Ne’e fakatu’akoi e te ʼAtua tana fili te kau Kilisitiano agatonu, hili tanatou mamate, ’e fakatu’uake anai natou ke maʼu’uli ʼi selo. (1 Petelo 1:​3, 4) ʼI tonatou kua ʼosi filifili, ’e tonu ke natou taupau te tui pea mo fakaalu tahi tonatou maʼuli ki te ʼu pelesepeto Fakakilisitiano. ʼE maʼuhiga te faʼahi ʼaia, mo kapau ʼe natou fia maʼu te pilivilesio ʼaia.​—Efeso 5:5; Filipe 3:​12-​14.

Kotea ka fai anai ʼe natou ʼae ka hake ki selo?

 Ne’e fakanofo ke natou hau pea mo pelepitelo lolotoga ta’u ’e afe ia tafa ’o Sesu. (Apokalipesi 5:​9, 10; 20:6) ʼE natou faʼufaʼu te “lagi fo’ou,” ko tona ʼuhiga ko te puleʼaga ’e tu’u ’i selo ka ina puleʼi anai te “kele fo’ou” pe’e ko te sosiete fakatagata. Ko te kau takitaki ʼaia ’e tokoni anai ki te toe fakatu’u ’o te ’u aluʼaga faitotonu ʼae ne’e fakatu’utu’u e te ʼAtua talu mai te kamat​a ’o te malamanei.—Esaia 65:17; 2 Petelo 3:​13.

Ko te toko fia ka fakatuʼuake anai ki selo?

 Ne’e fakaha ’i te Tohi-Tapu ko te toko 144 000 hahaʼi ʼae ka fakatu’uake ki te maʼuli ’i selo. (Apokalipesi 7:4) ʼI te tohi ’o Apokalipesi 14:​1-3, ne’e sio te apositolo ko Soane ki “te Akeno ’e tu’u ’i te mo’uga ’o Sione, pea mo te toko 144 000.” (Soane 1​:29; 1 Petelo 1:​19) Ko te “Mo’uga ’o Sione” ’e ina fakata te tu’ulaga ma’oluga ’o Sesu mo te toko 144 000 ʼae ʼe hau mo ia ’i Selo.​—Pesalemo 2:6; Hepeleo 12:22.

 Ko natou ʼae ne’e “pau’i mo filifili” ke natou kaugā hau fakatahi mo Sesu ’i te Puleʼaga ’e higoa’i natou ko te “ki’i faga ovi.” (Apokalipesi 17:14; Luka 12:32) ’E ha mai ’e mole natou kaugā malie ’i te ’u ovi fuli ’a Sesu.​—Soa. 10:16.

Te ʼu manatu ʼo ʼuhiga mo natou ʼae ka olo ki selo

 Te manatu ʼa te tagata: Ko te toko 144 000 ʼae ’e tu’u ’i te tohi ’o Apokalipesi ko he mataʼi numelo fakata kae mole ko he mataʼi numelo mo’oni.

 Te manatu ʼae ʼe moʼoni: ’I te tohi ’o Apokalipesi, ’e tou maʼu ʼihi mataʼi numelo ’i tona ʼuhiga fakata, kae ko ʼihi atu ’e tou to’o ’i tona ʼuhiga mo’oni. Ohage la, ne’e tohi ʼi ai “te ’u higoa ʼe 12 ’o te ʼu apositolo ʼe toko 12 ʼa te Akeno.” (Apokalipesi 21:14) Tou vakaʼi te ’u fakamo’oni ke tou mahino ai ko te toko 144 000 ’e mole ko he mataʼi numelo fakata kae ko he mataʼi numelo ’e mo’oni.

 Ia Apokalipesi 7:4 ʼe talanoa ki “te kaugā malie ʼo natou ʼae neʼe fakailoga, [peʼe fakamoʼoni ki te maʼuli ʼi selo], neʼe ko te toko 144 000.” ’I te kapite pe aia ’o Apokalipesi ’e ’i ’ai te tahi kutuga ’e mole fakatahi ia mo te toko 144 000: “Koʼeni he toe hahaʼi tokolahi, neʼe mole feala ke lau e he tahi.” Ko te “toe hahaʼi tokolahi” ʼaia ’e natou maʼu te haofaki mai te ʼAtua. (Apokalipesi 7:​9, 10) Kapau la ko te toko 144 000 ko he mataʼi numelo fakata, pea ʼe fakaʼuhiga ki he toe hahaʼi kaugā malie mole feala ke lau, ka na ʼaua la ’e mole ʼi ai ni kutuga ’e lua. a

 Pea tahi, ’e fakaha ko te toko 144 000 “ko natou ’aia ne’e totogi mai te malamanei ohage ko he ’u ’uluaki fua.” (Apokalipesi 14:4) Ko te kupu “’uluaki fua” ʼe fakaʼuhiga ki he ki’i kutuga fakafofoga. ʼE alu tahi mo natou ʼae ka hau anai mo Kilisito ’i selo, ki te hahaʼi tokolahi ʼae ’e maʼu’uli ’i te kele.​—Apokalipesi 5:​10.