’Ei. Ko’eni te ’u fa’ahi ’ae ’e fakamo’oni ai ki tamatou mulimuli ia Kilisito:

• ’E matou faiga ke matou mulimuli ki te ’u akonaki pea mo te fa’ifa’itaki ’o Sesu Kilisito.—1 Petelo 2:21.

• ’E matou tui ko Sesu tokotahi pe totatou haofaki’aga, kote’uhi “e mole i ai i te lalo lagi he tahi age higoa nee kua foaki ki te u tagata, e tonu ke ... haofaki ai [tatou].”—Gaue 4:12.

• Ka liliu he tahi ko he Fakamo’oni ’a Sehova, pea ’e papitema ’i te huafa ’o Sesu.—Mateo 28:18, 19.

• ’E matou faikole ’i te huafa ’o Sesu.—Soane 15:16.

• ’E matou tui ’e ko Sesu te Pule ’o te tagata fuli.—1 Kolonito 11:3.

Ka’e, ’e lahi te ’u fa’ahi ’e matou kehekehe ai mo te ’u lotu ’ae ’e natou ui ’e natou mulimuli ia Kilisito. Ohage la, ’e matou tui ki te akonaki ’o te Tohi-Tapu ’ae ko Sesu ’e ko te ’Alo ’o te ’Atua, pea ’e mole kau ia ki he Tahitolutapu. (Mateo 16:16; Maleko 12:29) ’E mole matou tui ’e ’i ai he laumalie ’o te tagata ’e ma’uli ’i te hili ’o tana mate, mo te ui ’ae ko te ’Atua ’e ina fakamamahi’i te haha’i ’i he ’ifeli kakaha ’o he’e gata, pea ’e mole tonu ke faka’aoga’i e te kau takitaki lotu ni higoa fakatu’ulaga mo ’onatou fakama’uhiga’i.—Ekelesiasi 9:5; Esekiele 18:4; Mateo 23:8-10.