Ka fai e he tahi hana fakapapau, “ ʼe mole ina fai ni palalau neʼe mole ina fakakaukauʼi pea ʼe ko he fakapapau ʼe ina fakahoko anai ia. Pea ʼe ina kole ki te ʼAtua ke fakamoʼoni ki tana fakapapau ʼaia.” ʼE feala pe ke ina ui leʼo lahi peʼe tohi ʼi he pepa.

ʼE feala ke manatu ʼihi ʼe mole lelei ke fai he fakapapau, he neʼe ui e Sesu: “ ʼAua naʼa kotou fai he fakapapau. Ko takotou ‘io’ ke ‘io’ pea ko takotou ‘kailoa’ ke ‘kailoa’ koteʼuhi ko te ʼu meʼa ʼe kotou hilifaki ki ai ʼe haʼu ia mai te Agakovi.” (Mat. 5:33-37) Neʼe iloʼi e Sesu, ʼi te Lao ʼa Moisese, neʼe fakamaʼua ai ni fakapapau pea neʼe fai e ni kaugana agatonu ʼa te ʼAtua ni fakapapau. (Sen. 14:22, 23; Eke. 22:10, 11) Neʼe ina toe iloʼi neʼe fai pe la e Sehova totonu ni fakapapau. (Hep. 6:13-17) Koia, neʼe mole ui leva e Sesu ʼe mole feala hatatou fai ni fakapapau. Kae neʼe ina fakatokaga te hahaʼi ke ʼaua naʼa natou fai ni fakapapau ki he ʼu meʼa ʼe mole hona ʼaoga, peʼe mole hona tupuʼaga lelei. ʼE tonu ke tou fakahoko tuʼumaʼu ʼatatou fakapapau he ʼe ko te meʼa ʼaia ʼe loto ki ai e Sehova ke tou fai.

Kotea la ʼae ʼe tonu ke ke fai moka ʼe kole atu ke ke fai he fakapapau? ʼE tonu muʼa ke ke iloʼi papau pe ʼe feala hau fakahoko. Pea kapau ʼe ke sio ʼe faigataʼa anai, pea ʼe lelei age pe tau fakafisi. ʼE fai mai e te Folafola ʼa te ʼAtua te fakatokaga ʼaeni: “ ʼE lelei age tau mole fai he fakapapau ʼi tau fai he fakapapau kae ʼe mole ke fakahoko.” (Ekl. 5:4) Pea ke fakakaukauʼi te ʼu pelesepeto Fakatohi-tapu ʼae ʼe pipiki ki te fakapapau ʼae ʼe kole atu ke ke fai. Pea ke ke toʼo he tonu ʼo mulimuli pe ki tou leʼo ʼo loto ʼae neʼe akoʼi e te ʼAtua. Kotea te ʼu pelesepeto Fakatohi-tapu ʼaia?

Ko ʼihi fakapapau ʼe alu tahi mo te finegalo ʼo te ʼAtua. Ohage la, ko te kau Fakamoʼoni ʼa Sehova ʼe natou fefakapapauʼaki moka natou ʼohoana. Ko te tagata mo te fafine ʼohoana ʼe nā fakapapau ia muʼa ʼo te ʼAtua pea mo te ʼu fakamoʼoni ʼo tonā ʼohoana, ʼe nā feʼofaʼofani anai mo fefakaʼapaʼapaʼaki lolotoga tonā maʼuli katoa. (Ko ʼihi taumatuʼa ʼe mole tatau tanatou fefakapapauʼaki, kae ʼe natou fai pe he fakapapau ia muʼa ʼo te ʼAtua.) Pea fakaha ai leva kua nā ʼohoana lolotoga tonā maʼuli katoa. (Sen. 2:24; 1 Ko. 7:39) Ko te fakapapau ʼo te ʼohoana ʼe ko he meʼa ʼe lelei pea ʼe alu tahi pea mo te finegalo ʼo te ʼAtua.

Ko ʼihi fakapapau ʼe mole alu tahi mo te finegalo ʼo te ʼAtua. Ko he Kilisitiano moʼoni ʼe mole ina fai anai he fakapapau feia, ohage la moka ʼe ina fakaʼaogaʼi he ʼu mahafu ke lagolago ki tona fenua peʼe ke fakafisi ki tana tui ki te ʼAtua. ʼE mole alu tahi anai mo te ʼu fakatotonu ʼa te ʼAtua. Ko te kau Kilisitiano ʼe mole tonu ke natou kau ki te malama ʼaeni, koia ʼe mole tonu ke tou kau ki ʼanatou fihi, feia mo ʼanatou tau.​—Soa. 15:19; Esa. 2:4; Sakp. 1:27.

 Ko ʼihi fakapapau ʼe fakalogo ki te leʼo ʼo loto. ʼI muʼa ʼo te fai ʼo he fakapapau, ʼe maʼua muʼa ke tou fakakaukau fakalelei pe ʼe tou mulimuli ki te tokoni ʼaeni ʼa Sesu: “Kotou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua.”—Luka 20:25.

Ohage la ko he Kilisitiano ʼe fia fetogi puleʼaga peʼe ina kole ke fai hana pasipo, pea ʼe ui age ʼe maʼua ke ina fai he fakapapau. Kapau ʼi te fenua ʼaia, ko te fai ʼo he fakapapau ko tona fakaʼuhiga ko te fai ʼo he faʼahi ʼe mole alu tahi mo te lao ʼa te ʼAtua, ko tona leʼo ʼo loto ʼae neʼe akoʼi e te Tohi-Tapu ʼe mole ina fakagafua anai ke ina fai te faʼahi ʼaia. Kae ʼe fakafealagia anai e te puleʼaga ki te Kilisitiano ʼaia ke ina fetogi te ʼu aluʼaga ʼae neʼe tohi huʼu mo tona fakapapau ʼuhi pe ko tona leʼo ʼo loto.

Ko te fai ʼo te taʼi fakapapau ʼaia neʼe fetogi, ʼe feala pe ke alu tahi mo Loma 13:1, ʼe ui ai: “Ke fakalogo te hahaʼi fuli pe ki te ʼu pule maʼoluga.” Koia, ʼe feala ke manatu e te Kilisitiano ʼe mole ina fai he meʼa ʼe kovi mo kapau ʼe ina fakapapau ke ina fai he meʼa ʼe kole age e te ʼAtua ke fai e te kau Kilisitiano.

ʼE toe maʼuhiga ke fakalogo te Kilisitiano ki tona leʼo ʼo loto moka kole age ke ina fakaʼaogaʼi he meʼa peʼe ina fai he faʼahiga hakaga pe moʼo fai ʼaki ai tana fakapapau. Ko te kau Loma mo te kau Scythes ʼo te temi muʼa, neʼe natou fai ʼanatou fakapapau, ʼo natou fakaʼaogaʼi ʼonatou heleta. Ko tona fakaʼuhiga neʼe natou fakaʼaogaʼi te fakata ʼo te ʼatua ʼo te tau ohage ko te fakamoʼoni ʼo te nofo agatonu ʼa he tahi. Ko te kau Keleka neʼe natou hiki ʼonatou nima ki te lagi, moka neʼe natou fai he fakapapau. Ko tonatou fakamoʼoni ʼaia ʼe ʼi ai he malohi fakaʼatua ʼe ina sioʼi te ʼu meʼa ʼe ui pea mo fai, ʼa ia ʼe huʼi maʼua ki ai te tagata.

ʼEi, ʼe mole fai anai e he kaugana ʼa Sehova he fakapapau ʼo ina fakaʼaogaʼi he fakata fakapuleʼaga ʼae ʼe pipiki ki te lotu hala. Kae feafeaʼi moka kole atu ʼi te telepinale ke ke hili tou nima ki te Tohi-Tapu ʼo ke fakapapau ʼe ke tali pe anai te moʼoni? Ko te faʼahi ʼaia, ʼe feala pe tau fai, he ʼe palalau ʼi te Tohi-Tapu ki ni hahaʼi agatonu neʼe natou fai ni fakapapau ʼo fai ʼaki ni hakaga. (Sen. 24:2, 3, 9; 47:29-31) ʼE maʼuhiga ke ke manatuʼi, ka ke fai te taʼi fakapapau ʼaia, ko tau fakapapau ʼaia ia muʼa ʼo te ʼAtua ʼe ke tala pe anai te moʼoni. ʼE tonu anai ke ke tali ki te ʼu fehuʼi fuli ʼe fai atu, kae ke tala pe te moʼoni.

ʼUhi ʼae ʼe maʼuhiga kia tatou tatatou felogoi mo Sehova, ʼe tonu anai ke tou faikole mo vakavakaʼi fakalelei moka kole mai ke tou fai he fakapapau. ʼE tonu anai ke tou mahino papau ʼe mole tou fakafeagai anai ki totatou leʼo ʼo loto pea mo te ʼu pelesepeto Fakatohi-tapu. Ka ke fakatotonu ke ke fai he fakapapau, pea ʼe maʼua anai ke ke fakahoko.​—1 Pet. 2:12.