Tagna 3. Sakit
Tagna 3. Sakit
“An mga tawo . . . mag-aantos hin makangingirhat nga mga sakit.”—LUCAS 21:11, Contemporary English Version.
● Ha usa nga nasud ha Aprika nga nag-antos tungod han girra sibil, nangalimbasog an public health officer nga hi Bonzali nga tambalon an iya kahimungto nga mga minero nga tikamatay na tungod han Marburg nga virus. * Nakimalooy hiya nga buligan han mga opisyal ha mas daku nga syudad, pero waray ito tagi hin atensyon. Paglabay hin upat ka bulan, may inabot nga bulig, pero patay na hi Bonzali. Natapnan hiya han Marburg tikang ha mga minero nga karuyag niya tambalon.
ANO AN IGINPAPAKITA HAN MGA REPORT? An mga sakit ha baga (sugad han pulmonya), uro-uro, HIV/AIDS, tuberkulosis, ngan malarya amo an pipira han pinakamakamaratay nga sakit nga nakakaapekto ha mga tawo. Ha usa la ka tuig, ginbabanabana nga 10.7 ka milyon an namatay tungod hinin lima nga sakit. Ha iba nga pagkayakan, ini nga mga sakit nakamatay hin mga usa ka tawo kada tulo ka segundo, ha bug-os nga tuig.
ANO AN KOMON NGA PAGRIWA? Padayon nga nagtitikadamu an populasyon han kalibotan, salit natural la nga mas damu an nagkakasakit. Mas damu na nga tawo an puydi matapnan.
MAKATADUNGANON BA ITO NGA PAGRIWA? Madagmit nga nagdamu an populasyon ha kalibotan. Pero nag-uswag liwat an abilidad han tawo nga mahibaroan, pugngan, ngan tambalon an sakit. Salit angay unta maibanan an kadamu han tawo nga nagkakasakit. Pero kabaliktaran an nahitatabo.
ANO HA IMO PAGHUNAHUNA? An mga tawo ba nag-aantos hin makangingirhat nga mga sakit sugad han igintagna han Biblia?
Minilyon an nag-aantos tungod han mga linog, gutom, ngan sakit. Minilyon liwat an nag-aantos tungod han binuhatan han ira igkasi-tawo, ngan damu ha ira an ginbibiktima han mga tawo nga angay unta magprotektar ha ira. Pansina an igintagna han Biblia nga mahitatabo.
[Footnote]
^ par. 3 An Marburg Hemorrhagic Fever tikang ha virus nga puropariho ha Ebola.
[Blurb]
“Makaharadlok mamatay kay ginkaon ka hin leon o iba pa nga hayop, pero makaharadlok gihap mamatay tungod han makangingirhat nga sakit ha sulod mismo han imo lawas, ngan mas makaharadlok kon nakikita mo nga damu an namamatay tungod hito.”—MICHAEL OSTERHOLM, EPIDEMIOLOGIST.
[Ginkuhaan han retrato]
© William Daniels/Panos Pictures