Ginbabanabana nga lima ka bilyon nga tawo an magkikita han FIFA World Cup nga nagtikang han Nobyembre 20 ngan matatapos ha Disyembre 18, 2022. Damu an naghuhunahuna nga labaw pa an mahihimo han sugad hini nga mga sporting event kay han magkaurosa la an mga tawo ha pagkita han uyag.

•   “Kaya mabag-o han isport an kalibotan. Kaya hito mapagios an mga tawo. Kaya hito maurosa an mga tawo ha naiiba nga paagi.”—Nelson Mandela, presidente hadto han South Africa.

•   “Tungod han football, nagkakaurosa an mga tawo. An tanan naglalaom, malipayon, eksayted, ngan hinigugma nira an tanan bisan iba-iba an ira gintikangan.”—Gianni Infantino, presidente han FIFA. a

 Makakab-ot ba ito han World Cup o han bisan ano nga sporting event? Posible ba nga magkaada kamurayawan ngan pagkaurosa?

 An World Cup hini nga tuig diri la basta mahitungod ha football. Ini nga mga uyag nagin hinungdan han mga debate ha mga isyu ha komunidad ngan politika sugad han katungod han tawo, diskriminasyon ha lahi, ngan diri patas nga ekonomiya.

 Bisan pa hito, damu an nalilipay nga magkita han internasyonal nga mga sporting event sugad han World Cup. Pero anoman an ira buhaton, diri ito magriresulta hin nagpapadayon nga pagkaurosa. Lugod, nakikita dinhi an mga kinaiya ngan buhat han mga tawo nga nagriresulta han pagkabahin-bahin, nga ginsiring han Biblia nga magigin tigaman han peryodo han panahon nga gintatawag nga “kataposan nga mga adlaw.”—2 Timoteo 3:1-5.

 Mababasa ha Biblia an totoo nga paglaom para ha bug-os-kalibotan nga pagkaurosa. Nagsasaad ito nga an ngatanan nga tawo ha tuna magkakaurosa tungod ha pagmando han langitnon nga gobyerno nga gintatawag nga “Ginhadian han Dios.”—Lucas 4:43; Mateo 6:10.

 Sisiguruhon han Hadi hito nga Ginhadian, hi Jesu-Kristo, nga magkakaada hin kamurayawan ha bug-os nga kalibotan. An Biblia nasiring:

•   “An matadong mag-uuswag, ngan an kamurayawan magigin hura.”—Salmo 72:7.

•   “Iya tatalwason an pobre nga nangangaraba para hin bulig . . . Iya tatalwason hira tikang ha panalumpigos ngan kamadarahog.”—Salmo 72:12, 14.

 Bisan yana, tungod han mga katutdoan ni Jesus nagkakaurosa na an minilyon nga mga tawo tikang ha 239 nga mga nasud. Nahibaro hira nga diri na magdumot ha iba. Basi mahibaro hin dugang pa, basaha an serye han mga artikulo nga may ulohan nga “Kon Paonan-o Matatapos an Kangalas.”