Igintagna han Biblia nga ha aton panahon magkakaada mga girra, linog, epidemya, ngan iba pa nga “makaharadlok nga mga kiritaon.” (Lucas 21:10, 11) Ito nga tagna padayon nga natutuman ha 2022 nga tuig han pag-alagad. a Pananglitan, an girra ha Ukraine nagpapadayon, ngan nakakaapekto ito ha kinabuhi han minilyon nga tawo. Daku nga bahin han kalibotan an nangangalimbasog la gihapon ha pag-atubang han mga epekto han COVID-19 nga pandemya. Dugang pa, damu nga tawo an naapektohan han mga kalamidad, sugad han mga linog ha Haiti ngan makusog nga mga bagyo ha Central America, Pilipinas, ngan sur-este han Africa. Paonan-o ginbuligan han mga Saksi ni Jehova an mga naapektohan?

 Han 2022 nga tuig han pag-alagad, an aton organisasyon nagtagana hin bulig ha mga biktima han mga 200 nga kalamidad! Ha kabug-osan, nakagasto kita hin haros 12 milyon ka dolyar para makagtagana hin bulig. b Kitaa kon paonan-o gin-gamit an mga donasyon ha pagbulig ha mga biktima han duha nga kalamidad.

 Han Agosto 14, 2021, nagkaada 7.2 magnitude nga linog ha sur han Haiti. Makasurubo, tulo nga Saksi an namatay—duha nga sister ngan usa nga brother. Kinahanglan atubangon han mga nakatalwas an pisikal ngan emosyonal nga kasakit nga resulta han linog. An brother nga hi Stephane nagsiring: “Ha bug-os nga syudad, damu hinduro an namatay ngan damu an iginlulubong kada semana ha sulod han sobra duha ka bulan.” Usa pa nga brother nga hi Éliézer, nagsiring: “Damu nga Saksi an waray gin-uukyan, waray mga bado, sapatos, ngan iba pa nga nangunguna nga panginahanglan. Ha sulod hin mga bulan, damu an nahahadlok tungod han padayon nga mga aftershock.”

 An aton organisasyon binulig dayon. An branch ha Haiti naghatag hin sobra 53 ka tonilada nga pagkaon, pati mga tent, trapal, higdaan, ngan solar nga mga charger para ha mga celfon. Dugang pa, han 2022 nga tuig han pag-alagad, sobra 100 nga balay an gintukod o gin-ayad. Gumasto kita hin sobra usa ka milyon ka dolyar para hini.

 Mapasalamaton gud an aton kabugtoan. Hi Lorette nagsiring: “Nabungkag an amon balay ngan nawarayan kami negosyo tungod han linog. Waray na kami ginkakaon. Pero ginbuligan kami han organisasyon ni Jehova, ngan gintagan kami han ngatanan namon nga ginkikinahanglan.” Hi Micheline nagsiring: “Tungod han linog, an gin-uukyan ko ngan han akon duha nga anak naguba. Diri ako maaram han akon bubuhaton labot la ha pag-ampo para hin bulig, ngan ginbaton ito ni Jehova pinaagi han iya organisasyon. May-ada na kami yana gin-uukyan nga marig-on nga balay. Determinado ako nga buhaton an tanan ko nga makakaya basi ipakita an akon pagpasalamat kan Jehova.”

 Napansin han lokal nga mga awtoridad an aton ginhihimo nga pagbulig. An direktor han city hall han L’Asile nagsiring: “Karuyag ko kamo i-congratulate tungod han iyo madagmit nga pagresponde basi bumulig. Maopay gud an iyo ginbubuhat kay nagpapakita kamo hin daku nga respeto ha mga awtoridad. Nalilipay ako nga makita nga diri kamo interesado ha kwarta. Lugod, karuyag niyo bumulig ha mga tawo. Ginbubuhat niyo ito tungod han gugma.”

 Han Enero 24, 2022, an bagyo nga Ana nakaigo ha Mozambique, katapos, nagtipakadto ha weste, ha Malawi. Tungod han bagyo, nagkaada makusog nga uran ngan hangin—inabot hin 100 ka kilometro kada oras. Naguba an mga linya han koryente, mga tulay, ngan nagkaada daku nga mga pagbaha.

 Sobra 30,000 nga Saksi ha Malawi ngan Mozambique an naapektohan han bagyo. Hi Charles, nga brother nga binulig ha panhatag hin relief, nagsiring: “Han nakita ko an pag-antos han kabugtoan ngan kon ano kadamu an nawara ha ira, nasubo gud ako ngan inabat nga waray ako mahihimo.” Makuri gud an ira sitwasyon kay an ira gutiay nga suplay han pagkaon ngan mga tanom nawara tungod han baha. Damu an nawarayan hin balay. Makasurubo, usa nga brother an namatyan hin asawa ngan duha nga batan-on nga anak kay nalumos han nakulob an sakayan nga nagtatalwas unta ha ira.

 Makaharadlok gud an bagyo. Han ala-una han maagahon ha Nchalo, Malawi, nabatian han pamilya Sengeredo an makaharadlok nga tunog han masulog nga tubig. Duha nga salog an binaha! Nagdesisyon hi Brother Sengeredo nga kinahanglan bumaya hira ha ira balay. Maaramon ito nga desisyon kay waray pag-iha naguba an ira balay tungod han baha. An ira mga panag-iya naguba o naanod. Nagdesisyon an pamilya nga kumadto ha Kingdom Hall, nga kasagaran nga 30 minutos la kon babaktason tikang ha ira balay. Pero hito nga panahon, inabot hin duha ka oras an ira pagbaktas. Inabot hira nga mahulos ngan ginkakapoy, pero talwas hira.

 An mga branch ha Malawi ngan Mozambique nagpadara dayon hin bulig. Naghatag hira hin instruksyon ha mga paramangno han sirkito ngan mga tigurang nga usisahon kon ano an panginahanglan han apektado nga kabugtoan ngan taganahan hira hin espirituwal ngan emosyonal nga bulig. Igintoka an pipira nga Disaster Relief Committee (DRC) basi manguna ha panhatag hin relief, ngan gintikangan dayon hini nga mga committee an pagbulig ha kabugtoan nga magkaada pagkaon ngan iba pa nga mga panginahanglan. Sobra $33,000 an nagasto ha pagbulig ha mga tawo ngan sobra $300,000 ha pag-ayad ngan pagtukod hin mga balay.

 Gin-gamit hin maaramon han mga DRC an donasyon. Importante ini labi na kay nagmahal an mga paraliton. Pananglitan, ha siyahan nga pito ka bulan han relief work, an presyo han mais nga harina—nangunguna nga pagkaon ha Malawi—nagmahal hin mga 70 porsyento. Nagmahal liwat an gasolina. Basi makatipid, an kabugtoan napalit hin binulto nga pagkaon ngan mga materyales dida mismo ha ira lugar. Tungod hito, nakakatawad hira ngan diri na daku an ira gasto para ha pamasahe.

 An relief work nakabantad han kasingkasing han katawohan ni Jehova. Hi Felisberto nga brother ha Mozambique, nagsiring: “Yana pa gud la ako pakakakita hin organisasyon nga damu hinduro an iginhahatag: mga materyales, transportasyon, mga boluntaryo ha konstruksyon, pagkaon, ngan mahigugmaon nga giya. Usa ini nga maopay gud nga ehemplo han minagburugto nga gugma nga ginsiring ni Jesus ha Juan 13:34, 35. “Hi Ester, nga balo ha Malawi nga naguba an balay, nagsiring: “Nawad-an ako hin paglaom kay waray ako kwarta nga magagamit ha pagtukod utro hin balay. Salit han may inabot nga kabugtoan nga nagtukod hin balay para ha akon, inabat ko nga adto na ako ha Paraiso.”

 Samtang nagtitikahirani kita ha iginsaad nga bag-o nga kalibotan, makakalaom kita nga magkakaada mas damu pa nga kalamidad. (Mateo 24:7, 8) Bisan pa hito, tungod han iyo mga donasyon, nasarig kita nga an katawohan ni Jehova makakakarawat han ginkikinahanglan nga bulig. Iginsasaysay ha donate.ps8318.com an mga paagi ha paghatag hin donasyon. Salamat han iyo pagin mahinatagon.