Hirayo ha matawo ngan busy nga kinabuhi ha syudad, may mga tawo nga iba-iba an tribo, linggwahe, ngan nasyonalidad nga naukoy ha kagurangan han Amazon ha South America. Salit han Hulyo 2017, may 13 nga mga Saksi ni Jehova nga nagbiyahe ngadto ha Salog Maroni ngan ha nagsasanga nga mga salog hito ha este ha French Guiana. Ano an ira katuyoan? Basi dad-on an mensahe han Biblia nga naghahatag hin paglaom ngadto ha mga tawo nga naukoy ha ligid han salog.

 Usa ka bulan antes han 12 ka adlaw nga pagbiyahe, nagmiting an ngatanan nga kaupod basi magplano. “Nahibaro kami mahitungod ha lugar ngan ha kasaysayan hito, ngan ginhisgotan liwat namon kon paonan-o iaandam an amon kalugaringon para hito nga pagbiyahe,” siring ni Winsley. An kada tagsa gintagan hin surudlan nga diri masusulod hin tubig diin iginbutang nira an ira duyan ngan moskitero. Hito nga pagbiyahe, duha ka beses hira nga sinakay ha eruplano ngan damu ka oras nga nagbiyahe ha mga baluto.

 Ano an gin-abat hadton mga ginpili nga umupod? Ginkarawat dayon nira Claude ngan Lisette, nga sobra 60 anyos na, ito nga imbitasyon. “Sobra gud an akon kalipay, pero medyo nahadlok liwat ako,” siring ni Claude. “Nahibaroan ko nga may masulog nga mga dapit han salog nga delikado gud.” Hi Lisette may iba liwat nga ginkakabarak-an: “Ginhihinunahuna ko kon paonan-o ako makakayakan han mga linggwahe han mga Amerindian,” siring niya.

 Pariho liwat hito an gin-abat ni Mickaël nga usa han mga upod. “Diri kami pamilyar han Wayana nga tribo,” siring niya, “salit nag-research ako ha Internet basi mahibaro hin pipira nga pulong ngan basi makumusta an mga tawo ha ira linggwahe.”

 Hi Shirley, nga nagbiyahe upod han iya asawa nga hi Johann, naghimo hin lista han mga linggwahe nga ginagamit han mga naukoy ha ligid han salog. “Nag-download kami hin mga video tikang ha jw.org ha kadam-an hito nga mga linggwahe ngan nagdara kami hin libro nga nagtututdo han simple nga mga pulong ha Wayana,” siring niya.

 Han Martes, Hulyo 4, an grupo sinakay ha eruplano ha Saint-Laurent du Maroni tipakadto ha Maripasoula, nga usa nga gutiay ngan interyor nga bungto ha French Guiana.

 Han sumunod nga upat ka adlaw, an grupo nagsangyaw ha mga baryo ha ligid han mga sanga nga salog han Maroni. Nagbiyahe hira sakay han demotor nga mga baluto nga tinatawag nga pirogue. “Interesado gud an mga Amerindian ha Biblia,” siring ni Roland, nga kaupod ha grupo. “Damu an ira pakiana, ngan karuyag han iba nga dumarahan namon hira hin pag-aram ha Biblia.”

 Ha usa nga baryo, hira Johann ngan Shirley may nakaistorya nga batan-on nga mag-asawa nga may paryente nga bag-o pa la nga nag-unay. “Iginpakita namon ha ira an video nga Nakilala ng Isang Katutubong Amerikano ang Kaniyang Maylalang,” ha JW Broadcasting^®, siring ni Johann. “Naimpres gud hini nga video an batan-on nga mag-asawa. Iginhatag nira ha amon an ira e-mail address kay karuyag nira nga padayon kami nga makigkomunikar ha ira.”

 An pinakahirayo nga ginkadtoan amo an Antécume Pata. Didto, gintugotan han lider han komunidad an kapoy na nga mga Saksi nga ihigot an ira mga duyan ha usa nga panpubliko nga lugar. Kinarigo liwat hira ha salog, pariho han ginbubuhat han mga residente.

 Tikang didto, an grupo nagbiyahe ngadto ha baryo han Twenké, diin may mga residente nga nasusubo gud tungod han kamatyi hin hinigugma. “Gintugotan kami han ‘Grand Man,’ an lider han tribo, nga makaistorya an mga tawo ha baryo nga nasusubo gud basi liawon hira,” siring ni Éric, usa han mga nag-organisar han pagbiyahe. “Gin-apresyar gud han lider ngan han iya pamilya an mga teksto nga amon ginbasa ha ira ha Wayana nga Biblia. Iginpakita liwat namon an mga video mahitungod ha saad han Biblia nga pagkabanhaw.”

 Kahuman, nagbiyahe an grupo hin tunga ka oras tikang ha Maripasoula ngadto ha gutiay nga bungto han Grand-Santi. Han Martes ngan Mierkoles, nagsangyaw hira han mensahe han Biblia ha mga tawo didto. Han Huwebes, nagbiyahe na liwat hira hin lima ngan tunga ka oras tipailawod ha Salog Maroni ngadto ha Apatou.

 Antes an ultimo nga adlaw han pagbiyahe, an grupo binisita ha mga baryo han mga Maroon ha kagurangan. Ini hira katulinan han mga uripon nga Aprikano nga gindara ha South America ha panahon nga an kahirani nga nasud nga Suriname usa nga kolonya. An mga Saksi nangimbitar ha mga tawo para ha usa nga katirok ha kagurangan ha daku nga tolda nga ginhimo para hito nga okasyon. “Nalipay gud kami han damu nga tawo an inatender,” siring ni Claude. “Hito la nga aga namon hira gin-imbitar!” Hi Karsten, nga siyahan pa la nga nakaupod ha pagbiyahe ngadto ha interyor nga mga lugar, amo an naghatag han pahayag publiko ha Aukan nga linggwahe nga an ulohan, “Sugad Na La ba Hini an Kinabuhi?” Nobenta-y-uno nga tawo tikang ha iba-iba nga baryo an inatender ha katirok.

 Ha urhi, binalik an grupo ngadto ha Saint-Laurent du Maroni. Tanan hira nalipay gud ha interes nga iginpakita han mga residente, nga nagkarawat hin damu nga publikasyon ngan nagkita hin damu nga video nga ginhimo han mga Saksi ni Jehova.

 “Waray pulong nga makakagsaysay han akon kalipay tungod ha akon pag-upod hini nga pagbiyahe,” siring ni Lisette. Hi Cindy inuyon: “Kon magkakaada utro higayon, makikimalooy ako para la paupdon ako. Kinahanglan maeksperyensyahan mo ini nga kalipay basi masabtan mo ito!”

 Tungod hini nga pagbiyahe, karuyag han iba nga nangupod nga bumalik. “Andam kami nga buhaton ito utro!” siring ni Mickaël. Hi Winsley binalhin ngadto ha Saint-Laurent du Maroni. Hira Claude and Lisette, nga pariho sobra 60 anyos na, nagdesisyon nga bumalhin ngadto ha Apatou.