KATSARINGSING adto han 1931. Puno hin mga delegado tikang ha 23 nga nasud an entrada han kilala nga Pleyel concert hall ha Paris. Ha atubangan hito, nagkakahaw-as ha mga taxi an mga pasahero nga mag-opay an pamado, ngan waray pag-iha napuno an awditoryum. Haros 3,000 nga delegado an kinadto, diri basi magkita hin konsyerto, kondi basi mamati kan Joseph F. Rutherford, an nangunguna ha aton pagsangyaw nga buruhaton hito nga panahon. An iya makapaaghat nga pahayag iginhubad ha Franses, Aleman, ngan Polako. An daku nga tingog ni Bugto Rutherford nalanog ha bug-os nga pasilidad.

An kombensyon ha Paris nakagbag-o gud ha pagsangyaw nga buruhaton ha Fransia. Gin-aghat ni Bugto Rutherford an mga mamarati tikang ha iba-iba nga nasud—partikular na an batan-on nga mga Kristiano—nga mag-alagad sugad nga colporteur ha Fransia. Waray gud hingalimti ni John Cooke, batan-on nga delegado nga taga-Inglatera, inin makapaaghat nga panawagan: “Waray bisan ano nga sadang makapugong ha iyo nga mga batan-on ha pagin colporteur!” *

Labot la kan John Cooke, nga ha urhi nagin misyonero, damu pa an kumarawat han panawagan. (Buh. 16:9, 10) Ngani, nagdamu an colporteur ha Fransia, tikang ha 27 han 1930 ngadto ha 104 han 1931—makatirigamnan gud nga pag-uswag ha sulod hin usa la ka tuig. Tungod kay diri maaram magyakan hin Franses inin siyahan nga mga payunir, paonan-o nira maaatubang an mga ulang tungod han linggwahe, makuri nga panginabuhi, ngan kahibulag ha pamilya ngan kabugtoan?

An mga colporteur nga tikang ha iba nga nasud nadepende la ha mga testimony card basi makagsangyaw mahitungod han Ginhadian. Usa nga bugto nga nagyayakan hin Aleman nga waray kahadlok nga nagsangyaw ha Paris an nagsiring: “Maaram kami nga makagarahum an amon Dios. Kon ginkukulba kami durante han amon pagministeryo, diri ito tungod kay nahahadlok kami ha tawo kondi tungod kay nahahadlok kami nga mahingalimtan ini nga mga pulong: ‘Voulez-vous lire cette carte, s’il vous plaît? [Puydi makialayon pagbasa hini nga card?]’ Kombinsido kami nga importante gud an amon buruhaton.”

Kon nagsasangyaw an mga colporteur ha mga apartment, agsob nga ginpapaiwas hira han mga caretaker. Usa ka adlaw, duha nga sister nga taga-Inglatera nga gutiay la an hinbabaroan ha Franses nga linggwahe an may nakaistorya nga nasisina nga caretaker nga nagpakiana kon hin-o an ira ginbibiling. Samtang nangangalimbasog nga pakalmahon an caretaker, nakita han usa nga sister an nakasurat ha usa nga purtahan: “Tournez le bouton [Pindota an doorbell].” Tungod kay ginhunahuna niya nga ngaran ito han tagbalay, malipayon hiya nga binaton: “Ginbibiling namon hi Madam ‘Tournez le bouton.’” An pagpatawa nakabulig gud hinin madasigon nga mga colporteur!

Han dekada han 1930, makuri an panginabuhi han kadam-an ha Fransia, ngan ito liwat an nagin kahimtang han mga colporteur nga tikang ha iba nga nasud. May kalabotan ha iya eksperyensya kaupod han iya partner nga payunir, hi Mona Brzoska nga Ingles an linggwahe, nagsiring: “Simple hinduro an amon mga urukyan, ngan usa han amon daku nga problema an pagpapaso durante han kathagkot. Kasagaran nga gin-iilob namon an duro nga kahagkot diin kinahanglan namon tunawon an yelo ha tubig ha pitsel ha aga antes kami makaghiram-os.” Nanluya ba an mga colporteur tungod hinin makuri nga kahimtang? Waray gud! May kalabotan han ira inabat, usa ha ira an nagsiring: “Waray kami bisan ano nga panag-iya, pero waray kami magkulang hin bisan ano.”—Mat. 6:33.

Kinahanglan liwat atubangon hinin madasigon nga mga colporteur an kamingaw tungod ha kahibulag ha pamilya ngan kabugtoan. Temprano han dekada han 1930, waray pa mag-700 an magwarali ha Fransia, ngan kadam-an ha ira naukoy ha iba-iba nga lugar han nasud. Ano an nakabulig ha mga colporteur nga matipigan an ira kalipay? Hi Mona, nga inatubang hini nga problema kaupod han iya partner, nagsiring: “Kinahanglan namon atohan an kamingaw pinaagi han magkaupod nga pag-aram hin regular han mga publikasyon han Sosiedad. Tungod kay hito nga panahon [diri kami nagbabalik-bisita ngan nagdudumara hin pag-aram ha Biblia], may-ada kami panahon ha gab-i ha pagsurat ha amon pamilya ngan labi na ha iba nga payunir basi isumat an amon mga eksperyensya ngan dasigon an usa kag usa.”—1 Tes. 5:11.

Inin mga colporteur nga andam magsakripisyo nagpabilin nga positibo bisan pa han mga kakurian. Makikita ito ha ira mga surat nga iginpadara ha sanga nga opisina, mga dekada katapos nira magpayunir ha Fransia. Ha paghinumdom hito nga katuigan, hi Annie Cregeen nga dinihogan nga bugto nga nagbiyahe ha bug-os nga Fransia kaupod han iya bana tikang han 1931 tubtob 1935, nagsurat: “Nagin malipayon ngan mapulsanon gud an amon kinabuhi! Kami nga mga payunir duok ha kada tagsa. Sugad han ginsiring ni apostol Pablo, ‘Ako an nagtanom, hi Apolos an nagsaribo, kondi an Dios an padayon nga nagpapatubo hito.’ Makalilipay gud ini para ha amon nga nagkaada hin higayon nga makabulig ha mga tawo han naglabay nga damu nga katuigan.”—1 Cor. 3:6.

Oo, ini nga mga colporteur nagpakita hin susbaranan han pagin mapailubon ngan pagin madasigon para hadton naghihingyap ha pagpahaluag han ira ministeryo. Yana, may mga 14,000 nga regular payunir ha Fransia. Damu ha ira an nag-aalagad ha mga grupo o kongregasyon nga nagamit hin iba nga linggwahe. * Pariho han kabugtoan nga nahiuna ha ira, diri nira gintutugotan an bisan ano nga makapugong ha ira!—Tikang ha aton daan nga mga koleksyon ha Fransia.