ʼE FEALA KOA HAU FILIFILI PE KOTEA ANAI TOU KA HAʼU? Ko ʼihi ʼe natou tui ʼe mole feala hanatou toʼo he ʼu tonu he ʼe kua fakatuʼutuʼu fakatomuʼa pe tonatou maʼuli. ʼE mole feala ai hanatou puleʼi tonatou maʼuli. Pea kapau ʼe to noa ʼanatou fakatuʼutuʼu, ʼe natou ui: “Neʼe mole tonu pe ia ke hoko.”

ʼE lotovaivai ʼihi he ʼe mole ʼi ai he puleʼaki ki te agakovi pea mo te heʼe faitotonu ʼi te malama ʼaeni. ʼE natou faigaʼi ke lelei age ʼonatou maʼuli. Kae ʼe kei hoko atu pe te tau, te faifakapo, mo te ʼu tuʼutamaki fakanatula pea mo te mahaki, ʼo to noa ai ʼanatou fakatuʼutuʼu. Pea ʼe natou feʼekeʼaki fenei ai: “Kotea ʼape tona ʼuhiga?”

ʼE moʼoni ʼe feala ke to noa te ʼu fakatuʼutuʼu ʼuhi ko te ʼu aluʼaga ʼae ʼe hoko ʼi te maʼuli. (Ekelesiasi 9:11) Kae, ʼe feala pe ke ke filifili pe kotea anai tou ka haʼu heʼe gata. Koia, ʼe fakaha ʼi te Tohi-Tapu ʼe fakalogo tou ka haʼu ki te tonu ʼae ka ke fai. Tou vakaʼi pe kotea ʼae ʼe ui mai ai.

Neʼe palalau fenei ia Moisese ki te puleʼaga ʼo Iselaele ʼi tanatou ʼamanaki hu ki te Kele ʼo te Fakapapau: “E au tuku ki ou mua te mauli mo te mate, te tapuakina mo te malaia. Ke ke filifili te mauli, o tupu ke ke mauli, ia koe mo tou hakoga, o ofa [kia Sehova, MN], tou Atua, pea mo fakalogo ki tona leo, pea mo pipiki kia ia.”—Tetelonome 30:15, 19, 20.

“E au tuku ki ou mua te mauli mo te mate, te tapuakina mo te malaia. Ke ke filifili te mauli.”​—Tetelonome 30:19

Neʼe fakaʼateainaʼi e te ʼAtua ia te kau Iselaele mai tonatou maʼuli popula ʼi Esipito. Pea neʼe ina fakapapauʼi age kia natou he maʼuli fiafia mo fimalie ʼi te Kele ʼo te Fakapapau. Kae ʼe mole natou hoʼi maʼu feia pe anai. Neʼe tonu ke natou “filifili te maʼuli,” ke natou maʼu te ʼu tapuakina ʼaia. ʼO feafeaʼi? ʼAki tanatou ‘ ʼoʼofa ki tonatou ʼAtua, mo fakalogo ki tona leʼo, pea mo pipiki kia te ia.’

ʼI te temi ʼaeni, ʼe ʼi ai te tonu maʼuhiga ʼe tonu ke ke fai. Pea ʼe fakalogo tou ka haʼu ki ai. Kapau ʼe ke ʼofa ki te ʼAtua, mo ke fakalogo ki tona leʼo, pea mo ke pipiki kia te ia, ʼe ke filifili anai te maʼuli heʼe gata ʼi te palatiso ʼi te kele. Kae, kotea te fakaʼuhiga ʼo te ʼu fakamaʼua takitahi ʼaia?

Ko te ʼuluaki kalitate ʼo te ʼAtua ʼe ko te ʼofa. Neʼe tohi fenei e te apositolo ko Soane: “Ko te ʼAtua ʼe ko te ʼofa.” (1 Soane 4:8) Pea neʼe tali fenei e Sesu ʼi te fehuʼi age ʼae pe kotea te fakatotonu ʼae ʼe lahi age: “ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa.” (Mateo 22:37) Ko he felogoi moʼoni mo Sehova ʼAtua ʼe fakatafito ki te ʼofa, kae mole ki te tuʼania. Kae, he koʼe koa ʼe tonu ke tou filifili ke tou ʼoʼofa kia te ia?

ʼE hage pe te ʼofa ʼa Sehova ki te malamanei, ko te ʼofa ʼa he ʼu matuʼā ki hanā fanau. Logo la tonā ʼuhiga agahala, kae ʼe nā faigaʼi pe anai ke nā akoʼi, mo fakalotomalohiʼi mo lagolago pea mo fakatonutonuʼi ʼanā fanau. ʼE nā fakaʼamu ke fua lelei tanā ako kia natou pea ke natou maʼuʼuli fiafia. Pea kotea ʼae ʼe loto ki ai te ʼu matuʼā? Ke ʼoʼofa age ʼanā fanau pea ke natou fakaʼaogaʼi lelei ʼanā tokoni. Koia, ʼe mole matatonu koa la te loto ʼa tatatou Tamai ʼae ʼi selo ke tou lotofakafetaʼi kia meʼa fuli ʼae neʼe ina fai maʼa tatou?

ʼI te ʼu ʼuluaki lea ʼo te Tohi-Tapu, ʼe tau fakaʼuhiga te kupu “fakalogo” ki te “haga mulimuli.” Ko tatatou manatu la ʼaia moka tou ui: “Fakalogo ki au matuʼā.” Koia, ke tou fakalogo ki te leʼo ʼo te ʼAtua, ʼe tonu ke tou ako mo mulimuli ki ʼana fakatotonu. ʼE mole feala ke tou logo moʼoni ki te leʼo ʼo te ʼAtua. Kae, ʼe tou logo ki tona leʼo, ʼaki tatatou lau te Tohi-Tapu tana Folafola mo tou maʼuliʼi.—1 Soane 5:3.

Neʼe fakamaʼuhigaʼi fenei e Sesu te fakalogo ʼae ki te leʼo ʼo te ʼAtua: “ ʼE mole tonu ke maʼuli pe te tagata ki te pane kaʼe ki te ʼu folafola fuli ʼae ʼe haʼu mai ia Sehova.” (Mateo 4:4) ʼE ʼaoga te meʼa kai ki te maʼuli fakasino, kae ʼe toe maʼuhiga ʼaupito age la tatatou iloʼi te ʼAtua. Kotea tona tupuʼaga? Neʼe fakamahino fenei e te Hau poto ko Salomone: “I te malumalu o te poto e kita fakamalumalu ai o hage ko te fakamalumalu i te malumalu o te paaga; kae e lelei age te poto koteuhi e ina foaki te mauli ki ae e ina mau.” (Ekelesiasi 7:12) ʼE puipui tatou e te ʼatamai malama pea mo te poto ʼae ʼe haʼu mai te ʼAtua. Pea ʼe ko he tokoni ke tou toʼo he tonu ʼe fakapotopoto, ke tou iku ai ki te maʼuli heʼe gata.

Tou manatuʼi, ʼi te alatike ʼae kua ʼosi atu, te lea fakata ʼaeni ʼa Sesu: “ ʼE faveliveli ia te matapa pea mo lauveliveli ia te ala ʼae ʼe ina taki ki te maʼuli, pea ʼe tokosiʼi ia natou ʼae ʼe natou maʼu.” (Mateo 7:13, 14) Kapau ʼe tou olo ʼi he ʼala feia, ʼe ʼaoga anai ke tou haʼele feovi mo te tagata taki ʼala faiva, ke tou kaku ki te koga meʼa ʼae tou olo ki ai, ʼae kote maʼuli heʼe gata. Koia, ʼe toe maʼuhiga foki ke tou nonofo ovi ki te ʼAtua. (Pesalemo 16:8) Kae, ʼe feafeaʼi hatatou fakahoko te faʼahi ʼaia?

ʼI te ʼaho fuli, ʼe ʼi ai te ʼu maʼua ʼe tonu ke tou fakahoko. Pea ʼe toe lahi age la te ʼu meʼa ʼae ʼe tou fakaʼamu ke tou fai. ʼE feala ke tou maʼumaʼua ai peʼe fakaleluʼi ai tatou ke mole tou maʼu he temi metitasio ki te ʼu fakatotonu ʼa te ʼAtua. Koia ʼe fakamanatuʼi fenei mai ʼi te Tohi-Tapu: “Kotou tokakaga fakalelei ki takotou aga, ke mole kotou hage ko ni hahaʼi vavale kaʼe ke kotou hage ko ni hahaʼi popoto, ʼo kotou fakaʼaogaʼi lelei tokotou temi koteʼuhi ʼe tou maʼuʼuli nei ʼi te ʼu ʼaho ʼe kovi.” (Efeso 5:15, 16) Ko te meʼa ʼae ʼe maʼuhiga ʼaupito, ke tou nonofo ovi ki te ʼAtua ʼaki tatatou fakamuʼamuʼa ʼi totatou maʼuli ʼatatou felogoi mo ia.—Mateo 6:33.

ʼE mole kei feala hau fetogi te ʼu tonu ʼae neʼe ke fai ʼi muʼa atu. Kae ʼe ʼi ai te ʼu meʼa ʼe feala ke ke fai ke ke maʼu ai hou ka haʼu lelei mo natou ʼae ʼe ke ʼofa ai. ʼE fakaha mai ʼi te Tohi-Tapu ʼe ʼofa moʼoni ia Sehova ʼAtua tatatou Tamai ʼae ʼe ʼi selo kia tatou. Pea ʼe ina fakaha mai te ʼu meʼa ʼae ʼe ina loto ke tou fai. Tokagaʼi age te ʼu palalau ʼaeni ʼa te polofeta ko Mikea:

“Nee fakaha kia koe, oi tagata, te mea ae e lelei; pea ko te mea ae e kole atu e [Sehova, MN] kia koe, ke ke fai te mea ae e totonu, ke ke ofa ki te manavaofa, pea ke ke haele mo tou Atua i te agamalu.”—Mikea 6:8.

ʼE ke tali anai koa te fakaafe ʼaeni ʼa Sehova ke ke haʼele mo ia pea mo ke maʼu tapuakina ʼo talu ai? ʼE fakalogo pe anai kia koe.