KE KE fakakaukauʼi age muʼa ʼe ke haʼele ʼi te ala ʼi te poʼuli. Fokifa pe ʼe ʼi ai he tahi ʼe ina muliʼi koe. Ka ke tuʼu pea toe tuʼu mo ia. Ka ke haʼele vave, ʼe toe haʼele vave mo ia. Pea ʼe ke kamata lele ki te ʼapi ʼo hou kaumeʼa ʼe tuʼu ovi mai pe. ʼI te avahi mai ʼo te matapa e tou kaumeʼa pea mo ina fakatalitali koe ʼi tona ʼapi, ʼe ke logoʼi ai tou fimalie he ʼe ke iloʼi ʼe mole hoko anai he meʼa kia koe.

ʼE lagi heʼeki hoko kia koe he ʼaluʼaga feia. Kaʼe, ʼe lagi ʼe ʼi ai he tahi ʼu tuʼania ʼi tou maʼuli ʼe tupu ai tau mataku. Ohage la, ʼe ke faiga koa ʼo tauʼi hou vaivaiʼaga kaʼe ʼe ke haga fai pe te lakahala ʼaia? ʼE kua fualoa koa hau kumi gaue kaʼe ʼe faigataʼa? ʼE ke tuʼania koa ʼo ʼuhiga mo te vaivai matuʼa pea mo he ʼu mahaki ʼe feala anai ke ke maʼu? Peʼe ʼi ai koa he tahi age meʼa ʼe ke tuʼania ki ai?

Tatau aipe pe ʼe kotea he fihifihia ʼe tau mo koe, kaʼe ʼe lelei age ke ke maʼu hou kaumeʼa ʼe feala ke ke fakaha ki ai ʼau tuʼania pea ʼe lotolelei ke tokoni atu. ʼE ʼi ai koa hou kaumeʼa feia? ʼEi. Ohage ko tona tuʼu ia Esaia 41:8-13, ko Sehova ʼe ko hou kaumeʼa ohage pe ko tana kaumeʼa mo te tagata agatonu ko Apalahamo. ʼI te ʼu vaega 10 pea mo 13, ʼe fakapapauʼi fenei mai e Sehova kia tatou takitokotahi: “Aua naa ke mataku ki he mea, koteuhi e au nofo mo koe; aua naa ke feaveaki ni mata tuania, koteuhi ko au ko tou Atua; e au fakamalohii ia koe, e au hau o tokoni kia koe, e au taofi ia koe aki toku nima matau malo. Koteuhi ko au ko [Sehova], tou Atua, ae e ina fakamalohii tou nima matau, ae e ui atu kia koe: aua naa ke mataku ki he mea, e au hau o tokoni kia koe.”

ʼE fakalotofimalie ʼaupito te ʼu palalau ʼa Sehova. ʼAhiʼahi fakakaukauʼi age muʼa pe kotea te fakaʼuhiga ʼo te fakapapau ʼaia ʼa Sehova kia tatou. ʼE mole fakaʼuhiga ʼi te vaega ʼaia, ʼe ke haʼele ia tafa ʼo Sehova ʼo puke tona nima. Koteʼuhi kapau ʼe ke haʼele ia tafa ʼo Sehova, ʼe puke anai e Sehova ia tou nima hema ʼaki tona nima mataʼu. Kaʼe ʼe fakaʼuhiga ko Sehova ʼe ina faoʼi mai tona “nima matau malo” pea ʼe ina puke “tou nima matau.” ʼE hage pe ʼe ina tohoʼi mai koe mai he aluʼaga faigataʼa. Koia ka puke e Sehova tou nima mataʼu, ʼe ina fakalotomalohiʼi ai koe ʼaki te ʼu palalau ʼaeni: “Aua naa ke mataku ki he mea, e au hau o tokoni kia koe.”

ʼE mole koa la ko Sehova ko hau Tamai ʼofa pea mo hou Kaumeʼa? ʼE ke tui koa ʼe tokoni atu anai moka ke tau mo he ʼu aluʼaga faigataʼa? ʼE tokaga moʼoni ia Sehova kia koe pea ʼe fia tokoni atu. Ka ke felaveʼi mo he ʼu fihifihia, ʼe loto e Sehova ke ke hao mai ai. Kotea tona tupuʼaga? Koteʼuhi ʼe ʼofa mamahi ia koe. Pea ʼe ‘ko he tokoni moʼoni ʼe mole toe puli ʼi te temi ʼo te mamahi.’—Pesalemo 46:2.

Ko ʼihi ʼe faigataʼa tanatou galoʼi ʼanatou agahala ʼae neʼe natou fai ʼi muʼa atu. Pea ʼe natou feʼekeʼaki pe ʼe fakamolemole age anai te Atua kia natou. Kapau ʼe ke logoʼi te faʼahi ʼaia, manatuʼi te tagata agatonu ko Sopo. Neʼe ina fakaha te agahala ʼae neʼe ina fai ʼi tana kei tupulaga. (Sopo 13:26) Neʼe toe logoʼi e te tagata faipesalemo ko Tavite te aluʼaga ʼaia ʼi tana kole fenei kia Sehova: “Ke aua naa ke manatui te u hala o toku temi tupulaga pea mo aku agahala.” (Pesalemo 25:7) ʼI totatou ʼuhiga heʼe haohaoa, ʼe tou ‘agahala fuli pea ʼe mole tou ʼaʼu ki te kololia ʼo te ʼAtua.’—Loma 3:23.

Ko te ʼu palalau fakalotofimalie ʼae ʼe tuʼu ʼi te kapite 41 ʼo Esaia, neʼe tohi maʼa te kau Iselaele. Neʼe natou fai he ʼu agahala mamafa. Koia ʼae neʼe ui ai e Sehova ʼe ina fakatuʼa anai natou ʼo ʼave ʼaunofo ki Papilone. (Esaia 39:6, 7) Pea neʼe fakapapauʼi e Sehova ʼe ina fakaʼateainaʼi anai natou ʼae ʼe fakahemala pea mo toe liliu mai kia te ia. (Esaia 41:8, 9; 49:8) Ia ʼaho nei, ʼe toe fakaha e Sehova ia te ʼofa mo te manavaʼofa ʼaia kia natou ʼae ʼe fakahemala moʼoni pea mo fia fakafiafiaʼi tona loto.—Pesalemo 51:3.

Tou vakaʼi te faʼifaʼitaki ʼa Takuya *. Neʼe faiga ke ina tauʼi he ʼu agamahani ʼe kovi. Ohage la, ko te sioʼi ʼo he ʼu ʼata peʼe ko he ʼu pāki ʼe ʼasi ai he ʼu aga heʼe ʼaoga pea mo te palu ʼo te ʼu koga tapu. Neʼe tuʼa lahi tana to ki te agamahani ʼaia ʼe kovi. Kotea ʼae neʼe ina logoʼi? Neʼe ina ui fenei: “Neʼe au logoʼi ʼe mole kei ʼi ai hoku ʼuhiga. Kaʼe ʼi taku fakaovi kia Sehova ʼi te faikole ʼo kole tana fakamolemole, neʼe tokoni mai.” Neʼe tokoni feafeaʼi ia Sehova kia ia? Neʼe ui age e te kau tagata ʼafeā ʼo te kokelekasio ʼa Takuya ke telefoni age kia natou ʼi te temi pe ʼae ʼe toe to ai ki te agamahani ʼaia ʼe kovi. ʼE ina ui fenei: “Neʼe mole ko he aluʼaga ʼe faigafua te telefoni kia natou. Kaʼe, neʼe au maʼu tuʼumaʼu he ʼu fakalotomalohi.” Pea neʼe fai e te kau tagata ʼafeā he fakatuʼutuʼu mo te taupau ʼo te siliko ke ʼaʼahi ia Takuya. Neʼe ui fenei e te taupau ʼo te siliko kia ia: “Neʼe mole au haʼu fakafuanoa pe. Kaʼe, neʼe au haʼu he neʼe loto e te kau tagata ʼafeā. Neʼe natou toʼo te tonu ʼae ke au haʼu ʼo ʼaʼahi koe.” ʼE ui fenei e Takuya: “Neʼe au agahala kaʼe neʼe tokoni mai ia Sehova ʼaki tana fakaʼaogaʼi te kau tagata ʼafeā.” Ki muli age, neʼe taʼofi e Takuya ʼana agamahani ʼaia ʼe kovi. Neʼe liliu ʼo pionie pea ʼi te temi nei ʼe gaue ʼi te petele. Koia, ohage pe ko te tokoni ʼa te ʼAtua ki te tehina ʼaia, ʼe tokoni atu anai moka ke fai ni agahala.

Ko ʼihi ʼe natou tuʼania koteʼuhi kua natou mavae mai tanatou gaue pea ʼe mole feala ke natou toe maʼu he tahi gaue. Ke ke fakakaukauʼi age muʼa, ʼe mole ko he aluʼaga faigafua ia te maʼu vave ʼo he gaue. Koia ka hoko ki ʼihi ia he aluʼaga faigataʼa feia, ʼe natou logoʼi ʼe mole kei ʼi ai honatou ʼuhiga. ʼE tokoni feafeaʼi atu ia Sehova? ʼE mole ina foimo foaki atu aipe he gaue ʼe lelei, kaʼe ʼe feala ke tokoni atu ke ke manatuʼi te ʼu palalau ʼaeni ʼa Tavite: “Nee au tupulaga, pea kua au matua, kae e heeki au sio nee siaki te tagata agatonu, pe nee kai kolekole tona hakoga tana pane.” (Pesalemo 37:25) ʼE ke maʼuhiga ia mata ʼo Sehova. Pea ʼe ina faoʼi atu tona “nima matau malo” ke feala hau maʼu te meʼa ʼae ʼe ʼaoga kia koe ke hoko atu tau tauhi kia te ia.

Ko Sara ʼe maʼuli ʼi Colombie, neʼe sio ki te tokoni ʼa Sehova kia ia. Neʼe gaue ʼaho katoa ʼi he matani gaue ʼe fakaʼapaʼapaʼi mo iloa. Pea neʼe lahi tana foʼi falā neʼe ina maʼu. Kaʼe, neʼe loto ia ke lahi age tana  tauhi kia Sehova. Koia ʼae neʼe mavae ai ʼi tana gaue pea neʼe ina kamata toʼo te selevisi pionie. Kaʼe, neʼe faigataʼa kia ia hana maʼu he gaue koga ʼaho. Neʼe ina fakatuʼu he kiʼi fale koloa ʼe fakatau ai te ʼu sope. ʼAki te alu ʼo te temi, neʼe mole kei lahi tana foʼi falā pea neʼe tonu ke ina pupunu tona kiʼi fale koloa. ʼE ina ui fenei: “Kua fakalaka ki ai taʼu ʼe tolu, kaʼe ʼe au fakamalō kia Sehova he neʼe au lava maʼu te faʼa kataki.” Neʼe ina ako pe kotea te ʼu meʼa ʼae neʼe ʼaoga moʼoni kia ia pea ʼe feafeaʼi hana mole tuʼania ki te apogipogi. (Mateo 6:33, 34) Ki muli age, neʼe telefoni age tona patolo ʼae neʼe ʼuluaki gaue ki ai ʼo ʼuhiga mo te gaue ʼae neʼe ina fai ki muʼa atu. Neʼe ina ui ʼe ina tali anai mo kapau pe ʼe mole gaue ʼaho katoa pea ʼe feala tana kau ki te ʼu fono pea mo te ʼu fakatahi lalahi. Ia ʼaho nei, ʼe mole lahi te foʼi falā ʼae ʼe maʼu e Sara kaʼe ʼe feala hana hoko atu tana selevisi pionie. ʼE ina ui neʼe ina logoʼi ia te tokoni ʼofa ʼa Sehova lolotoga te temi faigataʼa ʼaia.

Tokolahi ʼe natou tuʼania ʼuhi ko te vaivai matuʼa pea mo tanatou kua vave letelete. Neʼe natou feʼekeʼaki pe ʼe feʼauga anai tanatou foʼi falā ke natou maʼuʼuli fimalie ai. ʼE natou toe tuʼania ʼo ʼuhiga mo te ʼu mahaki ʼe feala ke hoko anai. Neʼe ko te aluʼaga ʼaia neʼe kole fenei ai e te Hau ko Tavite kia Sehova: “Aua naa ke siaki au i toku temi matua; ka puli toku malohi, aua naa ke siaki au!”—Pesalemo 71:9, 18.

ʼE lava fakaha feafeaʼi e te hahaʼi matutuʼa tanatou falala ʼo ʼuhiga mo te ka haʼu? ʼE tonu ke natou fakamalohiʼi tanatou tui mo tanatou falala ki te ʼAtua. Koteʼuhi ʼe ina foaki age anai kia natou te ʼu meʼa fuli ʼae ʼe ʼaoga kia natou. Kaʼe, ko ihi ʼe natou koloaʼia ʼuhi he ʼe lahi ʼanatou foʼi falā. Koia ʼae ʼe ʼaoga ai ke natou ako ia te fakafaigafua ʼo tonatou maʼuli pea mo maʼuli fakafeʼauga. Neʼe mahino kia natou ʼe lelei age anai tonatou maʼuli malolo fakasino moka natou kai ‘he pa lauʼakau’ ʼi he “pipi gako.” (Taaga Lea 15:17) Kapau ʼe ke tokaga tafitō ki tau tauhi kia Sehova, ʼe tokaga anai Sehova ki te ʼu meʼa fuli ʼae ʼe ʼaoga kia koe moka ke vaivai.

Fakakaukauʼi age muʼa te faʼifaʼitaki ʼa José mo Rose. Neʼe nā tauhi kia Sehova temi katoa lolotoga taʼu ʼe 60 tupu. ʼI te temi ʼaia, neʼe nā tau mo he ʼu faigataʼaia. Neʼe tonu ke nā tokakaga ki te tamai ʼa Rose. Neʼe tonu ke tokoni ki ai ʼi te ʼaho mo te po. Pea tahi, neʼe tonu ke tafa ia José ʼuhi ko te kosea pea mo ina fai ia te chimiothérapie. Neʼe faoʼi feafeaʼi e Sehova tona nima mataʼu ki te taumatuʼa agatonu ʼaia? Neʼe ina fakaʼaogaʼi te tahi age taumatuʼa Kilisitiano. ʼE ko Tony mo Wendy. Neʼe ʼi ai hona koga fale neʼe nā fia foaki ki he ʼu pionie katoa kaʼe mole totogi. Neʼe manatuʼi e Tony ʼi tana kei ako ʼi te lise, neʼe sio ʼi te matapa fakamalama kia José mo Rose ki tanā faifakamafola tuʼumau. Neʼe leleiʼia e Tony te faʼafai ʼae neʼe nā fakaha pea neʼe malave ʼaupito kia ia. Neʼe foaki e Tony mo Wendy tona koga fale kia José mo Rose koteʼuhi neʼe nā foaki katoa tonā maʼuli ki te tauhi kia Sehova. Lolotoga te ʼu taʼu ʼe 15 kua hili, neʼe nā tokoni kia José mo Rose ʼae kua taʼu 85 ʼi te temi nei. Neʼe iloʼi e José mo Rose ko Tony mo Wendy ʼe ko he meʼa ʼofa mai ia Sehova.

Koia, ʼe fakapapau fenei atu e Sehova kia koe: “Aua naa ke mataku ki he mea, e au hau o tokoni kia koe.” ʼE ina toe faoʼi atu kia koe tona “nima matau malo.” Kaʼe ʼe feafeaʼi anai ʼo ʼuhiga mo koe? ʼE ke puke malohi anai koa tona nima?