Neʼe fiafia ia Toni pea mo Malekalita * ʼi te haʼu ʼa tanā taʼahine pea mo tona kiʼi famili ʼo fakasiosio mai kia naua. ʼI muʼa atu ko te gaue ʼa Malekalita neʼe ko te faikuka, pea kua letelete nei. Neʼe ina teuteuʼi te meʼa kai ʼae neʼe fia kai ai ʼona kiʼi mokopuna, ko te makaloni neʼe fakatahi mo te folomasi.

Neʼe natou heheka fuli ki te laupapa kae, ʼaumai e Malekalita ia te kulo. ʼI tana toʼo ake te tapunu, neʼe punamaʼuli. He neʼe ko te huʼa folomasi pe ia ʼae neʼe ʼi te kulo. Neʼe galo ke ʼai e Malekalita te makaloni ki loto.

ʼEi, ʼe tou lakahala fuli, tatau aipe peʼe kei tou tupulaga peʼe kua tou fotufotuʼa peʼe tou faiva ʼi he ʼu gaue. ʼE feala pe ke tou fai he ʼu palalau neʼe mole tou fakakaukauʼi, peʼe ko he meʼa neʼe mole tonu ke tou fai, pe neʼe tou galoʼi he meʼa. Kae he koʼe ʼe hoko te ʼu aluʼaga ʼaia? Kotea ʼae ʼe tonu ke tou fai moka hoko he ʼu aluʼaga feia? ʼE feafeaʼi hatatou hao mai te ʼu aluʼaga ʼaia? Kapau ʼe tou maʼu he faʼahiga sio ʼe lelei ʼo ʼuhiga mo te ʼu lakahala ʼa ʼihi pea ʼe hoki feala anai ke tou tali ki te ʼu fehuʼi ʼaia.

Ka tou fai he gaue ʼe lelei, ʼe tou fiafia moka ʼe tokagaʼi pea mo vikiʼi tatou. Pea ka tou lakahala, ʼe mole tonu koa la ke tou fakaha neʼe tou lakahala, tatau aipe pe neʼe mole tou loto ki ai, pe neʼe mole tokagaʼi e he tahi? ʼI te faʼahi leva ʼaia, ʼe maʼua ke tou agavaivai ai.

Kapau ʼe tou tokagaʼi fau ia tatou totonu, ʼe feala ke tou manatu neʼe mole kovi tatatou aga, peʼe tou tukugakoviʼi ai he tahi age, peʼe tou ui neʼe mole ko hatatou hala. Kapau ʼe tou fai ia te faʼahi ʼaia, ʼi te agamahani ʼe ʼi ai ʼona fua kovi. ʼE mole fakatokatoka ai te fihifihia pea ʼe feala ke tukugakoviʼi hala ai ʼihi. Tatau aipe pe neʼe tou hao mai te ʼu nunuʼa ʼo tatatou lakahala, kae ʼaua pe naʼa galo kia tatou “ ʼe fakamauʼi anai e te ʼAtua ia tatou takitokotahi ʼo mulimuli ki ʼatatou aga.”—Loma 14:12.

ʼE totonu te faʼahiga sio ʼa te ’Atua ki ʼatatou lakahala. ʼE ui ʼi te tohi ʼo Pesalemo, ko te ʼAtua ʼe “loto tokaga” mo “manavaofa,” ʼe “mole ina valoki o heegata.” ʼE ina iloʼi totatou ʼuhiga agahala pea ʼe mahino ki ʼotatou vaivaiʼaga, e ina “manatui ko tatou ko te efu.”—Pesalemo 103:8, 9, 14.

ʼE hage te ’Atua ko he tamai manavaʼofa, ʼe ina loto ke tou maʼu ia tana faʼahiga sio ki ʼatatou lakahala. (Pesalemo 130:3) ʼE lahi te ʼu tokoni ʼe tou maʼu ʼi Tana Folafola. Pea ʼe tokoni mai ke tou popoto ʼi te fakatokatoka ʼo ʼatatou lakahala ʼo feia mo ʼae ʼa ʼihi.

’I te agamahani, ka lakahala he tahi, ʼe faiga ke kumi takuʼaki peʼe ke ina fakalakatonuʼi ia ia totonu. Kae kapau neʼe kotou fai he ʼu palalau neʼe lave kovi ki he tahi, ʼe lagi lelei ke kotou faifakalelei ki ai pea mo faigaʼi ke kotou fakatokatoka pea ke koulua taupau he ʼu felogoi lelei. Neʼe kotou fai koa he aga ʼe mole lelei, ʼo fua kovi ai kia kotou totonu peʼe ko he tahi age? ʼAua naʼa kotou tukugakovi ia kotou totonu peʼe ko he tahi age. Kae kotou fakatokatoka te fihifihia  ʼaia. Kapau ʼe mole kotou tali neʼe ko kotou ʼae neʼe lakahala, ʼe feala ke ʼasili kovi age te fihifihia. ʼAua naʼa kotou fai ia te faʼahi ʼaia, kae kotou faiga ke kotou mahino ki te fihifihia pea mo fakatokatoka.

Ka lakahala he tahi, ʼe faigafua pe hatatou fakaha neʼe mole tou leleiʼia te meʼa ʼae neʼe ina fai. ʼE lelei age ke tou muliʼi te tokoni ʼae neʼe fai e Sesu Kilisito ʼi tana ui fenei: “Koia, ko meʼa fuli ʼe kotou loto ke fai atu e te hahaʼi, kotou toe fai feia mo koutou kia natou.” (Mateo 7:12) Ka kotou lakahala, tatau aipe pe ʼe mole faʼa kovi, ʼe mahino ia ʼe kotou loto anai ke manavaʼofa atu te hahaʼi pea mo natou molehi katoa takotou hala. Koia ʼe tonu ai ke tou faiga malohi ke tou fakaha te manavaʼofa ʼaia ki ʼihi.—Efeso 4:32.

ʼE fakamahino fenei ʼi he tikisionalio, ʼe tou lakahala koteʼuhi “neʼe hala hatatou manatu, pe neʼe tou mahino hala, pe neʼe mole tou nonofo tokaga.” ʼE moʼoni ʼi ʼihi temi ʼe feala pe ke tou totō fuli ʼi he aluʼaga feia. Kae ʼe feala anai ke siʼisiʼi ʼatatou lakahala mo kapau ʼe tou tokagaʼi ʼihi pelesepeto Fakatohi-tapu.

ʼE tou maʼu te pelesepeto ʼaia ia Taaga Lea 18:13, ʼe ui fenei ai: “Ko ia ae e tali palalau kae nee mole fakalogo mua e ina fakaha tona vale pea e ina kai tona ufiufi.” ʼEi ʼe tonu muʼa ke tou toʼo he temi ke tou fakalogo lelei pea mo fakakaukauʼi tatatou tali. Kapau ʼe tou fai feia ʼe tokoni mai anai ke ʼaua naʼa tou fai he ʼu palalau peʼe ko he aga neʼe mole tou fakakaukauʼi. ʼE maʼuhiga ke tou fai te faʼahi ʼaia ke ʼaua naʼa tou faihala pea mo lakahala ai.

ʼE ui fenei ʼi te tahi pelesepeto Fakatohi-tapu: “Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe.” (Loma 12:18) Kotou haga kumi te tokalelei pea mo te logo tahi. Kapau ʼe kotou kaugā gaue mo ni ʼihi, faigaʼi ke kotou fefakaʼapaʼapaʼaki mo fefakamaloʼaki pea mo fefakalotomalohiʼaki. Kapau ʼe kotou fai feia, ʼe faigafua ai anai hona fakamolemole mo kapau ʼe kotou fai he ʼu palalau neʼe mole kotou fakakaukauʼi peʼe ko he meʼa neʼe kotou fai. Pea ʼe toe feia pe mo te ʼu lakahala mamafa, ʼe feala anai ke fakatokatoka gafua.

Kotou taʼofi he ako mai te lakahala ʼaia kae ʼaua naʼa kotou kumi takuʼaki. Pea ʼe ko he faiga malie ʼaia ke kotou gaueʼi ai he ʼu kalitate. ʼE mole ʼaoga anai koa ke kotou fakaha te kataki fualoa, te agalelei mo te lotololomi? Peʼe ko te agamalū, te tokalelei pea mo te ʼofa? (Kalate 5:22, 23) Koia, ʼe kotou iloʼi leva te meʼa ʼae ka kotou fai moka hoko mai he aluʼaga feia. Pea ʼaua naʼa kotou tokakaga fau ki te meʼa ʼae ka koutou logoʼi. Kae kotou toʼo ohage ko he meʼa fakakata pe.

Ka tou maʼu he faʼahiga manatu ʼe lelei ʼo ʼuhiga mo te ʼu lakahala, ʼe feala anai ke tou tauʼi te ʼu aluʼaga ʼaia ʼaki he aga fakapotopoto. ʼE tokalelei anai totatou ʼatamai pea mo tou faifaitahi ai mo ʼihi. Ka tou haga taʼofi maʼu he ʼu ako mai ʼatatou lakahala, ʼe tou liliu anai ʼo popoto age pea mo agalelei. Pea ʼe mole tou lotomamahi fau anai ʼo tukugakoviʼi ia tatou totonu. Pea ka tou iloʼi ʼe toe fakatokatoka e ʼihi mo ʼanatou lakahala, ʼe uga ai tatou ke tou kumi te felogoi tahi. Ko te meʼa ʼae ʼe maʼuhiga ʼaupito, ko tatatou ako mo faʼifaʼitakiʼi te ʼofa ʼo te ʼAtua pea mo tona lotofakamolemole. Pea ʼe fua lelei anai kia tatou.—Kolose 3:13.

Ko te lakahala ʼae neʼe fai e Malekalita neʼe tou talanoa ki ai ʼi te kamata neʼe fakatupu kovi koa ki tanatou kakai fakafamili ʼaia? Kailoa ia. Neʼe kataʼi e te kiʼi famili te aluʼaga ʼaia, tafito ia Malekalita. Pea neʼe natou leleiʼia pe te meʼa kai logo la neʼe mole ʼi ai he makaloni. ʼI ni taʼu ki muli age, neʼe toe fakamatala e te ʼu mokopuna ʼe lua ʼo Malekalita te kakai ʼaia ki ʼanā fanau takitahi ʼo natou taupau ai he suvenia ʼo ʼanatou kui. He neʼe ko he kiʼi lakahala noa pe.