DURANTE han ultimo nga mga tuig han kinabuhi han batâ ni Tatay nga hi Nikolai Dubovinsky, iginsurat niya an iya mga eksperyensya—makalilipay ngan diri—ha pag-alagad kan Jehova, nga an kadak-an nahitabo durante han pagdiri han Unyon Sobyet ha aton buruhaton. Bisan pa han mga pagsari ngan kakurian, nagpabilin hiya nga matinumanon ngan madasigon. Agsob nga nasiring hi Batâ Nikolai nga karuyag niya mabatian han mga batan-on an iya mga eksperyensya, salit karuyag ko isumat ha iyo an pipira hito. Natawo hiya han 1926 ha usa nga pobre nga pamilya ha baryo han Podvirivka, nga nahimumutang ha Chernivtsi Oblast, Ukraine.

Hi Batâ Nikolai nagsaysay: “Usa ka adlaw han 1941, an akon magurang nga bugto nga hi Ivan inuli ha balay nga may dara nga mga libro nga The Harp of God ngan The Divine Plan of the Ages, pipira nga Watchtower, ngan mga bokleta. Ginbasa ko ito ngatanan. Nahipausa ako han hinbaroan ko nga an Yawa ngay-an, diri an Dios, an nagpapahinabo han ngatanan nga kasamok ha kalibotan. Kaupod hito nga mga publikasyon, ginbasa ko an mga Ebanghelyo, ngan nasantop ko nga nabilngan ko na an kamatuoran. Madasigon nga iginsumat ko ha iba an mahitungod ha Ginhadian. Samtang gin-aadman ko ini nga mga publikasyon, nagtikahilarom an akon pagsabot ha kamatuoran ngan ginhingyap ko gud nga magin surugoon ni Jehova.

“Maaram ako nga mag-aantos ako tungod han akon gintotoohan. Panahon adto han girra, ngan diri ko gud karuyag pumatay. Basi magin andam ha maabot nga mga pagsari, nagmemorya ako hin mga teksto sugad han Mateo 10:28 ngan 26:52. Determinado gud ako nga magpabilin nga matinumanon kan Jehova, bisan kon mangahulogan ito han akon kamatayon!

“Han nag-18 anyos ako han 1944, iginpatawag ako basi magsundalo. Ini an siyahan nga higayon nga nakaupod ko an akon mga igkasi-tumuroo—an iba pa nga batan-on nga iginpatawag ha kampo han militar tungod kay aada na hira ha edad ha pagserbisyo ha militar. Marig-on nga ginsidngan namon an mga opisyal nga diri kami makikigbahin ha girra. Nasina gud hira, salit gintarhog nira kami nga diri kami papakaunon, papahimoon kami hin mga kanal, o pupusilon kami. Waray kahadlok nga binaton kami: ‘Kamo na an bahala ha amon. Pero anoman an iyo buhaton, diri gud namon tatalapason an sugo han Dios nga “Diri ka magpatay.”’—Eks. 20:13.

“Sugad nga resulta, iginpadara ako ngan an duha pa nga bugto ngadto ha Belarus basi magtrabaho ha uma ngan mag-ayad hin mga balay. Nahinunumdoman ko pa an makangingirhat nga epekto han girra ha mga lugar nga hirayo ha sentro han Minsk. Makikita an nasunog nga mga kahoy ha ligid han kalsada. May patay nga lawas han mga tawo ngan mga kabayo ha mga kali ngan kagurangan. Nakita ko an gin-abandona  nga mga karuwahe ngan dagku hinduro nga armas pati an guba nga mga parti hin eruplano. Hito nga higayon, nakita ko mismo an mga resulta han pagtalapas ha mga sugo han Dios.

“Natapos an girra han 1945, pero ginsentensyahan la gihapon kami hin napulo ka tuig nga kaprisohan tungod ha amon pagdumiri ha pakiggirra. Ha siyahan nga tulo ka tuig, waray kami katirok o inimprinta nga espirituwal nga pagkaon. Nakigkomunikar kami ha pipira nga bugto pinaagi hin surat, pero naaresto liwat hira ngan ginsentensyahan hin 25 ka tuig nga kaprisohan.

“Antes pa matapos an amon sentensya, ginpagawas kami han 1950 ngan inuli kami. Han priso ako, an akon nanay ngan manghod nga hi Maria nagin Saksi ni Jehova! An akon magurang nga kalalakin-an diri pa mga Saksi, pero nag-aaram hira han Biblia. Tungod kay madasigon ako ha pagsangyaw, karuyag ako prisuhon utro han ahensya ha seguridad han Sobyet. Katapos, ginhangyo ako han kabugtoan nga nanginginano han aton buruhaton nga bumulig ha patago nga pag-imprinta hin mga literatura. Bainte kwatro anyos ako hadto.”

“An mga Saksi pirme nasiring, ‘Kon an buruhaton han Ginhadian igindidiri ha bawbaw han tuna, magpapadayon ito ha ilarom han tuna.’ (Prob. 28:28) Hini nga panahon, kasagaran nga nag-iimprinta kami ha tago nga mga lokasyon ha ilarom han tuna. Usa nga kwarto ha ilarom han balay han akon magurang nga hi Dmitry an akon siyahan nga ‘trabahoan.’ Usahay diri ako nabaya didto ha sulod hin duha ka semana. Kon napaparong an lampara tungod han kakulang hin oksihina, nahigda ako tubtob nga mapuno utro an kwarto hin presko nga hangin.

“Usa ka adlaw, ginpakianhan ako han usa ko nga katrabaho, ‘Nikolai, nabawtismohan ka na  ba?’ Bisan kon 11 ka tuig na ako nga nag-aalagad kan Jehova, waray pa ako mabawtismohi. Salit ginhisgotan niya ha akon an mahitungod hini. Hito nga gab-i, ha edad nga 26, nabawtismohan ako ha usa nga danaw. Paglabay hin tulo ka tuig, nakakarawat ako hin dugang nga responsabilidad, an pagin membro han Komite han Nasud. Hito nga panahon, ginpili an diri priso nga kabugtoan nga kalalakin-an nga sumaliwan hadton mga naaresto, salit nagpadayon an buruhaton han Ginhadian.”

“An pag-imprinta nga buruhaton ha ilarom han tuna mas makuri gud kay ha pagin priso! Ha sulod hin pito ka tuig, basi diri madakpan han KGB, waray ako makatambong hin katirok ngan kinahanglan ko atamanon an akon espirituwalidad. Nakikita ko la an akon pamilya kon ginbibisita ko hira, nga talagsa ko la mahimo. Bisan pa hito, nasabtan nira an akon kahimtang, ngan nakaparig-on gud ito ha akon. An pirme pag-abat hin istres ngan panginahanglan nga magin maikmat nakaubos han akon kusog. Kinahanglan namon magin andam ha anoman nga posible mahitabo. Pananglitan usa ka gab-i, may umabot nga duha nga pulis ha balay nga akon gin-uukyan. Linukso ako ha bintana ha luyo han balay ngan dinalagan tipakadto ha kagurangan. Pag-abot ko ha usa nga uma, nakabati ako hin naiiba nga hagiyos. Han hinbatian ko an mga buto hin pusil, nasantop ko nga tikang ha mga bala an mga hagiyos! An usa han mga naglalanat ha akon sinakay hin kabayo ngan ginpinusil ako tubtob nga naubos an iya bala. Naigo ako ha butkon. Katapos hin lima ka kilometro nga paplanatay, nakapalagiw ako pinaagi ha pagtago ha kagurangan. Ha urhi, han ginbista ako, nagsiring hira nga 32 ka beses nira ako nga ginpinusil!

“Tungod kay daku nga panahon an akon ginagamit ha pagtrabaho ha ilarom han tuna, nagin duason gud ako. Mahimo ini magin hinungdan nga masabtan an akon ginbubuhat. Salit naggahin ako hin daku nga panahon basi magpasirak tubtob nga mahihimo ko. An pagtrinabaho ha ilarom han tuna nakaapekto liwat ha akon kahimsog. Makausa, waray ako makatambong hin importante nga miting kaupod han iba nga kabugtoan tungod kay nagdinugo an akon irong ngan baba.”

“Han Enero 26, 1957, naaresto ako. Paglabay hin unom ka bulan, iginpahibaro han Korte Suprema han Ukraine an desisyon. Ginsentensyahan ako hin kamatayon pinaagi hin firing squad, pero tungod kay ginkuha na ha nasud an sentensya nga kamatayon, ginbag-o an  akon sentensya ngadto ha 25 ka tuig na la nga kaprisohan. Walo ha amon an ginsentensyahan hin kapriso ha mga prisohan nga may pinirit nga pagpatrabaho. Iginpadara kami ha mga prisohan ha Mordvinia, diin may mga 500 nga Saksi. Patago kami nga nagkakatirok ha gudtiay nga grupo basi pag-adman an Barantayan. Katapos usisahon han usa nga gwardya an pipira han aton magasin nga ira ginkumpiskar, hiya nagsiring: ‘Kon padayon kamo nga magbabasa hito, waray bisan hin-o nga makakapaluya han iyo pagtoo!’ Maduruto gud kami nga nagtatrabaho ngan agsob nga nagbubuhat labaw pa han igintoka ha amon. Bisan pa hito, an kumander nagsiring: ‘Diri importante ha amon an iyo trabaho dinhi. An iyo pagkamaunungon ngan suporta an amon kinahanglan.’”

Han ginpagawas hi Batâ Nikolai ha prisohan han 1967, binulig hiya ha pag-organisar hin mga kongregasyon ha Estonia ngan ha St. Petersburg, Rusya. Temprano han 1991, ginkansela an desisyon nga ginhimo han 1957 tungod han kakulang hin ebidensya ha kaso. Hito nga panahon, gin-abswelto an damu nga Saksi nga nag-antos hin pagmaltrato han mga awtoridad. Han 1996, binalhin hi Batâ Nikolai ha syudad han Velikiye Luki ha Pskov Oblast, nga mga 500 ka kilometro tikang ha St. Petersburg. Pinalit hiya hin gutiay nga balay, ngan han 2003, usa nga Kingdom Hall an gintukod ha iya lote. Yana, duha nga nag-uuswag nga kongregasyon an nagkakatirok didto.

Ako ngan an akon bana nag-aalagad ha sanga nga opisina han mga Saksi ni Jehova ha Rusya. Han Marso 2011, pipira la ka bulan antes mamatay hi Batâ Nikolai, ginbisita niya kami ha ultimo nga higayon. Nabantad gud kami samtang nagyayakan hiya nga may kalipay ha iya mata: “Tungod ha ngatanan nga nahitatabo, masisiring ko nga nagtikang na an ikapito ka adlaw nga pagmartsa ha palibot han Jerico.” (Jos. 6:15) Otsenta-y-singko anyos hiya. Bisan kon diri masayon an iya kinabuhi, ginhulagway niya ito hini nga mga pulong: “Daku gud an akon kalipay nga nagdesisyon ako nga mag-alagad kan Jehova han batan-on pa ako! Waray ko gud ito pagbasuli!”