“Ke Akoʼi Te ʼu Meʼa ʼAia Ki He ʼu Tagata Agatonu”
“Ke ke akoʼi te ʼu meʼa ʼaia ki he ʼu tagata agatonu, ke natou liliu mo natou ʼo popoto ʼi te akoʼi ʼo te ʼu meʼa ʼaia ki ʼihi age.”—2 TIMOTEO 2:2.
KATIKO: 123, 53
1, 2. Kotea te manatu ʼa te tokolahi ʼo ʼuhiga mo tanatou gaue?
ʼI TE manatu ʼa te tokolahi, ʼe fakalogo tonatou maʼuhiga ki te gaue ʼae ʼe natou fakahoko. Pea ʼi ʼihi agaʼi fenua, moka kita fia feiloʼiʼaki mo he tahi, ʼe ko he agamahani te fai ʼo te fehuʼi ʼaeni: “ ʼE ke gaue ʼifea?”
2 ʼE talanoa ʼi te Tohi-Tapu ʼi ʼihi temi ki te ʼu gaue neʼe fai e ʼihi. Ohage la, ko “Mateo, te tagata tanaki tukuhau,” mo “Simone, te tagata fai kiliʼi manu” pea mo “Luka, te toketa ʼofaina.” (Mateo 10:3; Gaue 10:6; Kolose 4:14) Pea ʼi ʼihi temi, ʼe toe talanoa ʼi te Tohi-Tapu ki te ʼu gaue ʼae ʼe fakahoko e ʼihi ʼi tanatou tauhi kia Sehova. Tou fakakaukauʼi muʼa te Hau ko Tavite, mo te polofeta ko Elia pea mo te apositolo ko Paulo. Neʼe fakamaʼuhigaʼi e te ʼu tagata ʼaia ʼanatou gaue ʼae neʼe tuku age e Sehova. ʼO toe feia pe, ʼe tonu ke maʼuhiga kia tatou te ʼu gaue fuli ʼae ʼe tou fakahoko ʼi tatatou tauhi kia Sehova.
3. He koʼe ʼe tonu ke akoako e te ʼu tehina matutuʼa ia te kau tupulaga? (Vakaʼi te ʼuluaki pāki.)
Ekelesiasi 1:4) Pea ʼe ko he aluʼaga fakalotomamahi ʼaia ki te hahaʼi ʼa Sehova. Ia ʼaho nei, kua tuputupu te gaue faifakamafola, pea kua fakaʼaogaʼi e te kautahi ʼo Sehova ia te tekenolosia ke kaku te logo lelei ki he hahaʼi tokolahi. Kaʼe ʼi ʼihi temi, ʼe faigataʼa ki te ʼu tehina matutuʼa hanatou toe ako he ʼu faʼahiga faifakamafola foʼou. (Luka 5:39) Pea ka kua matutuʼa te ʼu tehina, ʼe mole kei tatau leva tonatou malohi. (Taaga Lea 20:29) Koia, kapau ʼe akoako e te ʼu tehina matutuʼa ia te kau tupulaga ke toe lahi atu te ʼu gaue ʼae ʼe natou fakahoko ʼi te kautahi ʼo Sehova, ʼe ko he fakaha ʼaia ʼo tonatou ʼofa.—Lau ia Pesalemo 71:18.
3 ʼE maʼuhiga kia tatou te ʼu gaue ʼae ʼe tou fakahoko ʼi tatatou tauhi kia Sehova, pea ʼe tou lotofiafia ʼaupito ai. Koia, ʼe tou fakaʼamu ke toe fualoa atu tatatou fakahoko ʼatatou gaue. He ʼe ka hoko mai leva te temi matuʼa, pea ʼe mole kei tou fealagia anai te ʼu gaue ʼae neʼe tou fai ʼi tatatou kei malolohi. (4. He koʼe ʼe faigataʼa kia natou ʼae ʼe takitaki ʼi te kokelekasio hanatou foaki he gaue ki te kau tupulaga? ( Vakaʼi te fakamatala ʼae ’i te ʼa takai “He Koʼe ʼe Faigataʼa Hatatou Foaki ʼo He Gaue?”)
4 ʼE mole faigafua tuʼumaʼu kia natou ʼae ʼe takitaki ʼi te kokelekasio hanatou foaki he gaue fakateokalatike ki te kau tupulaga. ʼE lagi lotomamahi te ʼu tehina mo kapau ʼe mole kei natou lavaʼi he gaue ʼe natou manako ki ai. Peʼe lagi natou toe lotomamahi ʼi tanatou manatu ʼae ʼe tuku anai tanatou gaue makehe ʼae ʼe natou leleiʼia. Peʼe lagi natou manatu ʼe mole lelei anai te fai ʼo te gaue mo kapau ʼe mole natou tokakaga totonu ki ai. Peʼe natou ui ʼe mole maʼu honatou temi ke natou akoako ai niʼihi. Pea ʼi te tahi faʼahi, ʼe tonu ki te kau tupulaga ke natou maʼu te kataki fualoa mo kapau ʼe mole foaki age niʼihi atu gaue fakateokalatike.
5. Kotea te ʼu fehuʼi ka tou talanoa anai ki ai ʼi te alatike ʼaeni?
5 Kaʼe, he koʼe ʼe maʼuhiga ke tokoni te ʼu tehina matutuʼa ki te kau tupulaga ke natou fakahoko he tahi atu ʼu gaue fakateokalatike? ʼE feafeaʼi hanatou lava fakahoko te faʼahi ʼaia? (2 Timoteo 2:2) Pea he koʼe ʼe tonu ke maʼu e te kau tupulaga he manatu ʼe lelei lolotoga tanatou gaue fakatahi mo te ʼu tehina faiva matutuʼa pea mo natou taʼofi mai ia natou he ako? Tou vakaʼi muʼa pe neʼe teuteuʼi feafeaʼi e te Hau ko Tavite ia tona foha ki he gaue ʼe maʼuhiga ʼaupito.
NEʼE TEUTEUʼI E TAVITE IA SALOMONE
6. Kotea ʼae neʼe fakaʼamu ki ai ia Tavite? Kaʼe kotea ʼae neʼe ui age e Sehova ki ai?
6 Lolotoga ni taʼu, neʼe fakatagaʼi ia Tavite pea neʼe tonu ke maʼuli fehikiʼaki ʼi te ʼu potu fenua. Kaʼe ʼi te hili ʼo tona fakanofo hau, neʼe nofo leva ʼi he fale hau matalelei. Koia, neʼe ina ui fenei ai ki te polofeta ko Natane: “Koeni, e au nofo i he fale kua fau aki te sete, pea e tuku te aleka o te hai a [Sehova] i lalo o he falela.” Neʼe fakaʼamu ia Tavite ke ina laga he fale tapu peʼe ko he fale lotu matalelei moʼo Sehova. Pea neʼe ui fenei age e Natane: “Fai te u mea fuli ae e ke mau i tou loto, koteuhi e kau te Atua 1 Koloniko 17:1-4, 8, 11, 12; 29:1.
mo koe.” Kaʼe neʼe mole ko te finegalo ʼaia ʼo Sehova. He neʼe ina fakatotonu age kia Natane ke ina fakahoko te ʼu palalau ʼaeni kia Tavite: “E mole ko koe ae e ina lagai anai he fale kia au ke au nofo ai.” Logo la neʼe fakapapauʼi age e Sehova kia Tavite ʼe nofo tuʼumaʼu anai mo ia, kaʼe neʼe iloʼi e Tavite ʼe laga anai te fale lotu e he tahi ʼi ʼona foha. Neʼe kotea te manatu ʼa Tavite?—7. Neʼe tali feafeaʼi e Tavite ia te takitaki ʼa Sehova?
7 Neʼe lagi lotomamahi ʼaupito ia Tavite he neʼe loto moʼoni ke ina laga he fale lotu moʼo Sehova. Kaʼe neʼe lagolago tuʼumaʼu ki te gaue ʼae ka takitaki e tona foha ko Salomone. Neʼe tokoni ai ia Tavite ki te fakatuʼutuʼu ʼo te kau gaue pea mo te tanaki ʼo te ukamea, mo te kapa, mo te siliva, mo te aulo pea mo te papa. Neʼe mole ina tuʼania ia pe ʼe ko ai ʼae ka vikiʼi ʼo ʼuhiga mo te laga ʼo te fale lotu ʼae ka fakahigoaʼi anai ko te fale lotu ʼo Salomone. Kaʼe neʼe ina fakalotomalohiʼi ia Salomone ʼo ina ui fenei: “I te lakaga nei, sioku foha, ke nofo [Sehova] mo koe, o tupu ke manuia au gaue pea ke ke fakatuu te fale o [Sehova], tou Atua, o hage ko te mea ae nee ina fakaha o uhiga mo koe!”—1 Koloniko 22:11, 14-16.
8. He koʼe neʼe lagi manatu ia Tavite neʼe mole heʼeki tokalelei ia Salomone ke ina laga te fale lotu? Kaʼe kotea ʼae neʼe fai e Tavite?
8 Lau ia 1 Koloniko 22:5. Neʼe lagi manatu ia Tavite neʼe heʼeki tokalelei ia Salomone ke ina takitaki ia he toe gaue maʼuhiga feia. Pea tahi, neʼe tonu ke “lelei tukupau” ia te fale lotu, kaʼe ko Salomone neʼe kei tamasiʼi pea neʼe heʼeki ina maʼu he poto feʼauga. Kaʼe neʼe iloʼi e Tavite ʼe tokoni anai ia Sehova kia Salomone ke ina fakahoko te gaue makehe ʼaia. Koia, neʼe faiga malohi aipe ia Tavite ke tokoni ki tona foha ki te tokonaki ʼo te toe gaue maʼuhiga ʼaia.
KOTOU FIAFIA ʼI TE AKOAKO ʼO NIʼIHI
9. Kotea ʼae ʼe feala ke logoʼi e te ʼu tehina matutuʼa ʼi tanatou foaki he ʼu gaue ki ʼihi? Kotou tuku mai he faʼifaʼitaki.
9 ʼE mole tonu ke lotovaivai te ʼu tehina matutuʼa mo kapau ʼe ʼaoga ke natou foaki he ʼu gaue ki te kau tupulaga. ʼE tou iloʼi fuli, ʼe ko te gaue ʼa Sehova ʼae ʼe maʼuhiga ʼaupito ia ʼaho nei. Pea ko te akoako ʼo te kau tupulaga ke natou fakahoko he ʼu gaue ʼi te kokelekasio, ʼe tokoni anai ki te fakahoko ʼo te gaue ʼaia. Tou toʼo he faʼifaʼitaki. ʼI tau kei veliveli, neʼe ke sio ki te taki motoka ʼo tau tamai. Pea ʼi tau lahi ake, neʼe ina fakamahino atu pe ʼe feafeaʼi te taki ʼo he motoka. ʼAki te temi, neʼe ke maʼu leva tou pelemi pea ke taki motoka mo koe. Logo la kua ke maʼu tou pelemi, kaʼe neʼe toe foaki atu pe e tau tamai ni tokoni. ʼI ʼihi temi, neʼe kolua fesuisuiʼaki te taki ʼo te motoka. Kaʼe ʼi te fakahaʼuhaʼu ʼo tona vaivai, neʼe lagi ke taki pe te motoka. Neʼe ita ai koa tau tamai? Kailoa ia, neʼe fiafia he neʼe ina iloʼi kua feala ke ke feʼaveʼaki ia ia. ʼO toe feia pe, ʼe fiafia te ʼu tehina matutuʼa ʼi tanatou sisio ki te kau tupulaga ʼae neʼe natou akoako, kua natou tokalelei ki te fakahoko ʼo he ʼu gaue ʼi te kautahi ʼo Sehova.
10. Kotea te manatu ʼa Moisese ʼo ʼuhiga mo tona fakamaʼuhigaʼi pea mo tona ʼuhiga polofeta?
10 ʼE tonu ke tou tokakaga naʼa tou maheheka ʼo ʼuhiga mo te ʼu gaue fakateokalatike ʼae ʼe maʼu e ʼihi. Koia, tou toʼo he ako mai te faʼahiga manatu ʼa Moisese, ʼi te temi ʼae neʼe palalau ai ʼihi Iselaele ohage ko he kau polofeta. (Lau ia Numelo 11:24-29.) Neʼe fia fakagata e Sosue tanatou aga ʼaia, kaʼe neʼe ui fenei age e Moisese: “Pe e ke finenonofo o tupu ko au? E fakaamu ake ke liliu te hahai fuli a [Sehova] ko ni polofeta, pea ke finegalo lelei [ia Sehova] o tuku tona Laumalie kia natou!” Neʼe iloʼi e Moisese, ko Sehova ʼae ʼe ina lolotoga takitaki ia te gaue. Pea neʼe mole ina kumi ke fakamaʼuhigaʼi ia ia, kaʼe neʼe loto ke maʼu e te ʼu kaugana fuli ʼa Sehova honatou ʼu pilivilesio. Kaʼe ʼe feafeaʼi kia tatou? ʼE tou fiafia koa mo kapau ʼe maʼu e ʼihi ni gaue ʼi te tauhi ʼae kia Sehova?
11. Kotea ʼae neʼe ui e te tehina ʼo ʼuhiga mo te foaki ʼo he gaue ki ʼihi?
11 Tokolahi te ʼu tehina neʼe gaue kinakina ʼi te tauhi kia Sehova lolotoga ni taʼu ʼe loaloaga. Neʼe natou akoako te kau tupulaga ke natou fakahoko he tahi atu ʼu gaue. Ohage la ko te tehina ʼe higoa ko Peter.
Lolotoga taʼu ʼe 74, neʼe kau ʼi te selevisi temi katoa, pea neʼe gaue ʼi te filiale ʼo te Eulopa ia taʼu ʼe 35. Neʼe tokaga ki te Selevisi Gaue ʼi he temi fualoa. Hili ia, neʼe filifili ki te gaue ʼaia te tehina tupulaga ʼe higoa ko Paul, neʼe akoako e Peter. Neʼe ita koa ia Peter ʼo ʼuhiga mo te fetogi ʼaia? Kailoa ia. He neʼe ina ui fenei: “ ʼE au fiafia ʼaupito ʼi taku sio ki te ʼu tehina ʼae neʼe au akoako, ʼe natou tali ke natou fakahoko he tahi atu ʼu gaue pea mo natou tokakaga lelei ki ai.”TOU FAKAʼAPAʼAPA KI TE ʼU TEHINA MATUTUʼA
12. Kotea te ako ʼe tou taʼofi mai te faʼifaʼitaki ʼo Lopoamo?
12 Hili pe te fakanofo hau ʼo te foha ʼo Salomone ko Lopoamo, neʼe kumi tokoni leva ki te hahaʼi matutuʼa ʼo ʼuhiga mo ʼona maʼua foʼou. Kaʼe ki muli age, neʼe fakafisi ia ki ʼanatou tokoni. Neʼe fia mulimuli ia ki te ʼu tokoni ʼa te kau tupulaga ʼae ʼe natou taʼiake tahi. Pea neʼe iku ai ki te malaʼia. (2 Koloniko 10:6-11, 19) Kotea te ako ʼe tou taʼofi mai ai? ʼE ko he aga fakapotopoto hatatou kole tokoni ki te hahaʼi ʼae ʼe matutuʼa pea kua natou faiva age ia tatou. Pea ʼe mole fakamaʼua ki te kau tupulaga ke natou fakahoko te ʼu gaue ke tatau mo tona fai e ʼihi tehina matutuʼa ʼi muʼa atu. ʼE tonu ke natou lotolelei ʼo fakaʼapaʼapa ki te ʼu manatu ʼa te ʼu tehina matutuʼa. Pea ke ʼaua naʼa natou ui ʼe mole lelei te faʼahiga fai ʼo te gaue e natou matutuʼa.
13. ʼE tonu ke gaue fakatahi feafeaʼi te kau tupulaga mo ʼonatou tehina matutuʼa?
13 ʼI ʼihi temi, ʼe hinoʼi te kau tupulaga ki he gaue neʼe fai mahani e he ʼu tehina matutuʼa mo faiva. ʼE lelei anai ke natou taʼofi he ʼu ako mai ʼonatou tehina matutuʼa ʼaia. Ohage la ko Paul ʼae neʼe ina fetogi ia Peter ʼi tona tuʼulaga tagata taupau ʼi he selevisi ʼi te Petele. Neʼe ina ui fenei: “ ʼE au toʼo he temi ke au alu ai ʼo kumi tokoni kia Peter, pea ʼe au fakalotomalohiʼi ʼihi tehina ʼi te selevisi ʼaia ke natou toe fai feia.”
Neʼe toʼo e Paulo he temi ke ina akoʼi ia Timoteo pea neʼe taupau lelei e Timoteo te ako ʼaia
14. Kotea ʼae ʼe tou ako mai te gaue fakatahi ʼa Timoteo mo te apositolo ko Paulo?
14 Neʼe kei tamasiʼi age ia Timoteo ʼi te apositolo ko Paulo, kaʼe neʼe nā gaue fakatahi lolotoga ni taʼu. (Lau ia Filipe 2:20-22.) Neʼe ui fenei e Paulo ki te kau Kolonito: “[ʼE au] fekauʼi atu ia Timoteo, he ʼe ko taku fanau ʼofaina pea mo agatonu ʼi te ʼAliki. ʼE ina fakamanatuʼi atu anai ʼaku faʼahiga gaue maʼa Kilisito Sesu, ohage pe ko taku fai ʼi te ʼu kokelekasio fuli.” (1 Kolonito 4:17) ʼE ha lelei mai, neʼe gaue fakatahi ia Paulo mo Timoteo pea neʼe nā felagolagoʼaki. Neʼe toʼo e Paulo he temi ke ina akoʼi ai ia Timoteo ki tana “faʼahiga gaue maʼa Kilisito,” pea neʼe taupau lelei e Timoteo te ako ʼaia. Neʼe ʼofa mamahi ia Paulo kia Timoteo pea neʼe tui papau ʼe tokaga lelei anai ki ʼona tehina mo tuagaʼane ʼo Kolonito. ʼE feala ke faʼifaʼitakiʼi e te kau tagata ʼafeā ia te apositolo ko Paulo ʼi tana akoʼi ʼihi tehina ki te takitaki ʼo te kokelekasio.
ʼE TOU MAʼUHIGA FULI
15. ʼE tokoni feafeaʼi mai ia Loma 12:3-5 ke tou tali te ʼu fetogi ʼae ʼe hoko?
15 ʼE tou maʼuʼuli nei ʼi he ʼu temi fakaofoofo. ʼE tuputupu te koga ʼo te kautahi ʼo Sehova ʼae ʼi te kele ia faʼahi kehekehe. Ko tona fakaʼuhiga, ʼe ʼi ai tuʼumaʼu pe anai he ʼu fetogi. Pea ko ʼihi fetogi ʼe feala ke faigataʼa kia tatou. Kaʼe kapau ʼe tou agavaivai mo tou tokagaʼi tafito te ʼu faʼahi ʼae ʼe lelei ki te fakahoko te gaue ʼo te Puleʼaga ʼo te ʼAtua, pea ʼe mole tou manatu pe anai kia tatou totonu. ʼI tatatou fai feia, ʼe tou logo tahi ai. Neʼe faitohi fenei ia Paulo ki te kau Kilisitiano ʼo Loma: “ ʼE au ui kia koutou fuli ke ʼaua naʼa kotou manatu ʼe kotou maʼuhiga.” Hili ia, pea neʼe ina fakamahino ʼe tou tahi maʼu ʼi te kokelekasio he ʼu gaue kehekehe ohage pe ko te ʼu koga kehekehe ʼo te sino.—Loma 12:3-5.
Ko te ʼu kaugana fuli ʼa Sehova, ʼe natou fia lagolago ki te Puleʼaga ʼo te ʼAtua pea mo fakahoko ia gaue fuli pe ʼe kole age kia natou
16. Kotea ʼe feala ke fai e te ʼu Kilisitiano fuli moʼo taupau ia te tokalelei mo te logo tahi ʼo te kautahi ʼo Sehova?
16 Ko te ʼu kaugana fuli ʼa Sehova, ʼe natou fia lagolago ki te Puleʼaga ʼo te ʼAtua pea mo fakahoko ia gaue fuli pe ʼe kole age kia natou. ʼE feala ke akoako e te ʼu tehina matutuʼa ia te kau tupulaga. ʼE feala ki te kau tupulaga ke natou fakahoko he tahi atu ʼu gaue ʼaki te fia malalo pea mo te aga fakaʼapaʼapa. Pea ʼe fiafia te ʼu tehina mo kapau ʼe lagolago age ʼonatou ʼohoana ʼi te ʼu temi ʼae ʼe hoko ai he ʼu fetogi. ʼE feala ki te ʼu fafine ʼaia ke natou faʼifaʼitakiʼi ia Pilisila, ʼae neʼe ko he fafine agatonu pea neʼe gaue fakatahi mo tona ʼohoana ko Akila.—Gaue 18:2.
17. Ko te gaue fea ʼae neʼe akoʼi e Sesu ke fai e ʼana tisipulo?
17 Neʼe tuku mai e Sesu ia te faʼifaʼitaki ʼae ʼe lelei tokotahi ʼo ʼuhiga mo te akoʼi ʼo te hahaʼi. Neʼe iloʼi e Sesu ʼe hoko atu anai tana gaue e niʼihi. ʼE moʼoni, neʼe mahino ki te ʼuhiga agahala ʼo ʼana tisipulo. Kaʼe neʼe falala ia Sesu ʼe natou fakamafola anai te logo lelei ʼo lahi age. (Soane 14:12) Neʼe ina akoʼi lelei ia natou, koia neʼe natou lavaʼi ai te gaue faifakamafola ʼi te ʼu fenua fuli ʼae neʼe feala ke natou olo ki ai.—Kolose 1:23.
18. Kotea te gaue ʼae ka tou fai anai ʼi te ka haʼu? Kotea te gaue ʼae ʼe tou fai nei?
18 Hili tana fakatuʼuake ia Sesu, neʼe toe hilifaki age e Sehova te tahi ʼu gaue pea mo te pule “ ʼo maʼoluga age ʼi te ʼu puleʼaga, mo te ʼu pule, mo te ʼu malohi, mo te ʼu takitaki . . . fuli pe.” (Efeso 1:19-21) Tatau aipe pe ʼe tou mamate agatonu kia Sehova ʼi muʼa ʼo te hoko mai ʼo Alamaketone, ʼe tou toe maʼuʼuli anai pea ʼe tou toe fakahoko anai ʼo katoa he gaue ʼaoga ʼi te malama foʼou. Kaʼe ʼo kamata atu ʼi te temi nei, ʼe tou kau fuli ki te gaue fakafiafia ʼae ko te fakamafola ʼo te logo lelei mo te fai ʼo ni tisipulo. Koia tupulaga peʼe matuʼa, ʼe feala ke lahi tuʼumaʼu ʼatatou “gaue ʼi te ʼAliki.”—1 Kolonito 15:58.