Kailoa ia. Neʼe matou tala ʼi tamatou nusipepa, Te Tule Leʼo: “ʼE mole lelei te fakamalohiʼi ʼo te hahaʼi ke fetogi tanatou lotu.” a ʼE matou taupau te manatu ʼaia ʼuhi ko te ʼu tupuʼaga ʼaeni:

• Neʼe mole fakakinauʼi e Sesu ʼi he temi te hahaʼi ke natou tali ʼana akonaki. Neʼe ina iloʼi ʼe tokosiʼi anai natou ʼe natou tali tana logo. (Mateo 7:​13, 14) ʼI te temi ʼae neʼe tukia ai ʼihi ʼo ʼana tisipulo ʼuhi ko ʼana palalau, neʼe mole ina fakakinauʼi ke nonofo, kae neʼe ina tuku ke olo.​—Soane 6:​60-​62, 66-​68.

• Neʼe akoʼi e Sesu ki ʼana tisipulo ke ʼaua naʼa natou fakakinauʼi he tahi ke ina fetogi tana tauhi. Neʼe tonu ke kumi e ʼana tisipulo ʼae ʼe fia logo ki te logo lelei ʼo te Puleʼaga, pea neʼe mole tonu ke natou fakamalohiʼi he tahi mo kapau ʼe mole loto ki ai.​—Mateo 10:​7, 11-​14.

• Ko te fetogi ʼae ʼe fai fakakinau ʼe mole hona ʼaoga, he ʼe tali e te ʼAtua te tauhi ʼae ʼe fai age kia te ia ʼaki te loto katoa.​—Tetelonome 6:​4, 5; Mateo 22:37, 38.

ʼE moʼoni, ʼe matou fakamafola te logo ʼo te Tohi-Tapu “ʼo kaku ki te ʼu potu taupotu ʼo te kele,” “ia muʼa ʼo te hahaʼi pea mo te ʼu ʼapi,” ohage ko tona fakatotonu mai ʼi te Tohi-Tapu. (Gaue 1:8; 10:42; 20:20) Pea ohage pe ko tona fai ki te ʼu ʼuluaki Kilisitiano, neʼe tau tukugakoviʼi hala matou, ʼe matou gaue “ʼi hona faʼahiga fai ʼe fakafeagai ki te lao.” (Gaue 18:12, 13) Kae, ʼe hala te ʼu tukugakovi ʼaia. ʼE mole matou fakakinauʼi he tahi. Kae, ʼe matou iloʼi ʼe tonu muʼa ke mahino he tahi pea hoki feala leva ke fai tana tonu.

ʼE mole matou fakakinauʼi te hahaʼi ke fetogi lotu. ʼE mole matou faipolitike ʼi ʼomatou fakatahi, pea ʼe mole matou foaki ni koloa peʼe ko ni tuʼulaga moʼo fakalalata mai te hahaʼi. Ko tamatou aga ʼe mole alu tahi mo natou ʼae ʼe natou ui ʼe natou Kilisitiano kae ʼe natou fakalainoaʼi ia Kilisito ʼi tanatou fai te taʼi aga ʼaia. b

ʼEi, ʼe fakaha ʼi te Tohi-Tapu ʼe feala ki te hahaʼi hanatou fetogi lotu. ʼE toe talanoa ai ki te ʼu hahaʼi neʼe mole natou muliʼi te lotu ʼo tanatou famili, pea neʼe natou toʼo te tonu ʼae ke natou tauhi ki te ʼAtua moʼoni. Ohage la ko Apalahamo, Lute, te kau Atena mo te apositolo ko Paulo. (Sosue 24:2; Lute 1:​14-​16; Gaue 17:22, 30-​34; Kalate 1:​14, 23) Tahi ʼae, ʼe ui ʼi te Tohi-Tapu, ʼe toe feala ki he tahi ke ina toʼo te tonu fakaʼofaʼofa ʼae ke ina liʼaki te tauhi ʼae ʼe tali e te ʼAtua.​—1 Soane 2:​19.

Ki te ONU (Puleʼaga Fakatahi), ʼe kau te fetogi lotu ki “te lao fakamalamanei ʼo te ʼAlikiʼaga ʼo te tagata.” Ko te Déclaration universelle des droits de l’homme ʼe lagolago ki te lao ʼaia pea mo fakamoʼoni ki te ui ʼae ko te tagata fuli ʼe feala ke “fetogi lotu peʼe ko te ʼu akonaki ʼe tui ki ai” pea mo tana “kumi, mo maʼu pea mo folahi . . . ni fakamahino mo ni manatu,” tafito ʼae ʼe fakalotu. c ʼE mahino ia, ʼe toe fakamaʼua mai e te ʼu lao ʼaia ke tou fakaʼapaʼapa ki te ʼu tonu ka fai e te tagata takitokotahi, ke ina taupau te ʼu akonaki ʼe loto ki ai pea mo fakafisi ki ʼae ʼe mole loto ki ai.

Kailoa ia. ʼE fakalotomalohiʼi tatou ʼi te Tohi-Tapu ke tou fakaʼapaʼapa ki te tagata takitokotahi mo tana lotu. (1 Petelo 2:​17) Tahi ʼae, ʼe mulimuli te kau Fakamoʼoni ʼa Sehova ki te fakatotonu ʼa te Tohi-Tapu ʼae ke fakaʼapaʼapa ki ʼanatou matuʼā, tatau aipe pe ʼe mole natou lotu tahi.​—Efeso 6:​2, 3.

Kae, tokolahi ʼe mole natou manatu tahi mo te Tohi-Tapu. ʼE ui fenei e te fafine neʼe lahilahi ake ʼi Zambie: “ʼI toku fenua, ka fetogi lotu he tahi . . . ʼe ko tana kakaʼi ʼaia tona famili pea mo tona fenua.” Neʼe tau te fafine mo te aluʼaga ʼaia ʼi tana kei tupulaga. ʼI te temi ʼaia, neʼe ina kamata ako te Tohi-Tapu mo te kau Fakamoʼoni ʼa Sehova, pea mole faʼa fualoa ki ai, neʼe ina toʼo leva te tonu ʼae ke fetogi lotu. ʼE ina ui fenei: “Neʼe ui tuʼumaʼu mai e ʼaku matuʼā tanā iita kia au pea mo tanā lotomamahi. Neʼe faigataʼa ʼosi kia au te aluʼaga ʼaia, he neʼe au ʼofa mamahi ʼi ʼaku matuʼā. . . . Ko te tonu ʼae ke au agatonu kia Sehova kae tuku te ʼu talatisio fakalotu, ʼe mole fakaʼuhiga ia ʼe au fakafisi ki toku famili.” d