PELESEPETO FAKATOHI-TAPU: “ ʼE mole fehiʼa he tagata ki tona sino, kaʼe ʼe ina fafaga pea mo fakapelepeleʼi.”—Efeso 5:29.

TONA FAKAʼUHIGA: ʼE fakalotomalohiʼi tatou e te Tohi-Tapu ke tou tokakaga ki tatatou malolo fakasino. ʼE ui e te sivi ʼe tupu te ʼu mahaki ʼuhi ko te faʼahiga maʼuli ʼo te hahaʼi. Koia, kapau ʼe tou puleʼakiʼi lelei totatou faʼahiga maʼuli, ʼe lelei age anai tatatou malolo fakasino.

TE ʼU TOKONI:

• Te Kai. Tokaga ki tau faʼahiga kai ʼo filifili te ʼu meʼa kai ʼae ʼe ʼaoga ki tou malolo fakasino, pea mo inu lahi te vai.

• Te Faigaoʼi. ʼAki te faigaoʼi ʼe ke malohi ai tatau aipe pe kua ke matuʼā, maʼimoa peʼe ke mahaki. ʼE lagi fakalotomalohiʼi koe e tou famili, ʼou kaumeʼa peʼe ko te ʼu toketa ke ke faigaoʼi, kae ʼe ʼa koe pe te fakahoko ʼo te faʼahi ʼaia.

• Te Moe. ʼE tupu te ʼu mahaki kovi ʼuhi ko te mole feʼauga ʼo te moe. Ko ʼihi ʼe natou fai ni gaue ʼi te temi moe. Kae ko te feʼauga ʼo te moe ʼe fua lelei kia koe.

PELESEPETO FAKATOHI-TAPU: “Tou fakamaʼa ia tatou mai te ʼu ʼuli fuli ʼo te sino pea mo te ʼatamai.”—2 Kolonito 7:1.

TONA FAKAʼUHIGA: Tokolahi ʼe natou mahahaki mo mamate ʼuhi ko te suluka.

TE ʼU TOKONI: Tohi ʼi te kaletalio te ʼaho ʼae ʼe ke fia fakagata ai tau suluka. ʼI muʼa ʼo te ʼaho ʼaia,  liʼaki te ʼu sikaleti mo te ʼu meʼa tusikaleti, mo te ʼu puhaafi mo ʼihi atu meʼa ʼo ʼuhiga mo te agamahani kovi ʼaia. ʼAua naʼa ke alu ki te ʼu faʼahi ʼae ʼe suluka ai ʼihi. Pea ke fakaha ki ʼou kaumeʼa tau fakatuʼutuʼu ʼaia.

PUIPUI TOU MAʼULI.

‘Kapau e ke fakatuu anai he fale foou, e ke fau anai he a ae e ina takatakai te ato, o tupu ke aua naa maligi he toto i tou fale, moka to anai he tahi.’​—TETELONOME 22:8.

LOLOMI TOU ITA.

“Ko ae e mole itaita vave e nofo mo he atamai lahi, kae ko ae e itaita vave e ina fakaha tona vale.”​—TAAGA LEA 14:29.

FAKAFEʼAUGA TE KAI.

“Ke aua naa ke kau . . . ia natou ae e kai fakavale.”​—TAAGA LEA 23:20.