Nagtatagad Gud ba an Dios ha Imo?

INAABAT mo ba nga hinigugma ka? O usahay inaabat mo nga waray gud nahigugma ha imo? Dinhi hinin okupado ngan makikalugaringon nga kalibotan, baga hin masayon hunahunaon nga diri ka importante. Sugad han siring han Biblia, damu yana an interesado la ha ira kalugaringon salit kalyap an kawaray pagtagad ha iba.—2 Timoteo 3:1, 2.

An ngatanan nga tawo anoman an pangidaron, kultura, yinaknan, o nasyonalidad, may-ada natural nga panginahanglan nga maghigugma ngan higugmaon. Sumala ha pipira nga report, an aton nervous system gindisenyo ha pag-abat hin gugma. Hi Jehova nga Dios, an aton Maglalarang, mas maaram kay ha bisan hin-o nga nagkikinahanglan kita hin gugma ngan apresasyon. Ano daw la an imo aabaton kon sumiring hiya nga presyoso ka ha iya? Sigurado nga ito an pinakabirilhon nga pasarig nga imo makakarawat. Pero, makakasiguro gud ba kita nga interesado hiya ha diri hingpit nga mga tawo? Nagtatagad ba hiya ha kada tagsa ha aton? Kon oo, paonan-o an usa magigin makaruruyag ha iya?

Nagtatagad Gud hi Jehova ha Aton

Mga 3,000 ka tuig na an naglabay, gindayaw gud han usa nga mahadlukon ha Dios nga salmista an makatarag-ob nga kalangitan nga puno hin bitoon. Kombinsido gud hiya han pagkaharangdon han Usa nga naglarang han diri maihap nga bitoon. Samtang ginpapamalandong an pagkaharangdon ni Jehova ngan an pagin minos han tawo, iginpahayag niya an apresasyon ha mahigugmaon nga pagtagad ni Jehova: “Kon gintatan-aw ko an imo kalangitan, nga amo an binuhat han imo mga tudlo, an bulan ngan an mga bitoon nga imo ginpahamutang; Ano la an tawo nga basi mo hiya mahinumdoman? Ngan an anak han tawo, nga basi mo hiya maduaw [‘atamanon,’ NW]?” (Salmo 8:3, 4) Masayon la hunahunaon nga an Supremo nga Usa hirayo gud o okupado hinduro ha pagtagad han diri hingpit nga tawo. Kondi, maaram an salmista nga bisan kon minos kita ngan halipot la an kinabuhi, importante gud kita ha Dios.

Usa pa nga salmista an nagpahayag han iya pagsarig: “Hi Jehova nagmamalipay dida ha ira nga nahadlok ha iya, ha ira nga naglalaom ha iya mahigugmaon nga kalooy.” (Salmo 147:11)  Makapabantad gud ito nga mga teksto. Hi Jehova harangdon hinduro, salit diri la kay basta maaram hiya han kahimtang han tawo. Kondi, iya ‘gin-aataman’ hira ngan ‘nalilipay ha ira.’

Dugang nga ginpabug-atan ito hin tagna ha Biblia nga natutuman ha aton panahon. Pinaagi kan propeta Hagay, hi Jehova nagsiring nga an maopay nga sumat han Ginhadian igsasangyaw ha bug-os nga kalibotan. Tagda an usa nga resulta hini: “An birilhon nga mga butang han ngatanan nga nasud mahinganganhi; ngan akon pupun-on ini nga balay hin himaya.”—Hagay 2:7.

Ano inin “birilhon nga mga butang” nga gintirok tikang ha ngatanan nga nasud? Diri ini materyal nga mga butang. (Hagay 2:8) Diri salapi ngan bulawan an nakakapalipay kan Jehova, kondi an mga tawo nga nagsisingba ha iya tungod han gugma bisan pa kon diri hira hingpit. (Proberbios 27:11) Hira an “birilhon nga mga butang” nga naghahatag ha iya hin kadayawan, ngan ginpapabilhan niya an ira bug-os nga debosyon ngan madasigon nga pag-alagad. Usa ka ba ha ira?

Baga hin diri katoohan nga an diri hingpit nga mga tawo magigin birilhon ha Harangdon nga Maglalarang han uniberso. Kondi ha tinuod la, ini nga kamatuoran sadang magpagios ha aton nga karawaton an iya imbitasyon nga magin duok ha iya.—Isaias 55:6; Jakobo 4:8.

“Ikaw Hinihigugma Gud”

Usa ka gab-i, han lagas na hi propeta Daniel, may makatirigamnan nga nahitabo. Samtang nag-aampo hiya, tigda nga may inabot nga respetado nga bisita. Hiya hi Gabriel. Nakita na hiya ni Daniel hadto, salit maaram hi Daniel nga anghel hiya ni Jehova. Iginsumat ni Gabriel an rason han iya pagbisita: “O Daniel, ako yana nakanhi ha paghatag ha imo hin kinaadman ngan hin sarabotan . . . kay ikaw hinihigugma gud.”—Daniel 9:21-23.

Ha lain nga higayon, usa pa nga anghel an nagsiring kan Daniel: “O Daniel, ikaw tawo nga hinigugma gud.” Katapos, basi parig-unon hiya, ito nagsiring: “O tawo nga hinihigugma gud, ayaw kahadlok: an kamurayaw maaada ha imo.” (Daniel 10:11, 19) Salit tulo ka beses nga gintawag hi Daniel nga “hinihigugma gud.” Ini nga mga pulong mahimo liwat mangahulogan hin “ginpapabilhan gud,” “nalilipayan gud,” o “usa nga paborito.”

Sigurado nga duok na hi Daniel kan Jehova ngan maaram nga inuuyonan ni Jehova an iya sinsero nga pag-alagad. Kondi mas naparig-on pa gud hiya han nagsiring an mga anghel nga hinigugma gud hiya han Dios. Salit nakagsiring hi Daniel: “Ikaw nagpakusog ha akon.”—Daniel 10:19.

 Inin makapabantad nga asoy mahitungod han gugma ni Jehova ha iya matinumanon nga propeta igin-upod ha iya Pulong para ha aton kapulsanan. (Roma 15:4) An pagpamalandong ha ehemplo ni Daniel mabulig ha aton nga hibaroan kon paonan-o an usa magigin birilhon ha aton Amay ha langit.

Admi Pirme an Pulong han Dios

Hi Daniel maduruto ha pag-aram han Kasuratan. Maaram kita hito kay hiya mismo nagsurat: “Ako . . . nakasabot pinaagi han mga basahon, han kadamu han mga tuig . . . para han kahumanan han mga kalaglagan han Jerusalem.” (Daniel 9:2) An giniyahan nga sinurat nga nabasa niya hadto posible nga nag-uupod han sinurat nira Moises, Salomon, Isaias, Jeremias, Esekiel, ngan iba pa nga propeta. Mahahanduraw naton hi Daniel nga napapalibotan hin damu nga linukot nga basahon ngan nakapokus ha pagbinasa ngan pagtanding han mga tagna ha pagpahiuli han tinuod nga pagsingba ha Jerusalem. Sigurado nga ginpamalandong niya an kahulogan hito samtang nag-aaram ha mamingaw nga dapit, nga posible ha kwarto ha atop. Tungod han seryoso nga pag-aram, naparig-on an iya pagtoo ngan nagin duok kan Jehova.

An pag-aram han Pulong han Dios nagmolde liwat han personalidad ni Daniel ngan nakaapekto han iya bug-os nga kinabuhi. An Kasuratanhon nga instruksyon nga nakarawat han bata pa hiya, sigurado nga nakabulig ha iya nga magin determinado ha pagsunod han Balaud han Dios ha pagkaon. (Daniel 1:8) Ha urhi, maisugon nga iginpahayag niya an mensahe han Dios ha mga lider han Babilonya. (Proberbios 29:25; Daniel 4:19-25; 5:22-28) Kilala hiya nga maduruto, tangkod, ngan masasarigan. (Daniel 6:4) Labaw ha ngatanan, imbes magkompromiso basi maluwas, bug-os nga sinarig hiya kan Jehova. (Proberbios 3:5, 6; Daniel 6:23) Salit diri urusahon nga “hinihigugma gud” hiya han Dios.

Ha pipira nga paagi, mas masayon yana an pag-aram han Biblia kay ha panahon ni Daniel. An dagku nga linukot nga basahon ginsaliwnan na hin magaan nga mga libro. May-ada na kita yana kompleto nga Biblia, upod na an mga rekord kon paonan-o natuman an pipira nga tagna ni Daniel. Dugang pa, abunda kita hin garamiton ha pag-aram han Biblia ngan pagsaliksik. * Ginagamit mo ba ito? Nag-ieskedyol ka ba hin panahon ha pagbasa han Biblia ngan pagpamalandong? Kon oo, mabulig ito nga magin marig-on an imo pagtoo ngan magin mas duok kan Jehova pariho kan Daniel. An Pulong han Dios maggigiya ha imo kinabuhi, ngan magpapasarig han gugma ngan pagtagad han Dios ha imo.

Padayon ha Pag-ampo

An pag-ampo bahin han kinabuhi ni Daniel. An iya mga hangyo uyon ha kaburut-on han Dios. Han batan-on pa hiya, nanilikado an iya kinabuhi tungod kay kon diri niya maisaysay an kahulogan han inop ni Hadi Nabukodonosor han Babilonya, papatayon hiya. Salit, nag-ampo dayon hiya kan Jehova para hin bulig ngan proteksyon. (Daniel 2:17, 18) Paglabay hin mga tuig, mapainubsanon nga ginkilala hinin matinumanon nga propeta an iya pagkadiri-hingpit pinaagi ha pagsumat han iya sala ngan han sala han iya katawohan, ngan nanginyupo han pagpasaylo ni Jehova. (Daniel 9:3-6, 20) Han waray niya masabti an mga bisyon nga iginhatag ha iya, nangaro hiya hin bulig ha Dios. Ha usa nga higayon, an anghel nga binisita ha iya basi tagan hiya hin dugang nga pagsabot nagsiring: “An imo mga pulong pinamatian.”—Daniel 10:12.

Kondi an pag-ampo ni Daniel diri kay puro la hangyo. An Daniel 6:10 nasiring: ‘Makatulo ha usa ka adlaw [hiya] nag-aampo, ngan nagpapasalamat ha atubangan han iya Dios, sugad han iya ginbubuhat hadto pa nga panahon.’ Damu an rason ni Daniel nga magpasalamat ngan magdayaw kan Jehova, ngan pirme niya ito  ginbubuhat. Oo, an pag-ampo importante nga bahin han iya pagsingba, salit waray gud hiya umundang ha pagbuhat hito bisan pa kon mameligro hiya. Matin-aw, tungod han iya pagkamatinumanon hinigugma hiya ni Jehova.

Maopay gud nga regalo an pag-ampo! Ayaw palabya an usa ka adlaw nga diri ka nakikiistorya ha imo Amay ha langit. Pasalamati ngan dayawa hiya han iya pagkamaopay. Ayaw pag-alang ha pagpahayag han imo problema ngan kabaraka. Pamalandonga kon paonan-o ginbaton ni Jehova an imo mga hangyo o pangamuyo, ngan pasalamati hiya. Ayaw pagdagmit kon nag-aampo. Kon iginpapahayag naton kan Jehova an aada ha aton kasingkasing, aabaton naton an iya gugma ha aton sugad nga indibiduwal. Daku gud ito nga rason ha ‘pagpadayon ha pag-ampo.’—Roma 12:12.

Dayawa an Ngaran ni Jehova

Waray pagkamagsangkay nga magpapadayon kon an usa interesado la ha iya kalugaringon. Sugad liwat hito an pakigsangkay kan Jehova ngan maaram hito hi Daniel. Tagda an iya daku nga hingyap ha pagdayaw han ngaran ni Jehova.

Han ginbaton han Dios an pag-ampo ni Daniel pinaagi ha pagsumat han inop ni Nabukodonosor ngan han kahulogan hito, hi Daniel nagsiring: “Mabulahan unta an ngaran han Dios ha kagihaponan; tungod kay an kinaadman ngan an kusog iya.” Ha urhi, han iginsumat niya kan Nabukodonosor an inop ngan an kahulogan hito, pauroutro nga iginhatag niya kan Jehova an kadayawan, ginpapabug-atan nga Hiya la an “nagpapahayag han mga tinagoan.” Ha pariho nga paagi, han nangamuyo hi Daniel hin kapasayloan ngan panalipod, hiya nag-ampo: “O Dios ko, . . . an imo bungto ngan an imo katawohan tinatawag pinaagi ha imo ngaran.”—Daniel 2:20, 28; 9:19.

Masusubad naton hi Daniel ha damu nga paagi. Kon nag-aampo, mahimo naton ipahayag an aton hingyap nga ‘dayawon an ngaran’ ni Jehova. (Mateo 6:9, 10) Diri gud naton karuyag nga mapasiparahan an Iya baraan nga ngaran tungod han aton paggawi. Lugod, pirme naton dayawon hi Jehova pinaagi ha pagsangyaw han maopay nga sumat han iya Ginhadian.

Oo, an mga tawo ha kalibotan yana waray gugma ngan pagtagad ha iba. Kondi, maliliaw kita ha paghibaro nga hi Jehova nagtatagad gud ha tagsa niya nga magsiringba. Sugad han ginsiring han salmista: “Hi Jehova nalilipay ha iya katawohan: Papagtahumon niya an mapainubsanon pinaagi han kaluwasan.”—Salmo 149:4.

[Footnote]

[Blurb ha pahina 21]

Iginpahayag han Dios an Iya gugma kan Daniel pinaagi ha pagsugo kan anghel Gabriel nga parig-unon hiya

[Blurb ha pahina 23]

An maduruto nga pag-aram ngan pag-ampo nakabulig kan Daniel nga magin maopay nga tawo ngan magin birilhon ha Dios