Neʼe Fua Lelei Ia Te ʼu Faifakaafe ʼAe Neʼe Fakatuʼutuʼu Lelei

Ko Maria Isabel, ʼe ko he kiʼi kaugā fagona tupulaga ʼe faʼafai ʼi te faifakamafola, ʼe maʼuli ʼi te kolo ko San Bernardo ʼo te fenua ko Chili, ʼi Amelika Saute. Ko ia mo tona famili, ʼe natou palalau ʼi te lea ʼo te kau Mapuche, te telepi ʼo te fenua ko Chili. Neʼe fiafia ia te famili katoa ʼi tanatou tokoni ki te kiʼi kokelekasio foʼou ʼaia ʼi te lea ʼo te kau Mapuche, pea ʼe toe higoa ia te lea ʼaia ko te Mapudungun.

ʼI te temi ʼae neʼe fakaha ai ʼe fai anai ia te ʼAho Fakamanatu ʼo te mate ʼo Kilisito ʼi Mapudungun, pea neʼe kua ta ia pepa fakaafe ʼe 2 000 ki te ʼAho Fakamanatu ʼi tanatou lea, neʼe ina uga ai ia Maria Isabel ke ina fai hana fakatuʼutuʼu. Kotea tana fakatuʼutuʼu? Neʼe ina manatuʼi ia te faʼifaʼitaki ʼo ʼihi kau tupulaga Kilisitiano neʼe natou fiafia ʼi tanatou faifakamafola ki ʼonatou kaugā ako pea mo ʼanatou kau faiako. Neʼe palalau mo ʼana matuʼā ʼo ʼuhiga mo tana fakatuʼutuʼu, pea mo natou tonu tahi ke fakakaukauʼi e Maria Isabel ia he faʼahiga fakatuʼutuʼu moʼo tufa ia te ʼu pepa fakaafe ʼi te fale ako. Kotea ia te fakatuʼutuʼu ʼae neʼe ina fakaha age ki ʼana matuʼā?

ʼUluaki, neʼe kole e Maria Isabel ki te kau takitaki ʼo te fale ako peʼe feala ke ina pulusi ia te pepa fakaafe ʼi te huʼaga ʼo te fale ako. Neʼe natou lotolelei ki ai pea neʼe natou fakamalō age ki ai ʼo ʼuhiga mo tana fakatuʼutuʼu. ʼI te tahi uhu, neʼe palalau ia te pule ʼo te fale ako ʼi te mikolo ʼo te fale ako ʼo ʼuhiga mo te pepa fakaafe.

Pea neʼe kole e Maria Isabel ke ina ʼaʼahi ia te ʼu kalasi fuli. ʼI te temi ʼae neʼe tali lelei ai e te kau faiako, neʼe ina fakalavelave ʼi te ʼu kalasi peʼe ʼi ai he ʼu Mapuche. ʼE ina ui fenei: “ ʼI taku manatu, ʼe lagi maʼu ʼi te fale ako he toko 10 peʼe ko he toko 15 ʼo te kau Mapuche, kaʼe neʼe hahaʼi age ia, ʼo au tufa ai ia pepa fakaafe ʼe 150.”

“KI TANA MANATU KO HE TAHI KUA MATUʼA”

ʼI te sio ʼa te fafine ki te pepa fakaafe ʼae neʼe pulusi ʼi te huʼaga ʼo te fale ako, neʼe ina fakalavelave peʼe ko ai ʼae ʼe feala ke ina fakamahino age ia te pepa fakaafe ʼaia. Neʼe punamaʼuli ʼi tona taki ki te kiʼi taʼahine kei taʼu hogofulu. Neʼe ui fenei e Maria Isabel mo tana kata: “Ki tana manatu ko he tahi kua matuʼa.” ʼI te hili ʼo tana foaki age ki te fafine ia tona pepa fakaafe pea mo te ʼu fakamahino, neʼe kole age e Maria Isabel ia tona tuʼasila ke feala hana alu age mo ʼana matuʼā ke natou palalau ki te Puleʼaga ʼo te ʼAtua. Neʼe fiafia ia te toko 20 ʼo te ʼu tehina mo tuagaʼane ʼae ʼe natou faifakamafola ʼi te lea ʼo te kau Mapuche ʼi tanatou sisio ki te fafine ʼaia pea mo te toko 26 ʼo te kau Mapuche neʼe natou ʼomai ki te ʼAho Fakamanatu. Kua liliu ʼi te temi nei ko he kiʼi kokelekasio ʼe tuputupu ʼi te faʼahi fakalaumalie.

Tatau aipe peʼe kotou taʼu fia, ʼe feala koa ke kotou fakatuʼutuʼu ke kotou fakaafe ʼokotou kaugā ako, mo ʼokotou kaugā gaue ki he ʼAho Fakamanatu, ki he akonaki ki te kaugā malie, peʼe ki he fakatahi fakatisitilike? He ko ʼe ʼe mole kotou fai he ʼu fekumi ʼi ʼatatou tohi Fakatohi-tapu ke feala hakotou maʼu he ʼu faʼifaʼitaki ʼo ʼuhiga mo te faʼahi ʼaia? Kotou kole ia te laumalie maʼoniʼoni ʼo Sehova ke tokoni atu ke kotou maʼu ia te lototoʼa ke kotou lava palalau ʼo ʼuhiga mo ia. (Luka 11:13) Kapau ʼe kotou fai ia te faʼahi ʼaia, ʼe kotou punamaʼuli anai pea mo lotomalohi ʼi te fua lelei ʼo takotou gaue ʼuhi neʼe kotou fakatuʼutuʼu lelei.