Sumala ha Biblia, hi Hadi David han Israel nabuhi ha ika-11 ka siglo B.C.E. ngan an iya mga tulin nagmando hin ginatos ka tuig. Pero may mga kritiko nga nasiring nga hi David usa la nga tawohan ha mga susmatanon o ha mga istorya nga inimbento han mga tawo ha urhi. Tinuod ba nga persona hi Hadi David?

 Han 1993, an arkeologo nga hi Avraham Biran ngan an iya grupo nakadiskobre hin tipak hin bato ha Tel Dan, ha norte han Israel, nga may inskripsyon nga nag-uunabi han “Balay ni David.” An inskripsyon, nga nakasurat ha kadaan nga Semitiko, tikang pa han ikasiyam ka siglo B.C.E. Matin-aw nga usa ito nga parte hin monumento nga gintindog han mga Arameo basi ighambog an ira kadaogan kontra ha mga Israelita.

 An usa nga artikulo ha Bible History Daily nasiring: “May mga nagruruhaduha ha inskripsyon nga ‘Balay ni David’ . . . Kondi, ginkarawat dayon han kadam-an nga eskolar han Biblia ngan mga arkeologo nga an tipak hin bato ha Tel Dan amo an siyahan nga marig-on nga ebidensya nga tinuod nga persona hi Hadi David han Biblia, salit nagin usa ini han pinakaimportante nga mga nadiskobrehan han arkeolohiya mahitungod ha Biblia nga nagin topiko ha BAR [Biblical Archaeology Review].”