Magraot nga Panhitabo nga Naghahatag hin Paglaom

“Ha kataposan nga mga adlaw maabot an peligroso nga mga panahon nga makuri pakiangayan.”​—2 TIMOTEO 3:1.

NAKABATI ka na ba​—o nakakita—​han bisan hain han masunod nga makasurubo nga mga panhitabo?

● Usa nga grabe nga sakit an nakamatay hin damu nga tawo.

● Usa nga gutom an nagresulta ha kamatay han ginatos nga tawo.

● Usa nga linog an nagresulta ha kamatay han yinukot ngan kawad-i hin balay han damu pa.

Ha masunod nga mga pahina, may mahibabaroan ka nga importante nga mga impormasyon mahitungod han sugad hito nga mga panhitabo. Makikita mo liwat nga igintagna han Biblia nga mahitatabo ito ha panahon nga gintatawag nga “kataposan nga mga adlaw.”

Pero diri katuyoan hini nga mga artikulo nga kombinsihon ka nga nagkikinabuhi na kita ha kalibotan nga puno hin magraot nga panhitabo. Posible nga nakikita mo mismo ito nga mga panhitabo. Lugod, katuyoan hini nga maghatag ha imo hin paglaom. Ipapakita hini nga an katumanan han unom nga tagna nagpapasabot nga hirani na matapos an “kataposan nga mga adlaw.” Ini nga mga artikulo maghihisgot liwat han pipira han komon nga pagriwa hini nga ebidensya ngan maghahatag ha aton hin marig-on nga basihan para tumoo nga hirani na an mas maopay nga kinabuhi.