nakakasabot han nahitatabo ha Vietnam. Nahinunumdoman ko pa an mga rali diin gintawag han mga nagpuprotesta an Amerikano nga mga sundalo nga parapamatay hin mga bata tungod hin mga report nga ginpamatay ha girra an inosente nga kabataan.

Basi matagbaw an akon espirituwal nga panginahanglan, sumingba ako ha iba-iba nga relihiyon. Hinigugma ko an Dios pero waray ako malipay ha akon naeksperyensyahan ha mga relihiyon. Ha urhi, tinambong ako ha Kingdom Hall han mga Saksi ni Jehova ha Delray Beach, Florida. Domingo adto han Pebrero 1971.

Pag-abot ko, matatapos na an pahayag publiko, salit nagpabilin ako para ha sunod nga programa, an pag-aram ha Barantayan. Diri ko na nahinunumdoman an ginhisgotan, pero nahinunumdoman ko pa an gudtiay nga kabataan nga namimiling ha ira Biblia han gin-uunabi nga mga teksto. Bumilib gud ako hito! Namati ako ngan nag-obserbar. Han tigawas na ako ha Kingdom Hall, dumaop ha akon an usa nga bugto nga mga 80 anyos—hi Jim Gardner. Dara niya an libro nga An Kamatuoran nga Nagtutugway Ngadto ha Kinabuhi nga Waray Katapusan ngan nagsiring, “Karuyag ko ini ihatag ha imo.” Nagsabot kami nga mag-aram han Biblia ha Huwebes han aga.

Kinahanglan ko magtrabaho ha gab-i hito nga Domingo. Nagtatrabaho ako ha emergency room han usa nga pribado nga hospital ha Boca Raton, Florida. An akon eskedyol tikang ha alas-11 ha gab-i tubtob ha alas-7 ha aga. Tungod kay waray pasyente hito nga gab-i, nabasa ko an Kamatuoran nga libro. Usa nga maiha na nga nars an dumaop ha akon, ginrabot niya an libro, ginkita an kobre hito, ngan ginuliat, “Ayaw pagsiring nga magsa-Saksi ka na!” Ginkuha ko an libro ngan ginsidngan hiya, “Katunga pa la an akon nababasa, pero baga hin masusugad gud hito!” Binaya hiya, ngan natapos ko an bug-os nga libro hito nga gab-i.

Ha amon siyahan nga pag-aram ha Biblia ni Bugto Gardner, nagpakiana ako, “Ano an aton pag-aadman?” Binaton hiya, “An libro nga iginhatag ko ha imo.” Nagsiring ako, “Nabasa ko na ito.” May pagkabuotan nga nagsiring hiya, “Paghisgotan ta la an siyahan nga kapitulo.” Nahipausa ako nga damu ngay-an an waray ko bug-os nga masabti. Iginpabasa niya ha akon an damu nga teksto ha akon Biblia nga King James Version. Nalipay ako nga nakikilala ko na an tinuod nga Dios, hi Jehova. Gin-adman namon ni Bugto Gardner, nga gintatawag ko nga Jim, an tulo nga kapitulo han Kamatuoran nga libro hito nga aga. Tikang hadto, tulo nga kapitulo an amon gin-aadman kada Huwebes han aga. Nalipay gud ako hito nga mga pag-aram. Daku nga pribilehiyo nga matutdoan hin dinihogan nga bugto nga personal nga kakilala hi Bugto Charles T. Russell!

 Paglabay hin pipira ka semana, naaprobaran ako nga magin magwarali han maopay nga sumat. Ginbuligan ako ni Jim ha akon mga ginkakabarak-an, upod na an may kalabotan ha pagsangyaw ha balay-balay. (Buh. 20:20) Tungod han iya bulig, naruyagan ko an pagsangyaw. Tubtob yana, gintatagad ko pa gihapon an ministeryo sugad nga akon pinakadaku nga pribilehiyo. Makalilipay gud magin igkasi-magburuhat han Dios!—1 Cor. 3:9.

Yana, isusumat ko ha iyo an usa nga importante nga butang—an akon gugma kan Jehova ha tinikangan. (Pah. 2:4) Ito nga gugma nakabulig ha akon nga malamposan an masakit nga mga hinumdoman ha girra ngan an iba pa nga pagsari.—Isa. 65:17.

Nahinunumdoman ko pa an usa nga espesyal nga adlaw han katsaringsing han 1971. Ginpaiwas pa la ako han akon mga kag-anak ha apartment nga ira ginpaukyan ha akon. Diri karuyag han akon pinakaamay nga may Saksi ni Jehova ha iya propyedad! Gutiay la an akon kwarta hito nga panahon. Kada duha ka semana an akon sweldo ha hospital, ngan kadak-an han akon kwarta iginpalit ko na hin mga bado basi magamit ko ha ministeryo ngan angayan nga makagrepresentar kan Jehova. May-ada ako gutiay nga natirok, pero nakadeposito ito ha usa nga bangko ha Michigan, diin ako nagdaku. Salit nag-ukoy ako ha akon awto hin pipira ka adlaw. Nagtutusar ngan naglalabar ako ha kasilyas han mga gasolinahan.

Usa ka adlaw han naukoy pa ako ha akon awto, inabot ako ha Kingdom Hall mga duha ka oras antes umabot an kabugtoan basi magsangyaw. Katatapos pa la han akon trabaho ha hospital. Samtang nalingkod ako ha luyo han Kingdom Hall diin waray nakakakita ha akon, nahinumdoman ko an makasurubo nga mga panhitabo ha Vietnam—an baho han  nasunog nga mga tawo ngan an makangingirhat nga pamatay. Sugad hin nababatian ngan nakikita ko an batan-on nga kalalakin-an nga napakiana ha akon, “Mabubuhi pa ba ako? Mabubuhi pa ba ako?” Maaram ako nga mamamatay hira, pero nangalimbasog gud ako nga liawon hira ngan diri ipaabat nga ito an mahitatabo ha ira. Tungod hini nga mga hinumdoman, nagin emosyonal gud ako.

Nag-ampo ako samtang nanunuro an akon mga luha. (Sal. 56:8) Ginpamalandong ko an paglaom nga pagkabanhaw. Katapos nasantop ko nga pinaagi han pagkabanhaw, wawad-on ni Jehova an ngatanan nga epekto han pamatay nga akon nakita ngan an kasakit nga inabat ko pati han iba. Babanhawon niya adton batan-on nga kalalakin-an, ngan magkakaada hira higayon nga mahibaro han kamatuoran mahitungod ha iya. (Buh. 24:15) Hito nga takna, an akon kasingkasing napuno hin daku nga gugma kan Jehova. Tubtob yana, espesyal pa gihapon ha akon ito nga adlaw. Tikang hito, ginbuhat ko gud an akon gimaopayi basi diri mawara an akon gugma kan Jehova ha tinikangan labi na ha panahon hin mga pagsari ngan kakurian.

Durante hin girra, an mga tawo nagbubuhat hin makangingirhat nga mga butang. Sugad liwat ako hito. Pero nakabulig ha akon an pagpamalandong ha duha han mga paborito ko nga teksto. Siyahan, an Pahayag 12:10, 11, nga nasiring nga napipirde an Yawa diri la pinaagi han aton pagsangyaw kondi pinaagi liwat han dugo han Kordero. Ikaduha, an Galacia 2:20. Hito nga teksto, hinbaroan ko nga hi Kristo Jesus namatay “para ha akon.” Ginkikita ako ni Jehova pinaagi han dugo ni Jesus, ngan Iya ako ginpasaylo han akon mga nahimo. An paghibaro hito nga kamatuoran nakabulig ha akon nga magkaada limpyo nga konsensya ngan nag-aghat ha akon nga buhaton an akon gimaopayi ha pagbulig ha iba nga mahibaro han kamatuoran mahitungod han aton maloloy-on nga Dios, hi Jehova!—Heb. 9:14.

Kon ginhuhunahuna ko an naglabay, nagpapasalamat gud ako nga pirme ako gin-aataman ni Jehova. Pananglitan, han hinbaroan ni Jim nga ha akon awto ako naukoy, iya dayon ako iginpakilala ha usa nga bugto nga may boarding house. Natoo gud ako nga gin-gamit ni Jehova hi Jim ngan adto nga bugto basi magkaada ako komportable nga urukyan. Buotan gud hi Jehova! Ginmamangnoan niya an iya magtinumanon nga magsiringba.

Han Mayo 1971, kinadto ako ha Michigan tungod kay may aasikasuhon ako. Antes bumaya ha Delray Beach Congregation ha Florida, ginpuno ko hin literatura an luyo han akon awto ngan nagbiyahe panorte ha Interstate 75. Antes pa ako makagawas ha Georgia, nga sapit nga estado han Florida, ubos na an mga literatura. Madasigon nga nagsangyaw ako han maopay nga sumat mahitungod han Ginhadian ha iba-iba nga lugar. Hinapit ako ha mga prisohan ngan nakapahamutang pa ngani hin mga tract ha mga tawo ha kasilyas han mga lugar nga pahuwayan. Tubtob yana, ginhuhunahuna ko kon may-ada ba tinubo hadto nga mga binhi.—1 Cor. 3:6, 7.

Pero han bag-o pa la ako ha kamatuoran, diri ako mataktika ha pakiistorya ha iba, labi na ha akon mga kapamilya. Tungod kay sugad hin nagkakalayo an akon gugma kan Jehova, maisugon kondi prangka ako nga nagsangyaw ha ira. Hinigugma ko gud an akon kabugtoan nga hira John ngan Ron, salit iginpipirit ko ha ira an kamatuoran. Ha urhi, nangaro ako ha ira hin pasaylo tungod han akon kawaray-pagtagad. Pero padayon ako nga nag-aampo nga karawaton unta nira an kamatuoran. Tikang hadto, gintutdoan ako ni Jehova nga magin mataktika kon nagsasangyaw ngan nagtututdo.—Col. 4:6.

Samtang padayon ko nga ginhihinumdom an akon gugma kan Jehova, diri ko liwat ginkakalimtan an iba ko pa nga hinigugma. An ikaduha ko nga hinigugma  amo an akon asawa nga hi Susan. Karuyag ko hin asawa nga mabulig ha akon ha pagtuman han buruhaton han Ginhadian. Hi Susan may marig-on nga espirituwalidad. Nahinunumdoman ko pa an usa ka beses nga binisita ako ha ira han mag-uyab pa la kami. Nakadto hiya ha balkon han ira balay ha Cranston, Rhode Island. Nagbabasa hiya hin Barantayan. Naimpres gud ako tungod kay bisan kon diri aradman nga artikulo an iya ginbabasa, ginkikita niya an mga teksto ha iya Biblia. Nahunahuna ko, ‘Espirituwal ini nga tawo!’ Nagpakasal kami han Disyembre 1971, ngan nagpapasalamat ako nga tikang hadto, pirme hiya aada para ha akon ngan ginsusuportaran ako. Pero an akon gud gin-aapresyar ha iya amo an iya mas daku nga gugma kan Jehova kay han iya gugma ha akon.

Nagkaada kami ni Susan hin duha nga anak, hira Jesse ngan Paul. Samtang nagdadaku hira, ‘hi Jehova nag-upod ha ira.’ (1 Sam. 3:19) Tungod kay nagkinabuhi hira uyon ha kamatuoran, naghatag hira hin pasidungog ha amon ni Susan. Padayon hira nga nag-aalagad tungod kay ginhinumdom nira an ira gugma kan Jehova ha tinikangan. An tagsa ha ira sobra 20 ka tuig na ha bug-os-panahon nga pag-alagad. Dugang pa, nalilipay liwat ako ha akon duha nga maghusay nga umagad, hira Stephanie ngan Racquel, nga gintatagad ko nga akon kalugaringon nga mga anak. An akon mga anak nag-asawa hin espirituwal nga kababayin-an nga nahigugma kan Jehova ha ira bug-os nga kasingkasing ngan kinabuhi.—Efe. 6:6.

 Katapos han akon bawtismo, nag-alagad ako hin 16 ka tuig ha Rhode Island, diin nagkaada ako presyoso nga kasangkayan. Damu an akon makalilipay nga hinumdoman ha susbaranan nga mga tigurang nga nakaupod ko. Dugang pa, nagpapasalamat ako ha nagbibiyahe nga mga paramangno, nga diri ko na ngangaranan tungod ha kadamu, nga nagin maopay nga impluwensya ha akon. Daku nga pribilehiyo an pag-alagad kaupod han mga tawo nga gintitipigan an ira gugma kan Jehova ha tinikangan! Han 1987, binalhin kami ha North Carolina basi mag-alagad diin mas daku an panginahanglan, ngan nagkaada liwat kami presyoso nga kasangkayan didto. *

Han Agosto 2002, ginkarawat namon ni Susan an imbitasyon nga magin bahin han pamilya han Bethel ha Patterson, Estados Unidos. Nagtrabaho ako ha Service Department, samtang hi Susan ha Laundry. Naruyagan gud niya an pagtrabaho didto! Katapos, han Agosto 2005, nakapribilehiyo ako nga magin membro han Nagmamando nga Lawas. Inabat ko nga baga hin diri ako takos hito nga toka. An akon hinigugma nga asawa nabaraka liwat tungod han kadaku han responsabilidad, han trabaho, ngan han nahiuupod nga mga pagbiyahe. Diri gud komportable hi Susan ha pagbiyahe ha eruplano, pero pirme namon ito ginbubuhat! Nagsiring hi Susan nga an mahigugmaon nga sagdon han mga asawa han mga membro han Nagmamando nga Lawas nakabulig ha iya nga magin determinado nga suportaran ako tubtob nga posible. Ito gud an iya ginbubuhat, ngan hinigugma ko gud hiya tungod hito.

Ha akon opisina, makikita an damu nga retrato nga birilhon gud ha akon! Nagpapahinumdom ito ha akon han makapatagbaw nga kinabuhi nga akon napahimulosan. Damu na nga makalilipay nga balos an akon nakarawat tungod ha pagbuhat han akon gimaopayi ha paghinumdom han akon gugma kan Jehova ha tinikangan!