Ko he ʼu felogoi ʼe lelei ʼe ko he fevaevaeʼaki mo ʼakotou fanau ʼakotou manatu pea mo te ʼu meʼa ʼae ʼe kotou logoʼi.

Ko te felogoi ʼe mole ko he meʼa ʼe faigafua. Tafito la mo te ʼu fanau ʼae ʼe kei tupulaga. ʼE ui fenei ʼi te tohi Breaking the Code: “ ʼI tanatou kei liliki, ʼe natou fia fakaha ia meʼa fuli ki ʼanatou matuʼā. Pea ka kua natou lalahi ʼe mole kei natou loko fia palalau. Koia ʼae ʼe mole iloʼi ai e te ʼu matuʼā te ʼu manatu pea mo te ʼu meʼa ʼae ʼe logoʼi e ʼanatou fanau.” Maʼia pe la pe ʼe mole natou fia palalau atu, kae ko te temi tonu la ʼaia ʼe maʼuhiga ai te felogoi.

Faipalalau mo ʼau fanau ʼi te temi pe ʼae ʼe fia palalau atu ai. Maʼia pe la moka ʼe tonu ke fualoa atu te faipalalau ʼi te poʼuli.

ʼE ui Fenei e Lisa: “ ʼE feala ke ke ui: ‘Kua ke fia palalau mai leva kae neʼe tā nonofo pe la ʼaho katoa mole ke palalau mai.’ He koʼe koa la ʼe ke muna, kae mole ko te loto koa la ʼaia ʼo te ʼu matuʼā fuli, ke ʼomai ʼanatou fanau ʼo palalau age?”

ʼE ui fenei e Herbert: “Logo la ʼe mole au fia moe tauhala, kae ko te ʼu faipalalau ʼae neʼe au leleiʼia mo ʼaku fanau tupulaga neʼe ko ʼae neʼe maʼupogia.”

PELESEPETO FAKATOHI-TAPU: “Tou tahi kumi te meʼa ʼae ʼe lelei ki he tahi, kaʼe mole ko te meʼa ʼae ʼe lelei kia tatou.”—1 Kolonito 10:24.

ʼAua naʼa fakaleluʼi koe. Neʼe ui fenei e he tamai: “ ʼI ʼihi temi, ʼe au lolotoga fakakaukauʼi au he tahi meʼa moka palalau mai haku fanau. Pea ʼe natou iloʼi pe ʼe mole au fagono age ki ʼanatou palalau.”

Koia, matehi te televisio mo ʼihi atu kiʼi masini moka ʼe fakalelu atu. Tokaga fakalelei ki te ʼu palalau ʼae ʼe fai atu e te ʼu fanau, tafito la moka ko he meʼa ʼe fakatupu hoha, tatau aipe pe ʼe mole faʼa maʼuhiga kia koe.

ʼE ui fenei e Maranda: “ ʼE tonu ke tou fakaha ki ʼatatou fanau, ko te ʼu meʼa ʼae ʼe natou logoʼi ʼe maʼuhiga ʼaupito kia tatou. He kapau ʼe mole tou fai feia, pea ʼe mole natou ʼomai anai ʼo fakaha mai te ʼu meʼa ʼae ʼe natou logoʼi, peʼe ʼe natou olo ai leva ʼo kumi tokoni ki tuʼa.”

ʼE ui fenei e Anthony: “ ʼAua naʼa kotou hoko iita tatau aipe pe ʼe mole lelei te manatu ʼa te ʼu fanau.”

PELESEPETO FAKATOHI-TAPU: “Kotou tokakaga ki takotou faʼahiga fakalogo.”—Luka 8:18.

Faipalalau ʼi te ʼu temi faigamalie. ʼI ʼihi temi, ʼe faigafua age te palalau ʼa te ʼu fanau moka ʼe natou heheka ia tafa ʼo ʼanatou matuʼā ʼi hanatou heheka ʼo fehagaʼaki.

ʼE ui fenei e Nicole: “ ʼE matou faipalalau moka matou olo motoka. Pea ʼe matou felogoi lelei moka ʼe matou heheka fakatahi.”

Ko te ʼu temi kai ʼe ko he tahi ʼaia ʼu faigamalie ke faipalalau ai.

ʼE ui fenei e Robin: “ ʼI te kai afiafi, ʼe tahi fakamatala te ʼu meʼa ʼae neʼe hoko ʼi te ʼaho katoa, pe neʼe lelei peʼe kovi. ʼI tamatou fai feia ʼe toe fakamalohiʼi ai tamatou feʼofaʼofani pea ʼe matou mahino ai ʼe maʼu tuʼumaʼu pe he tokoni ki ʼomatou fihifihia.”

PELESEPETO FAKATOHI-TAPU: “ ʼE tonu ki te tagata fuli ke lotolelei ʼo fagono, ke tuai ʼi te palalau.”—Sakopo 1:19.