Tagna 4. Waray Kinaiya nga Gugma

“An mga tawo . . . mawawarayan hin kinaiya nga gugma ha ira pamilya.”​—2 TIMOTEO 3:1-3, God’s Word Bible

● Hi Chris nagtatrabaho ha usa nga grupo ha North Wales nga nabulig ha mga biktima han kamadarahog ha pamilya. “Nahinunumdoman ko han may inabot nga babaye nga nakita ko hadto, pero tungod kay grabe an pagkakastigo ha iya, waray ko na hiya makilala,” siring ni Chris. “An iba nga babaye nag-antos hin maraot gud nga pagtratar salit naabat hira hin kawaray-pulos ngan pirme na la nagtitinamod.”

ANO AN IGINPAPAKITA HAN MGA REPORT? Ha usa nga nasud ha Aprika, ginbabanabana nga 1 ha kada 3 nga babaye an seksuwal nga gin-abuso han bata pa hira. Ha usa nga surbey nga ginhimo dida gihap hito nga nasud, nahibaroan nga sobra 30 porsyento han mga lalaki an naghuhunahuna nga diri maraot an pagkastigo ha ira asawa. Pero diri la mga babaye an biktima han kamadarahog ha pamilya. Pananglitan, ha Canada, haros 3 ha kada 10 nga lalaki an ginkakastigo o gin-aabuso ha iba nga paagi han ira padis.

ANO AN KOMON NGA PAGRIWA? Tikang pa hadto, may-ada na kamadarahog ha pamilya. Mas napapansin la ito yana kay han una.

MAKATADUNGANON BA ITO NGA PAGRIWA? Hinin naglabay nga mga dekada, mas naedukar na an mga tawo mahitungod ha kamadarahog ha pamilya. Pero nakabulig ba ito nga maibanan an kadamu han nahitatabo nga kamadarahog ha pamilya? Waray. Mas nagin komon pa ngani yana an kawaray-kinaiya nga gugma.

ANO HA IMO PAGHUNAHUNA? Natutuman ba an 2 Timoteo 3:1-3? Damu na ba an nawawarayan hin gugma ha ira pamilya, nga natural la unta nga abaton nira?

Nahidadabi ha ikalima nga tagna nga natutuman yana an aton urukyan nga tuna. Pansina an ginsisiring han Biblia mahitungod hito.

[Blurb]

“An kamadarahog ha pamilya ginkikilala nga usa han mga krimen nga diri kasagaran nga iginrireport. Ginbabanabana nga an usa nga babaye 35 ka beses anay nga makakastigo han iya padis antes hiya magreport ha pulis.”​—TAGAPAGYAKAN HAN WALES DOMESTIC ABUSE HELPLINE.