1. Ano an nangunguna nga kalidad han Dios, ngan ano an epekto han paghibaro hini ha imo inaabat ha iya?

AN GINIYAHAN nga Pulong ni Jehova, an Biblia, nagsusumat ha aton nga “an Dios gugma.” (1 Juan 4:8) Nagpapasabot ito nga an gugma diri la usa han damu nga makaruruyag nga kalidad ni Jehova, ito an iya nangunguna nga kalidad. Diri la kay may gugma hi Jehova—hiya an pinakamaopay nga susbaranan ha pagpakita hin gugma. Makalilipay gud hibaroan nga an Maglalarang han uniberso ngan han ngatanan nga buhi nga linarang usa nga Dios han gugma! Ito nga kalidad an nagpapagios ha iya ha ngatanan niya nga ginhihimo.

2. Ano an iginpapasarig ha aton han gugma han Dios? (Kitaa an retrato hini nga pahina.)

² An pagkabuotan ngan gugma han Dios ha iya mga linarang nagpapasarig ha aton nga an ngatanan niya nga katuyoan para ha katawohan matutuman ha pinakamaopay nga paagi ngan maghahatag hin daku nga kapulsanan ha ngatanan nga nagpapasakop ha iya pagmando. Pananglitan, tungod han gugma “may itinanda hiya nga adlaw para han iya katuyoan nga hukman an kalibotan uyon ha katadongan  pinaagi han usa nga tawo nga iya ginpili,” hi Jesu-Kristo. (Buh. 17:31) Makakasarig kita nga mahitatabo ini nga paghukom. An mga tawo nga may husto nga disposisyon ngan masinugtanon bibendisyonan hin makalilipay nga tidaraon nga magpapadayon ha waray kataposan.

3. Ano daw la an magigin kahimtang kon waray gugma an Dios ha katawohan?

³ Handurawa la an magigin kahimtang kon waray gugma an Dios ha katawohan. An katawohan padayon nga magmamando ha iya igkasi-tawo ngan padayon nga iimpluwensyahan han diri mahigugmaon ngan mabangis nga dios, hi Satanas nga Yawa. (2 Cor. 4:4; 1 Juan 5:19; basaha an Pahayag 12:9, 12.) Diri gud magigin makaruruyag an aton tidaraon kon waray gugma an Dios ha aton.

4. Kay ano nga gintugotan ni Jehova nga may magrebelde ha iya matadong nga pagmando?

⁴ Han nagrebelde an Yawa ha pagmando ni Jehova, gin-impluwensyahan niya an siyahan nga mag-asawa nga magrebelde liwat. Iya ginkwestyon an katungod han Dios ha pagmando ha bug-os nga uniberso. Sugad hin nagsiring hi Satanas nga magigin mas maopay an iya pagmando kay han Maglalarang. (Gen. 3:1-5) Bisan kon gintugotan ni Jehova hi Satanas nga pamatud-an an iya ginsisiring, temporaryo la ito nga pagtugot. Tungod han hilarom nga kinaadman ni Jehova, gintugotan niya nga lumabay an igo nga panahon basi makita hin matin-aw nga waray iba nga maopay nga magmarando labot ha iya. An makasurubo nga kasaysayan han katawohan nagpapakita nga waray kapas an tawo o hi Satanas nga magin maopay nga magmarando.

5. Ano an matin-aw nga iginpapakita han kasaysayan han tawo?

⁵ Ha naglabay nga 100 ka tuig, sobra 100 ka milyon nga tawo an namatay ha mga girra. Yana, padayon nga nagtitikaraot an kahimtang han kalibotan. Ito an igintagna han Pulong han Dios nga mahitatabo ha “kataposan nga mga adlaw” hini nga sistema diin an “magraot nga tawo ngan mga impostor mas magtitikaraot pa gud.” (2 Tim. 3:1, 13) Matin-aw nga iginpapakita han kasaysayan nga tinuod gud an ginsisiring han Biblia: “O Jehova, maaram ako nga an paagi han tawo diri aada ha iya ngahaw, diri aada ha tawo nga naglalakat an pagmando han iya mga pitad.” (Jer. 10:23) Waray laranga ni Jehova an tawo nga may abilidad o katungod ha pagmando ha kalugaringon nga bulag ha iya.

6. Ano an katuyoan han temporaryo nga pagtugot han Dios ha karaotan?

⁶ Labot la ha pagpakita nga waray pulos an pagmando han tawo, an temporaryo nga pagtugot han Dios ha karaotan may usa pa nga katuyoan. Permanente ito nga pamatuod nga an pagmando gud la han Dios an maglalampos. Kon may magkwestyon pa utro ha mahigugmaon nga pagmando ni Jehova katapos niya wad-on an karaotan ngan adton nagbubuhat hito, magios hiya dayon. Mahimo niya gamiton an mga nahitabo ha kasaysayan han tawo sugad nga makatadunganon nga basihan basi bungkagon dayon an sugad nga mga rebelde, ngan diri hira tutugotan nga maghimo utro hin karaotan.

7, 8. Ano an pipira han damu nga paagi nga iginpapakita ni Jehova an iya daku nga gugma?

⁷ Iginpapakita ni Jehova an iya daku nga gugma ha damu nga paagi. Pananglitan, tagda an haluag ngan makaruruyag nga uniberso. May-ada ito binilyon nga galaksi, nga an tagsa may binilyon nga bitoon ngan planeta. Ha aton Milky Way nga galaksi, usa han mga bitoon an adlaw, nga kon waray ito, waray linarang nga mabubuhi ha tuna. Ini ngatanan ebidensya han pagka-Dios ni Jehova ngan han iya mga kalidad, sugad han gahum, kinaadman, ngan gugma.  Oo, an “iya diri-nakikita nga mga kalidad, nga amo an iya waray kataposan nga gahum ngan pagka-Dios, klaro nga nakikita tikang pa ha paghimoa han kalibotan, kay nasasabtan ito pinaagi han mga butang nga ginhimo.”—Roma 1:20.

⁸ An ngatanan ha tuna gindisenyo ni Jehova para ha kapulsanan han iya mga linarang nga may kinabuhi. Naghimo hiya hin makaruruyag nga paraiso nga hardin para ha mga tawo, ngan gintagan niya hira hin perpekto nga hunahuna ngan lawas nga gindisenyo nga mabuhi ha waray kataposan. (Basaha an Pahayag 4:11.) Dugang pa, ‘hiya naghahatag hin karan-on ha ngatanan nga unod; kay an iya mahigugmaon nga kalooy nagpapadayon ha kagihaponan.’—Sal 136:25.

9. Bisan kon hi Jehova Dios han gugma, ano an usahay inaabat niya, ngan kay ano?

⁹ Hi Jehova an Dios han gugma, pero nasisina hiya ha karaotan. Pananglitan, an Salmo 5:4-6 nasiring mahitungod kan Jehova: “Kay diri ka an usa nga Dios nga nalilipay ha karaotan . . . Ikinangangalas mo an ngatanan nga magburuhat hin karaotan.” Ito nagdugang: ‘Hi Jehova nasisina ha makidugo [o, madarahog] ngan malimbong nga tawo.’

10, 11. (a) Ano an bubuhaton ni Jehova ha magraot? (b) Ano an ibabalos ni Jehova ha magtadong?

¹⁰ Tungod kay hi Jehova an Dios han gugma ngan nangangalas ha karaotan, tatapuson niya an karaotan ha tuna—pati na ha bug-os nga uniberso—kon masulbad na an isyu may kalabotan han iya katungod ha pagmando. An Pulong han Dios nagsasaad: “Paglalaglagon an mga magburuhat hin maraot; kondi an mga nahulat kan Jehova, makakapanunod hira han tuna. Salit diri mag-iiha, ngan an mga magraot pagwawad-on . . . Ngan an mga kaaway ni Jehova masusugad han tambok han mga karnero: Mauubos hira; ha asó mauubos hira.”—Sal. 37:9, 10, 20.

¹¹ An Pulong han Dios nagsasaad liwat: “An mga magtadong makakapanunod han tuna, ngan maukoy hira dida hin waray kataposan.” (Sal. 37:29) Ito nga mga magtadong “maglilipay . . . tungod han kahuraan han kamurayaw.” (Sal. 37:11) Matutuman gud ini tungod kay ginbubuhat pirme han aton mahigugmaon nga Dios an makakaopay ha iya matinumanon nga mga surugoon. An Biblia nasiring: “Papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit. An daan nga mga butang naglabay na.” (Pah. 21:4) Makalilipay gud nga tidaraon an mapapahimulosan hadton nag-aapresyar han gugma ni Jehova ngan nasugot ha iya sugad nga Magmarando!

12. Hin-o an “maupay nga tawo”?

¹² An Pulong han Dios nasiring: “Tigamni an maupay nga tawo, ngan kitaa an matadong; kay an tawo nga murayaw may-ada gud mga tulin. Kundi pagbubungkagon gud an mga makasasala, ngan pagpupuohon an ira mga tulin.” (Sal. 37:37, 38, Maupay nga Sumat) “An maupay nga tawo” nakilala kan Jehova ngan ha iya Anak ngan nagbubuhat han kaburut-on han Dios. (Basaha an Juan 17:3.) An sugad nga tawo kombinsido gud ha ginsisiring han 1 Juan 2:17: “An kalibotan mawawara pati an mga hingyap hito, pero hiya nga nagbubuhat han kaburut-on han Dios magpapadayon ha waray kataposan.” Samtang nagtitikahirani an kataposan han kalibotan, importante gud an ‘paghulat kan Jehova, ngan pagbantay han iya dalan.’—Sal. 37:34.

13. Ano an pinakadaku nga kapahayagan han gugma han Dios?

¹³ Bisan kon diri kita perpekto, mahimo kita magin masinugtanon kan Jehova. Mahimo liwat kita magin duok ha iya tungod han iya pinakadaku nga kapahayagan han gugma—an halad-lukat  ni Jesu-Kristo. Igintagana niya ito basi matalwas an masinugtanon nga mga tawo tikang ha sala ngan kamatayon nga napanunod kan Adan. (Basaha an Roma 5:12; 6:23.) Bug-os gud an pagsarig ni Jehova ha iya bugtong nga Anak, nga masinugtanon ha iya didto ha langit ha sulod hin diri maihap nga katuigan. Sugad nga mahigugmaon nga Amay, sigurado nga nasakitan hi Jehova ha maraot nga pagtratar kan Jesus dinhi ha tuna. Pero matinumanon nga ginsuportaran ni Jesus an katungod han Dios ha pagmando, ngan iya ginpakita nga mahimo matipigan han perpekto nga tawo an iya integridad bisan ha pinakamakuri nga mga kahimtang.

14, 15. Ano an kapulsanan han kamatayon ni Jesus para ha katawohan?

¹⁴ Gintipigan ni Jesus an iya integridad ngan ginsuportaran an pagkasoberano ni Jehova bisan pa ha pinakamakuri nga mga pagsari—an iya kamatay sugad nga matinumanon nga surugoon han iya Amay. Sadang gud kita magin mapasalamaton kay pinaagi han kamatayon ni Jesus, iya liwat iginbayad an lukat nga ginkikinahanglan basi an mga tawo magkaada higayon nga mabuhi ha waray kataposan ha bag-o nga kalibotan han Dios! Iginpakita ni apostol Pablo nga daku gud ito nga kapahayagan han gugma ni Jehova ngan ni Jesus, hiya nagsiring: “Ha pagkamatuod, samtang magluya pa kita, an Kristo namatay ha itinanda nga panahon para ha diri-diosnon nga mga tawo. Kay talagsa gud la an maruruyag nga mamatay para ha matadong nga tawo, ha pagkamatuod, posible pa nga may maruyag mamatay para ha maopay nga tawo. Pero iginpakita  ha aton han Dios an iya gugma hini nga paagi: An Kristo namatay para ha aton samtang makasasala pa kita.” (Roma 5:6-8) Hi apostol Juan nagsurat: “An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong nga Anak basi makarawat naton an kinabuhi pinaagi ha iya. Iginpahayag ini nga gugma, diri tungod kay ginhigugma naton an Dios, kondi tungod kay ginhigugma kita niya ngan ginpakanhi an iya Anak sugad nga halad ha pagpahiuli para ha aton mga sala.”—1 Juan 4:9, 10.

¹⁵ May kalabotan ha gugma han Dios ha katawohan, hi Jesus nagsiring: “Hinigugma gud han Dios an kalibotan [an katawohan nga takos lukaton] salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Daku hinduro an gugma han Dios ha katawohan, salit ginhatag niya an iya Anak sugad nga lukat bisan pa kon masakit gud ito ha iya. Ngan an iya gugma magpapadayon ha waray kataposan. Pirme kita makakasarig hito. Hi Pablo nagsurat: “Kombinsido ako nga bisan an kamatayon, kinabuhi, mga anghel, mga gobyerno, mga butang nga aanhi yana, mga butang nga maabot, mga gahum, kahitas-an, kahiladman, o an bisan ano nga iba pa nga butang nga hinimo han Dios diri makakagbulag ha aton ha gugma han Dios nga iginpakita pinaagi kan Kristo Jesus nga aton Ginoo.”—Roma 8:38, 39.

16. Ano an Mesianiko nga Ginhadian, ngan hin-o an ginpili ni Jehova nga magmarando hito?

¹⁶ An gobyerno han Dios, an Mesianiko nga Ginhadian, pamatuod liwat han gugma ni Jehova ha katawohan. Kay ano? Ginpili na ni niya an usa nga magmarando nga nahigugma ha katawohan ngan kwalipikado gud ha pagmando, hi Jesu-Kristo. (Prob. 8:31) Kon banhawon na an 144,000, gagamiton nira an ira eksperyensya sugad nga tawo ha pagmando kaupod ni Jesus ha langit. (Pah. 14:1) An Ginhadian an nangunguna nga tema han katutdoan ni Jesus, ngan iya gintutdoan an iya mga disipulo nga mag-ampo: “Amay namon ha langit, pagbaraanon an imo ngaran. Kumanhi unta an imo Ginhadian. Matuman an imo kaburut-on dinhi ha tuna sugad han ha langit.” (Mat. 6:9, 10) Hura gud nga bendisyon an makakarawat han masinugtanon nga katawohan kon matuman na ini nga mga pag-ampo!

17. Itanding an pagmando ni Jesus ha pagmando han tawo.

¹⁷ Daku gud an kaibahan han mahigugmaon nga pagmando ni Jesus ha pagmando han tawo nga nagresulta ha kamatay han minilyon nga tawo ha mga girra! Nagmamangno gud hi Jesus ha iya mga sakop, ngan iginpapakita niya an mag-opay nga kalidad han Dios, labi na an gugma. (Pah. 7:10, 16, 17) Hiya nagsiring: “Kadi kamo ha akon, kamo ngatanan nga kinakapoy ngan binubug-atan, kay papapahuwayon ko kamo. Pas-ana an akon yugo ngan mahibaro kamo tikang ha akon, kay ako malumo ngan mapainubsanon an kasingkasing, ngan makakapahuway an iyo mga kalag. Kay an akon yugo masayon pas-anon ngan an akon iginpapapas-an ha iyo magaan.” (Mat. 11:28-30) Mahigugmaon gud ito nga saad!

18. (a) Ano an ginbubuhat han Ginhadian han Dios tikang han naestablisar ito? (b) Ano an aton hihisgotan ha sunod nga artikulo?

¹⁸ Iginpapakita han Biblia nga an Ginhadian han Dios ha langit nagtikang na pagmando han 1914. Tikang hadto, gintitirok na an mga nabibilin pa nga makakaupod ni Jesus ha pagmando ha langit, pati na an “daku nga grupo” han katawohan nga matatalwas ha kataposan hini nga sistema ngan maukoy ha bag-o nga kalibotan. (Pah. 7:9, 13, 14) Mationan-o na kadaku yana an “daku nga grupo”? Ano an ginkikinahanglan ha ira han Dios? Ini nga mga pakiana hihisgotan ha sunod nga artikulo.