Te ʼu Fehuʼi ʼa Te Kau Lautohi
He koʼe ʼe ui ʼi te lao ʼae ia Levitiko 19:16 “e mole ke fai anai ni fakamooni loi ke tamatei ai tou oloi?” Pea kotea te ako kia tatou?
Neʼe ui e Sehova ki te kau Iselaele ʼe tonu ke natou maʼoniʼoni. Koia ʼae neʼe ina ui fenei age kia natou: “E mole pe ke fakamafola anai ni fatufatu loi ki he tahi o tau hahai. E mole ke fai anai ni fakamooni loi [peʼe “faiga,” NWT] ke tamatei ai tou oloi. Ko au [“Sehova,” NWT].”—Lev. 19:2, 16.
Ko te kupusiga palalau ʼae “fai anai ni fakamooni loi” neʼe totonu tona fakaliliu ʼi te Fakahepeleo. Kae kotea tona fakaʼuhiga? Neʼe ui fenei ʼi he tohi ʼo ʼuhiga mo te tohi ʼo Levitiko: “Neʼe faigataʼa te mahino ki te koga ʼo te vaega ʼaia he neʼe . . . faigataʼa te iloʼi pe ʼe fakaʼuhiga kitea te kupusiga palalau ʼaia. ʼI te Fakahepeleo ko tona fakaʼuhiga ‘ʼe mole tonu anai ke ke tuʼu ʼi ʼoluga, peʼe ke tuʼu ia tafa peʼe ovi’ ki he tahi.”
Ko ʼihi kau sivi Tohi Tapu ʼe natou ui ʼe ʼi ai tona pikipikiga mo te vaega ʼae ʼi muʼa atu, ʼae ʼe ui fenei: “E mole pe ke fai anai he tonu ke hala i au fakamaau: e mole ke sio anai ki te masiva o he tagata, pea e mole ke sio anai ki te mauhiga o he tagata, kae e ke fakamaaui anai tou oloi o mulimuli ki te lao totonu.” (Lev. 19:15) Koia, ka ui ʼi te vaega 16 ke mole tou fai he ʼu fakamoʼoni loi ‘ke tamateʼi ai totatou oloi,’ ko tona fakaʼuhiga ʼe tonu ki te hahaʼi ʼa te Atua ke natou faitotonu moka natou fakamauʼi he koga ʼi te telepinale. Tatau aipe pe ko te koga ʼaia ka fakamauʼi ʼe ko he aluʼaga fakakoloa, peʼe fakafamili. Pea ʼe mole tonu ki he Iselaele ke aga fakakaka ke ina maʼu ai hana meʼa. Koia, ʼe mole tonu ke tou fai te aga ʼaia, kae ʼe ʼi ai te tahi aluʼaga ke tou mahino ai ki te manatu ʼae ʼi te vaega 16.
Ka tou lau te kamataʼaga ʼo te vaega, neʼe fakatotonu e te ʼAtua ki tana hahaʼi ke ʼaua naʼa natou fakamafola ni loi ʼo ʼuhiga mo he tahi. Kotou manatuʼi ko te faifasituʼu ʼe kovi age ia ʼi te faifatufatu, logo la ʼe feala ke toe tupu ai ni fihifihia ʼuhi ko te faifatufatu. (Taag. 10:19; Ekl. 10:12-14; 1 Tim. 5:11-15; Sakp. 3:6) Ko he tahi ʼe faifasituʼu ʼe ina ʼulihi te matagafua ʼo he tahi, pea mo fakamafola ni loi ʼo feala ke tuʼutamaki ai tona maʼuli. Ko te aluʼaga ʼaia neʼe hoko kia Napote. Neʼe fakamafola ni loi ʼo ʼuhiga mo ia pea neʼe tuki makaʼi kae neʼe mole ina fai he meʼa ʼe kovi. (1 Hau 21:8-13) ʼEi, ka faifasituʼu he tahi ʼe tuʼutamakiʼia ai te maʼuli ʼo he tahi, ohage ko tona ui ʼi te lua koga ʼo te vaega ʼo Levitiko 19:16.
ʼE fakamatala e he tahi he ʼu loi ʼo ʼuhiga mo he tahi he ʼe fehiʼa ia ki ai. ʼE tou lau fenei ia 1 Soane 3:15: “Ko ia ʼae ʼe fehiʼa ki tona tehina ʼe ko he tagata faifakapo ia, pea ʼe kotou iloʼi ʼe mole he tagata faifakapo ʼe ina maʼu anai te maʼuli heʼe gata.” ʼE kotou tokagaʼi hili te fai e te Atua te ʼu palalau ʼaeni “e mole ke fai anai ni fakamooni loi ke tamatei ai tou oloi,” neʼe ina toe ui fenei: “E mole pe anai ke fehia ki tou tehina i tou loto.”—Lev. 19:17.
Koia, ko te manatu ʼae ʼe tou maʼu ia Levitiko 19:16 ʼe ko he fakatotonu ki te kau Kilisitiano fuli. ʼE mole tonu ke tou fakamafola ni loi ʼo uhiga mo he tahi ke ʼulihi ai tona matagafua. Kapau ʼe tou fakamafola ni loi ʼo uhiga mo he tahi, ko tona fakaʼuhiga ʼe tou fehihiʼa ʼi ai. Koia ʼe mole tonu ki te kau Kilisitiano ke natou fai te taʼi aga ʼaia.—Mat. 12:36, 37.