Neʼe tohi fenei e te apositolo ko Paulo ki te kau Kilisitiano ʼo Tesalonika: “Kapau ʼe mole fakalogo he tahi ki te meʼa ʼae neʼe matou fakaha atu ʼi te tohi ʼaeni, kotou tokakaga kia ia.” (2 Tes. 3:14) Neʼe tou ui ʼi muʼa atu, neʼe fai te fakatotonu ʼaia ki te kau tagata ʼafeā. Kapau ʼe hoko atu pe te meʼa noaʼi e he tahi te ʼu pelesepeto ʼi te Tohi-Tapu, logo la tona kua ʼosi tokoniʼi, ʼe feala ke fai e te ʼu tagata ʼafeā he akonaki fakatokaga ki te kokelekasio. Pea neʼe mole kei fakatahi leva te kau faifakamafola mo ia ʼaia.

Kae ʼe ʼaoga ke fai he fetogi ʼo ʼuhiga mo te manatu ʼaia. ʼE ha lelei mai ko te tokoni ʼa Paulo ʼe fakaʼuhiga ia ki he tonu ʼe fai anai e te kau Kilisitiano takitokotahi moka hoko he aluʼaga. Koia ʼe mole kei ʼaoga ke fai e te kau tagata ʼafeā he akonaki fakatokaga. He koʼe neʼe tou fetogi tatatou faʼahiga manatu? Tou vakaʼi pe kotea ʼae neʼe palalau ki ai ia Paulo ʼi tana foaki te fakatotonu ʼaia.

Neʼe tokagaʼi e Paulo ko ʼihi Tesalonika neʼe ‘maʼuʼuli maveuveu.’ Neʼe mole natou fakalogo ki te ʼu tokoni ʼae neʼe foaki age mai te Tohi-Tapu. ʼI tana tahi ʼaʼahi te kokelekasio ʼi muʼa atu, neʼe ina fakatotonu fenei: “Kapau ʼe mole fia gaue he tahi, ke ʼaua naʼa kai.” Kae neʼe hoko atu pe te mole fia gaue ʼa ʼihi moʼo taupau tonatou maʼuli logo la neʼe feala pe ke natou gaue. Pea neʼe mole gata ai, kae neʼe natou toe tokakaga ki he ʼu meʼa neʼe mole natou kau ai. Neʼe tonu ke feafeaʼi te aga ʼa te kau Kilisitiano kia natou ʼaia neʼe mole fia fakalogo?​—2 Tes. 3:​6, 10-​12.

Neʼe ui e Paulo: “Kotou tokakaga kia ia.” ʼI te Fakakeleka, ʼe fakaʼuhiga te kupu ʼaia ki hau iloʼi ia te aga ʼae ʼe fai e he tahi pea ke tokaga leva ke mole malave kia koe tana aga ʼaia ʼe kovi. Neʼe fai e Paulo te fakatotonu ʼaia ki te kokelekasio katoa kae neʼe mole gata pe ki te kau tagata ʼafeā. (2 Tes. 1:1; 3:6) Koia, kapau neʼe tokagaʼi e te kau Kilisitiano takitokotahi te mole fia fakalogo ʼa he tehina peʼe ko he tuagaʼane ki he tokoni ʼi te Tohi-Tapu, neʼe ina fai te tonu ʼae ke mole toe “fakatahi mo ia.”

Neʼe tonu koa ke fakaʼuhiga e te kokelekasio ia ia ʼaia ko he tahi kua fakamavae? Kailoa, he neʼe hoko atu fenei e Paulo: “Kotou haga tokoniʼi ia ia ohage ko he tehina.” Koia, neʼe kei fakatahi pe te kau Kilisitiano mo ia ʼi te ʼu fono mo te faifakamafola. Kae neʼe mole kei natou fakatahi leva mo ia ʼi te ʼu temi fakafiafia peʼe ʼi te ʼu temi malolo. Kotea tona tupuʼaga? Neʼe ui e Paulo: “Ke tupu ai hana ufiufi.” ʼI tanatou tokakaga leva kia ia ʼaia, neʼe feala ai ki te tehina peʼe ko te tuagaʼane ke ufiufi pea ke fetogi tana aga.​—2 Tes. 3:​14, 15.

Ia ʼaho nei, ʼe lava mulimuli feafeaʼi te kau Kilisitiano ki te tokoni ʼaia? ʼUluaki, ʼe tonu muʼa ke tou iloʼi papau pe ʼe fai moʼoni e te tehina peʼe ko te tuagaʼane he aga “maveuveu” ohage ko tona ui e Paulo. Neʼe mole palalau ia Paulo ʼo ʼuhiga mo natou ʼae ʼe natou fai ni tonu ʼe kehe mo ʼae ʼa tatou, he ʼe fakalogo ia ki te leʼo ʼo loto takitokotahi. Neʼe mole toe palalau ʼo ʼuhiga mo natou ʼae ʼe kehe age te ʼu meʼa ʼae ʼe natou leleiʼia mo tatou. Pea neʼe mole talanoa ia Paulo ʼo ʼuhiga mo natou ʼae ʼe natou fai mai he aga ʼe tou mamahi ai. Kae neʼe talanoa ia Paulo ʼo ʼuhiga mo natou ʼae neʼe tokoniʼi ʼaki te Folafola ʼa te ʼAtua kae mole natou fia fakalogo ki ai.

Ia ʼaho nei, kapau ʼe tou tokagaʼi ko he tehina peʼe ko he tuagaʼane ʼe kei talagataʼa pe ki te ʼu tokoni ʼae ʼe foaki age ʼi te Tohi-Tapu, a ʼe tou filifili anai ke mole kei tou fakatahi mo ia ʼi te ʼu temi fakafiafia peʼe ko te ʼu temi malolo. ʼUhi ʼae ʼe ko he tonu ke kita fai e kita takitokotahi, ʼe mole tou palalau anai ki te faʼahi ʼaia mo ʼihi atu, gata pe ki totatou kiʼi famili ʼae ʼi totatou loto fale. Pea ʼe hoko atu pe anai tatatou fakatahi mo ia ʼaia ʼi ʼatatou fono mo te faifakamafola. Pea ka fetogi leva tana aga, ʼe tou toe fakatahi anai mo ia ʼi te ʼu temi fakafiafia.