Ke Ke Lototoʼa Heʼe Nofo Ia Sehova Mo Koe

“Ke ke fakamalohi mo ke loto toa . . . Koteuhi ko [Sehova], tou Atua, e nofo mo koe.”—SOS. 1:9.

KOTEA TAKOTOU TALI?

Kotea ʼae neʼe tonu ke fai e Sosue ke feala ke haga malohi ia tana tui pea mo lototoʼa?

Ko te ʼu faʼifaʼitakiʼaga fea ʼo te lototoʼa ʼe kotou leleiʼia?

Kotea te ʼu faʼifaʼitakiʼaga ʼo te tui pea mo lototoʼa ʼe feala ke tokoni atu ke kotou haga faifakamafola?

1, 2. (1) Kotea anai te ʼu kalitate ʼae ka tokoni mai anai ke tou lava tauʼi ia te ʼu fihifihia? (2) Kotea te tui? Tuku mai he faʼifaʼitaki.

 ʼE FAKAFIAFIA ia te tauhi ʼae kia Sehova. Kaʼe ʼe tou tau fuli mo he ʼu fihifihia. ʼE lagi tou mamahi ʼuhi ko tatatou fia fai ia te meʼa ʼae ʼe lelei. (1 Pet. 3:14; 5:8, 9; 1 Ko. 10:13) Kapau ʼe tou fia katakiʼi ia te ʼu fihifihia ʼaia, ʼe ʼaoga kia tatou te tui mo te lototoʼa.

² Kotea te tui? Neʼe tohi fenei e te ʼapositolo ko Paulo: “Io, ko te tui e ko he iloi papau o te u mea e amanaki ki ai, ko he fakamooni o te u mea e mole sio ki ai.” (Hep. 11:1) ʼE tou toe lau fenei ʼi te tahi age Tohi-Tapu: “Ko te tui ʼe ko he pepa fakamoʼoni ʼo he ʼu meʼa ʼe tou fakaʼamu ki ai. Ko te tui ʼe ko he fakamoʼoni ki te ʼu meʼa ʼe mole tou sisio ki ai.” (The Simple English Bible) Ko he “pepa fakamoʼoni” ʼe ko he pepa ʼe ina fakamoʼoni he meʼa ʼa kita. Mai tona aluʼaga ʼae ʼe tou tui ʼe fakahoko tuʼumaʼu e te ʼAtua ʼana fakapapau, ʼe hage neʼe kita maʼu ia he “pepa fakamoʼoni.” Koia, ʼe tou tui papau ai, ʼe fakahoko anai e Sehova ʼana fakapapau pea ko meʼa fuli ʼe tou maʼu ʼi tana Folafola ʼe moʼoni tatau aipe peʼe “mole tou sisio ki ai.”

3, 4. (1) Kotea te lototoʼa? (2) Kotea ʼae ʼe feala ke tou fai moʼo fakatuputupu ia tatatou tui pea mo tatatou lototoʼa?

³ ʼAki ia te lototoʼa, ʼe tou lava palalau pea ʼe mole tou matataku moka hoko he aluʼaga faigataʼa pea mo fakatupu tuʼutamaki. ʼAki ia te lototoʼa, ʼe tou toe loto fimalie pea mo tou lotomalohi tatau aipe peʼe tonu ke tou mamahi ʼuhi ko te meʼa ʼae ʼe tou tui kiai.—Mko. 6:49, 50; 2 Tim. 1:7.

⁴ ʼE lagi tou fakaʼamu fuli ke tou maʼu ʼo lahi age ia te tui pea mo te lototoʼa. ʼE talanoa ʼi te Tohi-Tapu ki te ʼu faʼifaʼitaki lelei ʼo ʼuhiga mo te tui pea mo te lototoʼa ʼo te toko lauʼi afe ʼo te ʼu kaugana ʼa te ʼAtua. Kapau ʼe tou fakakaukauʼi lelei ia te ʼu faʼifaʼitaki ʼaia, pea ʼe feala ke tuputupu ia te ʼu kalitate ʼaia ia tatou.

 NEʼE NOFO IA SEHOVA MO SOSUE

5. Kotea ʼae neʼe ʼaoga kia Sosue ke feala ai hana liliu ko he takitaki lelei?

⁵ Tou fakakaukauʼi age muʼa te aluʼaga neʼe hoko kua hili ki ai taʼu ʼe 3 500. Kua taʼu 40 ia te kua fakaʼateaina e Sehova ia te toko lauʼi miliona kau Iselaele mai Esipito. Neʼe taki natou e te polofeta ko Moisese. ʼI tona taʼu 120, neʼe hake ki te Moʼuga ʼo Nepo ʼo sio ki te Kele ʼo te Fakapapau. Pea neʼe mate ai ʼi te fuga moʼuga. Pea neʼe ko Sosue ʼae neʼe ina hoko atu ia te taki ʼo te kau Iselaele, neʼe ko he tagata “nee fonu . . . i te Laumalie o te poto.” (Tet. 34:1-9) Neʼe ʼamanaki maʼu e te kautau ʼo Iselaele ia te fenua ko Kanaane. Neʼe ʼaoga kia Sosue ia te poto fakaʼatua, mo te tui, mo te lototoʼa, pea mo te falala ke feala ai hana liliu ko he takitaki lelei.—Tet. 31:22, 23.

6. (1) Ohage ko tona ui ia Sosue 23:6, ʼe ʼaoga ki tea ia te lototoʼa? (2) Kotea te ako ʼe tou maʼu mai ia Gaue 4:18-20 pea mo Gaue 5:29?

⁶ Neʼe tau ia te kau Iselaele lolotoga he ʼu taʼu ke feala hanatou maʼu ia te fenua ʼo Kanaane. Pea neʼe natou lotomalohi ʼuhi ko te poto, mo te lototoʼa pea mo te tui ʼae neʼe fakaha e Sosue. Neʼe mole ʼaoga pe kia natou ia te lototoʼa ke feala hanatou olo ʼo tau, kaʼe ke feala hanatou fakalogo ki te ʼAtua. ʼI muʼa pe ʼo te mate ʼa Sosue, neʼe ina ui fenei kia natou: “Ke koutou tokaga o tauhi i okotou loto katoa pea mo fai te u mea fuli ae e tuu i te tohi lao a Moisese, ke aua naa kotou he ki te fahai matau pee ko te fahai hema.” (Sos. 23:6) E toe ʼaoga mai kia tatou ia te lototoʼa ke tou fakalogo kia Sehova ʼi te temi fuli pe, tafitō la moka ʼe fakaneke tatou e ʼihi ke tou fai he meʼa ʼe mole alutahi mo te finegalo ʼo te ʼAtua. (Lau ia Gaue 4:18-20; 5:29.) Kapau ʼe tou kole ia te takitaki ʼa Sehova pea mo falala ki ai, ʼe tokoni mai anai ke tou maʼu ia te lototoʼa ʼae ʼe ʼaoga kia tatou.

ʼE KOTOU LAVA FAKALILIU FEAFEAʼI TOKOTOU ALA KE “MANUIA”?

7. Kotea ʼae neʼe tonu ke fai e Sosue ke feala hana lototoʼa pea mo fua manuʼia tona maʼuli?

⁷ Ke feala hatatou maʼu ia te lototoʼa ʼae ʼe ʼaoga moʼo fai ia te finegalo ʼo te ʼAtua, ʼe tonu ke tou ako tana Folafola pea mo maʼuliʼi ʼana tokoni. Ko te faʼahi ʼaia neʼe fakatotonu e Sehova kia Sosue ke ina fai ʼi te temi ʼae neʼe ina fetogi ai ia Moisese, ʼi tana ui fenei: “Kehe pe ke ke fakamalohi, mo ke loto toa lahi, o agatonu ki te lao katoa ae nee au tuku kia Moisese, taku tagata faifekau.” Pea ina toe ui fenei: “Ke aua naa mamao mai tou gutu te tohi aeni o te lao; kae ke ke metitasio ki ai i te aho mo te pouli, o tupu ke ke agatonu ki te u mea fuli e tuu i ai; koteuhi e ke manuia anai i ou ala, koia e ke poto ai anai.” (Sos. 1:7, 8) Neʼe fua manuʼia te maʼuli ʼo Sosue, koteʼuhi neʼe mulimuli ki te tokoni ʼaia. Kapau ʼe tou fai feia, ʼe tuputupu anai tatatou lototoʼa pea ʼe fua manuʼia anai tatatou tauhi ʼae ki te ʼAtua.

8. Kotea ia te vaega Fakatohi-tapu ʼo te taʼu 2013? ʼE tokoni feafeaʼi atu anai ia te ʼu palalau ʼaia kia koutou?

⁸ Pea neʼe toe ui fenei e Sehova kia Sosue: “Ke ke fakamalohi mo ke loto toa? Aua naa ke mataku, pea aua naa ke loto vaivai, koteuhi ko [Sehova], tou Atua, e nofo mo koe i te u kogamea fuli ae e ke alu ai anai.” (Sos. 1:9) ʼE toe nofo ia Sehova mo tatou. Tatau aipe peʼe kotea te ʼu fihifihia ʼe tou tau mo ia, kaʼe ʼe mole tonu ke tou matataku. ʼE maʼuhiga kia tatou ia te ʼu palalau ʼaeni: Ke ke lototoʼa pea mo malohi . . . ko Sehova tou ʼAtua ʼe nofo mo koe. Ko te ʼu palalau ʼae ʼe tuʼu ia Sosue 1:9, MN, ʼe ko te vaega  Fakatohi-tapu ʼaia ʼo te taʼu 2013. Koia ʼi te taʼu ʼaeni ʼe fakalotomalohiʼi anai tatou e te ʼu palalau ʼaia neʼe fai e Sehova kia Sosue pea mo te ʼu faʼifaʼitaki ʼo ʼihi atu, neʼe natou fakaha ia tanatou tui pea mo tanatou lototoʼa.

NEʼE NATOU FILIFILI ʼAKI HE LOTOTOʼA KE NATOU FAI TE FINEGALO ʼO TE ʼATUA

9. Neʼe fakaha feafeaʼi e Laape ia te tui pea mo te lototoʼa?

⁹ ʼI te fekauʼi e Sosue ia te ʼu malomu e toko lua ki te fenua ko Kanaane, neʼe fakanono naua e te fafine faiaga ko Laape pea neʼe ina lohiʼi te kau solia ʼa te hau. ʼI te temi ʼae neʼe maumauʼi ai e te kau Iselaele ia te kolo ʼo Seliko, neʼe haofaki ia Laape pea mo tona famili, ʼuhi ko tana tui pea mo tana lototoʼa. (Hep. 11:30, 31; Sakp. 2:25) ʼE mahino ia, neʼe fetogi e Laape ia tona faʼahiga maʼuli ʼafeā ke feala hana fakafiafia ia te loto ʼo Sehova. Ko ʼihi neʼe tonu ke natou maʼu ia te tui pea mo te lototoʼa ke feala hanatou fetogi ʼonatou maʼuli ke leleiʼia natou e te ʼAtua pea mo liliu ko he kau Kilisitiano.

10. Ko te aluʼaga fea neʼe filifili ai e Lute ke tauhi kia Sehova? Pea neʼe tapuakina feafeaʼi ia ia e Sehova?

¹⁰ ʼI te hili ʼo te temi ʼo Sosue, neʼe tupu ia te fafine Moape ko Lute. Neʼe lagi ina iloʼi ia Sehova he neʼe ʼohoana mo te tagata Iselaele. Pea neʼe lototoʼa ʼo tauhi kia Sehova. Neʼe maʼuli ia Naomi, te faʼe ʼo tona ʼohoana ʼi Moape, pea ʼi te mate ʼo te ʼohoana ʼo Naomi pea mo ʼanā tama, neʼe ina fakatuʼutuʼu ke toe liliu ki Petelehemi, te kolo ʼo Iselaele. ʼI tanā faifagona, neʼe ui age e Naomi kia Lute ke toe liliu ki tona kolo, pea neʼe fakafisi ki ai ia Lute. Neʼe ui fenei e Lute: “E liliu anai tau hahai ko taku hahai, pea e liliu anai tou Atua ko toku Atua.” (Lute 1:16) ʼAki te temi, neʼe ʼohoana leva ia Lute pea mo Poase, te tagata mai te famili ʼo Naomi. Neʼe maʼu tanā tamasiʼi, ʼae ki muli age neʼe hifo mai ai ia te hau ko Tavite pea mo Sesu. ʼE mahino ia, ʼe tapuakina e Sehova ia natou ʼae ʼe tui mo lototoʼa.

NEʼE NATOU TALI KE TUʼUTAMAKIʼIA ʼONATOU MAʼULI

11. Neʼe fakaha feafeaʼi e Seosata pea mo Sosepa ia tanā lototoʼa? Pea neʼe iku ki tea?

¹¹ ʼE malohi tatatou tui pea mo tou lototoʼa mo kapau ʼe tou tokagaʼi ʼe nofo ia Sehova mo natou ʼae ʼe natou fakahoko ia tona finegalo pea mo puipui ʼonatou tehina. Ohage la, ko te Pelepitelo Lahi ko Seosata pea mo tona ʼohoana ko Sosepa. ʼI te hili ʼo te mate ʼo te Hau ko Akasia, neʼe matematehi e tana faʼe ko Atalia, ia te ʼu tamaliki ʼa te hau, kaʼe hao ia Soasi pea mo heka ia ki te tuʼulaga hau. Logo la neʼe fakatupu tuʼutamaki kia Seosata mo Sosepa, kaʼe neʼe nā fufū ia Soasi, te foha ʼo Akasia lolotoga taʼu ʼe ono. ʼI te fitu taʼu, neʼe fakanofo hau e Seosata ia Soasi, pea neʼe ina fakatotonu ke matehi ia Atalia. (2 Hau 11:1-16) Pea ki muli age, neʼe tokoni ia Seosata ki te Hau ko Soasi ki te toe faʼu ʼo te fale lotu. Neʼe mate ia Seosata ʼi tona taʼu 130 pea neʼe tanu fakatahi ia ia mo te ʼu hau “koteuhi nee ina fai te mea ae e lelei i Iselaele, ki te Atua mo tona fale.” (2 Klk. 24:15, 16) ʼUhi pe ko te lototoʼa ʼa Seosata pea mo tona ʼohoana, neʼe hao ia te famili ʼae ʼe hifo mai ai te Mesia.

12. Neʼe fakaha feafeaʼi e Epeti-Meleke ia tana lototoʼa?

¹² Neʼe tuʼutamakiʼia te maʼuli ʼo Epeti-Meleke, ʼae neʼe ko he tagata kaugana ʼo te fale ʼo te Hau ko Setesiasi, ke feala hana haofaki ia Selemia. Neʼe ui e te ʼu tama ʼaliki ʼo Suta ki te hau ʼe fakalotovaivaiʼi e Selemia ia te kau solia pea mo te hahaʼi. Neʼe fakagafua e te hau kia natou ke natou fai ia te meʼa ʼae ʼe natou loto ki ai ʼo ʼuhiga mo Selemia. Koia la ʼae neʼe natou li ai ia Selemia ki te foʼi tane ʼe fonu pela, ʼo natou tuku ke mate ai. (Sel. 38:4-6) Neʼe kole age e Epeti-Meleke ki te Hau ko Setesiasi ke tokoni kia Selemia. Neʼe fakatupu tuʼutamaki ia te aluʼaga ʼae neʼe fakahoko e Epeti-Meleke, he neʼe hahaʼi ia natou ʼae neʼe fehihiʼa kia Selemia. Neʼe tali lelei ia Setesiasi pea neʼe ina ui kia Epeti-Meleke ke ina toʼo ia he ʼu tagata ʼe toko 30 ke natou olo ʼo toʼo ia Selemia ki tuʼa mai te foʼi  tane. ʼAki ia Selemia, neʼe fakapapau e te ʼAtua ʼe mole matehi anai ia Epeti-Meleke ʼi te temi ʼae ka tauʼi ai anai e te kau Papilone ia Selusalemi. (Sel. 39:15-18) ʼE fakapale e te ʼAtua ia natou ʼae ʼe natou lototoʼa ʼo fai ia tona finegalo.

13. Neʼe fakaha feafeaʼi e te ʼu Hepeleo ʼe toko tolu ia tanatou lototoʼa? Pea kotea te ako ʼe tou taʼofi mai ai?

¹³ ʼI te ʼu taʼu ʼe 600 ʼi muʼa ʼo te temi ʼo Kilisito, neʼe fakapale e te ʼAtua ʼana kaugana Hepeleo ʼe toko tolu ʼuhi ko tanatou tui pea mo tanatou lototoʼa. Neʼe fakatotonu e te Hau ko Nepukatenesale ki te kau tagata maʼu tuʼulaga ʼo Papilone ke natou fakatahitahi pea mo tauhi ki te toe fakatata ʼaulo lahi. Ko ʼae ka talagataʼa anai ki te fakatotonu ʼaia ʼe li anai ki te gutuʼumu kakaha. Neʼe ui fenei e te ʼu Hepeleo ʼe toko tolu ʼaki he aga fakaʼapaʼapa kia Nepukatenesale: “Ko tomatou Atua ae e matou tauhi ki ai, e feala anai ke ina haofaki matou mai te gutuumu kakaha, pea e ina haofaki anai matou mai tou nima, oi aliki hau! Kapau e kailoa, ke ke iloi, oi aliki hau, e mole matou tauhi anai ki ou atua, pea e mole matou atolasio anai ki te fakatata aulo ae nee ke fakatuu.” (Tan. 3:16-18) Ia Taniela 3:19-30, ʼe fakamatala ai pe neʼe feafeaʼi ia te haga ʼa Sehova ʼo haofaki ia te ʼu Hepeleo ʼe toko tolu. ʼE lagi mole tutu anai tatou ʼi he afi, kaʼe ʼi ʼihi temi ʼe tonu ke tou fakalogo ki te ʼAtua ʼi he ʼu aluʼaga ʼe faigataʼa ʼaupito. Tou tui papau ʼe tapuakina anai tatou e Sehova mo kapau ʼe tou fakaha tatatou tui pea mo tatatou lototoʼa.

14. Ia Taniela kapite 6, neʼe fakaha feafeaʼi e Taniela ia tana lototoʼa pea kotea tona ikuʼaga?

¹⁴ Neʼe fakalotoʼi e te ʼu fili ʼo Taniela ia te Hau ko Taliusi ke ina fai he fakatuʼutuʼu kovi ʼo ʼuhiga mo ia. Neʼe natou ui fenei ki te hau: “Ko te tagata ae, i te lolotoga o te u aho e tolugofulu, e faikole anai ki he atua kehe pee ko he tagata kehe, e si anai ia ia ki te luo o te u laione; e gata tahi pe kia koe, oi hau, e faikole anai ki ai.” Neʼe fakaha e Taniela ia tana tui pea mo tana lototoʼa ʼi te aluʼaga ʼaia. ʼI te temi pe ʼae neʼe ina iloʼi ai kua fai ia te lao, “nee alu leva ia ia ki tona fale; pea nee ina avahi leva te u matapa fakamalama o te kogafale i fata ki te fahai o Selusalemi. Pea nee tua tolu i te aho nee tuutuli ia ia o faikole mo fakavikiviki ki tona Atua, o hage ko tana fai mahani i mua atu.” (Tan. 6:6-10) Neʼe li ai ia Taniela ki te luo ʼo te ʼu laione. Kaʼe neʼe haofaki ia ia e Sehova.—Tan. 6:16-23.

15. (1) Neʼe fakaha feafeaʼi e Akilasi pea mo Pelesila ia tanā tui pea mo tanā lototoʼa? (2) Kotea ʼae ʼe tou mahino ki ai ʼo ʼuhiga mo te ʼu palalau ʼae neʼe fai e Sesu ia Soane 13:34? Neʼe fakaha feafeaʼi e te tokolahi ʼo te kau Kilisitiano ia te taʼi ʼofa ʼaia?

¹⁵ ʼE ui ʼi te Tohi-Tapu, neʼe tuʼutamakiʼia te maʼuli ʼo Akilasi mo Pelesila moʼo haofaki ia Paulo. (Gaue 18:2; Loma 16:3, 4) Neʼe nā lototoʼa pea neʼe nā mulimuli ki te fakatotonu ʼaeni ʼa Sesu: “E au foaki atu kia koutou he fekau foou:  Kotou feofaaki ia koutou; o hage ko au, nee au ofa ia koutou, ko koutou anai, koutou feofaaki ia koutou.” (Soa. 13:34) Neʼe fakatotonu ʼi te Lao ʼa Moisese ki te tagata fuli ke tahi ʼofa ki tona kaiga ohagē ko tana ʼofa kia ia totonu. (Lev. 19:18) Kaʼe he ko ʼe ʼe ui ʼe “foou” ia te fakatotonu ʼa Sesu? Heʼe ʼaki ia te fakatotonu ʼa Sesu, ʼe tonu ke tou lotolelei ke tou foaki totatou maʼuli maʼa ʼihi ohage ko tana fai. Tokolahi te kau Kilisitiano neʼe natou fakaha ia tonatou ʼofa moʼo haofaki ʼonatou tehina ke ʼaua naʼa gaohi koviʼi peʼe matematehi natou e ʼonatou fili.—Lau ia 1 Soane 3:16.

16, 17. Neʼe ʼahiʼahiʼi feafeaʼi ia te tui ʼo ʼihi ʼo te kau ʼuluaki Kilisitiano? Kaʼe ʼe feafeaʼi ki te kau Kilisitiano ʼo totatou temi?

¹⁶ Ohage ko Sesu, neʼe tauhi ʼateaina pe ia te kau ʼuluaki Kilisitiano kia Sehova. (Mat. 4:8-10) Neʼe mole natou fia tutu ia te iseso moʼo fakamaʼuhigaʼi ia te hau Loma. (Vakaʼi te paki.) Neʼe tohi e Daniel P. Mannix ʼi tana tohi Those About to Die neʼe ʼi ai te ʼaletale ʼe mu tuʼumau ai te afi moʼo faisakilifisio ʼi te malaʼe faigaoʼi. Neʼe ina tohi neʼe tonu pe ki te kau pilisoni ke natou tutu ia te iseso pea mo hoki foaki age kia natou he pepa fakamoʼoni kua fakaʼateaina natou. Neʼe fakamahino age ki ʼae neʼe pilisoni kapau ʼe ina fai ia te faʼahi ʼaia, ʼe mole ko he fakaha ia ʼo he faʼahiga tauhi ki te hau. Kaʼe neʼe tonu pe ia ki te tagata pilisoni ke ina fakaʼuhiga ia te hau Loma ko he ʼatua. Kaʼe logo la te faʼahi ʼaia, tokosiʼi te kau Kilisitiano neʼe natou tali ia te faʼahi ʼaia ke feala honatou fakaʼateaina.

¹⁷ Neʼe maʼu e te kau Kilisitiano ʼae neʼe pilisoniʼi ʼi te ʼu lotoʼa fakamamahi ʼo te kau Nasi ia te ʼu fealagia ke fakaʼateaina natou pea mo natou hao mai te mate. Ko te meʼa pe neʼe tonu ke natou fai ko te fakamoʼoni ki he pepa ʼe mole natou toe tauhi anai kia Sehova. Kaʼe tokosiʼi neʼe natou fakahoko ia te faʼahi ʼaia. Lolotoga te tau ʼae neʼe hoko ʼi Rwanda, neʼe tuʼutamakiʼia te maʼuli ʼo te ʼu tehina Tutsi pea mo Hutu ke feala ke natou fehaofakiʼaki. ʼE ʼaoga ki te hahaʼi ʼa te ʼAtua ia te lototoʼa pea mo te tui ʼi te taʼi ʼu aluʼaga ʼaia.

KOTOU MANATUʼI, ʼE NOFO IA SEHOVA MO TATOU

18, 19. Kotea te ʼu faʼifaʼitaki ʼi te Tohi-Tapu ʼo te ʼu hahaʼi tui pea mo lototoʼa ʼe feala ke tokoni mai ke tou haga faifakamafola?

¹⁸ ʼE tou maʼu ia te fealagia ʼae ke tou fakamafola ia te logo lelei ʼo te Puleʼaga pea mo fai ni tisipulo. Ko te toe gaue pe ʼaia neʼe foaki e Sehova ki ʼana kaugana ʼi te kele. (Mat. 24:14; 28:19, 20) ʼE tou loto fakafetaʼi ki te faʼifaʼitaki haohaoa ʼo Sesu. “Nee alu leva ia Sesu ki te u kolo lalahi mo te u kolo liliki, o akonaki te folafola pea mo fakaha te logo lelei o te puleaga o te Atua.” (Luka 8:1) Ohage ko ia, ʼe ʼaoga ke tou maʼu ia te tui pea mo te lototoʼa moʼo fakamafola ia te Puleʼaga. ʼAki te tokoni ʼa te ʼAtua, ʼe feala ke tou lototoʼa ohage ko Noe. Neʼe ko “te tagata faiakonaki aena o te faitotonu” neʼe maʼuli ʼi “he malama o ni tagata agahala” ʼae ka ʼamanaki pulihi ʼi te tulivio.—2 Pet. 2:4, 5.

¹⁹ ʼE tokoni mai ia te faikole ke tou haga faifakamafola. Ko ʼihi ʼi te ʼu tisipulo ʼa Sesu neʼe fakatagaʼi, neʼe natou faikole ke feala hanatou haga hoko atu tanatou “fakaha [te] folafola i te malohi katoa” pea neʼe tali ʼanatou kole. (Lau ia Gaue 4:29-31.) Kapau ʼe kotou matataku ʼi te faifakamafola ʼi te ʼu ʼapi, kotou faikole kia Sehova ke ina foaki atu ʼo lahi ia te tui pea mo te lototoʼa, pea ʼe tokoni atu anai.—Lau ia Pesalemo 66:19, 20. *

20. Kotea ʼae ʼe feala ke tokoni mai ʼi totatou ʼuhiga kaugana ʼa Sehova?

²⁰ ʼE mole faigafua ia te hoko atu ʼo te fai ʼo te finegalo ʼo te ʼAtua ʼi te malama agakovi ʼaeni. Kaʼe ʼe mole tou to tokotahi. ʼE nofo ia te ʼAtua mo tatou. ʼE toe tokoni mai ia tona ʼAlo, te Pule ʼo te kokelekasio. ʼE tou toe maʼu ia Fakamoʼoni ʼa Sehova ʼe toko 7 000 000 tupu ʼi te malamanei katoa. Koia, tou haga fakaha ia te tui pea mo tou fakamafola ia te logo lelei. ʼE tokoni mai anai ia te vaega Fakatohi-tapu ʼo te taʼu 2013 ke tou fai ia te faʼahi ʼaia: “Ke ke fakamalohi mo ke loto toa . . . Koteuhi ko [Sehova], tou Atua, e nofo mo koe.”—Sos. 1:9.

[Nota]

[ʼU fehuʼi ʼo te ako]

[Fakamatala ʼo te pāsina 8]

Tatatou vaega Fakatohi-tapu ʼo te taʼu 2013: “Ke ke fakamalohi mo ke loto toa . . . Koteuhi ko [Sehova], tou Atua, e nofo mo koe.”—Sosue 1:9

[Paki ʼo te pāsina 10]

Neʼe fakafisi ia te kau ʼuluaki Kilisitiano ke natou tauhi ki te hau Loma