Te ʼu Fehuʼi ʼa Te Kau Lautohi
Ko te temi fea ʼae neʼe nonofo haʼisia ai peʼe popula ai te hahaʼi ʼa te ʼAtua ki te kautahi fakamalamanei ʼo te ʼu lotu hala ʼae ko Papilone Lahi?
Neʼe kamata ʼi te hili ʼo te taʼu 100 H.T.S. ʼo kaku ki te fakaʼosi ʼo te taʼu 1919. He koʼe ʼe maʼuhiga ke tou mahino ki te fetogi ʼaia?
ʼI te ʼu fakamoʼoni fuli ʼae ʼe matou maʼu, ʼe ha ai, neʼe ko te taʼu 1919 ʼae neʼe fakaʼateainaʼi ai te kau Kilisitiano fakanofo mai Papilone Lahi pea neʼe tanaki natou ki te kokelekasio kua fakamaʼa. Fakakaukauʼi age muʼa te aluʼaga ʼaeni: Hili pe te kamata ʼafio ʼo te Puleʼaga ʼo te ʼAtua ʼi te lagi ʼi te taʼu 1914, neʼe ʼahiʼahiʼi te hahaʼi ʼa te ʼAtua pea fakamaʼa mamalie mai te lotu hala. a (Vakaʼi te kiʼi nota.) (Malakia 3:1-4) Pea ʼi te taʼu 1919, neʼe hinoʼi e Sesu ia “te tagata faifekau agatonu mo poto” ke ina foaki te meʼa kai “i tona temi totonu” ki te hahaʼi ʼa te ʼAtua ʼae kua fakamaʼa. (Mateo 24:45-47) ʼI te taʼu pe ʼaia, neʼe fakaʼateainaʼi te hahaʼi ʼa te ʼAtua mai tonatou haʼisia ki Papilone Lahi ʼi hona aluʼaga fakata. (Apokalipisi 18:4) Kaʼe ko te temi fea ʼae neʼe nonofo haʼisia ai te hahaʼi ʼa te ʼAtua?
Neʼe matou fakamahino ʼi muʼa atu, neʼe kamata nonofo haʼisia te hahaʼi ʼa te ʼAtua ki Papilone Lahi ʼi te taʼu 1918 lolotoga te kiʼi temi nounou. Ko Te Tule Leʼo ʼo te ʼaho 15 ʼo Malesio 1992, neʼe ui ai, ohage pe ko te ʼave popula ʼo te kau Iselaele ki Papilone, ko te ʼu kaugana ʼa Sehova neʼe nonofo haʼisia ki Papilone Lahi ʼi te taʼu 1918. Kaʼe ʼaki te tahi ʼu fekumi, neʼe ha ai ko te hahaʼi ʼa te ʼAtua neʼe nonofo haʼisia lolotoga ni taʼu ʼi muʼa atu ʼo te taʼu 1918.
Neʼe fakakikite ia Esekiele 37:1-14, ko te hahaʼi ʼa te ʼAtua ʼe ʼave popula anai pea ʼe toe fakaʼateaina anai. ʼI te meʼa ʼae neʼe ha kia Esekiele, neʼe sio ki te vaevaeliua peʼe ko te mafa ʼe fonu ai te ʼu hui. Neʼe ui fenei e Sehova: “Ko te u hui aeni ko te fale katoa o Iselaele.” (Vaega 11) Neʼe fakaʼuhiga ki te puleʼaga ʼo Iselaele pea ki muli age neʼe fakaʼuhiga ki “te Iselaele a te Atua,” ʼae ko te kau fakanofo. (Kalate 6:16; Gaue 3:21) ʼI te meʼa ʼae neʼe ha kia Esekiele, neʼe toe maʼuʼuli ake te ʼu hui pea neʼe liliu ko he foʼi kautau. ʼAki te aluʼaga ʼaia, ʼe tou iloʼi ai pe neʼe feafeaʼi te fakaʼateaina ʼo te hahaʼi ʼa te ʼAtua mai Papilone Lahi ʼi te taʼu 1919. Kaʼe ʼe ha feafeaʼi ʼi te lea fakapolofeta ʼaia te loaloaga ʼo te nonofo haʼisia ʼa te hahaʼi ʼa te ʼAtua?
ʼUluaki, neʼe fakatokagaʼi e Esekiele ko te ʼu hui ʼo te kau mate neʼe kua “moamoa fuli.” (Esekiele 37:2, 11) Ko tona fakaʼuhiga neʼe kua fualoa te mamate ʼa te hahaʼi. Lua, neʼe sio ia Esekiele ki te fakatuʼuake mamalie ʼo te kau mate, kaʼe mole fakafokifa. Neʼe logo ki “he logoaa, pea koeni nee fai leva he gaugaue, pea nee fehohokoaki leva te u hui, o tahi pipiki ki tona tuuaga.” Pea neʼe sio ia ki “ni ua, mo he kakano.” Hili ia, neʼe ʼuʼufi leva te kakano e te kili. Ki muli age, “nee ulu leva te [“manavā,” MN] kia natou, pea nee natou toe mauuli leva.” Pea ʼi te hili ʼo tonatou fakatuʼuake, neʼe foaki age e Sehova tonatou fenua ke natou maʼuʼuli ai. Koia ko te ʼu koga fuli ʼaia neʼe ʼaoga ki ai he temi.—Esekiele 37:7-10, 14.
Ohage pe ko tona fakakikite, neʼe fualoa te nonofo popula ʼa te kau Iselaele. Neʼe kamata tanatou nonofo popula ʼi te taʼu 740 I.M.T.S. b (Vakaʼi te kiʼi nota.) ʼi te temi ʼae neʼe tonu ai ke mavae mai tonatou fenua ia te ʼu telepi ʼe hogofulu ʼo Iselaele, ʼae ko te puleʼaga ʼo te potu noleto. Ki muli age, ʼi te taʼu 607 I.M.T.S., neʼe pulihi e te kau Papilone ia Selusalemi pea neʼe tonu ai ki te tahi ʼu telepi ʼe lua, te puleʼaga ʼo te potu saute ʼo Suta, ke natou mavae ʼi tonatou fenua. Pea ʼi te taʼu 537 I.M.T.S., neʼe fakaʼateaina ai te hahaʼi ʼa te ʼAtua ʼi te temi ʼae neʼe toe liliu ai he toko siʼi ʼo te kau Sutea ʼo toe laga te fale lotu, pea mo toe fakatuʼu te tauhi kia Sehova ʼi Selusalemi.
Koia ʼe ha ʼi te ʼu fakamahino fuli ʼaia, ko te kau Kilisitiano fakanofo neʼe nonofo haʼisia ki Papilone Lahi lolotoga he temi loaloaga, kaʼe neʼe mole kamata pe ʼi te taʼu 1918 ʼo kaku ki te taʼu 1919. Neʼe toe talanoa ia Sesu ki te temi loaloaga ʼaia ʼi te temi ʼae neʼe ina ui ai ko te kau Kilisitiano loi, ʼae ko te vao kovi peʼe ko te sisania, ʼe homo fakatahi anai mo “te u foha o te puleaga,” ia te fulumeto. (Mateo 13:36-43) Lolotoga te temi ʼaia, neʼe toko siʼi pe te kau Kilisitiano moʼoni. Tokolahi neʼe natou lau ko natou ko te kau Kilisitiano, kaʼe neʼe natou tali te ʼu akonaki loi pea neʼe natou liliu ko he kau aposeta. Ko te tupuʼaga la ʼaia ʼo te ui ʼae neʼe nofo haʼisia te kokelekasio Fakakilisitiano ki Papilone Lahi. Neʼe kamata tonatou haʼisia hili te taʼu 100 H.T.S. ʼo kaku ki te temi ʼae neʼe fakamaʼa ai te fale lotu fakalaumalie ʼa te ʼAtua ʼi te ʼu ʼaho fakamuli.—Gaue 20:29, 30; 2 Tesalonika 2:3, 6; 1 Soane 2:18, 19.
Lolotoga te ʼu lauʼi taʼu ʼaia ʼe teau, ko te kau takitaki lotu mo te kau takitaki politike neʼe natou fia puleʼi te hahaʼi. Ohage la, neʼe mole natou fakagafua ki te hahaʼi ke natou maʼu peʼe ke natou lau te Tohi-Tapu ʼi he lea ʼe feala ke natou mahino ki ai. Ko ʼihi ʼae neʼe natou lau te Tohi-Tapu, neʼe tutu natou. Pea ko natou ʼae neʼe fakafeagai ki te ʼu akonaki ʼa te ʼu takitaki lotu, neʼe gaohi koviʼi. Neʼe teitei pe ke mole feala
ki he tahi hana ako te moʼoni peʼe ke ina akoʼi ki ʼihi.ʼI te meʼa ʼae neʼe ha kia Esekiele, neʼe tou toe ako mai ai ko te hahaʼi ʼa te ʼAtua neʼe fakatuʼuake pea neʼe fakaʼateainaʼi mamalie natou mai te lotu hala. Koia neʼe feafeaʼi tonatou fakaʼateainaʼi pea neʼe kamata ʼanafea? Neʼe logo ia Esekiele ki te “logoaa” pea neʼe kamata hoko te aluʼaga ʼaia ʼi ni taʼu ʼe teau ʼi muʼa ʼo te ʼu ʼaho fakamuli. Lolotoga te ʼu taʼu ʼaia, neʼe ʼi ai te hahaʼi agatonu neʼe natou fia maʼu te moʼoni pea mo tauhi ki te ʼAtua logo la te kua mafola ʼo te ʼu akonaki loi. Neʼe natou ako te Tohi-Tapu pea mo faiga malohi ke natou fakaha ki te hahaʼi te ʼu moʼoni neʼe natou ako. Ko ʼihi neʼe natou gaue kinakina ki te fakaliliu ʼo te Tohi-Tapu ki te ʼu lea ʼae neʼe mahino ki ai te hahaʼi.
Pea ʼi te teitei taʼu 1870, neʼe hage pe ia kua ʼuʼufi te ʼu hui e te kakano mo te kili. Neʼe gaue kinakina ia Charles Taze Russell mo ʼona kaumeʼa ke natou maʼu te ʼu moʼoni Fakatohi-tapu pea mo tauhi kia Sehova. Neʼe natou toe tokoni ki ʼihi ke natou mahino ki te moʼoni ʼaki Te Tule Leʼo ʼo Sione pea mo ʼihi tohi. Ki muli age, ʼi te taʼu 1914 ʼaki te “Photo-Drame de la Création,” pea ʼi te taʼu 1917 ʼaki te tohi Le mystère accompli, neʼe toe malohi ai te tui ʼa te hahaʼi ʼa Sehova. Pea ʼi te taʼu 1919 leva, ʼe hage pe neʼe toe maʼuʼuli ake tana hahaʼi pea mo natou maʼu he fenua foʼou. Talu mai ai, ko natou ʼae neʼe ʼamanaki ki te maʼuli heʼe gata ʼi te kele, neʼe natou fakatahi ki te kau fakanofo. Neʼe natou tauhi fakatahi fuli kia Sehova, ʼo natou liliu ai ko he foʼi “kau tau kaugamalie.”—Esekiele 37:10; Sakalia 8:20-23. c—Vakaʼi te kiʼi nota.
Koia ʼe ha lelei mai, neʼe nonofo haʼisia te hahaʼi ʼa te ʼAtua ki Papilone Lahi, hili te taʼu 100 ki te temi ʼo Sesu. Neʼe ko te temi ʼaia ʼae neʼe liliu ai te tokolahi ko he kau aposeta, ʼaki tanatou tali te ʼu akonaki loi pea mo tanatou liakī te moʼoni. Lolotoga ni taʼu, neʼe faigataʼa te tauhi ʼae kia Sehova, ohage pe ko te kau Iselaele ʼi te temi ʼae neʼe pilisoniʼi ai natou. Kaʼe ia ʼaho nei kua fakamafola te moʼoni ki te hahaʼi fuli pe. ʼE tou fiafia ʼaupito koteʼuhi ʼe tou maʼuʼuli ʼi te temi ʼae ʼe ‘gigila anai natou ʼae ʼe popoto.’ Pea kua feala ʼi te temi nei ki te tokolahi ke natou “fakamaa, mo fakahihina” ia natou pea ke natou tali te tauhi moʼoni.—Taniela 12:3, 10.
ʼI te faigaʼi ʼae e Satana ke ina fakahalaʼi ia Sesu, neʼe ina ʼave moʼoni koa ki te fale lotu? Pe neʼe sio koa Sesu ki te fale lotu ʼi he meʼa neʼe ha age ki ai?
ʼE mole matou iloʼi papau pe neʼe fakaha feafeaʼi e Satana te fale lotu kia Sesu.
Neʼe talanoa ia Mateo mo Luka ki te aluʼaga ʼaia ʼi te Tohi-Tapu. Neʼe ui e Mateo ‘neʼe ʼave leva e te Tiapolo’ ia Sesu ki Selusalemi pea neʼe “fakatuu i oluga o te fale tapu,” ko tona fakaʼuhiga, ʼi te potu maʼoluga ʼo te fale lotu. (Mateo 4:5) Neʼe ui e Luka neʼe “taki leva ia e te tiapolo ki Selusalemi, o fakatuu i te potu maoluga o te fale tapu.”—Luka 4:9.
ʼI muʼa atu, neʼe ui ʼi ʼatatou tohi neʼe lagi mole ʼave moʼoni e Satana ia Sesu ki te fale lotu ʼi te temi ʼae neʼe ina faigaʼi ai ke ina fakahalaʼi. ʼI Te Tule Leʼo Fakapilitania ʼo te ʼaho 1 ʼo Malesio 1961, neʼe fakatatau ai te aluʼaga ʼaia ki te faigaʼi ʼa Satana ke ina fakahalaʼi ia
Sesu, ʼaki tana fakaha age ki ai te ʼu puleʼaga fuli ʼo te malamanei mai he moʼuga maʼoluga. ʼE mole ʼi ai he moʼuga ʼe feala ai ki he tahi ke sio ki te ʼu puleʼaga fuli ʼo te malamanei. Neʼe toe ui ʼi Te Tule Leʼo, ʼo toe feia pe, neʼe lagi mole ʼave moʼoni e Satana ia Sesu ki te fale lotu. Kaʼe ki muli age, neʼe ui ʼi te ʼu alatike ʼo Te Tule Leʼo ka na pau la neʼe fakatoto ia Sesu mai te fuga fale lotu, neʼe feala pe ke mate.ʼE ui e ʼihi ko Sesu neʼe mole ko he Levite, koia neʼe mole feala ai ke tuʼu ʼi te fuga sagatualio ʼo te fale lotu. Lagi ko te tupuʼaga ʼaia ʼo tanatou ui neʼe faigaʼi e Satana ke ina fakahalaʼi ia Sesu ʼaki he meʼa neʼe ha age ki ai. ʼI ni taʼu ʼe lauʼi teau ki muʼa atu, neʼe sio mo Esekiele ki te fale lotu ʼi he meʼa neʼe ha age ki ai.—Esekiele 8:3, 7-10; 11:1, 24; 37:1, 2.
Kaʼe kapau neʼe sio pe Sesu ki te fale lotu ʼi he meʼa neʼe ha age ki ai, ʼe feala ke feʼekeʼaki fenei e ʼihi:
-
Neʼe feala koa ke fakahalaʼi moʼoni ia Sesu ke fakatoto mai te fuga fale lotu?
-
ʼI te tahi ʼu lakaga neʼe faigaʼi e Satana ke ina fakahalaʼi Sesu, ʼaki tana kole age ke ina fetogi te ʼu foʼi maka ko he ʼu pane pea ke atolasio age ia Sesu. Koia neʼe toe feala pe koa ke kole age e Satana kia Sesu ke fakatoto moʼoni mai te fuga fale lotu?
Kaʼe kapau neʼe ʼave moʼoni e Satana ia Sesu ki te fale lotu, ʼe feala ke feʼekeʼaki fenei e ʼihi:
-
Neʼe maumauʼi koa e Sesu ia te Lao ʼi tana tuʼu ʼi te fuga sagatualio ʼo te fale lotu?
-
Neʼe ʼave feafeaʼi ia Sesu ki te fale lotu ʼi Selusalemi mai te toafa?
Tou vakaʼi ʼihi fakamahino ʼe tokoni mai anai ke tou tali ki te ʼu fehuʼi ʼaia ʼe lua.
Neʼe ui e te Polofesea ko D. A. Carson, ko te kupu Fakakeleka ʼae neʼe fakaʼaogaʼi ki te kupuʼi palalau “fale tapu” ʼi te ʼu tohi ʼo Mateo mo Luka, neʼe lagi talanoa ki te fale lotu katoa, kaʼe mole ki te sagatualio ʼae ʼe feala pe ke olo ki ai te kau Levite. Ko te potu saute esite ʼo te fale lotu neʼe ʼi ai tona ʼato ʼe lafalafa pea neʼe ko te potu maʼoluga ʼaia ʼo te fale lotu. Neʼe feala pe ke tuʼu ia Sesu ʼi te fuga ʼato ʼaia. Mai te fuga ʼato ʼaia ʼo kaku ki lalo ifo ʼi te mafa ʼo Setolone, neʼe ko meta ʼe 140. Neʼe ui e te tagata faihisitolia ko Josèphe, ʼi te maʼoluga ʼaupito ʼo te potu ʼaia ʼo te fale lotu, neʼe feala pe ke “manamana” he tahi ʼe tuʼu ai mo sio ifo ki lalo. Logo la ko Sesu neʼe mole ko he Levite, kaʼe neʼe feala hana tuʼu ʼi te fuga ʼato ʼaia pea neʼe mole feala ke fakafihi he tahi ki ai.
Kaʼe neʼe ʼave feafeaʼi ia Sesu ki te fale lotu ʼi Selusalemi mai te toafa? ʼE mole matou iloʼi papau. ʼE ui mai pe ʼi te Tohi-Tapu neʼe ʼave ia Sesu ki Selusalemi. ʼE mole ui mai pe neʼe ko kilometa ʼe fia neʼe vaha ai te koga meʼa neʼe nofo ai Sesu mai Selusalemi, pe neʼe feafeaʼi te loaloaga ʼo te faigaʼi e Satana ke ina fakahalaʼi ia Sesu. Koia neʼe feala pe ke haʼele ia Sesu ki Selusalemi, tatau aipe pe neʼe lagi loaloaga tana faifagona.
ʼI te temi ʼae neʼe fakaha ai e Satana “te u puleaga fuli o te malama-nei” kia Sesu, neʼe lagi sio pe Sesu ki te ʼu puleʼaga ʼaia ʼi he meʼa neʼe ha age kia ia, koteʼuhi ʼe mole feala ke tou sisio ki te ʼu puleʼaga fuli ʼaia mai he moʼuga. Neʼe hage pe ko hatatou fakaʼaogaʼi he foʼi televisio ke tou fakaha ai ki he tahi ni pāki ʼo te ʼu potu kehekehe ʼo te malamanei. Logo la, neʼe lagi sio ia Sesu ki te ʼu puleʼaga ʼi he meʼa neʼe ha age ki ai, kaʼe neʼe loto moʼoni Satana ke tulolo ifo ia Sesu ʼo atolasio age kia ia. (Mateo 4:8, 9) Koia ʼi te ʼave ʼae e Satana ia Sesu ki te fale lotu, neʼe loto moʼoni ke tuʼutamakiʼia te maʼuli ʼo Sesu ʼaki hana fakatoto ifo mai te fuga fale lotu. Kaʼe neʼe teteke e Sesu ia Satana. ʼE mahino ia, neʼe mole he ʼuhiga ʼo te fakahalaʼi ʼo Sesu mo ka na pau la neʼe mole tuʼu moʼoni ʼi te fuga ʼato ʼo te fale lotu.
Koia neʼe feala pe ke alu moʼoni ia Sesu ki Selusalemi pea neʼe tuʼu ʼi te potu maʼoluga ʼo te fale lotu. Pea ohage pe ko tona ui ʼi te kamataʼaga ʼo te alatike ʼaeni, ʼe mole matou iloʼi papau pe neʼe fakaha feafeaʼi e Satana te fale lotu kia Sesu. Kaʼe ʼe feala hatatou tui papau neʼe faigaʼi e Satana ke fai e Sesu ia he aga ʼe kovi pea ʼi te temi ʼaia, neʼe teteke malohi e Sesu ia Satana.
a Vakaʼi Te Tule Leʼo ʼo te ʼaho 15 ʼo Sulio 2013, pasina 10-12, palakalafe 5-8, 12.
b Ko te ʼu mataʼi tohi ʼaeni I.M.T.S. ko tona fakaʼuhiga: ʼI Muʼa ʼo te Temi ʼo Sesu.
c Ia Esekiele 37:1-14 pea mo Apokalipisi 11:7-12, ʼe talanoa ai ki te aluʼaga neʼe hoko ʼi te taʼu 1919. Ko te lea fakapolofeta ʼo Esekiele 37:1-14, ʼe fakaʼuhiga ki te toe liliu ʼo te hahaʼi fuli ʼa te ʼAtua ki te tauhi moʼoni ʼi te taʼu 1919 hili tanatou nonofo haʼisia ʼi he temi loaloaga. Kaʼe ko Apokalipisi 11:7-12, ʼe fakaʼuhiga ki te toe malohi fakalaumalie ʼo te kiʼi kutuga ʼo te ʼu tehina fakanofo ʼi te taʼu 1919, ke natou takitaki te hahaʼi ʼa te ʼAtua. Neʼe mole fakagafua ki te ʼu tehina ʼaia ke natou fakahoko he gaue fakalaumalie lolotoga he temi.