Ko Sehova ʼe Ina Takitaki Tana Hahaʼi ʼi Te Ala ʼo Te Maʼuli
“Koʼeni te ala. Kotou haʼele ai.”—ESAIA 30:21, MN.
KATIKO: 65, 48
1, 2. (1) Kotea te ʼu fakatokaga ʼe haofaki ai te tokolahi? (Vakaʼi te ʼuluaki pāki.) (2) Kotea te takitaki ʼe maʼu e te hahaʼi ʼa te ʼAtua?
LOLOTOGA taʼu ʼe 100 tupu, ʼi te ala ʼo te ʼu saliote afi ʼi te potu Noleto ʼo Amelika, neʼe tuʼu ai te ʼu pano lalahi ʼe tohi ai te ʼu kupu ʼaeni, “Tuʼu, Sio, Fagono.” Kotea tona tupuʼaga? Ke mole fakaʼi te ʼu motoka e he saliote afi lolotoga tanatou fakalaka. Kapau ʼe mulimuli lelei te hahaʼi ki te ʼu fakatokaga ʼaia, ʼe haofaki ai anai ʼonatou maʼuli.
2 Kaʼe ʼe lelei age te ʼu fakatokaga ʼae ʼe tuku mai e Sehova. Koteʼuhi ʼe ina takitaki tana hahaʼi ke natou maʼu te maʼuli heʼe gata pea ke natou hao mai te ʼu tuʼutamaki. ʼE hage pe ia Sehova ko he tagata tauhi ovi ʼofa ʼe ina takitaki pea mo fakatokaga tana faga ovi ke mole natou olo ki te ala ʼae ʼe natou tuʼutamaki ai.—Lau ia Esaia 30:20, 21. [1] (Vakaʼi te nota ʼi te fakaʼosi ʼo te alatike.)
KO SEHOVA ʼE INA TAKITAKI TUʼUMAʼU TANA HAHAʼI
3. He koʼe kua haʼele te tagata ʼi te ala ʼae ʼe tau ki te mate?
3 Talu mai te kamataʼaga ʼo te hisitolia ʼo te tagata, neʼe foaki e Sehova ni fakatotonu ki tana hahaʼi. Ohage la, ʼi te ʼoloto ʼo Eteni, neʼe foaki e Sehova te ʼu fakatotonu ʼe mahino lelei ke maʼu e te tagata te maʼuli heʼe gata mo te maʼuli fiafia. (Senesi 2:15-17) Kaʼe neʼe mole mulimuli ia Atama mo Eva ki te takitaki ʼa tanā Tamai ʼofa. Koteʼuhi neʼe fakalogo ia Eva ki te tokoni ʼa te gata, pea neʼe fakalogo ia Atama ki tona ʼohoana. Neʼe kotea ʼona fua? Neʼe nā maʼuʼuli mamahi mo nā mamate pea neʼe mole kei ʼi ai hanā ʼamanaki. Pea tahi, kua haʼele te tagata ʼi te ala ʼae ʼe tau ki te mate, ʼuhi ko tanā talagataʼa.
4. (1) He koʼe neʼe ʼaoga he ʼu fakatotonu foʼou hili te to ʼo te Tulivio? (2) Kotea ʼae neʼe ha ʼaki te ʼu aluʼaga foʼou ʼo ʼuhiga mo te faʼahiga manatu ʼa te ʼAtua?
4 Neʼe foaki e te ʼAtua he ʼu fakatotonu kia Noe ke haofaki ai te tokolahi. Hili te to ʼo te Tulivio, neʼe fakatotonu e Sehova ki te hahaʼi ke mole natou kai mo inu te toto. Kotea tonu tupuʼaga? Koteʼuhi ʼi te lakaga ʼaia, neʼe ina fakagafua ai ki te hahaʼi ke natou kai ki he kanoʼi manu. Pea ʼuhi ko te ʼu aluʼaga foʼou ʼaia, neʼe ʼaoga ai kia natou te ʼu fakatotonu foʼou ʼaeni: “Ke aua pe naa koutou kai he kanoi manu mo tona laumalie [peʼe maʼuli], . . . tona toto.” (Senesi 9:1-4) ʼAki tana fakatotonu ʼaia ʼe tou iloʼi ai te faʼahiga manatu ʼa te ʼAtua ʼo ʼuhiga mo te maʼuli. Ko totatou Tupuʼaga pea neʼe ina foaki mai te maʼuli, koia ʼe matatonu ai ke ina fakatuʼu he ʼu lekula ʼo ʼuhiga mo te maʼuli. Ohage la, neʼe ina fakatotonu ʼe mole tonu ke matehi e he tagata ia he tahi tagata. Ko te maʼuli mo te toto ʼe taputapu kia mata ʼo te ʼAtua. Pea ʼe ina tauteaʼi anai te hahaʼi fuli ʼae ʼe natou fakaʼaogaʼi kovi.—Senesi 9:5, 6.
5. Kotea ʼae ka tou vakaʼi anai, pea kotea tona tupuʼaga?
5 Hili te temi ʼo Noe, neʼe hoko atu e te ʼAtua te takitaki ʼo tana hahaʼi. ʼI te alatike ʼaeni, ʼe tou vakaʼi ai anai he ʼu faʼifaʼitaki ʼo tana faʼahiga takitaki tana hahaʼi. Ko tatatou ako tana faʼahiga takitaki, ʼe ina fakamalohiʼi anai tatou ke tou mulimuli ki te takitaki ʼa Sehova ʼi te malama foʼou.
HE PULEʼAGA FOʼOU, HE ʼU FAKATOTONU FOʼOU
6. He koʼe neʼe tonu ke fakalogo te hahaʼi ʼa te ʼAtua ki te ʼu lao ʼae neʼe ina foaki age kia natou ʼaki ia Moisese? Pea neʼe tonu ke feafeaʼi te aga ʼa te kau Iselaele?
6 ʼI te temi ʼo Moisese, neʼe foaki e Sehova he ʼu fakatotonu ki tana hahaʼi ʼo ʼuhiga mo tanatou aga pea mo tanatou tauhi. Kotea tona tupuʼaga? Koteʼuhi neʼe toe fetogi te ʼu aluʼaga. Lolotoga taʼu ʼe luageau tupu, neʼe maʼuli popula te kau Iselaele ʼi Esipito. ʼI ʼonatou tafaʼaki, neʼe tauhi te hahaʼi ki te kau mate, mo fakaʼaogaʼi te ʼu taulaʼatua pea mo natou fai te ʼu aga ʼe fakalainoaʼi ai te ʼAtua. Pea ʼi te temi ʼae neʼe fakaʼateainaʼi ai te hahaʼi ʼa te ʼAtua mai Esipito, neʼe ʼaoga kia natou he ʼu lekula foʼou. Koteʼuhi ʼe natou faʼufaʼu anai te puleʼaga ʼae ka mulimuli ʼateaina pe ki te ʼu Lao ʼa Sehova. ʼE ui ʼi ʼihi tohi, ko te kupu Fakahepeleo ʼae neʼe fakaʼaogaʼi ki te kupu “lao” ʼe pipiki ki te kupu ko tona fakaʼuhiga, “takitaki, akoʼi.” Ko te Lao neʼe ina puipui te kau Iselaele mai te ʼu aga heʼe ʼaoga mo te lotu hala ʼae neʼe fai e te ʼu puleʼaga ʼo ʼonatou tafaʼaki. ʼI te temi ʼae neʼe natou fakalogo ai ki te ʼAtua, neʼe natou maʼu ai tana tapuakina. Kaʼe kapau neʼe mole natou fakalogo kia te ia, neʼe natou maʼuli mamahi ai.—Lau ia Tetelonome 28:1, 2, 15.
7. (1) Fakamahino pe ʼe koʼe neʼe foaki e Sehova ni fakatotonu ki tana hahaʼi. (2) He koʼe ko te Lao neʼe ko he takitaki ʼo Iselaele?
7 Neʼe ʼaoga foki te ʼu fakatotonu foʼou, koteʼuhi ko te Lao neʼe ina teuteuʼi te kau Iselaele ki te aluʼaga maʼuhiga ʼi te fakatuʼutuʼu ʼa Sehova. Neʼe ko te haʼu ʼa te Mesia, ia Sesu Kilisito. Neʼe fakamanatuʼi e te Lao ki te kau Iselaele ia tonatou ʼuhiga agahala. ʼAki te Lao neʼe natou mahino ai neʼe ʼaoga kia natou he totogi, ʼae ʼe fakaʼuhiga ki he sakilifisio haohaoa ʼe ina pulihi katoa anai ʼanatou agahala. (Kalate 3:19; Hepeleo 10:1-10) Pea tahi, neʼe puipui e te Lao ia te hologa ʼo te Mesia pea mo tokoni ki te kau Iselaele ke natou iloʼi ia ia ʼi te temi ʼae ʼe haʼu ai anai. ʼEi, ko te Lao neʼe hage ko he takitaki fakatemi peʼe ko he “tagata faiako,” ʼe ina taki kia Kilisito.—Kalate 3:23, 24.
8. He koʼe ʼe tonu ke takitaki tatou e te ʼu pelesepeto ʼo te Lao ʼa Moisese?
8 ʼI totatou ʼuhiga Kilisitiano, ʼe toe fua lelei kia tatou te ʼu fakatotonu ʼae ʼa Sehova ʼi te Lao. ʼO feafeaʼi? ʼE feala ke tou ʼai muʼa he kiʼi tuʼu pea mo tou sio peʼe tou vakaʼi te ʼu pelesepeto ʼae neʼe fakatafito ki ai te Lao. Logo la ʼe mole kei tou mulimuli ki te ʼu lao ʼaia, kaʼe ʼe kei ʼi ai te ʼu lao ʼe ʼaoga ki totatou maʼuli ʼi te ʼaho fuli pea mo tatatou tauhi kia Sehova. Neʼe loto ia ke tohi te ʼu lao ʼaia ʼi te Tohi-Tapu ke tou toʼo mai ai he ako, ke takitaki tatou e te ʼu pelesepeto ʼo te ʼu lao ʼaia. Pea ke tou lotofakafetaʼi kia Sesu ʼi tana akoʼi mai he ʼu lekula ʼe maʼoluga age ʼi te Lao ʼo ʼuhiga mo te aga ʼe tonu ke tou fai. Tou fagono peʼe tou fakalogo ki te ʼu palalau ʼaeni ʼa Sesu: “Kua kotou logo nee fakaha: Aua naa ke tono. Kae ko au, e au ui atu kia koutou, ko ae e sio ki he fafine i he sio manumanu, kua tono ia ia mo te fafine aena i tona loto.” Koia ʼe mole tonu pe ke tou tekeʼi te tono, kaʼe ʼe tonu foki ke tou tekeʼi te ʼu holi pea mo te ʼu manatu heʼe ʼaoga.—Mateo 5:27, 28.
9. Kotea te ʼu aluʼaga foʼou ʼae neʼe ʼaoga ki ai he ʼu fakatotonu foʼou mai te ʼAtua?
9 Hili te haʼu ʼa Sesu ʼi tona ʼuhiga Mesia, neʼe foaki e Sehova ni fakatotonu foʼou pea neʼe ina fakaha ʼihi fakamahino ʼo ʼuhiga mo tana fakatuʼutuʼu. He koʼe neʼe ʼaoga ke fai e Sehova te ʼu aluʼaga ʼaia? ʼI te taʼu 33 H.T.S. [2] (vakaʼi te nota ʼi te fakaʼosi ʼo te alatike), neʼe liʼakina e Sehova te puleʼaga ʼo Iselaele pea neʼe ina filifili te kokelekasio Fakakilisitiano ke liliu ko tana hahaʼi. Koia neʼe toe fetogi te ʼu aluʼaga ʼo te hahaʼi ʼa te ʼAtua.
HE TAKITAKI KI TE ISELAELE FAKALAUMALIE
10. He koʼe neʼe foaki ni lao foʼou ki te kokelekasio Fakakilisitiano? Pea kotea tona kehekehe mo te ʼu lao ʼae neʼe foaki ki te kau Iselaele?
10 Neʼe foaki e Sehova ia te Lao ʼa Moisese ki te kau Iselaele ke natou ako ai, pe ʼe tonu ke feafeaʼi tonatou maʼuli mo tanatou tauhi kia te ia. ʼI te kamataʼaga ʼo te ʼuluaki sekulo, ko te hahaʼi ʼa te ʼAtua neʼe mole kei natou ʼomai mai he puleʼaga pe ʼe tahi. Kaʼe neʼe kua kehekehe ʼonatou haʼuʼaga, ʼo fakahigoaʼi ai natou ko te Iselaele fakalaumalie. Neʼe natou faʼufaʼu te kokelekasio Fakakilisitiano pea neʼe natou nonofo ʼi te fuakava foʼou. Neʼe foaki age e Sehova ni fakatotonu foʼou ʼo ʼuhiga mo tonatou faʼahiga maʼuli mo tanatou tauhi kia te ia. Pea ʼe moʼoni, “e mole fai e te Atua he fakakehekehe ki he tahi, kae i te puleaga fuli, ko ae e ofa kia ia mo haele i te maonioni, e lelei ia ki ona mata.” (Gaue 10:34, 35) Neʼe natou mulimuli ki “te lao a Kilisito,” ʼae neʼe fakatafito ki te ʼu pelesepeto ʼae neʼe tohi ki ʼonatou loto kaʼe mole ki he maka. Pea ko te lao ʼaia, ʼe ina takitaki anai te kau Kilisitiano ke fua lelei kia natou ʼi he faʼahi pe ʼe natou maʼuʼuli ai.—Kalate 6:2.
11. Kotea te ʼu faʼahi ʼe lua ʼo te maʼuli Fakakilisitiano ʼe ʼaoga ki ai “te lao a Kilisito”?
11 Neʼe fua lelei ki te Iselaele fakalaumalie ia tonatou takitaki e Sehova ʼaki ia Sesu. ʼI muʼa pe ʼo tana fakatuʼu te fuakava foʼou, neʼe foaki e Sesu te ʼu fakatotonu maʼuhiga ʼe lua. Neʼe ʼi ai te tahi ʼo ʼuhiga mo te gaue faifakamafola, pea mo te tahi ʼo ʼuhiga mo te aga ʼae ʼe tonu ke femaʼuʼaki e te kau Kilisitiano. Ko te ʼu fakatotonu ʼaia neʼe fai ki te kau Kilisitiano fuli. Koia maʼia mo te temi nei, tatau aipe pe ʼe tou ʼamanaki ki te maʼuli heʼe gata ʼi selo peʼe ʼi te kele, kaʼe ʼe fakaʼuhiga te ʼu lao ʼaia kia tatou fuli.
12. Kotea te ʼu aluʼaga foʼou neʼe hoko ki te gaue faifakamafola?
12 ʼI te temi muʼa, neʼe tali leleiʼi te hahaʼi ʼo te ʼu puleʼaga matapule moka neʼe natou ʼomai ki Iselaele ʼo tauhi ai kia Sehova. (1 Hau 8:41-43) Kaʼe neʼe foaki ki muli age e Sesu te fakatotonu ʼae ʼe tou maʼu ia Mateo 28:19, 20. (Lau.) Neʼe fakatotonu e Sesu ki ʼana tisipulo ke natou “olo” ki te hahaʼi fuli. ʼI te Penikosite ʼo te taʼu 33 H.T.S., neʼe ha ai te loto ʼae ʼo Sehova ke fakamafola te logo lelei ki te malamanei katoa. ʼI te ʼaho ʼaia, neʼe ko te teitei toko 120 ʼo te kokelekasio foʼou, neʼe fonu ʼi te laumalie maʼoniʼoni pea neʼe natou kamata palalau ʼi te ʼu lea kehekehe ki te kau Sutea pea mo te kau poloselite, ko natou ʼaia neʼe tafoki mai ki te lotu Fakasutea. (Gaue 2:4-11) Hili ia, pea neʼe toe fakamafola te logo lelei ki te kau Samalitana. Pea ʼi te taʼu 36 H.T.S., neʼe fakamafola te logo lelei ki te kau Senitile, ko natou ʼaia neʼe mole ko he kau Sutea. Neʼe ha lelei ai, neʼe tonu ke olo te kau Kilisitiano ʼo faifakamafola ki te hahaʼi fuli ʼo te malamanei katoa.
13, 14. (1) Kotea ʼae ʼe fakamaʼua mai ʼi te ‘fakatotonu foʼou’ ʼa Sesu? (2) Kotea te ako ʼe tou taʼofi mai te faʼifaʼitaki ʼa Sesu?
13 Neʼe toe foaki e Sesu ia te ‘fakatotonu foʼou’ ki te aga ʼae ʼe tonu ke femaʼuʼaki e ʼotatou tehina mo tuagaʼane. (Lau ia Soane 13:34, 35.) ʼE tonu ke tou fakaha totatou ʼofa kia natou ʼi te ʼaho fuli, pea ʼe tonu foki ke tou lotolelei ʼo foaki totatou maʼuli maʼa natou. Pea ʼe mole ko he koga ia neʼe fakamaʼua ʼi te Lao.—Mateo 22:39; 1 Soane 3:16.
14 Ko Sesu tokotahi pe neʼe ina fakaha te ʼofa ʼaia. He ʼe ʼi te lahi ʼo tona ʼofa ki ʼana tisipulo, neʼe lotolelei ke mate maʼa natou. Pea ʼe ina fakaʼamu ke toe fai feia mo ʼana tisipulo fuli. Koia ʼe tonu ke tou lotolelei ʼo katakiʼi te ʼu faigataʼaia tatau aipe pe ʼe tonu ke tou mamate maʼa ʼotatou tehina mo tuagaʼane.—1 Tesalonika 2:8.
HE ʼU FAKATOTONU IA ʼAHO NEI MO TE KA HAʼU
15, 16. Kotea te ʼu aluʼaga foʼou ʼe tou tau nei mo ia? Pea ʼe takitaki feafeaʼi tatou e te ʼAtua?
15 Neʼe hinoʼi e Sesu “te tagata faifekau agatonu mo poto” ke ina foaki ki ʼana tisipulo te meʼa kai fakalaumalie “i tona temi totonu.” (Mateo 24:45-47) ʼE tou maʼu ʼi te meʼa kai ʼaia, te ʼu fakatotonu maʼuhiga maʼa te hahaʼi ʼa te ʼAtua moka hoko he ʼu aluʼaga foʼou. Kaʼe kua fetogi feafeaʼi totatou aluʼaga ia ʼaho nei?
16 ʼE tou maʼuʼuli nei ʼi “te u aho fakamuli,” pea kua vave hoko mai pe te mamahi fakamataku neʼe heʼeki hoko ʼi muʼa atu. (2 Timoteo 3:1; Maleko 13:19) Pea tahi, kua li ifo ki te kele ia Satana mo ʼana temonio, ʼo tupu ai te ʼu malaʼia ki te malamanei katoa. (Apokalipisi 12:9, 12) Tahi ʼae meʼa, ʼe tou fakalogo kia Sesu ʼo tou faifakamafola ki te hahaʼi ʼi te ʼu lea kehekehe ʼo laka age ia ʼi muʼa atu.
17, 18. ʼE tou tali feafeaʼi ki te ʼu fakatotonu ʼae ʼe tou maʼu?
17 ʼE lahi te ʼu meʼa gaue ʼe foaki mai e te kautahi ʼa te ʼAtua, ʼe tokoni mai ʼi te gaue faifakamafola. ʼE ke fakaʼaogaʼi koa te ʼu meʼa gaue ʼaia? ʼE tokoni mai ʼatatou fono ke tou popoto ʼi te fakaʼaogaʼi ʼo te ʼu meʼa gaue ʼaia. ʼE ke tokagaʼi koa ko te ʼu tokoni ʼaia ʼe haʼu mai te ʼAtua?
18 Ke tou maʼu te tapuakina ʼa te ʼAtua, ʼe ʼaoga ke tou tokakaga ki te ʼu fakatotonu fuli ʼae ʼe ina foaki mai ʼaki te kokelekasio Fakakilisitiano. Kapau ʼe tou fakalogo ʼi te temi nei, ʼe faigafua anai hatatou mulimuli ki te ʼu fakatotonu ʼaia lolotoga te “mamahi lahi,” ʼae ʼe pulihi katoa ai anai te malama agakovi ʼa Satana. (Mateo 24:21) ʼOsi ʼaia, pea ʼe ʼaoga anai kia tatou he ʼu fakatuʼutuʼu foʼou ki te maʼuli ʼi te malama foʼou ʼae ʼe maʼu ai te faitotonu. Pea ko te malama foʼou ʼaia, ʼe ʼateaina anai mai te ʼu fakahala fuli ʼa Satana.
19, 20. Kotea te ʼu takaiga tohi ʼae ka avahi anai, pea kotea anai ʼona fua?
19 ʼI te ʼu ʼaho ʼo Moisese, neʼe ʼaoga ki te puleʼaga ʼo Iselaele he ʼu fakatotonu foʼou, ʼo foaki age ai e te ʼAtua kia natou te Lao. Neʼe tonu ki muli age ke mulimuli te kokelekasio Fakakilisitiano ki “te lao a Kilisito.” ʼO toe feia pe, ʼe ui mai ʼi te Tohi-Tapu ʼe tou maʼu anai ʼi te malama foʼou, te ʼu takaiga tohi mo te ʼu fakatuʼutuʼu foʼou. (Lau ia Apokalipisi 20:12.) ʼE mahino ia, ʼe fakamahino anai ʼi te ʼu takaiga tohi ʼaia te ʼu fakamaʼua ʼa Sehova ʼo te temi ʼaia ki te tagata. ʼAki te ako ʼo te ʼu fakamaʼua ʼaia, ʼe iloʼi anai e te hahaʼi fuli pea mo te kau fakatuʼuake pe ʼe kotea te fakatuʼutuʼu ʼa te ʼAtua maʼa natou. ʼE tokoni mai anai te ʼu takaiga tohi ke tou iloʼi lelei te faʼahiga manatu ʼa Sehova. ʼE toe lelei age foki anai mo tatatou mahino ki te Tohi-Tapu, koia ʼae ʼe tou fefakahaʼaki ai anai ʼi te Palatiso te ʼofa mo te fakaʼapaʼapa. (Esaia 26:9) Fakafuafua age muʼa te ʼu faʼahi fuli ʼae ka tou ako anai pea mo tou toe akoʼi ki ʼihi ʼi te takitaki ʼa te Hau, ia Sesu Kilisito.
20 Kapau ʼe tou mulimuli ki te ʼu fakatotonu ʼae ʼe ‘tuʼu ʼi te ʼu takaiga tohi’ pea mo tou nonofo agatonu kia Sehova lolotoga te ʼahiʼahi fakaʼosi, ʼe tuʼu anai ʼotatou higoa ʼi “te tohi o te mauli” ʼo talu ai. Pea ʼe feala ai ke tou maʼu te maʼuli heʼe gata. Koia ʼe tonu muʼa ke ʼai hatatou kiʼi TUʼU ke tou lau te Tohi-Tapu, mo tou SIO peʼe tou vakaʼi tona fakaʼuhiga kia tatou pea mo tou FAGONO peʼe tou fakalogo ki te takitaki ʼa te ʼAtua ʼi te temi nei. Kapau ʼe tou fai feia, ʼe tou hao anai ʼi te mamahi lahi pea mo tou fiafia anai ʼi te ako ʼo ʼuhiga mo Sehova totatou ʼAtua poto mo ʼofa, ʼo talu ai.—Ekelesiasi 3:11; Loma 11:33.
^ [1] (palakalafe 2) ʼE fakaliliu fenei ia Esaia 30:20, 21 ʼi te Tohi-Tapu fakafalani Les Saintes Écritures. Traduction du monde nouveau, (MN ): “ ʼEi, ʼe foaki atu anai e Sehova he pane mo he vai ʼe hage ko te mamahi; kaʼe ko tou Faiako Lahi ʼe mole toe nono anai, pea ko ʼou mata ʼe liliu moʼoni anai ko he ʼu mata ʼe sio ki tou Faiako Lahi. ʼE logo anai ʼou taliga ki he folafola ʼe haʼu mai ʼou tuʼa, ʼo ui fenei: ‘Koʼeni te ala. Kotou haʼele ai,’ pe ʼe tonu ke kotou olo ki te faʼahi mataʼu peʼe tonu ke kotou olo ki te faʼahi hema.
^ [2] (palakalafe 9) Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.