Posible ba an Patas nga Sistema han Ekonomiya?
Ha damu nga nasud, may mga nagpuprotesta tungod kay inaabat nira nga diri patas an sistema han ekonomiya. Ito nga mga problema mas naggrabe pa han nagkaada COVID-19 nga pandemya, nga nagin hinungdan nga damu na an diri malipayon ha ira sitwasyon tungod han mga lockdown, kakulang hin pagkaon, ngan limitado nga serbisyo ha pagpatambal nga nagpapakita han mas daku nga kaibahan han riko ngan pobre.
Matatapos pa ba an mga problema ha ekonomiya nga nagpapaantos gud ha mga tawo? Oo. Iginsusumat han Biblia kon paonan-o susulbaron han Dios an mga problema nga gin-aatubang naton yana.
Mga problema ha ekonomiya nga susulbaron han Dios
Problema: An mga tawo waray makahimo hin sistema han ekonomiya nga makakahatag han ngatanan nga panginahanglan han tawo.
Solusyon: An mga gobyerno han tawo sasaliwnan han Dios han iya gobyerno nga gintatawag nga Ginhadian han Dios. Tikang ha langit magmamando ito ha bug-os nga tuna.—Daniel 2:44; Mateo 6:10.
Resulta: Sugad nga bug-os-kalibotan nga gobyerno, perpekto nga dudumarahon han Ginhadian han Dios an mga buruhaton dinhi ha tuna. An mga tawo diri na gud magigin pobre o mababaraka mahitungod han ira mga panginahanglan. (Salmo 9:7-9, 18) Lugod, magpapahimulos hira han mga resulta han ira gintrabahoan, ngan magkakaada hira mabungahon ngan malipayon nga kinabuhi kaupod an ira pamilya. An Biblia nagsasaad: “Magtutukod hira hin mga balay ngan maukoy dida hito, ngan magtatanom hira hin mga urubasan ngan makaon han mga bunga hito. Diri hira magtutukod nga iba an maukoy, ngan diri hira magtatanom nga iba an makaon.”—Isaias 65:21, 22.
Problema: Diri nalilikyan han mga tawo an mga panhitabo nga nagriresulta hin pag-antos ngan kapobrehan.
Solusyon: Pinaagi han iya Ginhadian, wawad-on han Dios an ngatanan nga hinungdan han kahadlok ngan kabaraka.
Resulta: Ha pagmando han Dios, an mga tawo diri na makakaeksperyensya han mga panhitabo nga nagigin hinungdan hin kawad-i nira o han ira pamilya han ira ginkikinahanglan. Pananglitan, an mga girra, kakulang hin pagkaon, ngan mga pandemya magigin butang na la han naglabay. (Salmo 46:9; 72:16; Isaias 33:24) An Dios nasiring: “An akon katawohan maukoy ha murayaw nga urukyan, ha talwas nga mga urukyan ngan ha murayaw nga mga pahuwayan.”—Isaias 32:18.
Problema: An mga tawo nga makikalugaringon ngan hakog kasagaran nga nanraraugdaog ha iba.
Solusyon: An mga sakop han Ginhadian han Dios mahibabaro pagpakita hin gugma ha iba labaw kay ha ira kalugaringon.—Mateo 22:37-39.
Resulta: Kon magmando na an Ginhadian han Dios, an ngatanan magpapakita hin diosnon nga gugma nga “diri nagbibiling han kalugaringon la nga kaopayan.” (1 Corinto 13:4, 5) An Biblia nasiring: “Diri hira mandadaot o manruruba ha akon bug-os nga baraan nga bukid, kay an tuna mapupuno gud han kahibaro mahitungod kan Jehova a sugad la nga an dagat nalulukop hin katubigan.”—Isaias 11:9.
Iginpapakita han Biblia nga nagkikinabuhi na kita ha kataposan nga mga adlaw hini nga sistema han mga butang ngan diri na maiha tutumanon han Dios an iya saad nga wad-on an ngatanan nga problema ha ekonomiya. b (Salmo 12:5) Samtang diri pa ito nahitatabo, an mga prinsipyo ha Biblia makakabulig ha imo nga mailob an mga problema ha ekonomiya nga imo naieksperyensyahan yana. Pananglitan, kitaa an artikulo nga “Paano Ka Makakapag-adjust Kapag Nabawasan ang Iyong Kita?” ngan “Timbang nga Panhunahuna ha Kwarta.”
a Ha Biblia, Jehova an ngaran han Dios.—Salmo 83:18.
b Basi mahibaro kon kay ano nga makakasarig ka ha Biblia, kitaa an artikulo nga “Biblia—Masasarigan nga Surok han Kamatuoran.”
Bangin Maruyagan Mo Liwat
AN BARANTAYAN
Ano an Bubuhaton han Ginhadian han Dios?
Maaram hi Jesus nga an Ginhadian han Dios la an gobyerno nga makakasulbad han mga problema ha tuna. Ano na an nabuhat han Ginhadian basi tumoo kita hito?
GINSAYSAY AN MGA BERSIKULO HAN BIBLIA
Mateo 6:34 Ginsaysay—“Diri Kamo Mangarit Tungud han Buwas nga Adlaw”
Diri iginpapasabot ni Jesus nga diri na kita sadang magplano para ha maabot nga panahon.
