ʼAki tana polofeta ko Esekiele, neʼe fakakikite e Sehova ʼe toe liliu anai tana hahaʼi ki te Kele ʼo Te Fakapapau pea ʼe natou logo tahi anai ohage pe he puleʼaga ʼe tahi. Neʼe toe fakakikite ko natou ʼae ʼe tauhi ki te ʼAtua ʼi te ʼu ʼaho fakamuli ʼaeni ʼe natou liliu pe anai ko he hahaʼi ʼe logo tahi.

Neʼe ui e Sehova ki tana polofeta ko Esekiele ke ina tohi ki he ʼu moʼi ʼakau ʼe lua. Neʼe ina tohi fenei ki te moʼi ʼakau: “Kia Suta mo te u fanau o Iselaele ae e kau mo ia.” Pea ko te tahi moʼi ʼakau neʼe ina tohi fenei ai: “Kia Sosefo, ko te vaa o Efalaimi, mo te fale katoa o Iselaele ae e kau mo ia.” Ko te ʼu moʼi ʼakau ʼaia ʼe lua neʼe liliu ko te ‘moʼi ʼakau pe ʼe tahi’ ʼi te ʼu nima ʼo Esekiele.—Esekiele 37:15-17.

Kotea ia te fakaʼuhiga ʼo te kupu ʼaeni “Efalaimi”? Neʼe malohi age te telepi ʼo Efalaimi ʼi te ʼu telepi ʼe hogofulu ʼo Iselaele ia te puleʼaga  ʼo te potu noleto. ʼI tona fakahagatonu, ko te ʼuluaki hau ʼae neʼe pule ki te puleʼaga ʼaia, ʼe ko Selopoamo. Neʼe haʼu mai te telepi ʼo Efalaimi. (Tetelonome 33:13, 17;1 Hau 11:26) Ko te telepi ʼaia neʼe hifo mai ia Efalaimi, ia te foha ʼo Sosefo. (Numelo 1:32, 33) Neʼe maʼu e Sosefo ia he tapuakina makehe mai tana tamai, ko Sakopo. Koia neʼe matatonu ai ke ui ko “te vaa o Efalaimi” neʼe ina fakata te ʼu telelepi ʼe hogofulu ʼo te puleʼaga ʼo te potu noleto. ʼI te taʼu 740 I.M.T.S., ʼi muʼa ʼo tona fakakikite e Esekiele, neʼe maʼu e te kau Asilia te puleʼaga ʼo Iselaele ʼo te potu noleto pea neʼe natou ʼave popula te hahaʼi. (2 Hau 17:6) ʼI ni taʼu ki muli age, neʼe malo te kau Papilone ʼi te kau Asilia. Koia, ʼi te temi ʼae neʼe tohi ai e Esekiele te lea fakapolofeta ʼo ʼuhiga mo te ʼu moʼi ʼakau ʼe lua, tokolahi ʼi te kau Iselaele ʼaia neʼe mafola ʼi te Puleʼaga katoa ʼo Papilone.

ʼI te taʼu 607 I.M.T.S., neʼe maʼu e te kau Papilone ia te ʼu telepi ʼe lua ʼo te puleʼaga ʼo Suta ʼo te potu saute pea neʼe natou ʼave te hahaʼi ki Papilone. Pea neʼe lagi natou toe ʼave mo te toega ʼo natou ʼae neʼe nonofo ʼi te puleʼaga ʼo Iselaele ʼo te potu noleto. Neʼe ʼomai te ʼu hau ʼo te puleʼaga ʼo te potu saute mai te telepi ʼo Suta. Neʼe toe maʼuʼuli mo te ʼu pelepitelo ʼi Suta koteʼuhi neʼe natou tauhi ʼi te fale lotu ʼo Selusalemi. (2 Koloniko 11:13, 14; 34:30) Koia neʼe matatonu ai ke ui ko te moʼi ʼakau ʼae “kia Suta” neʼe ina fakata te ʼu telepi ʼe lua ʼo te puleʼaga ʼo te potu saute.

Ko te temi fea ʼae neʼe fakatahiʼi ai te ʼu moʼi ʼakau ʼe lua? Neʼe hoko te aluʼaga ʼaia ʼi te taʼu 537 I.M.T.S., ʼi te temi ʼae neʼe toe liliu ai ia te ʼu fakafofoga ʼo te ʼu puleʼaga ʼo te potu saute mo te potu noleto ki Selusalemi mai tanatou ʼaunofo, ʼo toe fakatuʼu te fale lotu. Koia neʼe mole kei vaelua te puleʼaga ʼo Iselaele. Pea neʼe toe tauhi fakatahi te kau Iselaele. (Esekiele 37:21, 22) Neʼe toe fakakikite ia te logo tahi ʼaia e te ʼu polofeta ko Esaia pea mo Selemia.—Esaia 11:12, 13; Selemia 31:1, 6, 31.

Kotea ʼae neʼe fakakikite e te polofeta ko Esekiele ʼo ʼuhiga mo te tauhi maʼa? ʼE faiga anai ia Sehova ke ‘logo tahi’ ia natou fuli ʼae ʼe tauhi age kia te ia. (Esekiele 37:18, 19) ʼE hoko moʼoni koa te fakapapau ʼaia ia ʼaho nei? ʼEi. Neʼe kamata hoko te lea fakapolofeta ʼi te taʼu 1919. ʼI muʼa ʼo te taʼu ʼaia, neʼe faiga tuʼumaʼu ia Satana ke vaelua te hahaʼi ʼa te ʼAtua. Kaʼe ʼaki te alu ʼo te temi, ʼi te taʼu 1919, neʼe toe fakatuʼutuʼu pea mo toe fakatahiʼi.

ʼI te temi ʼaia, tokolahi ʼi te hahaʼi ʼa te ʼAtua neʼe natou maʼu te ʼamanaki ʼae ke natou liliu ko he ʼu hau mo he ʼu pelepitelo ʼi te lagi fakatahi mo Sesu. (Apokalipisi 20:6) Neʼe natou fakata ia te moʼi ʼakau ʼae kia Suta. Kaʼe, neʼe ʼi ai ʼihi hahaʼi neʼe natou maʼu te ʼamanaki ʼae ke natou maʼuʼuli heʼe gata ʼi te kele. Pea ʼaki te alu ʼo te temi, neʼe kaugā malie ia natou ʼae neʼe natou maʼu te ʼamanaki ʼaia. (Sakalia 8:23) Neʼe natou fakata ia te moʼi ʼakau ʼae kia Sosefo.

Ia ʼaho nei, ko te ʼu kutuga ʼaia ʼe lua ʼe nā tauhi fakatahi kia Sehova. Pea ko tonatou Hau pe ʼe tahi, ʼe ko Sesu Kilisito. ʼI te lea fakapolofeta ʼa Esekiele, ʼe ui ai ʼo ʼuhiga mo Sesu ʼe ko “taku tagata faifekau ko Tavite.” (Esekiele 37:24, 25) Neʼe faikole fenei ia Sesu ki tana Tamai ʼo ʼuhiga mo ʼana tisipulo: “Ke natou logo tahi fuli, ohage pe ko koe Tamai ʼe ke logo tahi mo au, pea ʼe au logo tahi mo koe.” * (Vakaʼi te kiʼi nota.) (Soane 17:20, 21, MN) Neʼe toe fakakikite e Sesu ko tana kiʼi faga ovi, ia te kau tisipulo fakanofo, ʼe natou liliu anai ko he “faga ovi e tahi” fakatahi mo tana ‘tahi ʼu ovi.’ Pea ʼe natou mulimuli fuli anai ʼi “he tauhi ovi e tahi.” (Soane 10:16) Ohage pe ko tona fakakikite e Sesu, ia ʼaho nei ko te hahaʼi fuli ʼa te ʼAtua ʼe natou logo tahi, tatau aipe pe ʼe ʼamanaki ʼihi ki te maʼuli ʼae ʼi te lagi peʼe ʼi te kele.