1. Kotea ʼae ʼe tonu ke fai e te kau tupulaga ʼo ʼuhiga mo tonatou ka haʼu? Kotea anai ka tokoni kia natou ke mole natou tuʼania fau? (Vakaʼi te ʼuluaki pāki.)

ʼU TUPULAGA, ʼe mahino ia, ʼe ko he aga fakapotopoto ia te teuteuʼi ʼo he folau pea ʼe tonu ke kotou fakatuʼutuʼu fakatomuʼa te koga meʼa ʼae ka kotou olo anai ki ai. ʼO toe feia pe, ko te maʼuli ʼe hage pe ia ko he folau. Pea ko tokotou temi tupulaga ʼae ʼe tonu ai ke kotou fai he ʼu fakatuʼutuʼu pe ʼe kotea ʼae ka kotou fai anai ʼi tokotou maʼuli. Kaʼe ʼe moʼoni, ʼe mole faigafua ia te fai ʼo he ʼu fakatuʼutuʼu feia. Ko te tuagaʼane ʼe kei finemui ʼe higoa ko Heather neʼe ina ui fenei: “ ʼE fakamataku ia, he ʼe tonu ke ke filifili pe ʼe kotea anai ka ke fai ʼi tou maʼuli katoa.” Koia kapau ʼe ke manatu feia, manatuʼi te ʼu palalau ʼaeni ʼa Sehova: “Aua naa ke feaveaki ni mata tuania, koteuhi ko au ko tou Atua; e au fakamalohii ia koe, e au hau o tokoni kia koe.”​—Esaia 41:10.

2. ʼE ke iloʼi feafeaʼi ʼe loto Sehova ke ke teuteuʼi lelei tou ka haʼu?

² ʼE fakalotomalohiʼi koe e Sehova ke ke teuteuʼi lelei tou ka haʼu. (Ekelesiasi 12:3; Mateo 6:20) He ʼe loto ia ke ke maʼuli fiafia. Pea ʼe fakamoʼoni ki ai ia tana fakatupu, te ʼu meʼa ʼae ʼe ke  sio mo logo ki ai pea mo te ʼu meʼa ʼae ʼe ke ʼahiʼahiʼi. ʼE toe tokaga ia Sehova kia tatou ʼi ʼihi aluʼaga. Ohage la, ʼe ina foaki mai he ʼu tokoni pea ʼe ina akoʼi tatou ke tou maʼuli fiafia. Koia, ka liakī e te hahaʼi ʼana tokoni fakapotopoto, ʼe mole fiafia ai. Pea ʼe ina ui fenei kia natou ʼaia ʼe mole mulimuli ki tana takitaki: “Nee koutou filifili te mea ae e au fehia ki ai. . . . Koeni, e fiafia anai aku tagata faifekau, kae e koutou ufiufi anai; Koeni, e hiva anai aku tagata faifekau te fiafia i onatou loto.” (Esaia 65:​12-14) Kapau ʼe tou toʼo he ʼu tonu ʼe fakapotopoto, ʼe tou fakakololiaʼi ai ia Sehova.​—Taaga Lea 27:11.

3. Kotea ʼae ʼe loto e Sehova ke ke fai?

³ Kotea te ʼu fakatuʼutuʼu ʼae ʼe loto e Sehova ke ke fai? Ke feala hau maʼuli fiafia, ʼe ʼaoga ke ke iloʼi ia Sehova pea mo ke tauhi kia te ia. He neʼe feia te fakatupu ʼo te tagata e Sehova. (Pesalemo 128:1; Mateo 5:3) Ko te ʼu manu, ʼe natou kakai pe natou mo iinu pea mo maʼu ʼonatou ʼuhi. Kaʼe ʼe loto e Sehova ke ke fai hau ʼu fakatuʼutuʼu ke ʼi ai he ʼuhiga moʼoni ʼo tou maʼuli mo ke fiafia ai. He ʼe ko tou Tupuʼaga, ko “te ʼAtua ʼo te ʼofa,” ko “te ʼAtua fiafia,” ʼae neʼe ina fakatupu te tagata ki tona pāki. (2 Kolonito 13:11; 1 Timoteo 1:11; Senesi 1:27) Pea ʼe ke fiafia anai mo kapau ʼe ke faʼifaʼitakiʼi ia totatou ʼAtua ʼofa. ʼE ui fenei ʼi te Tohi-Tapu: “ ʼE lahi age te fiafia moka kita foaki, ʼi takita tali.” (Gaue 20:35) ʼE moʼoni te faʼahi ʼaia. Pea ʼe mahino ia, neʼe kua ke logoʼi te taʼi fiafia ʼaia. Koia ʼae ʼe loto ai e Sehova ke ke fakatafito ʼau fakatuʼutuʼu, ki te ʼofa ki ʼou tatau pea mo tou ʼofa kia te ia.​—Lau ia Mateo 22:​36-39.

4, 5. Kotea ʼae neʼe fiafia ai ia Sesu?

⁴ Neʼe tuku e Sesu Kilisito ia he faʼifaʼitaki lelei kia koutou ʼu tupulaga. ʼE mahino ia, ʼi tana kei veliveli neʼe gaoʼi mo ʼihi tamaliki pea neʼe fiafia ai. Pea ohage pe ko tona ui ʼi te Folafola ʼa te ʼAtua, ʼe ʼi ai te temi moʼo “kata” pea ʼe ʼi ai te temi moʼo “mee.” (Ekelesiasi 3:4) Neʼe toe fakaovi foki ia Sesu kia Sehova ʼaki ia tana ako ia te ʼu Tohi Taputapu. ʼI tona taʼu 12, neʼe punamaʼuli te kau faiako ʼi te fale lotu “ ʼi tana mahino pea mo ʼana tali.”​—Luka 2:​42, 46, 47.

⁵ Pea ʼi te kua lahi leva ʼa Sesu, neʼe fiafia ʼi te fai ʼo te ʼu meʼa ʼae neʼe kole age e te ʼAtua ke ina fai. Ohage la, neʼe loto e te ʼAtua ke haga ia Sesu ʼo “tala te logo lelei ki te kau masisiva” pea ke ina “fakamalolo te kau kivi.” (Luka 4:18) Ia Pesalemo 40:​8, MN, ʼe fakaha lelei ai pe kotea ʼae neʼe logoʼi e Sesu, he neʼe ina ui fenei: “Neʼe au fiafia, e toku ʼAtua, ʼi te fai ʼo tou finegalo.” Neʼe fiafia ia Sesu ʼi te akoʼi ki te hahaʼi pe ko ai ia tana Tamai. (Lau ia Luka 10:21.) ʼI te tahi ʼaho, ʼi te ʼosi faifakamafola ʼa Sesu ki te fafine ʼo ʼuhiga mo te tauhi moʼoni, neʼe ina ui fenei ki ʼana tisipulo: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.” (Soane 4:​31-34) Neʼe fiafia ia Sesu he neʼe ʼofa ki te ʼAtua pea mo ʼona tatau. Pea ʼe ke toe fiafia anai mo koe mo kapau ʼe ke faʼifaʼitakiʼi ia Sesu.

6. He koʼe ʼe lelei ke ke palalau ki ʼihi ʼo ʼuhiga mo ʼau fakatuʼutuʼu?

 ⁶ Tokolahi te kau Kilisitiano neʼe natou pio­nie ʼi tanatou kei tupulaga, pea neʼe natou fiafia ai. He koʼe ʼe mole ke palalau mo ʼihi ia natou ʼaia ʼo ʼuhiga mo ʼau fakatuʼutuʼu? “E mole hoko te u fakatuutuu, o tupu ko te masiva fakakaukau; kae e natou manuia moka lahi te kau fakakaukau.” (Taaga Lea 15:22) ʼE ui atu anai e te ʼu tehina mo tuagaʼane ʼaia, ko te selevisi pionie ʼe ko he ako ia ʼe ʼaoga anai kia koe ʼi tou maʼuli katoa. Neʼe lahi te ʼu faʼahi neʼe ako e Sesu mai tana Tamai ʼi te lagi. Pea neʼe lahi mo te ʼu faʼahi ʼae neʼe ina ako lolotoga tona minisitelio ʼi te kele. Neʼe fiafia ʼuhi ko tana tala te logo lelei ki te hahaʼi pea mo tana nofo agatonu tuʼumaʼu ʼi te ʼu aluʼaga faigataʼa. (Lau ia Esaia 50:4; Hepeleo 5:8; 12:2) Tou vakaʼi pe koʼe ʼe feala ke ke maʼuli fiafia ʼi te selevisi temi katoa.

7. He koʼe ʼe leleiʼia e ʼihi tupulaga ia te selevisi temi katoa?

⁷ Neʼe fakatotonu mai e Sesu kia tatou ke tou “olo ʼo fai ni tisipulo” pea mo akoʼi te hahaʼi. (Mateo 28:​19, 20) Kapau ʼe ke fakatuʼutuʼu ke ke fai te gaue ʼaia ʼi tou maʼuli katoa, ʼe ke maʼuli fiafia anai pea ʼe ke fakamaʼuhigaʼi anai ia te ʼAtua. Pea ohage pe ko te gaue fuli, ʼe ʼaoga ki ai he temi ke ke liliu ai ʼo faiva. Ko te tehina ʼe higoa ko Timothy neʼe pionie ʼi tana kei tupulaga, pea neʼe ina ui fenei: “ ʼE au leleiʼia taku tauhi kia Sehova ʼi te selevisi temi katoa, koteʼuhi ʼe au fakaha ai ia toku ʼofa ia te ia. ʼI te kamata, neʼe mole ʼi ai haku ako Tohi-Tapu. Kaʼe neʼe au hiki leva ki te tahi telituale, pea hili ki ai mahina ʼe lua neʼe au kamata ʼaku ako Tohi-Tapu. Pea neʼe kamata haʼu te tahi ʼi ʼaku ako ki te ʼu fono. Neʼe au kau leva ki te Ako Tohi-Tapu ʼo Te ʼu Tehina Selipatea lolotoga mahina ʼe lua. ʼI te ʼosi ʼo te ako ʼaia, neʼe hinoʼi leva au ki te tahi telituale pea neʼe au kamata ai ako ʼe fa. ʼE au fiafia ʼi te akoʼi ʼo te hahaʼi, he ʼe au sio ai ki te fetogi ʼo ʼonatou maʼuli e te laumalie maʼoniʼoni.” * (Vakaʼi te kiʼi nota.)​—1 Tesalonika 2:19.

8. Kotea neʼe fai e ʼihi tupulaga moʼo faifakamafola ki he hahaʼi kaugā malie?

⁸ Neʼe ako e ʼihi tupulaga he tahi lea. Ohage la ko Jacob ʼae ʼe maʼuli ʼi te Potu Noleto ʼo Amelika. ʼE ina ui fenei: “ ʼI toku taʼu fitu, neʼe hahaʼi te kau Nai ʼi taku kalasi. Neʼe au fia palalau kia natou ʼo ʼuhiga mo Sehova, koia neʼe au fakatuʼutuʼu ai leva ke au ako ia tanatou lea. Kaʼe neʼe lahi pe taku ako tanatou lea ʼaki taku fakatatau ia Te Tule Leʼo Fakapilitania mo Te Tule Leʼo Fakanai. Neʼe au maʼu foki mo ʼoku kaumeʼa ʼi te kokelekasio lea Fakanai. Pea ʼi toku taʼu 18, neʼe au pionie ai leva. Ki muli age, neʼe au kau ki te Ako Tohi-Tapu ʼo Te ʼu Tehina Selipatea. ʼE tokoni mai te ako ʼaia ia ʼaho nei ʼi te kiʼi kutuga lea Fakanai ʼae neʼe fekauʼi au ki ai ʼi toku ʼuhiga pionie. Pea ko au pe ʼe tagata ʼafeā ʼi te kiʼi kutuga lea Fakanai ʼaia. Tokolahi te kau Nai ʼe natou punamaʼuli ʼi taku palalau ʼi tanatou lea. Pea ʼe natou fakaafe ai au ki ʼonatou ʼapi, mo au ako ia te Tohi-Tapu mo natou. Neʼe tuputupu ai ʼihi pea neʼe natou papitema.”​—Vakaʼi ia Gaue 2:​7, 8.

9. He koʼe ʼe tou ui ko te selevisi temi katoa ʼe ko he ako ʼe lelei?

⁹ ʼI te selevisi temi katoa, ʼe ke ako ai he ʼu agamahani ʼe lelei. Ohage la pe ʼe feafeaʼi te  fai ʼo he ʼu felogoʼi ʼe lelei, peʼe ko te mole tuʼania peʼe ko te aga fakaʼeteʼete. (Taaga Lea 21:5; 2 Timoteo 2:24) Kaʼe ʼe fakafiafia tafito te gaue ʼaia, koteʼuhi ʼe ke ako pe ʼe feafeaʼi hau fakaha ia tau tui ʼae ʼe fakatafito ki te Tohi-Tapu. ʼE ke toe ako ai foki pe ʼe feafeaʼi hau gaue fakatahi mo Sehova.​—1 Kolonito 3:9.

10. ʼE feafeaʼi hau lava maʼu te fiafia ʼi he telituale ʼe faigataʼa ai te fai ʼo ni tisipulo?

¹⁰ Tatau aipe pe ʼe tokosiʼi natou ʼae ʼe mole fia ako te Tohi-Tapu, kaʼe ʼe feala pe ke ke maʼu te fiafia ʼi te selevisi pionie. Ko te kokelekasio katoa ʼe gaue fakatahi moʼo fai ni tisipulo. ʼE lagi ko he tokotahi pe ʼae ʼe ina maʼu he tahi ʼe fia liliu ko he tisipulo. Kaʼe ʼe tou fiafia fuli, he neʼe tou kau fuli ki tona kumi. Tou toʼo te faʼifaʼitaki ʼo Brandon ʼae kua taʼu hiva ia tana pionie ʼi he koga meʼa ʼe tokosiʼi ai te ʼu ako Tohi-Tapu. ʼE ina ui fenei: “ ʼE maʼuhiga kia au ia te faifakamafola, he ʼe ko te gaue ʼae neʼe kole mai e Sehova ke tou fai. Neʼe au pionie ʼi te ʼosi pe ʼo taku ako. ʼE au fiafia ʼi te fakalotomalohiʼi ʼo te kau tupulaga ʼo toku kokelekasio pea moka au sio ki tanatou tuputupu ʼi te faʼahi fakalaumalie. ʼI te ʼosi ʼo te Ako Tohi-Tapu ʼo Te ʼu Tehina Selipatea ʼae neʼe au kau ai, neʼe hinoʼi au ki te tahi telituale. Pea ʼi te telituale ʼaia, ʼe mole heʼeki au fai he ako ʼa he tahi ʼo kaku ki te papitema, kaʼe kua maʼu te fealagia ʼaia e ʼihi. Kaʼe ʼe au fiafia he neʼe au fakatuʼutuʼu ke au kau ki te selevisi pionie temi katoa.”​—Ekelesiasi 11:6.

11. Kotea he faʼahiga selevisi ʼe maʼu e te kau tupulaga moʼo tauhi kia Sehova?

¹¹ ʼE lahi te ʼu faigamalie ʼe tou maʼu ke tou tauhi ai kia Sehova. Ohage la, tokolahi te kau tupulaga ʼe natou tokoni ki te gaue laga ʼo te ʼu Fale Fono. Pea ko Fale Fono ʼe lauʼi teau ʼe ʼaoga ke laga. ʼE natou fiafia ʼi te tokoni ki te ʼu laga fale ʼaia he ʼe ko he ʼu koga meʼa ʼe fakakololiaʼi ai ia Sehova. ʼE feala mo koe ke ke fiafia ʼi te gaue fakatahi mo ʼou tehina mo tuagaʼane. Pea ʼe lahi anai te ʼu faʼahi ʼe feala ke ke ako, ohage la ko te fai ʼo he gaue pea ʼe ke mulimuli lelei ki te ʼu lekula haofaki maʼuli. Peʼe ko he fai ʼo he gaue ʼe ke lagolago ai kia natou ʼae takitaki.

12. Kotea ʼihi faigamalie ʼe feala ke ke maʼu ʼi te selevisi temi katoa?

¹² Ko te tehina ʼe higoa ko Kevin ʼe ina ui fenei: “Talu mai taku kei veliveli, neʼe au fia tauhi temi katoa kia Sehova. Kaʼe neʼe hoki au kamata pionie pe ʼi toku taʼu 19. Moʼo taupau toku maʼuli, neʼe au gaue vaeluaʼi temi maʼa te tehina neʼe laga fale. Neʼe au ako ai ia te ʼato fale, mo te fakapipiki ʼo te ʼu matapa pea mo te ʼu matapa fakamalama. Ki muli age, neʼe au gaue taʼu lua mo te kiʼi kutuga laga fale ʼe tokoni ki te ʼu tehina mo tuagaʼane ʼi te hili ʼo he afā. Neʼe matou toe laga te ʼu Fale Fono pea mo ʼonatou ʼapi. ʼI taku logo ʼae neʼe ʼaoga he kau gaue ki te laga fale ʼi te Potu Saute ʼo Afelika, neʼe au fai ai taku kole ke au kau ki ai, pea neʼe tali taku kole. ʼI Afelika nei, ʼe matou hiki ki he tahi koga meʼa ʼo  laga ai he tahi Fale Fono hili pe he ʼu vahaʼa. Pea ʼe hage pe taku kutuga laga fale ko he kiʼi famili. ʼE matou maʼuʼuli fakatahi, ʼe matou ako fakatahi ia te Tohi-Tapu pea ʼe matou gaue fakatahi. ʼE au toe fiafia foki ʼi te faifakamafola ʼi te vahaʼa fuli mo te ʼu tehina mo tuagaʼane ʼo te ʼu potu ʼae ʼe matou laga ai te ʼu Fale Fono. Koia ʼaki te ʼu fakatuʼutuʼu neʼe au fai ʼi taku kei veliveli, neʼe au fiafia ai ʼi he ʼu faʼahi neʼe mole au ʼamanaki ki ai.”

13. He koʼe ʼe fiafia ʼihi tupulaga ʼi te gaue ʼi te Petele?

¹³ Ko ʼihi ʼae neʼe pionie kua natou gaue nei ʼi te Petele. ʼE fakatupu fiafia te gaue ʼae ʼi te Petele, he ʼe ko meʼa fuli ʼe ke fai ai ʼe ke fai maʼa Sehova. Pea ʼe lagolago te famili ʼo te Petele ki te tufa ʼo te ʼu Tohi-Tapu mo te ʼu tohi ke feala ki te hahaʼi hanatou iloʼi ia te moʼoni. ʼE ui fenei e te Petelite ʼe higoa ko Dustin: “Neʼe au fakatuʼutuʼu ke au kau ki te selevisi temi katoa, kaʼe neʼe kei au taʼu 9. Pea neʼe au pionie ʼi te ʼosi pe ʼo taku ako. Hili ki ai te taʼu katoa vaelua, neʼe fakaafe au ke au alu ʼo gaue ʼi te Petele. Neʼe au ako ia te fakaʼaogaʼi ʼo te ʼu masini ta tohi pea ki muli age, te fai ʼo te ʼu polokalama ki te ʼu olotinatea. ʼI te Petele, ʼe au leleiʼia moka ʼe au logo ki te tuputupu ʼo te gaue fakamalamanei ʼo te fai ʼo ni tisipulo. Pea ʼe au fiafia ʼi te gaue ʼi heni, he ʼe ko te gaue ʼae ʼe matou fai ʼe tokoni ki te hahaʼi ke natou fakaovi kia Sehova.”

14. ʼE feafeaʼi hau teuteu ʼi te temi nei ki te selevisi temi katoa?

¹⁴ ʼE feafeaʼi hau teuteu ki te selevisi temi katoa? ʼE tonu ke ke maʼu te ʼu kalitate Fakakilisitiano ke lelei tau tauhi kia Sehova. Ke ke ako tuʼumaʼu te Folafola ʼa te ʼAtua, mo ke metitasio ki ai pea mo ke faiga ʼo fakaha tau tui ʼi te ʼu fono ʼaki ʼau tali. ʼI te ʼu taʼu ʼae ʼe kei ke ako ai, faigaʼi ke ke poto ʼi te palalau ki ʼihi ʼo ʼuhiga mo te logo lelei. Ako pe ʼe feafeaʼi hau lava iloʼi ia te manatu ʼa te hahaʼi ʼo ke fai he ʼu fehuʼi ʼe fakaʼeteʼete pea mo ke fagono lelei ki ʼanatou tali. ʼE toe feala pe foki ke ke foaki ia tau tokoni ki te kokelekasio, ohage la ko te fakamaʼa pea mo te toe faʼu ʼo te Fale Fono. Ko Sehova ʼe fiafia ʼi te fakaʼaogaʼi ʼo natou ʼae ʼe agavaivai pea mo fia gaue. (Lau ia Pesalemo 110:3; Gaue 6:​1-3) Neʼe fakaafe e te apositolo ko Paulo ia Timoteo ke ina fakahoko ia te selevisi misionea he “neʼe palalau lelei te ʼu tehina . . . ʼo ʼuhiga mo ia.”​—Gaue 16:​1-5.

15. Kotea ʼae ʼe ke lava fai ke ke maʼu he gaue ʼe tokoni atu anai ki tau pionie?

¹⁵ Ko te tokolahi ia natou ʼae ʼe kau ʼi te selevisi temi katoa, ʼe tonu ke maʼu hanatou gaue. (Gaue 18:​2, 3) Koia, ʼe lagi lelei ke ke filifili he ako ʼe lava tokoni atu ke ke maʼu hau gaue vaeluaʼi temi ʼi te koga meʼa pe ʼae ʼe ke maʼuli ai. Palalau pea mo ke kole tokoni ki te taupau ʼo te siliko pea mo ʼihi pionie ʼo ʼuhiga mo ʼau fakatuʼutuʼu. Pea ohage ko tona ui ʼi te Tohi-Tapu, “tuku [kia Sehova] au gaue fuli, pea e manuia anai au fakatuutuu.”​—Taaga Lea 16:3; 20:18.

16. Kotea te ʼu fua lelei ʼe feala ke ke maʼu ʼaki te selevisi temi katoa?

¹⁶ ʼE feala ke ke tui papau, ʼe loto e Sehova ke ke “puke maʼu” te ka haʼu fiafia. (Lau ia 1 Timoteo 6:​18, 19.) ʼI te selevisi temi katoa, ʼe ke gaue fakatahi anai mo natou ʼae ʼe kau ʼi te selevisi temi katoa pea ʼe ke liliu ai anai ʼo fotufotuʼa ʼi te faʼahi fakalaumalie. ʼI te manatu ʼa te tokolahi, ko tanatou kau ʼi te selevisi temi katoa ʼi tanatou kei tupulaga ʼe fua lelei anai kia natou moka natou ʼohoana. Pea ko natou ʼae neʼe pionie ʼi tonatou temi selipatea, ʼe natou hoko atu tanatou pionie mo tonatou ʼohoana.​—Loma 16:​3, 4.

17, 18. Kotea ʼae ʼe lelei ke ke fakakaukauʼi fakamalotoloto ʼo ʼuhiga mo ʼau fakatuʼutuʼu?

¹⁷ ʼE ui fenei ia Pesalemo 20:5 ʼo ʼuhiga mo Sehova: “Ke ina foaki atu kia koe te mea ae e holi ki ai tou loto, pea ke ina fakahoko au fakaamu fuli!” ʼI tau teuteuʼi ia tou ka haʼu, fakakaukauʼi pe ʼe kotea ʼae ʼe ke loto moʼoni ke ke fai ʼi tou maʼuli. Fakakaukauʼi te gaue ʼae ʼe fakahoko e Sehova ʼi totatou temi pea mo ke vakavakaʼi pe ʼe kotea ʼae ʼe ke lava fai moʼo lagolago ki te gaue ʼaia. Pea fai hau ʼu fakatuʼutuʼu ʼe fiafia ai tona loto.

¹⁸ Ka ke fakaʼaogaʼi tou maʼuli katoa moʼo tauhi kia Sehova, ʼe ke fakakololiaʼi ia ia pea ʼe lahi ai anai tou fiafia. Pea ʼe liliu anai ia Sehova ko “tou fiafiaaga lahi, pea e ina foaki atu anai kia koe te mea ae e holi ki ai tou loto.”​—Pesalemo 37:4.