HA GINSIRING hinin duha nga indibiduwal, hain an imo gin-uuyonan? Damu an naliliaw ngan naruruyag ha mga pulong ni Saul han Tarso, nga gintatawag liwat nga apostol Pablo. (Buhat 17:26, 27) An Biblia may-ada iba pa nga mga pasarig nga sugad hito. Pananglitan ha usa nga pag-ampo ni Jesus, nagpasarig hiya nga mahimo makilala han iya mga sumurunod an Dios ngan kumarawat han Iya bendisyon.—Juan 17:3.

Kondi, iba an opinyon han mga pilosopo sugad kan Philo. Para ha ira, diri gud naton makikilala an Dios tungod kay imposible hiya masabtan. Pero ano gud ba an kamatuoran?

Oo, an Biblia nasiring nga may mga butang mahitungod ha Dios nga makuri masabtan han tawo. Pananglitan, an kahilawig han pag-eksister han Maglalarang, an kabaltok han iya hunahuna, ngan an kahilarom han iya kinaadman diri maiihap, masusukol, o matutugkad han panhunahuna han tawo. Kondi ini nga mga aspekto han Dios diri ulang ha aton pagkilala ha iya. Ha pagkamatuod, an pagpamalandong hini makakabulig ha aton nga ‘magin duok ha Dios.’ (Santiago 4:8) Aton hisgotan an pipira nga butang mahitungod ha Dios nga makuri masabtan. Katapos, aton uusisahon liwat an iya mga aspekto nga mahimo gud naton masabtan.

PAG-EKSISTER HAN DIOS: An Biblia nagtututdo nga an Dios naeksister “tikang han waray kataposan ngadto ha waray kataposan.” (Salmo 90:2) Karuyag sidngon, an Dios waray tinikangan ngan waray kataposan. Ha panhunahuna han tawo, “an kadamu han iya mga tuig diri matutukib” o maiihap.—Job 36:26.

Kon paonan-o ka magpapahimulos: An Dios nagsasaad ha imo hin kinabuhi nga waray kataposan kon imo gud hiya kikilalahon. (Juan 17:3) Makakasarig ka ba hini nga saad kon an Dios mismo diri naeksister tubtob ha waray kataposan? “An Hadi ha kadayonan” la an makakatuman hini nga saad.—1 Timoteo 1:17.

PANHUNAHUNA HAN DIOS: An Biblia nasiring nga “waray gud nakakatugkad” ha panhunahuna han Dios tungod kay an iya panhunahuna mas hitaas gud kay han aton panhunahuna. (Isaias 40:28; 55:9; Maupay nga Sumat) Salit, angayan an pakiana han Biblia: “Hin-o an nasayod han hunahuna han Ginoo, basi nga magtutdo ha iya?”—1 Corinto 2:16, An Baraan nga Kasuratan.

Kon paonan-o ka magpapahimulos: Nakakapamati an Dios ha minilyon nga pag-ampo bisan kon durungan ito. (Salmo 65:2) Maaram ngani hiya bisan han tagsa nga maya nga nahuhulog ha tuna. Maabot ba ha punto nga sobra nga mapupuno an hunahuna han Dios nga tungod hito diri na hiya makakahatag hin atensyon ha imo ngan ha imo mga pag-ampo? Diri, tungod kay waray limitasyon an iya hunahuna. Dugang pa, para ha iya “mas importante kamo kay ha damu nga maya.”—Mateo 10:29, 31.

PAMAAGI HAN DIOS: An Biblia nasiring nga “diri gud naton masasantop an tinikangan ug an katubtuban han ginbubuhat han Dios.” (Ecclesiastes 3:11, Baraan nga Biblia) Salit diri gud naton mahibabaroan an ngatanan mahitungod ha iya. “Diri masubay” an kinaadman han iya mga paagi. (Roma 11:33) Kondi, andam hiya nga ipahayag an iya pamaagi ha mga naruruyag nga lipayon hiya.—Amos 3:7.

Kon paonan-o ka magpapahimulos: Kon imo babasahon ngan aadman an Biblia, pirme ka makakabiling hin bag-o mahitungod ha Dios ngan han iya pamaagi. Karuyag sidngon, mahimo kita magin mas duok ha aton langitnon nga Amay ha kadayonan.

Bisan kon diri naton bug-os nga nasasabtan an pipira nga aspekto han Dios, diri ini nagpapasabot nga diri na naton hiya makikilala. Damu an impormasyon ha Biblia nga makakabulig ha aton nga mas makilala an Dios. Tagda an pipira hini:

NGARAN HAN DIOS: An Biblia nagtututdo nga may-ada ngaran an Dios. Hiya nagsiring: “Ako hi Jehova, amo ito an akon ngaran.” An ngaran han Dios mababasa ha Biblia hin sobra 7,000 ka beses, mas damu kay ha iba nga ngaran.—Isaias 42:8.

Kon paonan-o ka magpapahimulos: Hi Jesus nagsiring ha iya pag-ampo: “Amay namon ha langit, pagbaraanon an imo ngaran.” (Mateo 6:9) Mahimo mo ba liwat gamiton an ngaran han Dios ha imo pag-ampo? Karuyag ni Jehova nga talwason an ngatanan nga natahod ha iya ngaran.—Roma 10:13.

URUKYAN HAN DIOS: An Biblia nagtututdo nga may-ada duha nga lugar nga urukyan—an usa para ha espiritu nga mga linarang nga may espiritu nga lawas, ngan an usa an pisikal nga lugar nga ginkukompwesto han aton tuna ngan uniberso. (Juan 8:23; 1 Corinto 15:44) Ha Biblia, an pulong nga “langit” kasagaran nga nagtutudlok ha lugar han mga espiritu. Dida hito nga “langit” an “lugar nga urukyan” han Maglalarang.—1 Hadi 8:43.

Kon paonan-o ka magpapahimulos: Mas makikilala mo an Dios. An Maglalarang diri misteryoso nga  pwersa nga aada ha ngatanan nga lugar ngan ha ngatanan nga butang. Hi Jehova tinuod nga Persona nga naukoy ha tinuod nga lugar. Bisan pa hito, “waray hinimo han Dios nga diri niya nakikita.”—Hebreo 4:13.

PERSONALIDAD HAN DIOS: An Biblia nagtututdo nga makaruruyag an mga kalidad ni Jehova. “An Dios gugma.” (1 Juan 4:8) Diri gud hiya nagbubuwa. (Tito 1:2) Waray hiya pinaurog, maloloy-on hiya, mapinairon, ngan mahinay ha pagkasina. (Eksodo 34:6; Buhat 10:34) Bangin mahipausa pa ngani an damu nga tawo nga karuyag han Maglalarang nga magkaada duok nga “pakigsangkay” ha mga natahod ha iya.—Salmo 25:14.

Kon paonan-o ka magpapahimulos: Mahimo ka magin sangkay ni Jehova. (Santiago 2:23) Ngan samtang nahibabaroan mo an iya mga kalidad, mas masasabtan mo an mga asoy han Biblia.

Matin-aw an pagkahulagway han Biblia kan Jehova nga Dios. Diri hiya imposible masabtan. Ha pagkamatuod, karuyag niya nga makilala mo hiya. Hiya nagsasaad: “Kon imo hiya pamilngon, hiaagian mo hiya.” (1 Kronikas 28:9) Salit, kay ano nga diri kilalahon an Dios pinaagi ha pagbasa ngan pagpamalandong han mga asoy han Biblia? Nagsasaad an Biblia nga kon bubuhaton mo ito, ‘magigin duok hiya ha imo.’—Santiago 4:8.

Bangin maghunahuna ka, ‘Paonan-o ako magigin sangkay han Maglalarang nga diri ko man nasasabtan an ngatanan mahitungod ha iya?’ Tagda ini: Kinahanglan ba doktor liwat an sangkay han usa nga doktor? Diri! Bangin iba an propesyon han sangkay han doktor. Pero, posible la gihapon nga magin duok hira nga magsangkay. An importante, maaram an sangkay han personalidad, karuyag, ngan diri karuyag han doktor. Ha pariho nga paagi, mahimo mo hibaroan tikang ha Biblia an personalidad ni Jehova—an ngatanan nga kinahanglan mo hibaroan basi magin sangkay mo hiya.

Matin-aw nga an Biblia naghahatag hin impormasyon nga kinahanglan naton hibaroan mahitungod ha Maglalarang basi makilala naton hiya. Karuyag mo ba mahibaro hin dugang mahitungod kan Jehova nga Dios? An mga Saksi ni Jehova nagtatanyag hin libre nga pag-aram ha Biblia. Alayon pakigkomunikar ha mga Saksi ha iyo lugar o kitaa an amon website nga www.ps8318.com.